حزیں قادری
ایک منفرد فنکار تھے جو فلموں میں
شاعری کے علاوہ کہانی ، مکالمے اور منظر نامہ
بھی لکھتے تھے۔

ٹانگے والا خیر منگدا۔۔

فلم ڈاچی (1964) کے اس امر گیت نے جہاں مسعودرانا کو راتوں رات مقبولیت کی بلندیوں پر پہنچا دیا تھا وہاں انھیں پنجابی فلموں کی سٹینڈرڈ مردانہ آواز اور تاحیات ناقابل شکست گلوکار بھی بنا دیا تھا۔

اس شاہکار گیت کی دھن بابا چشتی نے بنائی تھی جبکہ اس کو الفاظ دینے والے شاعر کا نام حزیں قادری تھا جو پاکستان کی فلمی تاریخ کے ایک بلند پایہ نام ، ایک بے مثل فنکار اور پنجابی سینما کا فخر تھے۔ انھوں نے اڑھائی سو سے زائد فلموں میں ایک ہزار سے زائد گیت لکھنے کے علاوہ ڈیڑھ سو سے زائد فلموں کی کہانیاں ، مکالمے اور منظرنامے بھی لکھے تھے جن میں سے ، اب تک کی معلومات کے مطابق ، نوے کے قریب فلمیں ایسی تھیں کہ جن کے مندرجہ بالا چاروں شعبوں کے وہ کلی انچارج تھے جو ایک منفرد ریکارڈ ہے۔ اس کے علاوہ بطور ہدایتکار ان کی ایک فلم بڈھا شیر (1974) تھی اور بطور فلمساز ایک سپر ہٹ فلم سجناں دور دیا (1970) بھی تھی جبکہ تین فلموں گڈی گڈا (1956) ، چوہدری اور جمالو (1962) میں اداکاری بھی کی تھی۔

حزیں قادری کی پہلی فلم دو آنسو (1950) تھی جس میں ان کے دو اردو اور ایک پنجابی گیت تھا۔ انھوں نے اپنی دوسری فلم نتھ (1952) میں پہلی بار فلم کے جملہ گیت لکھنے کے علاوہ کہانی ، مکالمے اور منظر نامہ بھی لکھا تھا۔ حزیں قادری کا پہلا سپر ہٹ گیت فلم پتن (1955) میں تھا "ساڈا سجرا پیار ، کہے بار بار ، کیتے ہوئے قرار بھل جائی نہ۔۔" اس دلکش گیت کی دھن بابا چشتی نے بنائی تھی اور اسے زبیدہ خانم اور عنایت حسین بھٹی نے مسرت نذیر اور سنتوش کمار کے لیے گایا تھا۔ حزیں قادری کی پہلی بڑی فلم ہیر (1955) تھی جس میں لکھے ہوئے ان کے بیشتر گیت سپر ہٹ ہوئے تھے۔ اسی سال کی فلم پاٹے خان بطور مکمل مصنف پہلی بڑی فلم تھی جبکہ دیگر بڑی بڑی فلموں میں جہاں ان کے لکھے ہوئے سادہ اور عام فہم گیت سپر ہٹ ہوئے تھے وہاں ان کی بیشتر فلموں کے مختلف فلمی کرداروں کی مقبولیت کے علاوہ ان کے لکھے ہوئے مکالمے بھی زبان زدعام ہوئے تھے جو اہل پنجاب اور پنجابی زبان پر ان کا بہت بڑا احسان تھا۔ ایسی سدا بہار فلموں میں: نوراں (1957) موج میلہ (1963) ، ڈاچی ، ہتھ جوڑی (1964) ، پھنے خان (1965) ، جگری یار (1967) ، چن مکھناں ، باؤجی ، سجن پیارا (1968) ، جند جان ، تیرے عشق نچایا (1969) ، سجناں دور دیا (1970) ، مستانہ ماہی (1971) ، خان چاچا ، سجن بے پرواہ ، سلطان (1972) ، جیرا بلیڈ (1973) ، عشق میرا ناں (1974) ، شریف بدمعاش (1975) ، اتھرا پتر (1981) وغیرہ قابل ذکر ہیں۔

