ماسٹر عبد اللہ
ایک صاحب طرز موسیقار تھے

ماسٹر عبداللہ ، ایک صاحب طرز موسیقار تھے۔۔!

فلم سورج مکھی (1962) سے جب انھوں نے اپنے فلمی کیرئر کا آغاز کیا تو اس وقت ان کے بڑے بھائی ماسٹر عنایت حسین ایک مستند اور قابل احترام موسیقار کے طور پر فلمی دنیا میں موجود تھے۔ انھیں بریک تھرو فلم ملنگی (1965) کے سپر ہٹ گیت "ماہی وے سانوں بھل نہ جاویں۔۔" سے ملا تھا۔

ماسٹر عبداللہ کا فلمی سفر

اپنے تیس سالہ فلمی کیرئر میں ماسٹر عبداللہ نے 51 فلموں میں میوزک کمپوز کیا تھا جن میں 10 اردو اور 41 پنجابی فلمیں تھیں۔

گلوکاراؤں میں سب سے زیادہ گیت میڈم نورجہاں اور گلوکاروں میں سب سے زیادہ گیت مسعودرانا اور مہدی حسن سے گوائے تھے۔

عام طور پر پنجابی فلموں میں مردانہ گیتوں کی گنجائش کم ہی ہوتی تھی کیونکہ فلم بینوں کی اکثریت ناچتی گاتی عورت کو دیکھنے جاتی تھی اور ماسٹر صاحب خاص طور پر مجرا گیتوں کے ماہر تھے۔ اس کے باوجود انھوں نے مسعودرانا سے ڈیڑھ درجن سے زائد گیت گوائے تھے جن میں بڑی ورائٹی تھی۔

ماسٹر عبداللہ اور مسعودرانا کا ساتھ

ماسٹر عبداللہ اور ماسٹر عنایت حسین
بیک وقت چوٹی کے دو موسیقار بھائی تھے

ماسٹر عبداللہ اور مسعودرانا کا پہلا ساتھ فلم اک سی چور (1965) میں ہوا تھا۔ اس فلم کا ٹائٹل رول علاؤالدین نے کیا تھا جن پر نشے کی کیفیت میں گایا ہوا ایک بڑا ہی دلکش گیت فلمایا گیا تھا

• ڈگمگ ڈولیاں میں تاں سمجھ آئی اے ، پلیوں نئیں پیتی سانوں ، سجناں پلائی اے۔۔

مسعودرانا نے اس گیت میں گلے کا جو استعمال کیا تھا وہ کم ہی سننے میں آتا ہے۔

فلم ملنگی (1965) ماسٹر عبداللہ کے کیرئر کی بہت بڑی فلم تھی۔ یہی فلم پنجابی فلموں کے مقبول ہیرو اکمل کی بھی سب سے بڑی فلم تھی۔ اسی فلم سے میڈم نورجہاں اور فردوس کو

• ماہی وے سانوں بھل نہ جاویں۔۔

سے پنجابی فلموں میں بریک تھرو ملے تھے۔ ماسٹر صاحب نے اس فلم میں مسعودرانا سے دو تھیم سانگ گوائے تھے جن میں سے

• خاناں دے خان پروہنے ، کوئی غریب دا یار نئیں۔۔

ایک مقبول ترین گیت تھا۔ فلم لاڈو (1966) اپنے نغمات کی وجہ سے یاد رکھی جاتی ہے جس کے بیشتر گیت سپر ہٹ ہوئے تھے۔ اس فلم میں مسعودرانا اور مالا کا یہ دوگانا بڑا مقبول ہوا تھا

• کی بھروسہ دم دا اے دنیا فانی۔۔

اردو فلم کمانڈر (1968) میں مسعودرانا کا رونالیلیٰ کے ساتھ یہ رومانٹک گیت ایک شاہکار گیت تھا

• میرا محبوب ہے یا جان بہار آیا ہے۔۔

جبکہ فلم کا تھیم سانگ

• آنکھوں میں اشک ، درد ہے دل میں بسا ہوا۔۔

بھی کیا کمال کا گیت تھا۔ فلم بابل (1971) میں

• لے لو میرے کھلونے۔۔

کی دھن اور گائیکی اعلیٰ پائے کی تھی لیکن اس گیت کے بول

• قیمت سب دی وکھری وکھری ، نئیں جے ڈھائی ڈھائی آنے۔۔

ناقابل ہضم تھے۔ فلم نظام (1972) کا تھیم سانگ

• دل ٹٹڈا تے روندا اسمان ویکھیا۔۔

بھی ایک لاجواب گیت تھا جبکہ فلم ریشماں جوان ہوگئی (1975) میں مزاحیہ گیت

• کی ناں تیرا شہزادی۔۔

بڑا دلچسپ تھا۔ فلم بدل گیا انسان (1975) میں مسعودرانا کے شاہکار تھیم سانگز میں سے ایک

• امیروں کے خدا ، تو ہی غریبوں کا خدا ہے۔۔

بھی کیا گیت تھا۔ پنجابی فلموں میں عام طور نعتیہ کلام خال خال ملتا ہے لیکن فلم غازی علم الدین شہید (1978) میں ماسٹر صاحب نے مسعودرانا سے یہ نعت گوائی تھی

