پاکستان کی فلمی تاریخ میں بڑے بڑے مزاحیہ اداکاروں میں سے ایک بہت بڑا نام اداکار ننھا کا تھا۔۔!

ایک بینک کلرک سے شوقیہ سٹیج اداکار بنے۔ 1965ء میں پاکستان ٹیلی ویژن پر 'الف نون' کی مشہور زمانہ ڈرامہ سیریل میں 'ننھا' کے نام سےمعروف ہوئے۔ پہلی فلم وطن کا سپاہی (1966) میں ایک اہم رول ملا۔ اس فلم میں ان پر دو گیت بھی فلمائے گئے تھے جن میں سے ایک اعظم چشتی ، نسیم بیگم ، شوکت علی ، آئرن پروین اور ساتھیوں کی آوازوں میں ایک نعتیہ کلام تھا

• یا نبی سلام علیک ، یا رسول سلام علیک۔۔

جبکہ دوسرا ایک مزاحیہ گیت تھا

• اپنی ہوگئی شادی ، ملی پھولوں کی شہزادی۔۔

احمدرشدی اور آئرن پروین کی آوازیں تھیں۔

ننھا کی جدوجہد کا دور

ننھا کو اپنے ابتدائی دور میں چھوٹے موٹے کردار ملتے تھے۔ اپنے موٹاپے، معصوم شکل و صورت ، چہرے کےغیر معمولی تاثرات اور جگت بازی سے مزاح پیدا کرنے کی کوشش کرتے تھے۔

اس دور میں بڑے بڑے مزاحیہ اداکاروں میں رنگیلا ، منورظریف ، لہری ، نرالا ، خلیفہ نذیر اور زلفی ، بڑے نام تھے۔ فلم انسانیت (1967) میں پہلی بار علی اعجاز کے ساتھ نظرآئے جو ان کی سات درجن مشترکہ فلموں میں سے پہلی فلم تھی۔ اس فلم میں ان پر ایک مزاحیہ گیت فلمایا گیا تھا

• تیرا میرا پیار دیکھ کے سارا زمانہ جلتا ہے۔۔

ساتھی اداکارہ رضیہ تھی جو وقت کی مقبول ترین مزاحیہ اداکارہ تھی۔ یہ گیت بھی آئرن پروین اور احمدرشدی کا گایا ہوا تھا جو مزاحیہ گیتوں کے آئیڈیل گلوکار ہوتے تھے۔

ننھا اور مسعودرانا کا ساتھ

ننھا پر سب سے زیادہ گیت مسعودرانا کے گائے ہوئے فلمائے گئے تھے جن میں سے پہلا گیت فلم لالہ رخ (1968) میں تھا

• دنیا تو جھکی ہے میرے یار کے آگے۔۔

ننھا کے چند یادگار کردار

اس مزاحیہ گیت میں بھی آئرن پروین ساتھی گلوکارہ تھی۔

فلم سنگدل (1968) میں ننھا کا تکیہ کلام "منطق کی رو سے۔۔" بڑا مقبول ہوا تھا۔ فلم ٹیکسی ڈرائیور (1970) ، شاید پہلی فلم تھی جس میں ننھا کو ایک کامیڈین کا بھر پور رول ملا تھا۔ فلم ات خدا دا ویر (1970) جیسی شاہکار نغماتی فلم میں ننھا نے ایک حجام کا رول کیا تھا۔ اس دور کی پنجابی فلموں میں مزاحیہ اداکاروں کو معاشرے کے مختلف طبقات کی نمائندگی کرتے ہوئے دکھایا جاتا تھا جو فلم بینوں کے لیے بڑی دلچسپی کا باعث ہوتا تھا۔

فلم چاندسورج (1970) میں مسعودرانا اور ملکہ ترنم نورجہاں کا گایا ہوا ایک روایتی رومانٹک گیت

• وہ زمین اور ہو ، آسمان اور ہو۔۔

بھی ننھا اور نیلوفر نامی اداکارہ پر فلمایا گیا تھا۔ فلم بابل (1971) میں ننھا کا بے ہوش ہونے اور جوتا سونگھانے پر ہوش میں آنا بڑا پسند کیا گیا تھا۔ فلم ضدی (1972) میں ننھا کی منورظریف کے ساتھ کامیڈی بڑی پسند کی گئی تھی۔ اس دوران ننھا نے رنگیلا اور منورظریف کو ہیرو بنتے ہوئے دیکھااور ان کی متعدد فلموں میں ثانوی کردار بھی کیے۔ فلم دورنگیلے (1972) ، ایک بہت بڑی فلم تھی جس میں ننھا نے رنگیلا کے استاد کا رول کیا تھا جس کا تکیہ کلام ہوتا ہے "کاکے میں گیٹس ہیں۔۔"

