موسیقار ناشاد
کو اپنی جنم بھومی بھارت میں
کامیابی نہیں ملی تھی

موسیقار ناشاد

پاکستانی فلمی موسیقی کا ایک بہت بڑا نام ، موسیقار ناشاد کا تھا جن کے کریڈٹ پر بڑی تعداد میں سپرہٹ گیت تھے۔۔!

موسیقار ناشاد کو موسیقار نثار بزمی کی طرح اپنی جنم بھومی بھارت میں کامیابی نہیں ملی تھی لیکن پاکستان آتے ہی ان کی قسمت کا ستارہ چمک اٹھا تھا اور ناکامیاں ، کامیابیوں میں بدل گئی تھیں۔

ناشاد نے 1947ء سے 1962ء تک کے 16 برسوں میں 30 بھارتی فلموں میں موسیقی دی تھی۔ چند ایک فلموں اور گیتوں کے علاوہ وہ کسی قابل ذکر کارکردگی کا مظاہرہ نہیں کر پائے تھے۔ صرف دو گیت سپرہٹ ہوئے تھے جن میں فلم بارہ دری (1955) میں "بھلا نہیں دینا جی ، بھلا نہیں دینا ، زمانہ خراب ہے۔۔" (لتا منگیشکر اور محمدرفیع) اور "تصویر بناتا ہوں ، تصویر نہیں بنتی۔۔" (طلعت محمود)۔

ناشاد کی بھارتی فلمیں

ریکارڈز کے لیے ناشاد کی تمام بھارتی فلموں کی فہرست کچھ اس طرح سے ہے:

دلدار (1947) ، ٹوٹے تارے ، سہاگ ، جینے دو (1948) ، دادا ، آیئے (1949) ، رام بھروسے ، غضب (1951) ، نغمہ ، چار چاند (1953) ، دروازہ (1954) ، شہزادہ ، سب سے بڑا روپیہ ، شہزادہ ، جواب ، بارہ دری ، آوارہ شہزادی (1955) ، جلاد (1956) ، بڑا بھائی (1957) ، زندگی یا طوفان ، محفل ، ہتھکڑی ، ذرا بچ کے (1958) ، قاتل (1960) ، فلائٹ ٹو آسام ، پیار کی داستان (1961) ، روپ لیکھا (1962) ، مایا محل (1963) ، میں ہوں جادوگر ، میں ہوں فلائنگ مین (1965)

ناشاد اور نوشاد

دہلی میں 1923ء میں پیدا ہونے والے شوکت ہاشمی کو بھارتی فلم نغمہ (1953) کے ہدایتکار نخشب نے 'ناشاد' کا نام دیا تھا اور انھیں موسیقار نوشاد کا نعم البدل بنانے کی کوشش کی گئی تھی لیکن ناشاد ، نوشاد نہ بن سکے اور مسلسل ناکامیوں سے تنگ آکر پاکستان ہجرت کرنے پر مجبور ہوگئے تھے۔

ناشاد کی پاکستان میں کامیابیاں

موسیقار ناشاد کی پہلی فلم میخانہ (1964)

پاکستان میں ناشاد کا شمار چوٹی کے موسیقاروں میں ہوتا تھا۔ پہلی فلم مہ خانہ (1964) تھی جس کے فلمساز اور ہدایتکار نخشب تھے جن کی ترغیب پر وہ بھارت چھوڑ کر پاکستان چلے آئے تھے۔ آخری فلم بدنام (1980) کی موسیقی ترتیب دی تھی۔

ناشاد نے 1964ء سے 1980ء کے 17 برسوں میں 63 فلموں میں چار سو سے زائد فلمی گیت کمپوز کیے جن میں سے بے شمار سپرہٹ گیت تھے۔ ان کے مشہور زمانہ گیتوں کی ایک فہرست مضمون کے آخر میں دی گئی ہے۔

