رضا میر
پاکستان کی پہلی فلم
کے عکاس تھے

رضا میر ، پاکستان کی پہلی فیچر فلم تیری یاد (1948) کے عکاس تھے۔۔!

بہت سی فلموں کی عکاسی کے بعد انھوں نے پہلی بار فلم بیٹی (1964) کی ڈائریکشن دی تھی جو ایک انتہائی قابل تعریف فلم تھی۔

اس فلم میں انھوں نے ایک معصوم بچی گٹو سے اتنی عمدہ اداکاری کروائی تھی کہ فلم بین حیران رہ گئے تھے۔

ایک ہدایتکار ، فلم کا ناخدا ہوتا ہے اور کسی بھی فلم کی خوبی یا خامی کا براہ راست ذمہ دار ہوتا ہے۔ رضا میر صاحب نے اپنے عکاسی کے تجربات سے فائدہ اٹھاتے ہوئے اپنی خداداد صلاحتیوں کا بھر پور مظاہرہ کیا تھا۔ اصولاَ ہر فلم کا عکاس یا ڈائریکٹر آف فوٹوگرافی ، فلم کے ہدایتکار کو ہونا چاہئے کیونکہ کیمرے کا اینگل جو کچھ دیکھتا ہے ، وہی کچھ ایک فلم بین بھی دیکھتا ہے اور ایک ہدایتکار کو اس کا بخوبی علم ہونا چاہئے کہ فلم بین کیا دیکھ رہا ہے۔ رضا میر صاحب میں یہ فنی خوبی بدرجہ اتم موجود تھی۔

مسعودرانا کا پہلا اردو تھیم سانگ

فلم بیٹی کی خاص بات اس فلم کا تھیم سانگ تھا:

• ایسے بھی معصوم ہیں اس دنیا میں جانے کتنے ، جن کا جرم نہیں ہے کوئی ، پھر بھی لوگ سزا دیتے ہیں..

مسعودرانا کی دلکش اور پر اثر آواز میں یہ کسی بھی اردو فلم میں گایا ہوا پہلا پہلا تھیم سانگ تھا جس کی فلمی ناقدین نے دل کھول کر تعریف کی تھی۔ اس سے قبل اسی سال کی پنجابی فلم بھرجائی میں اپنا پہلا تھیم سانگ گا چکے تھے۔

اگلے تیس برسوں تک اس شعبہ میں مسعودرانا کا کوئی ثانی نہیں تھا اور وہ اردو اور پنجابی فلموں کے ٹائٹل اور تھیم سانگ گانے کے لیے موسیقاروں ، فلمسازوں اور ہدایتکاروں کا پہلا انتخاب ہوتے تھے۔

رضا میر کی کلاسیک فلم لاکھوں میں ایک (1967)

رضا میر کی دوسری فلم لاکھوں میں ایک تھی جس کے پروڈیوسر بھی وہ خود تھے۔

یہ پاکستان کی آل ٹائم ٹاپ ٹین فلموں میں سے ایک ہے۔ ہندو مسلم لو سٹوری جیسے نازک موضوع پر بننے والی اس لاجواب فلم کا ہر شعبہ با کمال تھا۔ خصوصاَ فلم کی موسیقی سدا بہار تھی اور میڈم نورجہاں نے

• چلو اچھا ہوا تم بھول گئے۔۔
• بڑی مشکل سے ہوا تیرا میرا ساتھ پیا۔۔
• سن ساجنا ، دکھی من کی پکار۔۔

جیسے امر گیت گا کر اپنی عظمت کی دھاک بٹھا دی تھی جبکہ نثاربزمی نے اس فلم کے بعد رضا میر کی فلم ناگ منی (1972) جیسی سدا بہار نغماتی فلم کی کارکردگی سے اپنا نام عظیم موسیقاروں کی صف میں شامل کروا لیا تھا ۔

رضا میر کی دیگر فلمیں

بطور ہدایتکار رضا میر کی دیگر فلمیں آسرا ، انیلا (1969) ، پرائی آگ (1971) ، وچھڑیا ساتھی (1973) ، آرزو ، پروفیسر (1975) ، سوہنی مہینوال (1976) ، دل کے داغ (1978) ، پوستی (1981) اور انہونی (1993) تھیں۔ ان کے علاوہ وہ فلم مرزا جٹ (1982) اور اشتہاری مجرم (1995) کے فلمساز بھی تھے۔

رضا میر کا پس منظر

رضا میر ، جوانی میں انتہائی خوبرو اور پرکشش شخصیت کے مالک تھے اور بتایا جاتا ہے کہ ماضی کی سکینڈل گرل مینا شوری کے شکاروں میں سے ایک تھے۔ وہ ، معروف فلم اور ٹی وی اداکار آصف رضا میر کے والد تھے اور موجودہ دور کے اداکار اور گلوکار احد میر کے دادا تھے۔ ان کا انتقال 16 ستمبر 2002ء کو ہوا تھا۔