شمیم آرا ، اردو فلموں کی صف اول کی اداکارہ اور ایک کامیاب ہدایتکارہ بھی تھی۔۔!

ایک دبلی پتلی ، نازک اندام حسینہ ، پچاس کے عشرہ کے وسط میں بھارت سے کراچی اپنے عزیز و اقارب سے ملنے آئی اور ہمیشہ کے لیے یہیں کی ہو کر رہ گئی تھی۔ ہدایتکار نجم نقوی نے اسے فلم کنواری بیوہ (1956) میں پہلی بار ہیروئن لیا تھا۔ فلم انارکلی (1957) میں شمیم آرا کو میڈم نورجہاں کے ساتھ ایک ثانوی کردار میں دیکھا گیا تھا جبکہ فلم راز (1959) میں وہ مسرت نذیر کے ساتھ سائیڈ ہیروئن تھی۔ فلم رات کے راہی (1960) میں شمیم آرا کو لہری کے مقابل سیکنڈ ہیروئن کے رول میں پیش کیا گیا تھا۔ تقریباً ڈیڑھ درجن فلموں میں مختلف کرداروں کے بعد شمیم آرا کو فلم سہیلی (1960) سے بریک تھرو ملا تھا جس میں اس پر پہلا سپر ہٹ گیت فلمایا گیا تھا "کہیں دو دل جو مل جاتے ، بگڑتا کیا زمانے کا۔۔" فلم قیدی (1962) میں فیض احمد فیض کی مشہور زمانہ نظم "مجھ سے پہلی سی محبت میرے محبوب نہ مانگ۔۔" بھی شمیم آرا پر فلمائی گئی تھی۔ فلم فرنگی (1964) میں یہ گیت "بن کے میرا پروانہ ، آئے گا اکبر خانا ، کہہ دوں کی دلبر جاناں ، پہ خیر راغلے۔۔" بھی شمیم آرا پر فلمایا گیا تھا۔ اس گیت میں "خوش آمدید" کا پشتو ترجمہ "پہ خیر راغلے" زبان زدعام ہوا تھا۔ کاش ، ہمارے ہاں ایک زبان کو مسلط کرنے کی بجائے سبھی علاقائی زبانوں کے روزمرہ بول چال کے ایسے جملوں کو عام کیا جاتا تو شاید اتنی تنگ نظری نہ ہوتی۔ نہ بنگلہ دیش بنتا اور نہ ہی ملک میں علاقائی ، نسلی ، لسانی اور گروہی تعصبات اتنے شدید ہوتے بلکہ ملکی یکجہتی میں اضافہ ہی ہوتا اور ایک دوسرے کے قریب آنے کا بہتر موقع ملتا۔

شمیم آرا کی مسعودرانا کے ساتھ پہلی فلم فیشن (1965) تھی جس میں اس کے لیے دو تھیم سانگ گائے گئے تھے لیکن ان کی سب سے یادگار فلم نائیلہ (1965) تھی جس کے سبھی سپر ہٹ گیتوں میں سے سب سے زیادہ مقبول گیت "دور ویرانے میں ایک شمع ہے روشن کب سے ، کوئی پروانہ ادھر آئے تو کچھ بات بنے۔۔" تھا جو شمیم آرا اور سنتوش پر فلمایا گیا تھا اور کیا خوب فلمایا گیا تھا۔ ایک خوابناک ماحول ، خوبصورت اداکاری اور دلکش آوازیں ، ایک مکمل فلمی نشہ تھا۔ پاکستانی فلموں میں بہت کم دوگانے اس میعار کے گائے گئے ہیں۔ حمایت علی شاعر کے بول اور ماسٹر عنایت حسین کی شاہکار دھن پر مسعودرانا کے ساتھ مالا کی آواز ایک جادوئی اثر رکھتی تھی۔ لڑکپن میں کوپن ہیگن کے ساگا سینما کی سلور سکرین پر دیکھی گئی تمام فلموں میں سے یہ سب سے یادگار فلم تھی جو کبھی نہیں بھلا سکا۔ معروف ناول نگار رضیہ بٹ کے ناول "نائیلہ" کو انھی دنوں پڑھا تھا۔ یقیناً ہدایتکار شریف نیر نے اس ناول کی جو تمثیل فلم نائیلہ کی صورت میں بنائی تھی ، وہ اس سے بہتر نہیں ہو سکتی تھی اور نہ ہی ناول کے کردار سلورسکرین کے کرداروں سے بہتر ہو سکتے تھے۔