ناشاد ،نثار بزمی ، سہیل رعنا اور روبن گھوش کی طرح صرف اردو فلموں کے موسیقار تھے۔ 1981ء میں ان کا انتقال ہو گیا تھا۔ موسیقار واجد علی ناشاد ، ان کے آٹھ بیٹوں میں سے ایک تھے۔ فلم چوڑیاں (1998) کے مشہور زمانہ گیت "کراں میں نظارا ، جدوں اوہدی تصویر دا۔۔" گانے والے امیرعلی بھی ان کے بیٹے تھے۔ ناشاد کے بارے میں ایک تفصیلی مضمون ، پاکستان فلم میگزین کے سابقہ ورژن میں لکھا جا چکا ہے جسے یہاں دھرانا ضروری نہیں۔

ناشاد اور مسعودرانا کا ساتھ

موسیقار ناشاد نے مسعودرانا کے لیے ڈیڑھ درجن گیت کمپوز کیے تھے۔ ان کا پہلا ساتھ فلم پھر صبح ہوگی (1967) کے ٹائٹل اور تھیم سانگ سے ہوا تھا۔ سب سے یادگار گیت "میرے دل کی ہے آواز کہ بچھڑا یار ملے گا۔۔" تھا جو ہدایتکار ایم صادق اور حسن طارق کی سپرہٹ فلم بہارو پھول برساؤ (1972) کے لیے ریکارڈ ہوا تھا۔ یہ گیت وحیدمراد پر فلمایا گیا تھا۔

مجھے اچھی طرح سے یاد ہے کہ 1983ء میں وحیدمراد کے اچانک انتقال کے بعد اس فلم نے لاہور میں گولڈن جوبلی منائی تھی۔ یہ ایک غیر معمولی کامیابی تھی کیونکہ وہ فلموں کا سلطانی دور تھا جس میں ایکشن پنجابی فلموں کا راج ہوتا تھا۔ میں ان دنوں یہاں کوپن ہیگن کی سب سے بڑی لائبریری میں بلاناغہ حاضری دیا کرتا تھا جہاں روزنامہ نوائے وقت لاہور سے فلموں کی نمائش کے ریکارڈز بھی نوٹ کیا کرتا تھا۔

ناشاد کی فلم بہارو پھول برساؤ (1972)

موسیقار ناشاد کی ایک نغمہ بار فلم بہارو پھول برساؤ (1972)

فلم بہارو پھول برساؤ (1972) میں میڈم نورجہاں کے دو گیت "یہ گھرمیرا گلشن ہے ، گلشن کا خدا حافظ۔۔" اور "چندا رے چندا ، کچھ تو ہی بتا میرا افسانہ۔۔" کے علاوہ شوکت علی ، آئرن پروین ، تصورخانم اور ساتھیوں کی یہ قوالی بھی بڑی مشہور ہوئی تھی "اے محبت تیرا جواب نہیں ہے۔۔" لیکن ان سبھی گیتوں پر مسعودرانا کا تھیم سانگ "میرے دل کی ہے آواز کہ بچھڑا یار ملے گا۔۔" بھاری ثابت ہوا تھا جو اس فلم کی پہچان بن گیا تھا۔ یہ گیت سنتے ہی میری بہت سی یادیں تازہ ہوجاتی ہیں جن کا آج ذکر ہوگا۔

یہ فلم بہارو پھول برساؤ (1972) ہی تھی جس کی میں نے صرف دس سال کی عمر میں پہلی سینما سلائیڈ لکھی تھی اور انعام کے طور پر سینما مالک نے مجھے اپنے ساتھ بٹھا کر فلم افسانہ زندگی کا (1972) دکھائی تھی۔ مجھے یاد ہے کہ 'بہارو پھول' پہلی لائن اور 'برساؤ' دوسری لائن میں لکھ دیا تھا جس پر سینما مالک نے مسکرا کر کہا تھا "بیٹا ، آپ لکھتے تو بہت اچھا ہیں لیکن ابھی بڑا تجربہ چاہیئے۔۔" مجھے بھی اسی وقت اندازہ ہوگیا تھا کہ فلم کا پورا نام ایک ہی لائن میں لکھنا چاہیئے تھا لیکن وہ بچپن تھا اور ناتجربہ کاری تھی۔

