حبیب جالب

معروف شاعر حبیب جالب ، اپنی مزاحمتی شاعری کی وجہ سے ہمیشہ یاد رکھے جائیں گے۔ انھوں نے اپنی اس انفرادیت کو فلموں میں بھی برقرار رکھا تھا۔۔!

پاکستان فلم ڈیٹا بیس میں اب تک کے غیر حتمی اعدادوشمار کے مطابق ، حبیب جالب نے ستر کے قریب فلموں میں ڈیڑھ سو کے قریب گیت لکھے تھے۔

چھ فلمیں ایسی تھیں جن کے جملہ گیت انھوں نے لکھے تھے جن میں یہ امن (1971) سب سے یادگار فلم تھی۔

ان کے لکھے ہوئے سب سے زیادہ گیت مالا اور میڈم نورجہاں نے گائے تھے جبکہ مرد گانے والوں میں اتفاق سے مسعودرانا ، احمدرشدی اور مہدی حسن نے یکساں تعداد میں گیت گائے تھے۔

انھوں نے بطور فلمساز ایک فلم کالے چور (1991) بھی بنائی تھی۔

حبیب جالب کی پہلی فلم بھروسہ (1958) تھی جس میں ان کے تین گیت تھے۔ آخری فلم کے طور پر فلم سکھاں (1997) کا نام ملتا ہے۔ انھیں سب سے زیادہ شہرت فلم خاموش رہو (1963) کے گیتوں سے ملی تھی اور اس گیت کا یہ جملہ

• میں نہیں مانتا۔۔

ایک ضرب المثل بن چکا ہے۔ فلم زرقا (1969) کا گیت

• رقص زنجیر پہن کر بھی کیا جاتا ہے۔۔

بھی ان کی پہچان تھا۔

جب نیلو نے آمریت کو للکارا

یہ نظم انھوں نے 11 فروری 1965ء کے ایک سچے واقعہ سے متاثر ہو کر لکھی تھی جب حکومت الوقت کے اہلکاروں کی زبردستی کے باوجود اداکارہ نیلو نے ایک اعلیٰ سطحی تقریب میں رقص کرنے سے انکار کر دیا تھا۔ ایک توہین آمیز سلوک سے دلبرداشتہ ہوکر اس نے خواب آور گولیاں کھا کر خودکشی کرنے کی کوشش بھی کی تھی۔

نیلو کی اس خودداری پر اسے خراج تحسین پیش کرنے کےلیے جہاں فلم انڈسٹری نے اظہار یکجہتی کے طور پر ہڑتال کی تھی وہاں حبیب جالب نے "نیلو" کے نام سے یہ لازوال نظم لکھی تھی جو فلم میں

• تو کہ ناواقف کہ آداب غلامی ہے ابھی۔۔

کے طور پر پیش کی گئی تھی۔

پاکستان کی پہلی ڈائمنڈ جوبلی فلم زرقا کا ٹائیٹل رول نیلو ہی نے کیا تھا جس نے اس فلم کے فلمساز ، ہدایتکار اور کہانی نویس ریاض شاہد سے شادی بھی کر لی تھی۔

کشمیر پر پاکستان کی بے بسی

حبیب جالب کی ایک اور تاریخی فلم یہ امن (1971) بھی تھی۔ کشمیر کے موضوع پر بنائی گئی اس فلم کا سب سے مقبول ترین گیت

• ظلم رہے اور امن بھی ہو ، کیا ممکن ہے ، تم ہی کہو۔۔

تھا۔ اس گیت کا یہ جملہ "تم کو اگر توفیق نہیں تو ، مجھ کو ہی سچ کہنے دو۔۔" پاکستان میں عوامی امنگوں اور سرکاری کشمیر پالیسی میں بے بسی اور بے چارگی کی حقیقت بھی بیان کرتا ہے۔۔!

حبیب جالب کے چند مشہور فلمی گیت

حبیب جالب کے چند مشہور ترین فلمی گیتوں کی ایک فہرست مرتب کی گئی ہے:

• اک بھول سمجھ کر ہم ، دل کی الفت کا زمانہ بھول گئے،، (گلوکار منیر حسین ، فلم بھروسہ 1958)
• بنا کے میرا نشیمن ، جلا دیا تو نے۔۔ (گلوکار سلیم رضا ، فلم دو راستے 1961)
• اس شہر خرابی میں ، غم عشق کے مارے زندہ ہیں۔۔ (گلوکار سلیم رضا ، فلم موسیقار 1962)
• میرے دل کی انجمن میں ، تیرے غم سے روشنی ہے۔۔ (گلوکار سلیم رضا ، فلم قیدی 1962)
• میں نہیں مانتا ، تم نے لوٹی ہے انسان کی آبرو۔۔ (گلوکار احمدرشدی ، فلم خاموش رہو 1963)
• جاگنے والو ، جاگو مگر ، خاموش رہو۔۔ (گلوکار ناہیدنیازی ، فلم خاموش رہو 1963)
• آئے گا پیا ، لہرائے گا پیا ، اب ڈر کاہے کا۔۔ (گلوکار مالا ، فلم قبیلہ 1966)
• ایک ہمیں آوارہ کہنا ، کوئی بڑا الزام نہیں۔۔ (گلوکار سلیم رضا ، فلم انسان 1966)
• آج اس شہر میں ، کل نئے شہر میں ، بس اسی لہر میں۔۔ (گلوکار احمدرشدی ، فلم جوکر 1966)
• کر دے گی قوم زندہ ، ماضی کی داستانیں۔۔ (گلوکار مسعودرانا ، شوکت علی مع ساتھی ، فلم وطن کا سپاہی 1966)
• دے گا نہ کوئی سہارا ، ان بے درد فضاؤں میں۔۔ (گلوکار مسعودرانا ، نسیم بیگم ، فلم کون کسی کا 1966)
• لوگ دیکھیں نہ تماشہ ، میری رسوائی کا۔۔ (گلوکارہ میڈم نورجہاں ، فلم ماں بہو بیٹا 1966)
• اب اور پریشان ، دل ناشاد نہ کرنا۔۔ (گلوکار مہدی حسن ، فلم ماں بہو بیٹا 1966)
• رقص زنجیر پہن کر بھی کیا جاتا ہے۔۔ (گلوکار مہدی حسن ، فلم زرقا 1969)
• ظلم رہے اور امن بھی ہو ، کیا ممکن ہے تم ہی کہو۔۔ (گلوکار میڈم نورجہاں ، مہدی حسن ، فلم یہ امن 1971)
• موہ سے پریت نبھانا رے ، سانورے۔۔ (گلوکارہ میڈم نورجہاں ، فلم ناگ منی 1972)
• رہے نام اللہ دا ، اللہ ہی اللہ۔۔ (گلوکار مسعودرانا ، فلم ہاشو خان 1974)
• سمجھ کے اپنا اک بیگانے کو پیار میں دھوکہ کھایا۔۔ (گلوکاران شازیہ ، احمدرشدی ، فلم ساجن رنگ رنگیلا 1975)
• یہ خون شہید وطن کا ہے ، رنگ لائے گا۔۔ (گلوکار اخلاق احمد ، فلم انقلاب 1978)
• پیسے کی یہ دنیا ہے پیارے۔۔ (گلوکاران ندیم ، مسعودرانا ، اے نیر ، مہناز ، فلم چوروں کی بارت 1987)
• دین پیسہ ، ایمان پیسہ۔۔ (گلوکاران اے نیر ، مسعودرانا ، میڈم نورجہاں ، فلم رنگیلے جاسوس 1989)

حبیب جالب اور مسعودرانا کا ساتھ

مسعودرانا کے ساتھ حبیب جالب کے درجن بھر گیت ملتے ہیں۔ ان کا ساتھ فلم لنڈا بازار (1964) میں ایک ایسے شعر سے ہوا جو اس فلم کا خلاصہ تھا کہ کس طرح سے لوگ دوسروں کے اترن پہن کر اپنی سفید پوشی کا بھرم قائم رکھتے ہیں۔ یہ صرف پاکستان ہی نہیں بلکہ دنیا بھر میں ایسا ہی ہوتا ہے۔ حتی کہ ڈنمارک جیسے امیر ترین ملک میں بھی بہت سے عام لوگ ایسے کپڑوں سے اپنا تن ڈھانپتے ہیں اور لنڈا بازار کی دکانیں عام ہیں جنھیں یہاں ری یوز شاپس کہا جاتا ہے۔

حبیب جالب نے جنگ ستمبر 1965ء میں دیگر شعراء کی طرح کئی ایک جنگی ترانے لکھے تھے۔ انھیں ولولہ انگیز ترانوں میں ایک

• کر دے گی قوم زندہ ، ماضی کی داستانیں۔۔

بھی تھا جو فلم وطن کا سپاہی (1966) میں مسعودرانا ، شوکت علی اور ساتھیوں کی آوازوں میں شامل کیا گیا تھا۔ اس جنگ کے موضوع پر بنی ہوئی ایک فلم معجزہ (1966) میں حبیب جالب ، متعدد دیگر شعرائے کرام کی طرح سلورسکرین پر اپنا کلام پڑھتے ہوئے نظر آتے ہیں۔

فلم کون کسی کا (1966) میں حبیب جالب کا لکھا ہوا گیت

• دے گا نہ کوئی سہارا ، ان بے درد فضاؤں میں ، سو جا غم کی چھاؤں میں۔۔

میری زندگی کا پہلا پہلا گیت ہے جو میری یادداشت میں محفوظ ہے۔ فلم ماں بہو بیٹا (1966) کے دونوں رومانٹک گیت

• چہرے پہ گرا آنچل ہوگا۔۔
• او نازک نرم حسینہ۔۔

جیسے گیت حبیب جالب کے مزاج کے مطابق نہیں تھے البتہ فلم بے رحم کا گیت

• تجھ کر ملی ہے جرم غریبی کی یہ سزا۔۔

سماجی ناہمواری پر ایک اعلیٰ پائے کا گیت تھا۔

فلم ہاشو خان (1974) کا یہ تھیم سانگ تو ایک بڑی حقیقت بیان کرتا ہے کہ ظالم ، جابر اور غاصب حکمران وقتی طور پر کامیاب تو ہو جاتے ہیں لیکن ایک دائمی لعنت ان کا مقدر ہوتی ہے اور معمولی سی عقل و شعور رکھنے والا کوئی ایک بھی شخص کسی آمر کو اچھے نام سے یاد کر ہی نہیں سکتا۔ اس گیت کا مکھڑا پورے گیت کا خلاصہ بیان کر رہا ہے:

• ایتھے مٹی ہوندے ویکھے ، بڑے بڑے فرعون
  دائم نام اللہ دا رہنا ، ہاشو خان تو کون۔۔؟
  رہے نام اللہ دا ، اللہ ہی اللہ ، ظلم نیں اوں رہنا باقی ، رہنا سدا پیار اوئے
  جگ دیاں دولتاں دا ، نشہ دن چار اوئے۔۔

اداکار اور فلمساز فاضل بٹ کی اشارتی فلم ہاشو خان (1974) کا ٹائٹیل رول ساون نے کیا تھا