• او بندے ، نبی ﷺ تے رکھ ایمان۔۔

ماسٹر عبداللہ کی فلم بابل (1971) سے منسلک چند یادیں

ماسٹر عبداللہ

ماسٹر عبداللہ کی ایک فلم بابل (1971) سے میری بڑی گہری یاد وابستہ ہے۔

1973ء میں یہ فلم دوسرے رن میں ہمارے مقامی سینما قیصر میں چلی تھی۔ عام طور پر پنجاب سرکٹ جو پورے ملک کے سینماؤں کا ساٹھ فیصد ہوتا تھا ، وہاں پنجابی فلمیں بار بار ریلیز ہو کر بڑا بزنس کرتی تھیں کیونکہ عام لوگوں کے پاس صرف فلم ہی سب سے بڑی تفریح ہوتی تھی۔ حتیٰ کہ لاہور میں ناکام ہونے والی پنجابی فلمیں بھی اتنے بڑے سرکٹ میں اتنا بزنس کر جاتی تھیں کہ ان کا فلمساز گھاٹے میں نہیں رہتا تھا۔

جمعہ کا دن تھا جب فلم بدلتی تھی۔ میں سکول سے گھر آیا تو دیکھا کہ راستے میں سینما کے بورڈ نہیں بدلے گئے تھے۔ بڑی فکر ہوئی اور بمشکل جمعہ کی نماز ادا کرکے فوراً قیصر سینما پہنچا جہاں دیکھا کہ برآمدے میں رکھے ہوئے سینما بورڈ شہر کا ایک تھرڈ کلاس پینٹر لکھ رہا ہے گویا استاد رشید بیمار تھے۔

مجھے دیکھتے ہی غیر مطمئن نظر آنے والے سینما منیجر نے خوشی سے نعرہ بلند کیا اور کہا

"استاد ، تم کہاں رہ گئے تھے ، آج تمہاری بڑی ضرورت ہے۔۔"

میری اس سے کوئی علیک سلیک نہیں تھی لیکن سینما کے پورے عملہ کی طرح وہ بھی مجھے جانتا تھا اور کم عمری میں اتنا خوشخط لکھنے کی وجہ سے سبھی ' استاد ' کہتے تھے۔ خاص طور پر پچھلے سال جب میں نے سینما کے مالک شیخ صاحب کو فلم بہارو پھول برساؤ (1972) کی سینما سلائیڈ لکھ کر دی تھی تو ہر کوئی بڑی قدر کی نگاہ سے دیکھتا تھا۔

حقیقت میں جتنا خوش خط پرائمری سکول کے زمانے میں لکھتا تھا ، اتنا پھر کبھی نہیں لکھ سکا کیونکہ روزانہ تختی لکھنے کی جو مشق ہوتی تھی وہ قلم دوات کا ساتھ چھوٹتے ہی ختم ہو گئی تھی۔ اب تو خیر بالکل ہی نہیں لکھا جاتا کیونکہ برسوں سے کی بورڈ پر انگلیاں چلاتے ہوئے نہ ہاتھوں میں وہ نزاکت رہی اور نہ ہی انگلیوں میں وہ لطافت کہ خوش خط لکھ سکوں۔

اس وقت مجھے سائن بورڈ لکھنے کا شوق نہیں ہوتا تھا لیکن کچے رنگ سے لکھ لیتا تھا ، پکے رنگ سے لکھنا مشکل ہوتا تھا کیونکہ اس کے لیے خاصا تجربہ درکار ہوتا ہے۔ اسوقت میں چھٹی جماعت کا طالبعلم تھا اور اپنی گیارہ سالہ عمر کے حساب سے حیرت انگیز طور پر خوش خط لکھتا تھا۔

جب اس پینٹر نے ایک بورڈ پر میرا لکھا ہوا ' بابل ' دیکھا تو ہکا بکا رہ گیا تھا۔ منیجر صاحب بھی میری کارکردگی سے بڑے خوش ہوئے اور بڑے فخر سے میرے لکھے ہوئے بورڈ کی طرف اشارہ کرتے ہوئے کہا

"پینٹر صاحب ، دیکھیں ، ایسے لکھتے ہیں۔۔!"