میرے دل کی ہے آواز کہ بچھڑا یار ملے گا

فلم بہارو پھول برساؤ (1972) میں مسعودرانا کا یہ مشہور زمانہ گیت "میرے دل کی ہے آواز کہ بچھڑا یار ملے گا۔۔" اکثر ریڈیو پر بجتا تھا اور مجھے زبانی یاد ہوگیا تھا۔ مجھے گانے کی عادت تھی اور بعض اوقات بے خیالی میں بھی گانے لگتا تھا۔ شاید یہی وجہ تھی کہ ایک دن والدصاحب (مرحوم) نے سن لیا اور حکم دیا کہ "پورا گیت سناؤ۔۔" میں نے زندگی بھر کبھی والد محترم سے آنکھ سے آنکھ ملا کر بات نہیں کی تھی لیکن نجانے اس دن اتنا حوصلہ کہاں سے آگیا تھا کہ میں نے انھیں یہ پورا گیت گا کر سنا دیا تھا۔ مجھے یاد ہے کہ اس گیت کے ایک انترے میں یہ بول تھے "بھٹک رہا ہوں صحرا صحرا۔۔" لیکن نجانے کیوں 'صحرا صحرا' کو 'تہرا تہرا' پڑھتا تھا۔ والد صاحب نے میری اصلاح کی تھی اور کسی قسم کی ڈانٹ ڈپٹ نہیں کی تھی کہ یہ گانے بجانے کا کام تم نے کہاں سے شروع کر دیا ہے۔۔؟

نغمہ نگار شیون رضوی کا لکھا ہوا یہ امر گیت "میرے دل کی ہے آواز کہ بچھڑا یار ملے گا۔۔" جب ریڈیو پر بجتا تھا تو دادا جان مرحوم و مغفور دھاڑیں مار مار کر روتے تھے۔ والدصاحب ان دنوں بیرون ملک تھے جن کی جدائی میں وہ بہت تڑپتے تھے اور ہر وہ گیت جو ہجر کی کیفیت بیان کرتا تھا ، اس پر ان کے جذبات بڑے شدید ہوتے تھے۔

مجھے تین گیتوں کا یاد ہے۔ ایک گیت عنایت حسین بھٹی کا ہوتا تھا "پچھ پچھ ہاریاں ، اکھیاں دل توں ، ہوسی کدوں دیدار ، دلبر ملسی ، کہیڑے وار۔۔" (فلم دل نال سجن دے 1972)۔ باقی دونوں گیت مسعودرانا کے ہوتے تھے جن میں ایک "تیرے بنا یوں گھڑیاں بیتیں ، جیسے صدیاں بیت گئیں۔۔" (فلم آنسو 1971) اور دوسرا یہ گیت تھا "میرے دل کی آواز کہ بچھڑا یار ملے گا۔۔" (بہارو پھول برساؤ 1972)۔ یہ آخری گیت انھیں زیادہ پسند تھا۔ یہی وجہ تھی کہ جب میں دسمبر 1973ء میں پہلی بار ڈنمارک آیا تھا تو انھیں لکھے جانے والے ہر خط کے آخر میں اس گیت کے بول ضرور لکھتا تھا۔ اس بات سے بے خبر کہ داداجان کے علاوہ کوئی اور بھی میرے جذبات سے متاثر ہو رہا ہے۔

موسیقار ناشاد کی ایک نغماتی فلم جلوہ (1966)

