مسعودرانانے اپنے فلمی کیرئر کا آغاز کراچی سے کیا تھا لیکن دستیاب معلومات کی حد تک ان کی چھ سو سے زائد فلموں میں سے صرف 15 فلمیں ایسی ملتی ہیں جو کراچی میں بنی تھیں۔ ان فلموں میں سے 14 اردو اور ایک سندھی فلم تھی۔

کراچی میں پہلی فلم ہماری زبان ، 1955ء میں بنائی گئی تھی۔ ستر کی دھائی کے شروع تک وہاں فلمیں بنتی رہیں لیکن پھر پٹھانوں اور اردو بولنے والوں میں کشیدہ تعلقات کی وجہ سے کراچی میں فلمسازی کا ماحول اتنا پراگندہ ہوا کہ پھر کئی دھائیوں تک کراچی میں اکا دکا فلمیں ہی بنیں۔

مسعودراناکی پہلی فلم انقلاب (1962) بھی کراچی میں بنائی گئی تھی لیکن باقی ملک میں کبھی ریلیز نہ ہوسکی تھی۔ اس فلم کا تھیم سانگ

• مشرق کی تاریک فضا میں نیا سویرا پھوٹا ہے۔۔

1960ء میں ریکارڈ ہوا تھا۔ یہ گیت اس وقت کے فوجی آمر جنرل ایوب خان کی مدح سرائی میں گایا گیا ایک پروپیگنڈہ گیت تھا جو مسعودراناا کا پہلا فلمی گیت شمار ہوا۔ ملک گیر پہچان انھیں فلم بنجارن (1962) سے ملی جس کے گیت سنتے ہی انھیں لاہور سے بلاوا آگیا تھا۔ اس طرح مسعودرانا کو اپنے ساتھی گلوکاروں ، احمدرشدی ، مہدی حسن اور اخلاق احمد کے برعکس کامیابی کے لیے زیادہ انتظار نہیں کرنا پڑا تھا۔

(27 اردو گیت ... 2 پنجابی گیت )