فلم نوکرووہٹی دا (1974) میں منورظریف ، فلم سٹوڈیو میں داخل ہونے کے لیے ننھا کی منت و سماجت کرتے ہوئے کہتے ہیں "ننھا صاحب ، اللہ نے آپ کو بڑی عزت دی ہے۔۔" اس پر ننھا کا برجستہ جواب ہوتا ہے "تم کیا چھیننے آئے ہو۔۔؟" رنگیلا اور منورظریف کی بطور ہیرو مصروفیات اور بطور مزاحیہ اداکار عدم دستیابی کی وجہ سے ننھا کو بہت سی فلموں میں مین کامیڈین کی حیثیت حاصل ہوگئی تھی۔

ننھا کا پہلا ٹائٹل رول

ننھا کو پہلی بار فلم ماجھا ساجھا (1975) میں ٹائٹل رول ملا تھا ، ساتھی اداکار علی اعجاز تھے۔ دو پاگل نوجوانوں کے کردار میں ان دونوں نے حقیقت کا رنگ بھردیا تھا۔ فلم پیار کا موسم (1975) میں ننھا کی جوڑی صاعقہ کے ساتھ تھی اور سیکنڈپیئر کے طور پر منورظریف اور ممتاز کے ساتھ یہ کورس گیت گاتے ہوئے نظر آتے ہیں

• گوری کی اداؤں سے بہار چھلکے ، ہائے رے نگاہیں ارے توبہ ، نگاہوں سے بہار چھلکے۔۔

احمدرشدی ، مسعودرانا ، ناہیداختر اور مہناز کی آوازیں تھیں۔ اسی فلم میں ننھا اور صاعقہ پر مالا اورریاض ملک نامی گلوکار کا یہ خوبصورت گیت بھی فلمایا گیا تھا "اےد نیا فانی ، بابا ، تیری جیوے جوانی ، بابا۔۔" فلم مفرور (1976) میں ننھا نے بطورگلوکار واحد گیت گایا تھا

• ٹک ٹک بولے دل ،مینوں سینے لا کے مل۔۔

بہت اچھی آواز کے مالک تھے لیکن نجانے گائیکی کی طرف دھیان کیوں نہیں دیا تھا؟

ننھا کی کیریکٹرایکٹر کے طور پر کامیابی

ننھا نے فلم نوکر (1975) اور سسرال (1977) میں سسر کے یادگار کردار کیے تھے جنھوں نے انھیں اردو فلموں کی ضرورت بھی بنادیا تھا۔

کیریکٹرایکٹر کرداروں میں ننھا سے بہترکارکردگی کبھی کسی مزاحیہ اداکار کی نہیں رہی۔ فلم آواز (1978) میں ننھا کا وہ یادگار مکالمہ تو ناقابل فراموش تھا جب وہ اپنے بیٹے محمدعلی اور پوتے وحیدمراد کی بیویوں ، نغمہ اور شبنم کا تعارف کرواتے ہوئے کہتے ہیں

"یہ میری بہو اور یہ ہُو بہو ہے۔۔"

جملہ سازی ، جگت بازی اور ٹائمنگ میں وہ کمال مہارت رکھتے تھے۔ اوپر سے چہرے کے تاثرات ، باڈی لینگویج اور الفاظ کی ادائیگی بڑے کمال کی ہوتی تھی جو انھیں ایک پرفیکٹ کامیڈین بنا دیتی تھی۔

فلم بھروسہ (1978) میں ننھا پر مہدی حسن کا واحد گیت فلمایا گیا تھا

• لو آگئیں بہاریں ، آیا سماں سہانا۔۔

ساتھی گلوکارہ ناہیداختر تھی اور اس روایتی رومانٹک گیت میں ساتھی اداکارہ تمنا تھی جس کے ساتھ ننھا کی جوڑی اتنی مقبول ہوئی تھی کہ ایک فلم بن رہی تھی ، "ننھا کی تمنا" لیکن مکمل نہ ہوسکی تھی۔

فلم پلے بوائے (1978) میں ننھا نے یورپ میں مقیم ایک روایتی تارکین وطن پاکستانی کا کردار بڑی مہارت سے کیا تھا اور ان پر شوکت علی کا گایا ہوا یہ دلچسپ گیت بھی فلمایا گیا تھا

• میں ولایت کاہنوں آگیا ، میرے مولا ، مینوں کڈھ لے ایتھوں۔۔

ایسا ہی ایک کردار انھوں نے فلم وہائٹ گولڈ (1986) میں بھی کیا تھا اور شوکت علی ہی کا گیت گایا تھا

• اوئے امریکہ والو ، اپنی کڑی سنبھالو ، ایس ولایتی میم نال میرا نئیں گزارا ، ایخو جئے ویاہ کولوں چنگا ساں کنوارا۔۔!