دسمبر 1976ء میں جب میں دوبارہ پاکستان گیا تو میری ایک 'چاچی' ہوتی تھی جس نے اپنی پہلی ہی ملاقات میں یہ اعتراض کیا کہ میں اسے 'یار' کیوں لکھتا تھا؟ میں بڑا حیران ہوا کہ یہ گستاخی میں نے کب کی تھی؟ جب پتہ چلا کہ وہ دادا جان کا خط لکھتی پڑھتی تھی تو بڑی مشکل سے اسے مطمئن کیا تھا کہ میں یہ گیت اس کے لیے نہیں بلکہ صرف اپنے دادا جان کے لیے لکھتا تھا۔

اصل میں میری 'چاچی' سے پرانی شناسائی تھی۔ وہ جب سے بیاہ کر ہمارے محلے میں آئی تھی ، اپنی موجودگی کا بھرپور احساس دلایا کرتی تھی۔ وہ ایک 'جانو کپتی' قسم کی عورت ہوتی تھی۔ کون تھا جس سے اس کی تُو تُو ، میں میں نہیں ہوتی تھی۔ محلے کے جن گھروں سے لڑائی مارکٹائی کا شوروشرابا اکثر سنائی دیتا تھا ، چاچی کا گھر ان میں سے ایک ہوتا تھا۔ چاچی کی تندمزاجی کی وجہ سے بچپن میں وہ مجھ جیسے شرارتی بچوں کے لیے ایک آئیڈیل ٹارگٹ ہوتی تھی۔

ان دنوں گھروں کے دروازے سارا دن کھلے رہتے تھے جنھیں لوگ صرف رات کو سونے سے قبل ہی بند کرتے تھے۔ میں جب بھی گلی میں سے گزرتے ہوئے چاچی کے گھر تک پہنچتا تو ہمیشہ جھانک کر دیکھتا کہ وہ کیا کر رہی ہے۔ اگر نظر آجاتی تو کوئی نہ کوئی فقرہ کستا۔ عام طور پر یہ گیت تو ضرور گنگناتا تھا "میری چاچی دا چھلا ماہی لاہ لیا ، گھر جاکے شکایت لاوے گی۔۔" وہ جس حال میں بھی ہوتی ، مشتعل ہوکر مجھے پکڑنے کے لیے میرے پیچھے بھاگتی لیکن میں بھلا کہاں پکڑائی دیتا۔ وہ تھک ہار کر میری شکایت ، داداجان کے پاس لے کر جاتی۔ وہ اس کا مقدمہ بڑے غور اور صبروتحمل سے سنتے اور وعدہ کرتے کہ اب کی بار میرے کان ضرور کھینچیں گے۔ چاچی کے ساتھ شرارتوں کا وہ سلسلہ میری جلاوطنی تک جاری رہا۔

ناشاد اور ملکہ ترنم نورجہاں

جب میں دوبارہ پاکستان گیا تو چاچی کو امید تھی کہ شرارتوں کا سلسلہ وہیں سے شروع ہوگا جہاں سے منقطع ہوا تھا کیونکہ وہ اس کی عادی تھی اور وہ سب کچھ اس کے مزاج کے عین مطابق بھی تھا۔ لیکن ڈنمارک میں قیام کے تین برسوں میں میں بڑا سنجیدہ اور سیانا ہوگیا تھا۔ چاچی سے پہلے والی حرکتیں نہیں کر سکتا تھا۔ میرے مزاح کا انداز ہماری اردو فلموں کے مزاحیہ اداکار لہری صاحب کی طرح کا ہو گیا تھا کہ جن کے بہت سے جملے دوسروں کے سر پر سے گزرجاتے تھے۔ چاچی بھی عام طور پر موٹے مغز والی عورت تھی ، اسے جب تک نقد بہ نقد جواب نہ ملتا ، سمجھ نہ آتی تھی۔

چاچی ، اکثر ہمارے گھر آتی تھی ، والدہ صاحبہ سے اس کی خوب بنتی تھی حالانکہ مزاجاً وہ دو مختلف عورتیں تھیں۔ چاچی ، کثیرالاولاد عورت تھی ، ہر سال نیا ماڈل تیار ہوتا تھا۔ ایسی عورت کی حالت کا اندازہ لگایا جا سکتا ہے۔

ایک دن خلاف معمول بنی سنوری ، نہائی دھوئی ، بال گندھے ہوئے ، آنکھوں میں سرمہ ، لبوں پر سک ملا ہوا اور بڑی ہشاش بشاش تھی۔ میں نے نظر بھر کے دیکھا اور پوچھا "چاچی ، خیر تو ہے ، آج بڑی بنی تنی ہو۔۔"

شرمائی ، لجائی اور آہستہ سے بولی "کیا کروں ، نکاح جو پڑھا ہوا ہے۔۔!"

