"تمہی ہو محبوب میرے ، میں کیوں نہ تمہیں پیار کروں۔۔"

جیسا لافانی گیت تخلیق کرنے والے نغمہ نگار خواجہ پرویز نے پاکستانی فلموں میں سب سے زیادہ گیت لکھے تھے۔ وہ ، اردو اور پنجابی فلموں میں یکساں طور پر مقبول عام گیت لکھتے تھے۔ اعدادوشمار کے مطابق انہوں نے جہاں گلوکاراؤں میں میڈم نورجہاں کے لئے سب سے زیادہ گیت لکھے وہاں گلوکاروں میں مسعودرانا نے ان کے لکھے ہوئے ریکارڈ پونے دو سو سے زائد گیت گائے تھے۔

2008ء میں جب خواجہ پرویز کے انتقال پر پاکستان فلم میگزین پر ایک تفصیلی مضمون لکھا گیا تھا تو اسوقت اتنی معلومات دستیاب نہیں تھی جتنی اب ہیں۔ فلمی شاعری سے قبل وہ بطور ادکار فلم حاتم (1956) سے فلمی دنیا میں آ چکے تھے۔ اسی سال کی فلم گڈی گڈا (1956) میں ہدایتکار ولی صاحب کے معاون بھی تھے۔ ہدایتکار اور اداکار خلیل قیصر کی فلم کلرک (1960) میں بطور اداکار انہوں نے ایک مزاحیہ کردار کے علاوہ آدھ درجن فلموں میں کام کیا تھا۔

خواجہ پرویز نے نغمہ نگاری کے علاوہ دو درجن فلموں کی کہانیاں ، مکالمے اور منظرنامے بھی لکھے تھے۔ بطور نغمہ نگار اپنی پہلی فلم رواج (1965) کے گیتوں کے علاوہ ریاض شاہد کے ساتھ مل کر اس فلم کے مکالمے بھی لکھے تھے۔ زمیندار (1966) پہلی فلم تھی جس کی کہانی ، مکالمے اور سکرین پلے کے علاوہ اس کے متعدد گیت بھی لکھے تھے۔ 2008ء میں پاکستانی فلموں کی ساٹھ سالہ سالگرہ کے موقع پر اس فلم پر ایک تفصیلی تبصرہ کے علاوہ یہ فلم یوٹیوب پر اپ لوڈ کی گئی تھی جو ضائع ہو چکی ہے۔

خواجہ پرویز کا پہلا فلمی گیت گلوکارہ مالا نے فلم رواج (1965) میں گایا تھا جس کی دھن ماسٹر عنایت حسین نے بنائی تھی اور بول تھے "دور دور رہ کر گزارا نہیں ہوگا ، ہمارا نہیں ہوگا ، تمہارا نہیں ہوگا۔۔" ان کا لکھا ہوا پہلا سپرہٹ گیت فلم آئینہ (1966) میں تھا "تمہی ہو محبوب میرے ، میں کیوں نہ تمہیں پیار کروں۔۔" جو مسعودرانا اور آئرین پروین نے الگ الگ گایا تھا۔ اسی فلم میں انہوں نے مہدی حسن سے یہ سپرہٹ غزل گوائی تھی "دل ویراں ہے ، تیری یاد ہے ، تنہائی ہے ، زندگی درد کی بانہوں میں سمٹ آئی ہے۔۔" میڈم نورجہاں کے ساتھ ان کا ابتدائی دور کا سب سے مقبول گیت فلم انورا (1970) میں تھا "سن وے بلوری اکھ والیا۔۔" اس گیت اور نغمہ کے رقص کی وجہ سے اس عامیانہ سی پنجابی فلم نے کراچی میں 75 ہفتے چلنے کا اعزاز حاصل کیا تھا۔

خواجہ پرویز کے بقول انہوں نے آٹھ ہزار کے قریب گیت لکھے تھے جن میں فلمی گیتوں کے علاوہ غیر فلمی گیت بھی تھے جن میں نصرت فتح علی خان کے بیشتر سپرہٹ گیت بھی شامل ہیں جن میں "اکھیاں اڈیکدیاں ، دل واجاں ماردا۔۔" ، "سانوں اک پل چین نہ آوے ، سجناں تیرے بنا۔۔" ، "کسے دا یار نہ وچھڑے۔۔" وغیرہ شامل ہیں۔

مسعودرانا کے ساتھ خواجہ پرویز کے پونے دو سو گیتوں میں سے "تمہی ہو محبوب میرے۔۔" کے علاوہ "بھل جان اے سب غم دنیا دے۔۔ " ، "اپنا بنا کے ، دل لا کے ، نس جائیں نہ میرے ہانیا۔۔" ، "تیرے بنا یوں گھڑیاں بیتیں۔۔" ، "سجناں اے محفل اساں تیرے لئی سجائی اے۔۔" ، "نسیاں نے ساڑیا ، حلیہ وگاڑیا۔۔" ، "نی چپ کر دڑ وٹ جا۔۔" اور "نیندراں نئیں آندیاں۔۔" وغیرہ جیسے بڑے بڑے سپرہٹ گیت شامل تھے۔

خواجہ پرویز کا اصل نام غلام محی الدین تھا۔ ان کے اپنے ایک انٹرویو کے مطابق وہ 28 دسمبر 1932ء کو امرتسر میں پیدا ہوئے تھے۔ ان کا انتقال 20 جون 2011ء کو لاہور میں ہوا تھا۔

41 اردو گیت ... 136 پنجابی گیت