ایک وقت تھا جب پاکستانی اردو فلموں پر دو سگے بھائیوں کا راج ہوتا تھا۔ اپنی مردانہ وجاہت اور افسانوی شہزادوں کی سی شکل و صورت میں پردہ سکرین پر نظر آنے والے ان دو بھائیوں کے نام تھے ، سنتوش اور درپن ۔۔!

درپن کا فلمی کیرئر زیادہ طویل نہیں تھا لیکن اس دوران ان کی چند فلموں نے فلم بینوں پر بڑا گہرا اثر چھوڑا تھا جن میں سہیلی ، گلفام اور نائیلہ جیسی یادگار فلمیں قابل ذکر تھیں۔ پاکستان فلم میگزین کے سابقہ ورژن میں درپن کے فلمی کیرئر پر بڑا تفصیلی مضمون لکھا جا چکا ہے ، جسے یہاں دھرانے کی ضروری نہیں ہے۔

درپن جب عروج پر تھے تو ان پر زیادہ تر سلیم رضا کے گائے ہوئے گیت فلمائے جاتے تھے جو پاکستان کی اردو فلموں کے پہلے بڑے گلوکار تھے اور جنہیں ساٹھ کے عشرہ کے وسط تک اردو فلمی گائیکی پر اجارہ داری حاصل رہی ہے۔ آنجہانی سلیم رضا کی فلم نور اسلام (1957) میں گائی ہوئی یہ لازوال فلمی نعت "شاہ مدینہ ﷺ ، یثرب کے والی ،سارے نبی تیرے در کے سوالی۔۔" درپن پر ہی فلمائی گئی تھی۔ دلچسپ اتفاق ہے کہ جیسے درپن کی آخری کامیاب فلم پائل کی جھنکار (1966) تھی ، ویسے ہی یہ فلم سلیم رضا کے سپر ہٹ گیتوں والی آخری فلم بھی تھی۔

مسعودرانا کی جب فلمی دنیا میں آمد ہوئی تھی تو اس وقت درپن روبہ زوال تھے اور ان کی بیشتر فلمیں ناکام ہونا شروع ہو چکی تھیں۔ اسی سال انھوں نے اداکارہ نیر سلطانہ سے شادی کی تھی جو ان کے فلمی کیرئر کی سب سے کامیاب فلم سہیلی (1960) کی ہیروئن تھی لیکن اتفاق دیکھیے کہ اس فلم کے بعد اس جوڑی کی کبھی کوئی فلم کامیاب نہیں ہوئی تھی بلکہ یہاں تک کہ ایک فلم دلہن (1963) میں درپن کی موجودگی میں نیر سلطانہ کی جوڑی حبیب کے ساتھ بنائی گئی تھی کیونکہ باکس آفس پر یہ جوڑی زیادہ کامیاب تھی۔

مسعودرانا کا پہلا فلمی گیت جو درپن پر فلمایا گیا تھا وہ ہدایتکار حسن طارق کی مشہور زمانہ فلم شکوہ (1963) کے لیے تھا:

• مکھڑے کو چھپانے کی ادا لے گئی دل کو..

اس گیت کی دھن دیبو بھٹاچاریہ نے بنائی تھی جو فلم بنجارن کے گیت "کہیں دل پہ نہ جادو کر جائے۔۔" کی طرز پر ہی تھی۔ یہ فلم اداکارہ صبیحہ خانم کی جذباتی اداکاری کی وجہ سے یادگار ہے جس نے صرف 27 سال کی عمر میں حقیقی زندگی میں اپنے دیور ، درپن کی ماں کا رول کیا تھا اور کیا خوب کیا تھا۔

اس جوڑی کی دوسری فلم میرے محبوب (1966) تھی جس میں مسعودرانا کے تین گیت درپن پر فلمائے گئے تھے۔ ان میں سے پہلا گیت:

• سامنے رشک قمر ہو تو غزل کیوں نہ کہوں ، کوئی محبوب نظر ہو تو غزل کیوں نہ کہوں..