میری ہنسی چھوٹ گئی۔ توقع تھی کہ وہ بتائے گی کہ کسی شادی یا تقریب میں گئی تھی یا جارہی تھی لیکن اتنے گہرے جواب کی توقع بالکل نہیں تھی۔ چاچی کو شرماتے ہوئے بھی شاید ہی کبھی دیکھا ہوگا۔ بس پھر کیا تھا ، مجھے ایک نئی شرارت ہاتھ لگ گئی۔ اس کے بعد جب وہ آتی تو عام طور پر چاچی کو ایک نظر دیکھتا ، آنکھوں سے سوال کرتا اور ہونٹوں کو سکیڑتا ، گردن ہلاتا اور کندھے اچکا کر بغیر کچھ کہے بہت کچھ کہہ جاتا تھا۔ کچھ دن ایسے ہی گزر جاتے تو پوچھتا "چاچی ، لگتا ہے چاچا سے ابھی صلح نہیں ہوئی۔۔"

چاچی کو آہستہ آہستہ میری باتوں اور باڈی لینگویج کی سمجھ آنا شروع ہوئی تو پھر کیا تھا۔ خوب کوستی ، مزیدار اور لذیز قسم کی گالیاں دیتی۔ خاص طور پر جب اس کے چھوٹے چھوٹے اوپر تلے کے بچے دیکھتا اور ان کی گنتی شروع کرتا تو اس کا برہم ہونا قابل دید ہوتا تھا۔ بڑی دلکش بددعائیں دیتی کہ جب تمہاری شادی ہوگی تو دیکھنا ہر سال ایک ایک نہیں بلکہ دو دو بچے پیدا ہوں گے۔

افسوس کہ اس کی بددعائیں دل سے نہیں نکلتی تھیں ، اسی لیے فضا میں معلق رہتیں اور جب عرصہ چودہ سال بعد چاچی سے ملا تو 'صرف' تین بچوں کا باپ تھا۔ چاچی کو بڑی مایوسی ہوئی اور بولی "بس ، صرف تین بچے۔۔!" میں نے جواباً کہا "چاچی ، اب میں تمہارا ریکارڈ تو نہیں توڑ سکتا تھا۔۔"

چاچی سے جب آخری ملاقات ہوئی تو وہ بڑی لاچاری اور بے بسی کی زندگی گزار رہی تھی۔ ایک کمائی پر سارا کنبہ پل رہا تھا۔ جوان بیٹے پرلے درجے کے ہڈحرام اور بے حس تھے۔ بوڑھا باپ باہر ہوتا تھا ، اس لیے انھیں کام کاج کی کیا ضرورت تھی۔ جوان بیٹیاں گھر بیٹھیں سر کے سفید بال گن رہی تھیں اور چاچی کی جوانی کی تمام تر شوخیاں اور تیزطراریاں اس پرانے ٹرانسسٹر ریڈیو کی طرح ہوگئی تھیں جس کے بیٹری سیل کمزور ہو جاتے تھے۔۔!

