میاں محمد بخشؒ کا کلام سیف الملوک
گانے میں جو کمال شوکت علی نے حاصل کیا
اسکی مثال ملنا مشکل ہے

طویل علالت کے بعد معروف فوک گلوکار شوکت علی کا 2 اپریل 2021ء کو لاہور میں انتقال ہو گیا۔۔!

شوکت علی ، لوک گائیکی کا ایک بہت بڑا نام تھے۔ انھوں نے اپنے فنی سفر کا آغاز تو فلمی گائیکی سے کیا تھا لیکن شہرت ریڈیو اور ٹی وی کے بعد ایک عہد ساز لوک فنکار کے طور پر ملی تھی۔

شوکت علی کی سیف الملوک

شوکت علی کو بطور خاص ، پنجابی زبان کے عظیم صوفی شاعر میاں محمد بخشؒ کا روحانی کلام سیف الملوک گانے میں جو کمال حاصل تھا ، وہ کبھی کسی اور گلوکار کے حصہ میں نہیں آیا تھا۔ وہ غزل ، گیت ، ترانے اور پنجابی لوک گیتوں کی مختلف اصناف گانے میں بھی ایک خاص مقام رکھتے تھے۔

شوکت علی کی پہلی فلم

شوکت علی کی پہلی فلم تیس مار خان بتائی جاتی رہی ہے لیکن پاکستان فلم ڈیٹا بیس کے مطابق ان کی ریلیز ہونے والی پہلی فلم ماں کے آنسو تھی جو 15 مارچ 1963ء کو ریلیز ہوئی تھی۔ اس اردو فلم میں شوکت علی نے ایک تھیم سانگ گایا تھا "نہ رہا کوئی سہارا ، نہ رہا کوئی ٹھکانا۔۔"

پلے بین سنگر

دلچسپ بات یہ ہے کہ خود موصوف بھی اپنے اس گیت اور فلم کے بارے میں یہی سمجھتے رہے ہیں کہ ان پر پابندی لگ گئی تھی اور ازراہ تفنن خود کو "پلے بین سنگر" کہتے تھے۔ لیکن یہ فلم نہ صرف ریلیز ہوئی تھی بلکہ سپر ہٹ بھی ہوئی تھی۔ نیر سلطانہ ، اس فلم کی ہیروئن تھیں جو عام طور پر جذباتی اداکاری میں بے مثل اداکارہ تھیں لیکن اس فلم میں انھوں نے شوخ اداکاری کر کے فلم بینوں کو حیران کر دیا تھا۔

شوکت علی کا سپرہٹ فلمی گیت

شوکت علی کو فلموں میں وہ کامیابی نہیں مل سکی تھی جو انھیں لوک فنکار کے طور پر ملی تھی۔ اس کی بنیادی وجہ یہ تھی کہ ان کی آواز ایک مخصوص ٹائپ کی آواز تھی جو فلمی گائیکی کے لیے موزوں نہیں تھی۔

تیس سالہ فلمی کیرئر میں ان کی فلموں کی تعداد سو سے بھی کم اور گیتوں کی تعداد بمشکل سوا سو کے لگ بھگ ہے ۔ ان میں مقبول عام گیتوں کی تعداد بہت کم تھی۔

ان کا گایا ہوا سب سے سپر ہٹ فلمی گیت فلم اک ڈولی دو کہار (1972) میں تھا "کیوں دور دور رہندے او ، حضور میرے کولوں۔۔" تھا۔

جاگ اٹھا ہے سارا وطن

شوکت علی کی ایک بہت بڑی پہچان 1965ء کی جنگ کا مشہورزمانہ ترانہ "ساتھیو ، مجاہدو ، جاگ اٹھا ہے سارا وطن۔۔" بھی ہے لیکن اس ترانے کا زیادہ تر کریڈٹ مسعودرانا کو جاتا ہے جن کا الاپ سارا میلہ لوٹ لیتا ہے۔ شاید یہی وجہ تھی کہ فلمی ایوارڈز کی بندر بانٹ کے لیے مشہور ، بدنام زمانہ نگار ایوارڈز نے بھی اس کورس گیت میں صرف مسعودرانا ہی کو بہترین گلوکار کا ایوارڈ دے کر شوکت علی کے ساتھ بڑی زیادتی کی تھی ، جن کا اس ترانے میں برابر کا حصہ تھا۔

