اداکارہ نغمہ ، پنجابی فلموں کی سپر سٹار ہیروئن تھی۔۔!

نغمہ کو پہلی بار فلم رانی خان (1960) میں ایک چھوٹے سے رول میں دیکھا گیا تھا۔ بطور ہیروئن پہلی فلم چوہدری (1962) تھی جس میں اس کی جوڑی اداکار اکمل کے ساتھ تھی۔ اس فلم کی فرسٹ ہیروئن لیلیٰ تھی جس کی جوڑی فلم کا ٹائٹل رول کرنے والے مزاحیہ اداکار آصف جاہ کے ساتھ تھی۔ فلم کی کامیابی کے باوجود نغمہ کو اپنا مقام بنانے کے لیے خاصی جدوجہد کرنا پڑی تھی۔

اس دور میں پنجابی فلموں میں نیلو ، لیلیٰ اور شیریں نامور فلمی ہیروئنیں تھیں جبکہ اردو فلموں میں صبیحہ خانم ، نیر سلطانہ ، نیلو ، شمیم آراء اور زیبا مقبول اداکارائیں تھیں۔

نغمہ کا ابتدائی دور

نغمہ کو ایک درجن فلموں میں ثانوی کردار کرنے کے بعد فلم انسپکٹر (1964) میں مزاحیہ اداکار نذر کے مقابل ہیروئن کے طور پر پیش کیا گیا تھا لیکن اردو فلموں میں اسے پذیرائی نہیں مل سکی تھی۔ اس کی بطور ہیروئن واحد کامیاب اردو فلم دیا اور طوفان (1969) تھی۔

اسی سال کی پنجابی فلم ہتھ جوڑی (1964) نے نغمہ کو صف اول کی ہیروئن بنا دیا تھا۔ اس فلم میں نذیر بیگم کا گایا ہوا اور بابا چشتی اور حزیں قادری کا شاہکار گیت "تھوڑا تھوڑا چن ویکھیا۔۔" پہلا سپر ہٹ گیت تھا جو نغمہ پر فلمایا گیا تھا۔

نغمہ کے عروج کا دور

نغمہ نے اپنے ہیروئن شپ کے انتہائی عروج کے سات سالہ دور یعنی 1968ء سے 1974ء تک کل سو فلموں میں کام کیا تھا جو چودہ پندرہ فلمیں سالانہ کی اوسط ہے۔ 1972ء میں نغمہ نے بیس فلموں میں کام کیا تھا جس سے اس کی مقبولیت کا اندازہ لگایا جا سکتا ہے۔

اس دور میں نغمہ ، فردوس کے ساتھ پنجابی فلموں کی صف اول کی ہیروئن تھی اور ان دونوں میں یہ فیصلہ کرنا مشکل ہوتا تھا کہ زیادہ مقبول ہیروئن کون تھی۔ رانی اور روزینہ دیگر مقبول ہیروئنیں تھیں ، نیلو ، لیلیٰ اور شیریں فلمی دنیا کو خیر آباد کہہ چکی تھیں جبکہ سلونی ، عالیہ ، رخسانہ ، زمرد ، ناہید اور غزالہ دیگر نامور معاون اداکارائیں تھیں۔

نغمہ کے زوال کا دور

1974ء کے بعد نغمہ زوال پذیر ہوئی اور اس کی جگہ آسیہ ، سنگیتا ، ممتاز اور نجمہ نے لے لی تھی۔ فلم انڈسٹری میں پچھلے ساٹھ سال سے موجود ہونے اور ہیروئن کے علاوہ معاون اداکارہ کے طور پر ساڑھے تین سو سے زائد فلموں میں کام کر چکی ہے۔ اس کی اب تک کی آخری ریلیز شدہ فلم فیصلہ گجر دا (2018) تھی۔

نغمہ کی جوڑی حبیب کے ساتھ سے بڑی مقبول ہوئی تھی جس کے ساتھ اس نے فلمساز اور کیمرہ میں اکبر ایرانی کے بعد شادی بھی کی تھی اور اس کی ایک بچی کی ماں بھی بنی تھی۔ سدھیر ، اکمل اور اعجاز کے ساتھ بھی نغمہ کو بہت پسند کیا گیا تھا۔

نغمہ ، بچپن کی حسین یاد

نغمہ ، میرے بچپن کی حسین فلمی یادوں میں سے ایک حسین یاد ہے۔ سات آٹھ سال کی عمر میں جب سلور سکرین پر فلم دیکھتے تھے تو وہ کوئی جادوئی سا عمل ہوتا تھا جو ذہن پر ہمیشہ کے لیے نقش ہو جاتا تھا۔ پنجاب میں زیادہ تر پنجابی فلمیں ہی چلتی تھیں ، اس لیے پنجابی فلمی فنکاروں کا اثر زیادہ ہوتا تھا۔