فلم میرے محبوب (1966) میں بھی شمیم آرا اور درپن پر ایک دوگانا فلمایا گیا تھا "کلی مسکرائی جو گھونگھٹ اٹھا کے ، خد کی قسم تم بہت یاد آئے۔۔" خلیل احمد کی موسیقی میں اس گیت میں پہلی بار مسعودرانا کے ساتھ میڈم نورجہاں کا ساتھ تھا۔ اسی فلم میں مسعودرانا کے دو رومانٹک گیت "سامنے رشک قمر ہو تو غزل کیوں نہ کہوں۔۔" اور "تم سا حسین ، کوئی نہیں ، کائنات میں۔۔" بھی شمیم آرا کے لیے ہی گائے گئے تھے۔ 1973ء کی فلم خواب اور زندگی میں شمیم آرا کے ساتھ وحیدمراد تھے اور ان پر مسعودرانا اور رونالیلیٰ کے اس گیت کو دوبار فلمایا گیا تھا "کل بھی تم سے پیار تھا مجھ کو ، تم سے محبت آج بھی ہے۔۔" اےحمید کی دھن پر اس فلم میں مسعودرانا کا ایک انتہائی دلکش گیت "اک سانولی سی لڑکی ، میرے دل کو بھا گئی ہے۔۔" ایکسپریشن کا ایک لاجواب شاہکار تھا جو نہ صرف شمیم آرا کے لیے گایا گیا تھا بلکہ اس گیت میں شمیم آرا کا نام بھی لیا گیا تھا۔

شمیم آرا کے فنی کیرئر کی ایک بہت بڑی فلم لاکھوں میں ایک (1967) بھی تھی جو ہندو مسلم محبت کے احساس موضوع پر بنائی گئی تھی۔ یہ ہر لحاظ سے ایک اعلیٰ پائے کی فلم تھی جس کا ہر شعبہ قابل تعریف تھا خصوصاً موسیقی ٹاپ کلاس تھی۔ موسیقار نثار بزمی نے خاص طور پر میڈم نورجہاں سے سدابہار گیت گوائے تھے جن میں "چلو اچھا ہوا ، تم بھول گئے۔۔" پہلا پہلا گیت ہے جو میرے ذہن پر نقش ہے اور اس میں شمیم آرا پہلی اداکارہ تھی جس کی معصوم شکل کبھی نہیں بھلا سکا۔

شمیم آرا کی ایک اور یادگار فلم صاعقہ (1968) بھی تھی جس کی خاص بات یہ تھی کہ بطور فلمساز ایک درجن فلموں میں سے یہ شمیم آرا کی پہلی فلم تھی۔ پلے بوائے (1978) اور مس ہانگ کانگ (1979) دیگر اہم ترین فلمیں تھیں۔

شمیم آرا نے بطور ہدایتکارہ بھی دو درجن سے زائد فلمیں بنائی تھیں جن میں مندرجہ بالا دو فلموں کے علاوہ منڈا بگڑا جائے (1995) جیسی سپر ہٹ فلم بھی شامل ہے جو لاہور میں ڈائمنڈجوبلی کرنے والی پہلی اردو فلم ثابت ہوئی تھی۔ بطور ہدایتکارہ آخری فلم منا بھائی (2004) تھی۔ شمیم آرا نے بطور اداکارہ صرف دو پنجابی فلموں جائیداد (1959) اور تیس مار خان (1989) میں کام کیا تھا۔ اس آخری فلم میں مسعودرانا کا ایک تھیم سانگ تھا "نچدی عوت دی چادر نوں ، کردے لیراں لیراں ، ہوووو۔۔"

(9 اردو گیت ... 0 پنجابی گیت )