ماسٹر عبداللہ کے سپرہٹ گیت

• جانے والی چیز کا غم کیا کریں۔۔ (گلوکارہ نورجہاں ، فلم واہ بھئی واہ 1964)
• پلیوں نئیں پیتی ، سانوں سجناں پلائی اے۔۔ (گلوکار مسعودرانا فلم اک سی چور 1965)
• ماہی وے سانوں بھل نہ جاویں۔۔ (گلوکارہ نورجہاں ، فلم ملنگی 1965)
• اج تیرے پنڈ نوں سلام کر چلیاں۔۔ (گلوکارہ مالا ، فلم ملنگی 1965)
• خاناں دے خان پروہنے ، کوئی غریب دا یار نئیں۔۔ (گلوکار مسعودرانا ، فلم ملنگی 1965)
• شکر دوپہر پپلی دے تھلے ، میں چھنکائیاں ونگاں۔۔ (گلوکارہ نورجہاں ، فلم لاڈو 1965)
• ڈنگ پیار دا سینے تے کھا کے۔۔ (گلوکارہ نورجہاں ، فلم لاڈو 1965)
• کی بھروسہ دم دا اے دنیا فانی۔۔ (گلوکارہ مالا ، مسعودرانا ، فلم لاڈو 1965)
• چوڑا میری بانہہ دا چھنک دا اے چھن۔۔ (گلوکار نسیم بیگم ، آئرن پروین ، فلم میدان 1968)
• مٹھی پے گئی چن تاریاں دی لوہ۔۔ (گلوکارہ نورجہاں ، فلم بدلہ 1968)
• جان من ، اتنا بتا دو ، محبت ہے کیا۔۔ (گلوکارہ رونالیلیٰ ، فلم کمانڈر 1968)
• میرا محبوب ہے کہ جان بہار آیا ہے۔۔ (گلوکارہ رونالیلیٰ ، مسعودرانا ، فلم کمانڈر 1968)
• جواب دے ، بے وفا زمانے۔۔ (گلوکارہ نورجہاں ، فلم کمانڈر 1968)
• آنکھوں میں اشک ، درد ہے دل میں بسا ہوا۔۔ (گلوکار مسعودرانا ، فلم کمانڈر 1968)
• مل گئی ٹھنڈک نگاہوں کو تیرے دیدار سے۔۔ (گلوکارہ نورجہاں ، فلم زندگی 1968)
• کچھ آہیں ہیں ، کچھ آنسو ہیں۔۔ (گلوکار مہدی حسن ، فلم زندگی 1968)
• اللہ دی سونہہ ، تو نئیں دسدا۔۔ (گلوکارہ نورجہاں ، فلم سو دن چور دا 1968)
• تیرے پیار دا میں کیتا اقرار۔۔ (گلوکارہ نورجہاں ، مجیب عالم ، فلم رنگوجٹ 1970)
• عزت والیو ، اج میں تاتھوں پچھ کے راں کی اک سوال۔۔ (گلوکارہ نورجہاں ، فلم ٹیکسی ڈرائیور 1970)
• چل چلیے ، دنیا دی اوس نکرے۔۔ (گلوکار نورجہاں ، مہدی حسن ، فلم دنیا پیسے دی 1971)
• جدوں وی کوئی پیار کرن دی حامی بھردا۔۔ (گلوکارہ نورجہاں ، فلم دنیا پیسے دی 1971)
• اٹھ وے مناواں تینوں ناچ وکھاواں۔۔ (گلوکارہ نورجہاں ، فلم دنیا پیسے دی 1971)
• میں کھولاں کہیڑی کتاب نوں ، میں کہیڑا سبق پڑھاں۔۔ (گلوکارہ مالا ، فلم بابل 1971)
• تو پھل تے میں خوشبو ، تیری میری اک جندڑی۔۔ (گلوکارہ رونالیلیٰ ، فلم بابل 1971)
• میرا دلبر ، میرا دلدار توں ویں۔۔ (گلوکارہ تصور خانم ، فلم جاگدے رہنا 1972)
• تیرے پچھے پچھے آنا ، اسان پیار نبھانا۔۔ (گلوکار مہدی حسن ، نورجہاں ، فلم نظام 1972)
• سجناں دی دید لئی ، مرنا قبول اے۔۔ (گلوکار مہدی حسن ، نورجہاں ، فلم نظام 1972)
• وے چھڈ میری وینی نہ مروڑ ، کچ دیاں ونگاں نہ توڑ۔۔ (گلوکارہ نورجہاں ، فلم ضدی 1972)
• تیرے نال نال وے میں رہنا ، میں تیرے ہان دی۔۔ (گلوکارہ نورجہاں ، فلم ضدی 1972)
• اکھیاں وے راتیں سون نہ دیندیاں۔۔ (گلوکارہ نورجہاں ، فلم ضدی 1972)
• وے تو آنا سی ، تو نئیں آیا ، سانوں تیری یاد ستاندی۔۔ (گلوکارہ نورجہاں ، فلم شہنشاہ 1974)
• جوگی آیا ، دوارے تیرے ، کن وچ پا کے مندراں۔۔ (گلوکار شوکت علی ، فلم شریف بدمعاش 1975)
• امیروں کے خدا ، تو ہی غریبوں کا خدا ہے۔۔ (گلوکار مسعودرانا ، فلم بدل گیا انسان 1975)
• یہ سفر تیرے میرے پیار کا۔۔ (گلوکار مہدی حسن ، فلم شیشے کا گھر 1978)
• امی دی میں پیاری ، بابل تیری میری چھو۔۔ (گلوکار مہناز ، مہدی حسن ، فلم قسمت 1985)
• جب بھی تیرا نام لیا ، پہلے کہا بسم اللہ۔۔ (گلوکار مہرعلی ، شیر علی قوال ، فلم اچھا شوکر والا 1992)

Masood Rana & Abdullah:

0 joint Online films

Masood Rana & Abdullah:

Total 18 joint films