میں نے نغمہ کی پہلی فلم انورا (1970) دیکھی تھی جو ایک فارمولا ٹائپ پنجابی فلم تھی جس کا ٹائٹل رول اس وقت کے مقبول ترین اداکار ساون نے کیا تھا۔

کراچی میں ، جہاں بڑی بڑی پنجابی فلمیں سلورجوبلی بھی بڑی مشکل سے کرتی تھیں وہاں یہ فلم مسلسل 75 ہفتے چل کر پلاٹینم جوبلی کر گئی تھی ۔ اس کی بڑی وجہ اس فلم کے سٹریٹ سانگ "سن وے بلوری اکھ والیا۔۔" کے دوران نغمہ کے خوبصورت جسم پر سجنے والا دلکش مغربی لباس اور وہ سٹیپس تھے جنھوں نے فلم بینوں کی نیندیں حرام کر دی تھیں۔ اسی فلم کے ایک گیت "میرا پیار نہ دلوں بھلاویں۔۔" کے دوران بھی فلم بینوں کی ساری توجہ نغمہ کی ریشمی شرٹ پر ہوتی تھی۔

نغمہ نے اپنے ہیروئن شپ کے دور میں اپنے جسم کا خاص خیال رکھا تھا اور انجمن یا ممتاز کی طرح فربہ نہیں ہوئی تھی۔

نغمہ کی چند خاص خاص فلمیں

پنجابی فلموں میں عام طور پر ہیروئن کا مصرف ناچنا ، گانا اور ہیرو کا دل لبھانا ہوتا تھا ، اداکاری کے جوہر دکھانے کا موقع کم ہی ملتا تھا۔ نغمہ کے ساتھ بھی کچھ ایسا ہی ہوا تھا لیکن چند فلمیں ایسی تھیں جن میں نغمہ کی کردارنگاری یادگار تھی۔

فلم بابل دا ویہڑا (1968) میں اولاد نرینہ سے محروم ایک شخص کی چھ بیٹیاں ہیں جن کی غربت کی وجہ سے شادی نہیں ہو پارہی۔ نغمہ نے ایک باحیا بیٹی کے رول میں متاثر کن اداکاری کی تھی۔ خاص طور پر حبیب پر فلمائے ہوئے مسعودرانا کے گیت "کلی کلی نہ جاویں مٹیارے۔۔" کے دوران نغمہ کی اداکاری کمال کی تھی۔

فلم مکھڑا چن ورگا (1969) میں بھی نغمہ نے اپنی جذباتی اداکاری سے فلم بینوں کو رلا دیا تھا۔ ایسا ہی ایک منظر فلم خان چاچا (1972) میں تھا جب میڈم نورجہاں کے اس دلکش گیت "دھیاں تے دھن پرایا وے بابلا۔۔" میں نغمہ نے حقیقت کا رنگ بھر دیا تھا۔

فلم سجن بے پرواہ (1972) میں بھی نغمہ کی کردارنگاری عروج پر تھی ۔ اس فلم میں ایک باپ اپنے بیٹے کی زندگی کے لیے اپنی بیٹی کی قربانی دیتا ہے لیکن وہی بھائی اپنی بہن کے لیے جان ہتھیلی پر رکھ دیتا ہے۔ اس فلم میں میڈم نورجہاں کے اس شوخ گیت "دل کملا ، دل جھلا۔۔" میں نغمہ کی بے خودی اور ادائیں کمال کی تھیں جو کبھی مجھے بھی بڑا بے چین رکھتی تھیں اور وہ ویڈیو دیکھنے کی بڑی خواہش رہتی تھی۔

نغمہ کے لیے مسعودرانا کے گیت

نغمہ کے پس منظر میں مسعودرانا کا پہلا گیت ایک دوہا تھا جو فلم ڈولی (1965) میں فلمایا گیا تھا "رب دا سچا بندہ اوخو ، جہیڑا کم کسے دے آوے ، سجن ہووے پاویں دشمن ، سب دا درد ونڈاوے۔۔"

یہ ایک طرح سے غیب کی آواز ہوتی تھی جو فلمی کرداروں کی رہنمائی کرتی تھی اور سننے والوں پر بڑا گہرا اثر کرتی تھی۔

ایسا ہی ایک یادگار گیت فلم بدلے دی اگ (1985) میں تھا "رل گئی اک مجبور۔۔"

فلم خونی شعلے (1992) میں ایک ڈبل ورژن گیت "تو میری زندگی۔۔" اردو اور پنجابی زبانوں میں الگ الگ گایا اور فلمایا گیا تھا۔