گیت نگار حمایت علی شاعر کی لکھی ہوئی اور موسیقار خلیل احمد کی دھن میں یہ ایک ایسی شاندار غزل تھی کہ جسے سن کر مسعودرانا کی گائیکی پر رشک آتا تھا۔ لطف کی بات یہ ہے کہ یہ غزل مقابلے کی فضاء میں گائی جاتی ہے جب فلم کے ہیرو درپن کا مقابلہ ہیروئن شمیم آراء کے ساتھ ہوتا ہے جو ملکہ ترنم نورجہاں کی یہ دلکش غزل گاتی ہے "ہر قدم پر ، نت نئے سانچے میں ڈھل جاتے ہیں لوگ۔۔" میوزک جیوری کے لیے یہ فیصلہ کرنا مشکل ہوتا ہے کہ کس کی گائیکی بہتر تھی۔ یقیناَ مسعودرانا کے لیے یہ بہت بڑے اعزاز کی بات تھی کہ میڈم کے مقابلے میں ان کے گیت کو ایسی پذیرائی ملی تھی۔ اتفاق سے یہی پہلی فلم تھی جس میں مسعودرانا نے میڈم کے ساتھ اپنا پہلا دوگانا بھی گایا تھا:

• کلی مسکرائی جو گھونگھٹ اٹھا کے ، خدا کی قسم ،تم بہت یاد آئے..

یاد رہے کہ میڈم نورجہاں کے سب سے زیادہ فلمی دو گانے مسعودرانا ہی کے ساتھ تھے۔ اس فلم کا تیسرا گیت ایک بڑا دلکش رومانٹک گیت تھا:

• تم سا حسین کوئی نہیں ، کائنات میں ، نازوادا ، شرم و حیا ، بات بات میں..

یہ گیت بھی درپن پر فلمایا گیا تھا اور اس طرح فلم میرے محبوب واحد فلم تھی جس میں مسعودرانا کے تین گیت درپن پر فلمائے گئے تھے۔

ان دونوں فنکاروں کی تیسری فلم بہادر (1967) تھی جس میں مسعودرانا کا گایا ہوا یہ سریلا گیت درپن پر فلمایا گیا تھا:

• اے جان غزل ، لہرا کے نہ چل ، دلبر ، میرا دل تڑپا کے نہ چل..

اس گیت میں آئرن پروین کی آواز بھی شامل تھی جو فلم کی ہیروئن مسرت نذیر پر فلمائی گئی تھی جس کی یہ آخری فلم تھی۔

اسی سال کی فلم ستمگر میں مسعودرانا کے دو گیت تھے جن میں سے پہلا ایک دلکش دوگانا تھا جو مالا کے ساتھ گایا گیا تھا:

• پھر محبت تیرے در پر ہمیں لے آئی ہے..

یہ رومانٹک گیت درپن اور رانی پر فلمایا گیا تھا جبکہ دوسرا گیت ایک تھیم سانگ تھا جو صبیحہ خانم اور درپن کے پس منظر میں گایا گیا تھا:

• ماں کے دل کو توڑ کر ، مامتا کی جنت چھوڑ کر..

ماں کے موضوع پر گائے ہوئے مسعودرانا کے دو درجن کے قریب گیتوں میں سے یہ ایک بامقصد گیت تھا جو سنجیدہ فلم بینوں پر بڑا گہرا اثر چھوڑتا تھا۔

اب تک کی معلومات کے مطابق مسعودرانا کا جو آخری گیت درپن پر فلمایا گیا تھا ، وہ بھی ایک دوگانا تھا جسے مالا کے ساتھ گایا گیا تھا اور جو ساتھی فنکارہ نیلو پر فلمایا گیا تھا:

• مچلے ہوئے جذبات ہیں ، معلوم نہیں کیوں..

تنویر نقوی کے لکھے ہوئے اس گیت کی دھن ماسٹر عاشق حسین نے فلم شام سویرا (1967) کے لیے بنائی تھی۔