اسلم ایرانی
ساٹھ کی دھائی میں پنجابی فلموں کے
کامیاب ہدایتکار تھے

ہدایتکار اسلم ایرانی

ہماری فلمی تاریخ میں بہت سے فنکار ایسے بھی گزرے ہیں کہ جنھوں نے صرف پنجابی فلموں کی وجہ سے شہرت حاصل کی تھی۔

ان میں سے بعض ایسے نام بھی ہیں کہ جن کا کبھی بہت کام اور نام ہوتا تھا لیکن اب گمنام ہیں۔ ان میں سے ایک ہدایتکار اسلم ایرانی تھے جو ساٹھ کے عشرہ میں پنجابی فلموں کے کامیاب ہدایتکار تھے اور جنھیں سماجی موضوعات پر سبق آموز اور نغماتی فلمیں بنانے کا فن خوب آتا تھا۔

ان کی دو درجن سے زائد فلموں میں سے اردو فلموں کی تعداد صرف چار تھی جن میں سے پہلی فلم تڑپ (1953) تھی اور باقی فلمیں پون (1956) ، مظلوم (1959) اور سارجنٹ (1977) تھیں۔

لولی پکچرز کی ایک درجن فلمیں

اسلم ایرانی کا فلمساز ادارہ لولی پکچرز (Lovely Pictures) تھا جس کے بینر تلے انھوں نے درجن بھر فلمیں بنائی تھیں۔

ریلیز کے اعتبار سے بطور ہدایتکار ، ان کی پہلی پنجابی فلم بچہ جمورا (1959) تھی اور انھیں شہرت دوسری پنجابی فلم بہروپیا (1960) سے ملی تھی جس میں ظریف اور لیلیٰ نے ٹائٹل رولز کیے تھے۔

تیسری فلم مفت بر (1961) کی کہانی پر بعد میں دو مشہور اردو فلمیں بے قصور (1970) اور انمول (1973) بنائی گئی تھیں۔

اسلم ایرانی کی پہلی چھ میں سے چار فلموں کے ہیرو اکمل تھے لیکن فلم موج میلہ (1963) جیسی سماجی اور نغماتی فلم میں انھوں نے پہلی بار حبیب کو ہیرو لیا تھا جو اکمل کی موت کے بعد ان کے فیورٹ ہیرو تھے۔

اسی سال کی فلم چاچا خوامخواہ کا ٹائٹل رول مشہور اداکار اے شاہ شکار پوری نے کیا تھا اور اس فلم میں انھوں نے سدھیر اور اکمل کو اکٹھا کیا تھا جو اس وقت پنجابی فلموں کے سپر سٹارز تھے۔

اسلم ایرانی کے فیورٹ گلوکار ، مسعودرانا

اسلم ایرانی کی مسعودرانا کے ساتھ پہلی فلم ڈاچی (1964) تھی جس میں ان کے لافانی گیت

• ٹانگے والا خیر منگدا۔۔

نے مقبولیت کے تمام اگلے پچھلے ریکارڈز توڑ دیے تھے۔ دلچسپ بات یہ ہے کہ ایرانی صاحب نے اپنی دس فلموں میں رانا صاحب کے دو درجن سے زائد گیت شامل کیے تھے۔

اسی سال اسلم ایرانی کی سب سے کامیاب ترین فلم ہتھ جوڑی بھی ریلیز ہوئی تھی جس سے اداکارہ نغمہ ان کی مستقل ہیروئن بن گئی تھی جو ان کے فلمساز اور کیمرہ مین بھائی اکبر ایرانی کی منکوحہ بتائی جاتی تھی۔

نور محمد چارلی کی پنجابی فلم

نور محمد چارلی سے لے کر شان تک
مسعودرانا کی آواز
آٹھ عشروں کے فنکاروں پر فلمائی گئی تھی
جو ایک منفرد ریکارڈ ہے۔۔!

1965ء میں اسلم ایرانی نے فلم پلپلی صاحب بنائی تھی جو ایک بڑا عجیب سا نام تھا۔ اس فلم کا ٹائٹل رول نور محمد چارلی نے کیا تھا جن کی یہ آخری فلم تھی۔

چارلی صاحب نے بیس کے عشرہ میں خاموش فلموں سے اپنے فلمی کیرئر سے آغاز کیا تھا اور تیس اور چالیس کے عشرہ میں ہندوستانی فلموں کے پہلے چوٹی کے مزاحیہ اداکار ثابت ہوئے تھے۔

تقسیم کے بعد پاکستان چلے آئے تھے لیکن کامیابی نہیں ملی تھی۔ اپنی اس آخری فلم میں ان پر مسعودرانا کا گایا ہوا ایک گیت فلمایا گیا تھا

• نوریا ، بھولیا بھالیا ، وے الٹی سمجھاں والیا۔۔

یہ ایک دوگانا تھا جس میں آئرن پروین کی آواز بھی شامل تھی جو اداکارہ چن چن پر فلمائی گئی تھی۔