ننھا ، ہیرو کے رول میں

1979ء کا سال ، ننھا کے فلمی کیرئر کا ٹرننگ پوائنٹ ثابت ہوا تھا جب انھیں پہلی بار فلم ٹہکا پہلوان (1979) کے ٹائٹل رول میں ہیرو کے طور پر کاسٹ کیا گیا تھا۔

ان کی پہلی ہیروئن نازلی تھی جس کے ساتھ وہ پچاس سے زائد فلموں میں نظر آئے اور جسکو بعد میں ان کی زندگی میں بڑی اہمیت حاصل ہوگئی تھی۔

اس فلم میں ننھا پر مسعودرانا کا یہ ٹائٹل اور تھیم سانگ فلمایا گیا تھا

• سارے شہر چہ میرے ٹہکے ، میں آں ٹہکا پہلوان ، میری جنج تے آنا سارا لائل پور ، ملتان۔۔

ننھا کے عروج کا دور

اسی سال یادگار فلم دبئی چلو (1979) ریلیز ہوئی جس نے ایکشن فلموں کے عروج کے دور میں ننھا اورعلی اعجاز کو متبادل تفریح کا ایک بہترین ذریعہ بنا دیا تھا۔ ان دونوں عظیم مزاحیہ اداکاروں نے پچاس سے زائد فلموں میں مرکزی کردار کیے تھے جو کامیڈین کی جوڑی کا ایک ریکارڈ بھی ہے۔

فلم سوہرا تے جوائی (1980) ، اس جوڑی کی ایک بہت بڑی تفریحی فلم تھی۔ ننھا کی بطورہدایتکار واحد فلم وڈا تھانیدار (1980) تھی جس میں ممتاز کے ساتھ ہیرو تھے۔ بطورفلمساز بھی ایک فلم آخری دشمن (1983) کے طور پر نام ملتا ہے۔

ننھا کے انتہائی عروج کا دور فلم سالاصاحب (1981) سے شروع ہوا تھا۔ اس بلاک باسٹر نغماتی فلم میں ننھا نے ٹائٹل رول کیا تھا۔

اس سال انھوں نے ڈیڑھ درجن کے قریب فلموں میں کام کیا تھا جن میں مثبت ، منفی اور مزاحیہ ، ہر طرح کے کردار تھے۔ فلم اتھراپتر (1981) میں مسعودرانا اور البیلا کا گایا ہوا یہ پیروڈی گیت

• کلا مرچلیا ، کنورا مر چلیاں ، سر تو لے کے پیراں تک سارا مر چلیاں۔۔

ننھا اور علی اعجاز پر فلمایا گیا ایک انتہائی دلچسپ گیت تھا۔

اگلے پانچ برسوں میں ننھا نے سو سے زائد فلموں میں کام کیا تھا۔ علی اعجاز کے ساتھ مشترکہ فلموں میں زیادہ تر سائیڈ ہیرو ، ولن یا کیریکٹرایکٹر کرداروں میں ہوتے تھے اور بھرپور کارکردگی کا مظاہرہ کیا کرتے تھے۔

فلم دوستانہ (1982) میں ایک اندھے حافظ کا کردار ناقابل فراموش تھا۔ فلم سونا چاندی (1983) میں ننھا کے ساتھ سنگیتا کا سنجیدہ کردار بڑا پسند کیا گیا تھا اور ان کے پس منظر میں مسعودرانا کا ایک دلسوز گیت بڑے کمال کا تھا

• رشتے ناطیاں دے دھاگے بڑے کچے ہوندے نیں ، اوہو نکلے نیں جھوٹے جہیڑے سچے ہوندے نیں۔۔

فلم دیوانہ مستانہ (1983) میں مسعودرانا کا ایک اور خوبصورت گیت

• گیت پیار دے گانا ، ایرے غیرے دا کم نئیں۔۔

بھی ننھا پر فلمایا گیا تھا۔ فلم جدائی (1984) میں مسعودرانا اور ناہیداختر کا ایک دلچسپ گیت ننھا اور سنگیتا پرفلمایا گیا تھا

