اداکارہ سلمیٰ ممتاز نے ماضی میں سماجی موضوعات پر بنائی گئی اصلاحی پنجابی فلموں میں ماں کے کردار میں بے پناہ شہرت حاصل کی تھی۔ پنجابی فلموں میں جب ایکشن فلموں کا دور دورہ ہوا تو وہ پس منظر میں چلی گئی تھیں کیونکہ وہ لاؤڈ ڈائیلاگ نہیں بول سکتی تھیں۔ ہیروئن کا رول نہ کرنے کے باوجود پونے دو سو کے قریب فلموں میں کام کرنے والی اس اداکارہ نے بعض فلموں میں بڑے یادگار کردار کیے تھے۔

فلم دربار (1958) سے فلمی کیرئر کا آغاز کرنے والی سلمیٰ ممتاز کو فلم موج میلہ (1963) سے بریک تھرو ملا تھا۔ اس فلم میں انھوں نے فلم کے ولن مظہرشاہ کی ماں کا رول کیا تھا جو باقی دنیا کے لیے تو خوف کی علامت ہوتا ہے لیکن اپنی ماں کے سامنے بھیگی بلی بن جاتا ہے۔ اس فلم میں سلمیٰ ممتاز کے پس منظر میں سلیم رضا کا یہ تھیم سانگ بڑا پراثر تھا "ربا ، کی سوچ کے بنایا ای دل ماں دا۔۔" فلم ہتھ جوڑی (1964) بھی سلمیٰ ممتاز کی کردار نگاری کی وجہ سے ایک یادگار فلم تھی۔

مسعودرانا کے ساتھ سلمیٰ ممتاز کی پہلی فلم پلپلی صاحب (1965) تھی جس میں ان کے فلمی بیٹے اکمل پر فلمایا ہوا یہ شاہکار گیت ماں کے موضوع پر گائے ہوئے مسعودرانا کے دو درجن کے قریب گیتوں میں سے ایک تھا:

• نئیں بھکھا شہر گراں دا ، نئیں چاہ زلفاں دی چھاں دا
  میں تیتھوں ربا میریا ، سکھ منگناں دکھی ماں دا۔۔

حزیں قادری کے لکھے ہوئے اس گیت کا ایک ایک بول موتیوں میں تولنے کے برابر ہے جس میں ماں جیسے مقدس رشتے کی قدرومنزلت بیان کی گئی ہے۔ ایک فرمانبردار بیٹا یہ اعلان کرتا ہے کہ وہ اپنی ماں کے لیے دنیا بھر کے آرام اور دولت کو قربان کر سکتا ہے۔ میرے لیے ایسے گیتوں کی اہمیت دیگر سبھی اصناف سے زیادہ رہی ہے اور یہی جذبہ اس سلسلے کو جاری رکھنے پر مجبور کرتا ہے۔ موسیقار بابا چشتی نے اس گیت کو فلم کے تھیم سانگ کے طور پر استعمال کیا تھا اور اسی گیت کو فلم کے کلائمکس کے طور پر آئرن پروین اور مسعودرانا سے گوایا تھا جبکہ ایک اور دوگانے "اے محفل دلداراں دی۔۔" میں بھی اس گیت کا حوالہ ملتا ہے جو ایک منفرد سی بات ہے۔ اسی فلم میں مسعودرانا نے پہلی بار سلمیٰ ممتاز کے پس منظر میں ہیر وارث شاہ سٹائل میں یہ بول گائے تھے "کھلی اکھ تے لکھ کروڑ سوچاں۔۔"

سلمیٰ ممتاز نے یوں تو بہت سی فلموں میں کام کیا تھا لیکن ہدایتکار ایم جے رانا کی فلم جگ بیتی (1968) میں ان کا کردار بڑا یادگار تھا۔ ہمارے معاشرے میں ہر جگہ ایسی عورتیں ہوتی تھیں جو اس کردار کی جیتی جاگتی تصویر ہیں۔ ہر وقت سر باندھے ، مصنوعی بیماری کا رونا روتے اور خاص طور پر اپنی بہو اور اس کے پچھلوں کو کوستے ہوئے "اک نہ روے نی پیکیاں دا۔۔" کا تکیہ کلام رکھتے ہوئے دن گزار دیتی ہیں۔ جب اس کی معصوم پوتی کھیلتے ہوئے نقل اتارتی ہے تھی اس کا غصہ قابل دید ہوتا ہے۔ فلم ہمراہی (1966) ، روٹی اور چن مکھناں (1968) وغیرہ میں ماں کے جذباتی کرداروں میں بڑا گہرا اثر کرتی تھیں۔ سلمیٰ ممتاز نے فلم ہیرسیال (1965) اور فلم ہیررانجھا (1970) میں ہیر کی ماں کے یادگار رول بھی کیے تھے۔

سلمیٰ ممتاز نے بطور فلمساز اور ہدایتکار بھی چند فلمیں بنائی تھیں جن میں پتردا پیار (1972) بڑی یادگار فلم تھی۔ اس فلم میں سدھیر کے ساتھ ان کی کردارنگاری بڑی یادگار تھی۔ مسعودرانا کا گایا ہوا تھیم سانگ:

• ہووے جداں پیراں ہیٹھاں جنتاں دی چھاں
  اوس پیارے رشتے نوں سارے کہندے ماں۔۔

بڑا سبق آموز تھا۔ دلچسپ بات یہ ہے کہ اس فلم کو پشتو میں بھی ڈب کر کے پیش کیا گیا تھا اور مسعودرانا کے اس گیت کو اسی دھن میں پشتو میں سننا بڑا زبردست تجربہ تھا۔ ان کی دیگر فلموں میں میری دھرتی میرا پیار (1970) ، بے اولاد (1975) اور ملتان خان (1979) بھی تھیں۔ فلم وریام (1969) میں سلمیٰ ممتاز کو ایک شاہکار گیت کی صورت میں یہ خراج تحسین پیش کیا گیا تھا:

• اے ماں ، پیاری ماں
  ساڈی بُلیاں توں پھل کھڑدے نیں ، جد لینے آن تیرا ناں۔۔

یہ لازوال گیت اسمعٰیل متوالا کا لکھا ہوا تھا جس کی دھن غلام حسین شبیر نے بنائی تھی اور مسعودرانا اور منیر حسین کی دلکش آوازوں میں وقت کے سپرسٹارز سدھیر اور حبیب پر فلمایا گیا تھا۔

سلمیٰ ممتاز نے اسی کے عشرہ تک فلموں میں کام کیا تھا۔ اس دوران فلم غریب دا بال (1978) میں منورظریف کے چھوٹے بھائی مجید ظریف کو نیلو کے مقابل ہیرو کے طور پر پیش کیا گیا تھا۔ موسیقار مشتاق علی نے اس فلم میں بھی مسعودرانا سے ماں کے موضوع پر یہ گیت گوایا تھا "ماواں ٹھنڈیاں چھاواں۔۔" جو سلمیٰ ممتاز کے لیے گایا گیا تھا۔

سلمیٰ ممتاز کی چھوٹی بہن اداکارہ شمی ، اداکار سدھیر کی بیوی تھی جبکہ ٹی وی اداکارہ نداممتاز ان کی بیٹی تھی۔ سلمیٰ ممتاز کا انتقال 2012ء میں ہوا تھا۔

(0 اردو گیت ... 2 پنجابی گیت )