مسعودرانا ، آٹھ دھائیوں کے گلوکار

اس طرح مسعودرانا ، پاکستان کی فلمی تاریخ کے واحد گلوکار ثابت ہوئے کہ جن کی آواز آٹھ عشروں کے اداکاروں پر فلمائی گئی تھی۔ بیس کے عشرہ کے نور محمد چارلی سے لے کر نوے کے عشرہ کے فنکاروں شان اور جان ریمبو پر بھی مسعودرانا کی آواز فلمائی گئی تھی۔

اسی فلم میں ماں کے موضوع پر رانا صاحب کا یہ گیت بھی بڑا متاثر کن تھا "نئیں بکھا شہر گراں تھا۔۔"

سجناں نے بوہے اگے چک تن لئی

1966ء میں اسلم ایرانی کی ایک اور یادگار فلم بھریا میلہ ریلیز ہوئی تھی جس میں ایک بار پھر مسعودرانا کا سٹریٹ سانگ

• سجناں نے بوہے اگے چک تن لئی۔۔

ساٹھ کے عشرہ کا شریر ترین گیت ثابت ہوا تھا جو اداکار اکمل پر فلمایا گیا تھا جو اسوقت مقبولیت کی بلندیوں پر تھے۔

1967ء کی فلم مقابلہ ایک ایکشن فلم تھی جو اکمل کے ساتھ ان کی آخری فلم تھی جن کا اس سال 11 جون کو انتقال ہو گیا تھا۔ اس فلم میں مسعودرانا کا نسیم بیگم کے ساتھ یہ مزاحیہ گیت بڑا دلچسپ تھا

• جل تو جلال تو ، اوکھی ویلے نال تو ، ایس بلا نوں ٹال تو۔۔

1968ء میں اسلم ایرانی کی دو فلمیں ریلیز ہوئی تھیں جن میں مسعودرانا کے کل نو گیت تھے۔ ان دونوں فلموں میں نغمہ اور حبیب کی جوڑی تھی۔ ان میں سے فلم میلہ دو دن دا تو اتنی خاص نہیں تھی لیکن فلم بابل دا ویڑا بڑی اعلیٰ پائے کی سماجی فلم تھی جو جہیز کے موضوع پر بنائی گئی تھی۔ اس فلم میں مسعودرانا کا تھیم سانگ

• دھیاں دتیاں تے کیوں نہ دتا مال مالکا۔۔

ایک بھارتی پنجابی فلم میں ہوبہو نقل کیا گیا تھا جو اس فلم میں اداکار ایم اسماعیل کے پس منظر میں بھی گایا گیا تھا۔

جب نغمہ اور ایرانی برادران کی راہیں جدا ہوئیں

1969ء میں اسلم ایرانی کی فلم لنگوٹیا اس لحاظ سے یادگار تھی کہ اس فلم کی شوٹنگ کے دوران اداکارہ نغمہ کی اداکار حبیب کی محبت میں گرفتار ہونے اور اپنے شوہر اکبر ایرانی سے علیحدگی کی وجہ سے یہ آخری مشترکہ فلم ثابت ہوئی تھی۔

یہی وجہ تھی ایرانی صاحب کی اگلی فلم بابا دینا (1971) میں پہلی بار فردوس ہیروئن تھی جو اگلی فلم اشتہاری ملزم (1972) میں بھی تھی جس میں انھوں نے پہلی بار اداکار اعجاز کو ہیرو لیا تھا جن پر مسعودرانا اور تصور خانم کا یہ دوگانا فلمایا گیاتھا

• اے دنیا روپ بہروپ۔۔ ، ایس توں بچنا پیندا اے

اس فلم کا ٹائٹل رول اقبال حسن نے کیا تھا جن کی جوڑی فردوس کے ساتھ تھی۔

کئی سال کے وقفے سے اسلم ایرانی کی اگلی فلم موت کھیڈ جواناں دی (1976) ریلیز ہوئی تھی جس میں سلطان راہی کا مرکزی کردار تھا اور اداکار اعجاز کی اپنے پہلے دور میں بطور ہیرو آخری فلم تھی اور اس فلم میں ان پر مسعودرانا کا جو آخری گیت فلمایا گیا تھا وہ بڑا زبردست تھا

• تینوں تکناں واں ، سوچی پے جاناں واں۔۔

اس دور میں ایرانی صاحب کی ایک میعاری فلم لائسنس (1976) بھی تھی جو سعادت حسن منٹو کے ایک افسانہ پر فلمائی گئی تھی اور جس میں اس وقت کے ایک مقبول قوال عزیز میاں کو پہلی بار اپنی قوالی پردہ سیمیں پر گاتے ہوئے دیکھا گیا تھا۔

فلم سارجنٹ بھی ایک اچھی فلم تھی جبکہ فلم ٹہکا پہلوان (1979) میں ننھا کو ٹائٹل رول میں پیش کیا گیا تھا۔ سنتری بادشاہ (1978) ، ماما بھانجا (1980) ، اچا شملہ جٹ دا (1984) اور آخری قتل (1989) ان کی دیگر فلمیں تھیں۔

1994ء میں ان کا انتقال ہوا تھا۔