• اک دو دن نئیں ساری زندگی کر کے پیار وخاواں گے ، روٹیاں دو پکاواں گے ، دوویں اک اک کھاواں گے ، وچ ادھا پرونٹھا کاکے دا۔۔

ننھا کے زوال کا دور

بڑی تعداد میں ریلیز ہونے والی ایک جیسی فلموں ، کرداروں کی یکسانیت ، گھسے پٹے ذومعنی مکالموں اور عامیانہ گیتوں سے اکتائے ہوئے فلم بینوں نے علی اعجاز اور ننھا کو نظرانداز کرنا شروع کردیا تھا اور ان کی فلمیں دھڑا دھڑ ناکام ہونا شروع ہوگئی تھیں۔

مزے کی بات ہے کہ ایکشن فلمیں ان سے بھی بدتر ہوتی تھیں ، لیکن فلم بین ان سے نہیں اکتاتے تھے۔

​علی اعجاز ، صرف ہیرو کے کرداروں میں ہوتے تھے ، اس لیے زوال پذیر ہوتے ہی فلموں سے کنارہ کشی اختیار کرلی تھی لیکن ننھا کی خوبی یہ تھی کہ وہ ہر طرح کے کرداروں میں بخوبی فٹ بیٹھتے تھے ، اس لیے انھیں فلموں کی کمی نہ تھی۔ گو انھیں ہیرو بننے کا بڑا شوق تھا اور متعدد فلموں میں ہیرو بھی آئے لیکن موٹاپے کی وجہ سے ہیرو کے کرداروں میں فلم بینوں کو متاثر نہیں کر سکے تھے۔

عروج سے زوال بھی برداشت نہ ہوسکا اور ​ اس دوران مبینہ طور پر ان کی ساتھی اداکارہ نازلی سے معاشقے اور دوسری شادی کے تنازعہ نے گھریلو مسائل میں اتنی شدت پیدا کردی تھی کہ 2 جون 1986ء کو اچانک یہ اندوہ ناک خبر ملی کہ ننھا نے خودکشی کرلی ہے۔

ننھا کی آخری فلم

​ریلیز کے اعتبار سے ایک پشتو فلم دا گند کپانو پلار (1994) میں ننھا کو آخری بار دیکھا گیا تھا جو بظاہر کسی اردو فلم کا پشتو ورژن تھا۔ اس سے قبل ان کی آخری اور مکمل پنجابی فلم پسوڑی بادشاہ (1991) ریلیز ہوئی تھی جس میں ننھا نے زبردست کامیڈی کا مظاہرہ کیا تھا اور متعدد ذومعنی جملوں کے علاوہ کئی ایک زبردست قسم کے چٹکلے بھی تھے۔ مثلاً دردانہ رحمان سے کہتے ہیں

"میرا نام بادشاہ اور تیرا نام ملکہ ہے، اگر ہم شادی کرلیں تو اس ملک میں بہت سے پرنس پیدا ہوجائیں گے۔۔"

بس کنڈکٹر ، ڈبل ٹکٹ کے پیسے مانگتا ہے کیونکہ ننھا ، دو سیٹوں پر براجمان ہیں۔ دھان پان کنڈکٹر کو جواب دیتے ہیں کہ

"کیا تم آدھی تنخواہ لیتے ہو جو میں تمہیں دو سیٹوں کا کرایہ دوں۔۔؟"

اپنی اس آخری فلم میں ننھا کا انجام موت پر ہوتا ہے۔

ننھا نے چار سو کے قریب فلموں میں کام کیا تھا۔ ڈیڑھ سو سے زائد اردو اور سوا دو سو سے زائد پنجابی فلمیں تھیں۔ وہ شاید واحد اداکار ہیں کہ جنھوں نے اردو ، پنجابی ، بنگالی ، پشتو اور سندھی فلموں میں بھی کام کیا تھا۔

​اصل نام محمدرفیع خاور تھا۔ 1944ء میں ساہیوال میں پیدا ہوئے اور 1986ء میں صرف 42 برس کی عمر میں لاہور میں خودکشی سے انتقال ہوا تھا۔ پولیس کی تفتیش سے یہ بات سامنے آئی تھی کہ انھوں نے خودکشی کی تھی اور یہ قتل کا کیس نہیں تھا۔

6 اردو گیت ... 15 پنجابی گیت