ساٹھ اور ستر کے عشرے حزیں قادری کے نام تھے جن میں وہ پنجابی فلموں اور گیتوں کی کامیابی کی ضمانت ہوتے تھے۔ ملکہ ترنم نورجہاں نے جب اداکاری ترک کرکے صرف پس پردہ گلوکاری کرنے کا فیصلہ کیا تھا تو فلم رانی خان (1960) میں ان کا گایا ہوا پہلا پنجابی گیت "نئیں بھلنا وے تینوں نئیں بھلنا۔۔" ، حزیں قادری صاحب کا لکھا ہوا تھا۔ جب فلم پھنے خان (1965) کے گیت "جیو ڈھولا۔۔" اور فلم ملنگی (1965) کے سٹریٹ سانگ "ماہی وے سانوں بھل نہ جاویں۔۔" سے پنجابی فلمی گیتوں پر میڈم کی اجارہ داری قائم ہوئی تھی تو وہ بھی حزیں قادری کے قلم کا کمال تھا۔ اس کے بعد انھوں نے میڈم کے لیے کیا کیا غضب کے گیت لکھے تھے جن میں سے چند ایک گیتوں کا ذکر نہ کرنا عین زیادتی ہو گی۔۔ "کہندے نیں نیناں۔۔" ، "سیو نی میرے دل دا جانی۔۔" ، "تیرے جہے پت جمن ماواں۔۔" ، "اللہ دی سونہہ ، تو نئیں دسدا۔۔" ، "تیرے عشق نچایا کر کے تھیا تھیا۔۔" ، "وگدی ندی دا پانی۔۔" ، "جناں تیری مرضی نچا بیلیا۔۔" ، "دلدار صدقے ، لکھ وار صدقے۔۔" ، "میں پل پل تینوں پیار کراں۔۔" وغیرہ وغیرہ۔۔

مسعودرانا کی طرح کئی دوسرے فنکاروں کو بھی حزیں قادری کے لکھے ہوئے گیتوں سے بریک تھرو ملا تھا۔ ان میں منیر حسین کو فلم نوراں (1957) کے گیتوں سے اور احمدرشدی کو فلم مہتاب (1962) کے سپر ہٹ گیت "گول گپے والا آیا۔۔" سے بریک تھرو ملا تھا۔ ساٹھ کے عشرہ کی معروف گلوکارہ نذیر بیگم کا سب سے سپر ہٹ گیت "تھوڑا تھوڑا چن ویکھیا۔۔" (فلم ہتھ جوڑی ، 1964) اور رونا لیلیٰ کا پہلا پنجابی گیت "ماہیا وے ، بنگلہ پوا دے ایتھے۔۔" (فلم جگ بیتی ، 1968) بھی حزیں قادری ہی کی تخلیق تھا۔ اسی سال عنایت حسین بھٹی کو دوسرا فلمی جنم دینے والا سپر ہٹ گیت "چن میرے مکھناں۔۔" (فلم چن مکھناں ، 1968) بھی انھی کے فن کا کمال تھا۔ وحیدمراد کی پہلی پنجابی فلم مستانہ ماہی (1971) کا گلی گلی گونجنے والا سپر ہٹ گیت "سیو نی میرا ماہی ، میرے بھاگ جگاون آ گیا۔۔" بھی حزیں قادری کے زرخیز ذہن کی پیداوار تھا۔ پرویز مہدی کا گایا ہوا واحد سپر ہٹ فلمی گیت "تک چن پیا جاندا ای۔۔" (فلم چن تارا ، 1973) بھی حزیں قادری کا لکھا ہوا تھا۔ سن اسی کے عشرہ میں میڈم نورجہاں کے ایک یادگار دورہ بھارت کے ایک یادگار پروگرام میں گایا ہوا ان کا ایک یادگار گیت: "جا ، اج تو میں تیری ، تو میرا۔۔" (فلم یار مستانے ، 1974) بھی حزیں قادری صاحب کے زور قلم کا نتیجہ تھا۔

حزیں قادری نے مسعودرانا کے لیے بھی سو سے زائد گیت لکھے تھے جن میں ان کے بیشتر سپر ہٹ پنجابی فلمی گیت شامل ہیں۔ ایسے گیتوں میں "ٹانگے والا خیر منگدا۔۔" کے علاوہ "سجناں نے بوہے اگے چک تن لئی۔۔" ، "سوچ کے یار بناویں بندیا۔۔" ، "دل دیاں لگیاں جانے نہ۔۔" ، "یا اپنا کسے نوں کر لے۔۔" ، "صدقے میں جاواں انہاں توں۔۔" ، "تیرے مدھ بھرے نین مل پین۔۔" وغیرہ شامل ہیں۔