اطہر شاہ خان جیدی

ممتاز فنکار جناب اطہر شاہ خان المعروف مسٹر جیدی طویل علالت کے بعد10 مئی 2020ء کو انتقال کر گئے۔ (انا للہ وانا الیہ راجعون)

پاکستان ٹیلی ویژن پر انھوں نے بے شمار ڈرامے لکھے لیکن مسٹر جیدی کا جو لازوال کردار تخلیق کیا وہ ان سب ڈراموں پر ہمیشہ حاوی رہا اور ان کی شخصیت کا ایک مستقل حصہ بن گیا تھا۔

انھوں نے متعدد فلموں میں بطور مصنف ، نغمہ نگار ، مکالمہ نگار ، ہدایتکار اور اداکار بھی کام کیا لیکن کامیاب نہیں ہوئے۔ بطور معاون ہدایتکار ان کی پنجابی فلم منجی کتھے ڈاہواں (1974) میں مسعودرانا کے یہ دو گیت تھے:

• حسن دا غرور میری توبہ ، آیا سرور میری توبہ..
• میں تے گاواں گا ، کوئی ہسے پاویں روئے ، غصے ہوندا اے ہووے..

مجھے اطہر شاہ خان خاص طور پر ایک مقبول عام ریڈیو پروگرام "رنگ ہی رنگ ، مسٹر جیدی کے سنگ" کے حوالے سے یاد ہیں جسے وہ مسٹرجیدی کے انداز میں پیش کرتے تھے۔

مسعودرانا کا ایک ریڈیو انٹرویو

اس کمرشل پروگرام میں وہ مختلف فنکاروں کے انٹرویوز پیش کرتے تھے اور زندگی میں پہلی بار اسی پروگرام میں مسعودرانا صاحب کا ایک انٹرویو سننے کا موقع ملا تھا۔

مجھے اچھی طرح سے یاد کہ اس انٹرویو سے قبل مسٹر جیدی اپنے مخصوص انداز میں ان کا مشہور زمانہ گیت "تیرے بنا یوں گھڑیاں بیتیں۔۔" گاتے ہیں اور آخری الفاظ ادا کرتے ہوئے ان کی آواز بیٹھ جاتی ہے۔

وہ ، رانا صاحب سے یہ سوال پوچھتے ہیں کہ وہ ہر گیت اتنی اونچی سروں میں کیوں گاتے ہیں؟

جواب میں مسعودرانا ، انھیں بتاتے ہیں کہ موسیقار جیسی دھن بناتا ہے ، اسی کے مطابق گانا پڑتا ہے۔

اسی انٹرویو میں مجھے پہلی بار معلوم ہوا تھا کہ مسعودرانا نے 1955ء میں ریڈیو پاکستان حیدرآباد میں پہلی بار گائیکی کی تھی اور انقلاب (1962) ان کی پہلی فلم تھی۔