فلم افسانہ (1970) کے گیت "یوں کھو گئے تیرے پیار میں ہم۔۔" کی ریکارڈنگ کے دوران موسیقار ناشاد ، گلوکار مجیب عالم ، نغمہ نگار تنویر نقوی اور ہدایتکار لقمان کے ساتھ

ناشاد کے سپرہٹ گیت

موسیقار ناشاد کے بے شمار سپرہٹ گیتوں میں سے چند گیتوں کی فہرست کچھ اس طرح سے تھی:

• جان کہہ کر جو بلایا تو بُرا مان گئے۔۔ (گلوکار سلیم رضا ، فلم مہ خانہ 1964)
• اک اپنا ، اک بیگانہ ، سُن لو دل کا افسانہ۔۔ (گلوکار ناہیدنیازی اور ساتھی فلم مہ خانہ 1964)
• کوئی جا کہ اُن سے کہہ دے ، ہمیں یوں نہ آزمائیں۔۔ (گلوکار مجیب عالم ، فلم جلوہ 1966)
• اُن کی نظروں سے محبت کا جو پیغام ملا۔۔ (گلوکارہ رونا لیلیٰ فلم ہم دونوں 1966)
• پھر صبح ہو گی ، اندھیرے نہیں رُکنے والے۔۔ (گلوکار مسعودرانا فلم پھر صبح ہوگی 1967)
• زخمِ دل چھپا کے روئیں گے ، تجھ کو آزما کے روئیں گے۔۔ (گلوکارہ نسیم بیگم ، فلم رشتہ ہے پیار کا (1967)
• معصوم سا چہرہ ہے ، ہم جس کے ہیں دیوانے۔۔ (گلوکار احمدرشدی ، رونا لیلیٰ ، فلم رشتہ ہے پیار کا1967)
• گوری کے سر پر سج کے ، سہرے کے پھول کہیں گے۔۔ (گلوکار احمدرشدی ، فلم تم ملے پیار ملا (1969)
• آپ کو بھول جائیں ہم ، اتنے تو بے وفا نہیں۔۔ (گلوکار مہدی حسن ، نورجہاں ، فلم تم ملے پیار ملا (1969)
• لے آئی پھر کہاں پر ، قسمت ہمیں کہاں سے۔۔ (گلوکارہ نورجہاں ، فلم سالگرہ 1969)
• میری زندگی ہے نغمہ ، میری زندگی ترانہ۔۔ (گلوکارہ نورجہاں ، فلم سالگرہ 1969)
• تو نے بار بار بار کیا مجھے بیقرار ، جا رے پیا تیرا دیکھ لیا پیار۔۔ (گلوکار مالا ، فلم سزا 1969)
• جب بھی چاہیں اک نئی صورت بنا لیتے ہیں لوگ۔۔ (گلوکار مہدی حسن ، فلم سزا 1969)
• یوں کھو گئے تیرے پیار میں ہم اب ہوش میں آنا مشکل ہے۔۔ (گلوکار مجیب عالم ، فلم افسانہ 1970)
• میں نے اک آشیاں بنایا تھا ، اب بھی شاید وہ جل رہا ہو گا۔۔ (گلوکارہ نورجہاں ، رم جھم 1970)
• خدا کرے کہ محبت میں وہ مقام آئے۔۔ (گلوکار مہدی حسن / نورجہاں ، فلم افشاں 1971)
• وعدے کر کے صنم تو نہ آئے ، پیار کے خوب وعدے نبھائے۔۔ (گلوکارہ رونا لیلیٰ ، فلم اک سپیرا 1971)
• زندگی اپنی گزر جائے گی آرام کے ساتھ۔۔ (گلوکار نورجہاں ، رجب علی ، فلم خاک اور خون 1971)
• الہیٰ ، کوئی ہوا کا جھونکا۔۔ (گلوکار احمدرشدی ، فلم دنیا نہ مانے 1971)
• ہم پہ الزام تو ویسے بھی ہے ، ایسے ہی سہی۔۔ (گلوکارہ نورجہاں ، فلم الزام 1972)
• اک بار چلے آؤ ، پھر آکے چلے جانا۔۔ (گلوکار مہدی حسن ، فلم ایک رات 1972)