مسعودرانا کے متعدد سپر ہٹ گیت نغمہ کے لیے گائے گئے تھے جن میں فلم بھریا میلہ (1966) میں اکمل کے لیے "سجناں نے بوہے اگے چک تن لئی۔۔" ، فلم جگری یار (1967) میں بھی اکمل کے لیے "دل کولوں پچھ پہلاں اکھاں نوں منا نی۔۔" ، فلم تیرے عشق نچایا (1969) میں اعجاز کے لیے "بن کے سوہنیاں دی سرکار۔۔" ، فلم بھائی چارہ (1970) میں حبیب کے لیے "صدقے میں جاواں انہاں توں۔۔" ، فلم اچی حویلی (1971) میں حبیب ہی کے لیے "اچی لمی کونج جئی مٹیار ملے۔۔" اور فلم جٹ دا قول (1971) میں یوسف خان کے لیے "نی جان والیے ، تینوں میں سنائی نئیوں گل دل والی نی۔۔" وغیرہ شامل ہیں۔

نغمہ کے لیے مسعودرانا کے دو گانے

مسعودرانا کے گائے ہوئے دو درجن دوگانے بھی نغمہ پر فلمائے گئے تھے جن میں فلم کھیڈن دے دن چار (1966) "ٹری ٹری جانی ایں نی غصے غصے ہو کے۔۔" ایک بڑا منفرد کلاسیکی انداز کا دوگانا تھا۔

فلم جانی دشمن (1968) کا دوگانا "دن چہ پے جائے رات وے ماہیا۔۔" بھی بڑا عجیب گیت تھا کہ جو مالا نے المیہ اور مسعودرانا نے طربیہ انداز میں گایا تھا۔ اس فلم میں ملکہ ترنم نورجہاں کا یہ سپر ہٹ گیت "میں چھج پتاسے ونڈاں۔۔" بھی نغمہ پر فلمایا گیا تھا۔

فلم نکے ہندیاں دا پیار (1969) کا دلکش دوگانا "دل دے کے تے نسیئے نہ۔۔" بھی کیا کمال کا گیت تھا۔ یہ وجاہت عطرے کی پہلی فلم تھی جس میں نغمہ پر میڈم نورجہاں کا یہ شاہکار گیت بھی فلمایا گیا تھا "آندا تیرے لئی ریشمی رومال۔۔" یہ گیت سن کر مجھے اپنے پاس محفوظ وہ ریشمی رومال یاد آجاتا ہے جو ایک حسینہ نے رومانٹک اشعار سے کڑھائی کر کے اپنی محبت کی یاد کے طور پر دیا تھا۔

فلم تیرے عشق نچایا (1969) میں ہدایتکار نے فلم کے کلائمکس میں میڈم نورجہاں اور مسعودرانا کے الگ الگ گائے ہوئے گیت "تیرے عشق نچایا کر کے تھیا تھیا۔۔" کو مکس کرکے پیش کیا تھا جس سے عام فلم بینوں کو یہی گمان ہوتا تھا کہ یہ ایک دوگانا ہے۔ اس گیت کی فلمبندی میں نغمہ نے زبردست اداکاری کی تھی۔ اسی فلم کا گیت "عشقے دی کوک سن کے ، کوئی اتر پہاڑوں آیا۔۔" ایک بڑے کمال کا گیت تھا جسے کبھی میں بار بار دیکھتا اور سنتا تھا۔

فلم ات خدا دا ویر (1970) نغمات کے لحاظ سے ایک بہت بڑی فلم تھی جس میں نغمہ پر میڈم کے تین شاہکار گیت فلمائے گئے تھے "جدوں ہولی جئی لینا میرا ناں۔۔" ، "ماہی میریا روند نہ ماریں ، میں داہ لایا جند جان جا۔۔" اور "گندلاں دا ساگ تے مکھناں مکئی۔۔" اس فلم کا دوگانا "دو جوانیاں ، ملیاں تے پیاں پکاراں پیار دیاں۔۔" بھی ایک اعلیٰ پائے کا گیت تھا جو نغمہ اور حبیب پر فلمایا گیا تھا اور جسے رونا لیلیٰ اور مسعودرانا نے گایا تھا۔ اسی فلم میں مسعودرانا کے اقبال حسن پر فلمائے ہوئے ایک خوبصورت رومانٹک سولو گیت "سونہہ تیری روپ تیرا ، چن دا دیدار اے۔۔" کے ریکارڈنگ ورژن میں بول کچھ اس طرح سے تھے "سونہہ تیری روپ تیرا ، رب دا دیدار اے۔۔"

نغمہ پر فلمائے ہوئے چند سپر ہٹ گیت

نغمہ پر بڑی تعداد میں سپر ہٹ گیت فلمائے گئے تھے جن کی ایک فہرست ملاحظہ فرمائیں:

• تھوڑا تھوڑا چن ویکھیا ، بہتا رہ گیا گھٹاں دے اولے۔۔ (گلوکارہ نذیر بیگم ، فلم ہتھ جوڑی 1964)
• میں چھج پتاسے ونڈاں ، اج قیدی کر لیا ماہی نوں۔۔ (گلوکار ملکہ ترنم نورجہاں ، فلم جانی دشمن 1967)
• جدا دل ٹٹ جائے ، جدی گل مک جائے ، جنوں چوٹ لگے ، او جانے۔۔ (گلوکارہ نسیم بیگم ، فلم میراویر 1967)
• جدوں تیری دنیا توں پیار ٹر جائے گا۔۔ (گلوکار ملکہ ترنم نورجہاں ، مہدی حسن ، فلم سسی پنوں 1968)
• تیرے عشق نچایا ، کر کے تھیا تھیا۔۔ (گلوکار مسعودرانا ، ملکہ ترنم نورجہاں ، فلم تیرے عشق نچایا 1969)
• اللہ دی سونہہ ، تو نئیں دسدا۔۔ (گلوکارہ ملکہ ترنم نورجہاں ، فلم سو دن چور دا (1969)
• چھپ جاؤ تاریو ، پا دیو انھیر اوئے ، اساں اس رات دی۔۔ (گلوکارہ نسیم بیگم ، فلم لنگوٹیا 1969)
• بن گئے پھل گلاب دے ، اج گوریاں بانہواں۔۔ (گلوکارہ ملکہ ترنم نورجہاں ، فلم مکھڑا چن ورگا 1969)
• تیری اکھ دا نئیں جواب ، بلیاں کھڑیاں سرخ گلاب۔۔ (گلوکار مسعودرانا ، نسیم بیگم ، فلم مکھڑا چن ورگا 1969)
• آندا تیرے لئی ریشمی رومال۔۔ (گلوکارہ ملکہ ترنم نورجہاں ، فلم نکے ہندیاں دا پیار 1969)
• سن وے بلوری اکھ والیا ، اساں دل تیرے نال لا لیا۔۔ (گلوکارہ ملکہ ترنم نورجہاں ، فلم انورا 1970)
• میرا پیار نہ دلوں بھلاویں ، میرے سوہنیا سجناں۔۔ (گلوکارہ ملکہ ترنم نورجہاں ، فلم انورا 1970)
• جدوں ہولی جئی لیناں میرا ناں۔۔ (گلوکارہ ملکہ ترنم نورجہاں ، فلم ات خدا دا ویر 1970)
• تیرے خواب تے خیال رہندے ، میرے نال نال۔۔ (گلوکارہ ملکہ ترنم نورجہاں ، فلم ڈیرہ سجناں دا 1970)
• اکھیاں دے موتیاں دی ٹٹ گئی اے مالا۔۔ (گلوکارہ ملکہ ترنم نورجہاں ، فلم بھائی چارہ 1970)
• وعدہ کر کے مکرے جہیڑا ، سجن نئیں او ویری اے۔۔ (گلوکارہ ملکہ ترنم نورجہاں ، فلم اچی حویلی 1970)
• ایناں پھل کلیاں دی محفل وچ ، او الہڑ جئی خوشبو نئیں۔۔ (گلوکارہ مالا ، فلم مستانہ ماہی 1971)
• منڈا شہر لاہور دا ، میرے دل تے تیر چلاوے۔۔ (گلوکارہ ملکہ ترنم نورجہاں ، فلم اصغرا 1971)
• دھیاں دے دھن پرایا وے بابلا۔۔ (گلوکارہ ملکہ ترنم نورجہاں ، فلم خان چاچا 1972)
• ادھی راتوں ڈھل گئی رات ، وے بے ایماناں۔۔ (گلوکارہ ملکہ ترنم نورجہاں ، فلم خان چاچا 1972)
• دلدار صدقے ، لکھ وار صدقے ، تیرا کرم ہویا۔۔ (گلوکارہ ملکہ ترنم نورجہاں ، فلم سلطان 1971)
• اک اک شے چناں ، تیرے لئی سجائی اے۔۔ (گلوکارہ ملکہ ترنم نورجہاں ، فلم سدھا رستہ 1974)
• مکھ تیرا چناں ، کناں پیارا لگدا اے۔۔ (گلوکار ملکہ ترنم نورجہاں ، مہدی حسن ، فلم سدھا رستہ 1974)
• جا اج تو میں تیری ، تو میرا ، سجناں وے۔۔ (گلوکارہ ملکہ ترنم نورجہاں ، فلم یار مستانے 1974)
• دلدارا ، دلدارا ، تیرا ایک اشارہ ۔۔ (گلوکار مالا ، منیر حسین ، فلم ہار گیا انسان 1975)

پنجابی فلموں کی عظیم جوڑی ، نغمہ اور حبیب

(2 اردو گیت ... 24 پنجابی گیت )