یہاں یہ بات دلچسپی سے خالی نہ ہوگی کی 2016ء میں شوکت علی نے اس لازوال ترانے کو اپنے ایک بیٹے کے ساتھ نئے رنگ میں پیش کیا تھا۔ مسعودرانا کے بول انھوں نے خود گائے تھے جبکہ دیگر گلوکاروں کے بول ان کے بیٹے اور ساتھیوں نے گائے تھے۔

یہی ترانہ انھوں نے سابق وزیر اعظم اور دلہن محترمہ بے نظیر بھٹو کی 1987ء میں شادی کی تقریب میں بھی گایا تھا اور اس میں یہ اضافہ بھی کیا تھا "جے اج تیرا بابل ہوندا ۔ گھلدا چاہواں نال ، بہنے ، سدا سکھ پاویں۔۔"

بیگم نصرت بھٹو اور سابق صدر اور دولہا میاں آصف علی زرداری کے علاوہ بے شمار افراد تالیاں بجا کر انھیں داد دے رہے تھے۔

جاگ اٹھا ہے سارا وطن ترانے کا پس منظر

اس مشہور زمانہ ترانے کا پس منظر بیان کرتے ہوئے وہ بتاتے ہیں کہ اصل میں جناب حمایت علی شاعر کے لکھے ہوئے اور موسیقار خلیل احمد کی بنائی ہوئی دھن میں یہ ایک جنگی نہیں سیاسی ترانہ تھا جو 1964ء میں محترمہ فاطمہ جناح کی انتخابی مہم کے دوران عوام الناس کے جوش و خروش کا ترجمان تھا ، لیکن فلم مجاہد (1965) میں ایک جنگی ترانے کی صورت میں پیش کیا گیا تھا اور 1965ء کی جنگ کا سب سے مقبول ترین ترانہ ثابت ہوا تھا۔

اس ترانے کو پی ٹی وی کے ایک میوزک شو میں مسعودرانا اور شوکت علی کے علاوہ ان کے بیٹے عمران شوکت مع ساتھیوں نے سٹیج پر لائیو گایا تھا لیکن اس کے بلیک اینڈ وہائٹ پرنٹ پر اصل ترانے کی ڈبنگ ہے۔

شوکت علی اور مسعودرانا کا ساتھ

شوکت علی کی مسعودرانا کے ساتھ پہلی فلم بھرجائی (1964) تھی اور انھیں پہلی کامیابی بھی مسعودرانا ہی کے ساتھ فلم مجاہد (1965) کے مندرجہ بالا ترانے سے ملی تھی۔

اعداوشمار کے مطابق ان دونوں فنکاروں کے مشترکہ گیتوں کی تعداد 16 ہے جو شوکت علی کے کسی بھی گلوکار یا گلوکارہ کے ساتھ گائے ہوئے دوگانوں کی سب سے بڑی تعداد ہے جبکہ مسعودرانا کی احمدرشدی کے بعد یہ دوسری بڑی مردانہ دوگانوں کی تعداد ہے۔

جب شوکت علی نے مہدی حسن کی مشکل آسان کی

شوکت علی کو یہ اعزاز بھی حاصل ہے کہ انھوں نے فلم ندیا کے پار (1973) میں موسیقار اے حمید کی یہ مشکل آسان کر دی تھی کہ خانصاحب مہدی حسن ، اپنے ایک کلاسیکل گیت "آج میرے سنگیت کے مالک ، دے دے ایسا گیان۔۔" کے آخر میں لمبی تان کیسے لگا پائیں گے۔۔؟

شوکت علی کے چند مشہور فلمی گیت

شوکت علی کے دیگر قابل ذکر فلمی گیتوں کی کچھ تفصیل یوں ہے:

• یا نبیﷺ سلام علیک ، یا رسول ﷺ سلام علیک۔۔ (مع نسیم بیگم ، آئرن پروین ، اعظم چشتی اور ساتھی ، فلم وطن کا سپاہی 1966)
• میرا دل سڑھدا ، بھیڑا تیریاں اڈیکاں وچ ہوکے بھردا۔۔ (مع نسیم بیگم ، فلم میرا ویر 1967)
• اے محبت ، تیرا جواب نہیں ہے۔۔ (مع آئرن پروین ، تصورخانم اور ساتھی ، فلم بہارو پھول برساؤ 1972)
• ظالما دے ظلم دی اخیر ہونی ٹھاہ۔۔ (مع افشاں اور ساتھی ، فلم ٹھاہ 1972)
• جوگی آیا ، دوارے تیرے ، کن وچ پا کے مندراں۔۔ (فلم شریف بدمعاش 1975)
• میں ولایت کاہنوں آ گیا ، مینوں کڈھ لے ایتھوں۔۔ (فلم پلے بوائے 1978)
• عشق دی سوہنی موج بہار ، نچدا عشق نچاوے یار۔۔ (فلم پتر پھنے خان دا 1978)
• ایہہ تے ویلا آپ دسے گا ، کون ماردا میدان پہلے ہلے۔۔ (مع عالم لوہار اور ساتھی ، فلم مولا جٹ 1979)
• میں پتر پاکستان دا ، مینوں جانے چین جاپان۔۔ (مع عنایت حسین بھٹی ، ناہیداختر ، فلم اتھرا پتر 1981)
• تم کون ہو ، کس دیس کے باسی ہو۔۔ (مع ناہیداختر ، رجب علی ، اخلاق احمد ، اے نیر ، غلام عباس ، فلم کھوٹے سکے (1981)

شوکت علی کا فلمی کیرئر

شوکت علی کا 2 اپریل 2021ء کو انتقال ہو گیا

پاکستان فلم ڈیٹابیس کے مطابق شوکت علی نے 96 فلموں میں 115 گیت گائے تھے جن میں سے 28 اردو فلموں میں 30 اور 68 پنجابی فلموں میں 84 گیت تھے۔ یہ حتمی اعدادوشمار نہیں ہیں۔

وہ ، گائیکی کے علاوہ چار فلموں میں بطور اداکار بھی نظر آئے تھے۔ پہلی دو فلموں فیشن (1965) اور میم صاب (1966) میں قوالیاں گاتے ہوئے نظر آئے تو فلم دوستانہ (1982) میں سٹیج پر آکر اپنے مخصوص سٹائل اور لباس میں "جدوں چھنکے تیری ونگ۔۔" گاتے ہوئے دیکھے گئے تھے۔

فلم کفارا (1986) میں انھوں نے فردوس کے بیٹے کا کردار کیا تھا اور ان کے گیت "سن کانواں۔۔" نے میلہ لوٹ لیا تھا۔

وہ ، اداکاری میں متاثر نہیں کر سکے تھے حالانکہ پی ٹی وی پر ان کا وہ گیت ناقابل فراموش تھا جس میں ان کی اداکاری پر حقیقت کا گمان ہوتا تھا۔ اس گیت میں وہ ، آئرن پروین کو جھولا جھلا رہے ہیں جو بڑے دلکش رومانٹک موڈ میں گاتے ہوئے یہ پوچھتی ہے کہ "تو میرا کی لگنا ایں ، مینوں پچھدے نیں لوکی سارے۔۔" اور واقعی اس گیت کا جادو ایسا تھا کہ بیشتر لوگ ہمیشہ یہ گتھی سلجھاتے رہے کہ ان دونوں کا کیا رشتہ ہے۔۔؟

ایک ٹی وی پروگرام میں بشریٰ انصاری نے یہ راز اگلوانے کی پوری کوشش کی تھی اور شوکت علی سے اشارتاَ پوچھا بھی تھا کہ انھوں نے کتنے عشق کیے ہیں۔۔؟

جواب میں انھوں نے ہاتھ کی انگلیوں پر گنتے ہوئے بتایا تھا کہ صرف ایک ، اور وہ بھی اپنی بیوی سے۔۔!

البتہ انھوں نے ایک انٹرویو میں یہ اعتراف کیا تھا کہ انھیں پہلا عشق تیسری جماعت میں اپنی ٹیچر سے ہوگیا تھا اور ستر کے عشرہ کی ٹی وی کی ایک دلکش گلوکارہ شاذیہ کو بھی نہیں بھلا پائے تھے۔۔!

فلم کھوٹے سکے (1981) کے گیت تم کون ہو کی ریکارڈنگ کے دوران موسیقار ایم اشرف کی ساتوں گلوکاروں کے ساتھ گروپ فوٹو (دائیں سے بائیں) شوکت علی ، رجب علی ، ایم اشرف ، ناہیداختر ، غلام عباس ، اے نیر اور اخلاق احمد

Masood Rana & Shoukat Ali:

0 joint Online films

Masood Rana & Shoukat Ali:

Total 35 joint films