• کس نے بجائی ہے یہ بانسریا رے۔۔ (گلوکارہ نورجہاں ، فلم ایک رات 1972)
• میرے دل کی ہے آواز کہ بچھڑا یار ملے گا۔۔ (گلوکار مسعودرانا ، فلم بہارو پھول برساؤ 1972)
• یہ گھر میرا گلشن ہے ، گلشن کا خدا حافظ۔۔ (گلوکارہ نورجہاں ، فلم بہارو پھول برساؤ 1972)
• آج تک یاد ہے وہ ، پیار کا منظر مجھ کو۔۔ (گلوکار مہدی حسن ، فلم سہرے کے پھول 1973)
• زندگی میں تو سبھی پیار کیا کرتے ہیں۔۔ (گلوکار مہدی حسن ، فلم عظمت 1973)
• وہ میرا ہو نہ سکا تو میں برا کیوں مانوں۔۔ (گلوکارہ نورجہاں ، فلم عظمت 1973)
• کسی کا ساتھ مل جائے ، میری تقدیر بن جائے۔۔ (گلوکار احمدرشدی ، فلم فرض 1973)
• اب کس کو سنائیں گے ، اس درد کا افسانہ۔۔ (گلوکار نورجہاں ، مہدی حسن ، فلم نیا سویرا 1973)
• محبت زندگی ہے اور تم میری محبت ہو۔۔ (گلوکار نورجہاں ، مہدی حسن ، فلم تم سلامت رہو (1974)
• کرتے ہیں محبت سب ہی مگر ہر دل کو صلہ کب ملتا ہے۔۔ (گلوکار غلام علی ، فلم تم سلامت رہو 1974)
• اگر تم مل جاؤ ، زمانہ چھوڑ دیں گے ہم۔۔ (گلوکارہ تصورخانم ، فلم ایماندار 1974)
• ہم نے خود چھیڑ لیا پیار کے افسانے کو۔۔ (گلوکارناہیداختر ، مہدی حسن ، فلم دیدار 1974)
• کانٹوں پہ چلتی ہوئی ، آئی تیرے گاؤں میں۔۔ (گلوکارہ نورجہاں ، فلم ساجن رنگ رنگیلا 1975)
• رفتہ رفتہ وہ میری ہستی کا ساماں ہو گئے۔۔ (گلوکار مہدی حسن ، فلم زینت 1975)
• کچھ لوگ محبت کا صلہ مانگ رہے ہیں۔۔ (گلوکارہ نیرہ نور ، فلم گمراہ 1975)
• یہ جھکی جھکی نگاہیں ، انھیں میں سلام کر لوں۔۔ (گلوکار مہدی حسن ، فلم پالکی 1975)
• دل میں طوفاں چھپائے بیٹھا ہوں ، یہ نہ سمجھو کہ مجھ کو پیار نہیں۔۔ (گلوکار مہدی حسن ، فلم نیکی بدی 1975)
• میں ہوں ، راستے کا پتھر ، ہے میرا نصیب ٹھوکر۔۔ (گلوکار اخلاق احمد ، فلم راستے کا پتھر 1976)
• پیار کرنا تو اک عبادت ہے۔۔ (گلوکار نورجہاں / مہدی حسن ، فلم راستے کا پتھر 1976)
• تو میری زندگی ہے تو میری ہر خوشی ہے۔۔ (گلوکار نورجہاں / مہدی حسن ، فلم محبت مر نہیں سکتی 1977)
• یہ ساتھ کبھی نہ چھوٹے گا، جو مر کر بھی نہ ٹوٹے گا۔۔ (گلوکار مہدی حسن ، ناہیداختر فلم ملن 1978)
• تجھ سے مل کر مجھے اکثر یہ گمان ہوتا ہے۔۔ (گلوکار اے نیر ، فلم احتجاج 1978)
• ہم نہ ہوں گے تو ہمیں یاد کرے گی دنیا۔۔ (گلوکار مہ ناز ، فلم ضمیر 1980)

Masood Rana & Nashad:

0 joint Online films

Masood Rana & Nashad:

Total 16 joint films