ہمراہی
غالباً واحد سپر ہٹ فلم تھی
جس میں کوئی رقص ، رومانس یا فائٹ نہیں تھی

ماسٹر تصدق حسین نے ستر کے قریب فلموں کی موسیقی ترتیب دی تھی اور چار سو کے لگ بھگ گیتوں کی دھنیں بنائی تھیں۔ فلم ہمراہی (1966) ان کے فلمی کیرئر کی سب سے بڑی فلم تھی جو اپنے لازوال گیتوں کی وجہ سے ایک سپرہٹ فلم ثابت ہوئی تھی۔۔!

فلم ہمراہی (1966) کی صورت میں ماسٹر تصدق حسین کو ایک بہت بڑا چیلنج درپیش تھا۔ اس فلم کی کہانی ایک بھارتی فلم دوستی (1964) کی کاپی تھی جس میں محمد رفیع کے گیت سپر ہٹ ہو چکے تھے۔ ایسے میں آسان کام تو یہی تھا کہ کہانی کی طرح گانے بھی کاپی کر لیے جاتے لیکن ایسا نہیں ہوا۔ ماسٹر صاحب نے اوریجنل دھنیں بنائیں اور کچھ کم نہیں ، آٹھ میں سے چھ گیت سپر ہٹ ہوئے تھے۔ یہ ایک ایسی منفرد فلم تھی کہ جس میں کوئی رقص ، فائٹ یا ایک بھی رومانٹک گیت نہیں تھا بلکہ متنوع گیتوں کی ایک مالا تھی جن میں نعت ، ترانہ ، غزل ، طربیہ اور المیہ گیت تھے۔ ان لازوال گیتوں کو مسعودرانا کے سوا کوئی دوسرا گلوکار گا بھی نہیں سکتا تھا۔ سابقہ ویب سائٹ پر اس فلم پر ایک تبصرہ موجود ہے لیکن اسے نئے سرے سے لکھا جائے گا ، ان شاء اللہ۔۔!

ماسٹر تصدق حسین کے فلمی کیرئر کا آغاز فلم نوکر (1955) سے ہوتا ہے جس میں وہ بابا چشتی کے معاون تھے۔ اگلے ہی سال کی فلم چھوٹی بیگم (1956) ان کی بطور میوزک ڈائریکٹر پہلی فلم تھی۔ یہ ایک سپر ہٹ فلم تھی جس نے پچاس کے عشرہ میں گولڈن جوبلی کی تھی جو ستر کے عشرہ کی ڈائمنڈ جوبلی فلموں سے بڑی کامیابی تھی۔ اس فلم کی خاص بات یہ تھی کہ میڈم نورجہاں کی مشہور زمانہ فلم انتظار (1956) کے ساتھ ہی ریلیز ہوئی تھی لیکن باکس آفس پر اس سے دگنی کامیاب ہوئی تھی۔ اس فلم میں تصدق حسین کے دو گیت بڑے مقبول ہوئے تھے۔ کوثر پروین کا گایا ہوا گیت "کب تک رہو گے آخر ، اجی یوں دور دور ہم سے۔۔" اور سلیم رضا اور کوثر پروین کا دوگانا "ہم بھی راضی ، تم بھی راضی ، کرلے جو کہتا ہے قاضی۔۔" اپنی اگلی فلم داتا (1957) میں سلیم رضا کا یہ گیت بھی بڑا پسند کیا گیا تھا "کر ساری خطائیں معاف میری ، تیرے در پہ میں آن گرا۔۔" ان کی اگلی آٹھ فلموں میں کوئی گیت مقبول نہیں ہو سکا تھا حالانکہ اس دوران فلم روپ متی باز بہادر (1960) میں انھیں بہترین میوزک ڈائریکٹر کا صدارتی ایوارڈ بھی دیا گیا تھا جو غالباً صرف اسی سال دیا گیا تھا۔

فلم غالب (1961) ، ملکہ ترنم نورجہاں کی بطور اداکارہ آخری فلم تھی جس میں مرزا غالب کی غزلوں کو فلمی رنگ میں پیش کیا گیا تھا۔ یہ دو غزلیں بڑی مقبول ہوئی تھیں "مدت ہوئی ہے یار کو مہمان کیے ہوئے۔۔" اور "یہ نہ تھی ہماری قسمت کہ وصال یار ہوتا۔۔" اس کے علاوہ ماسٹر تصدق حسین کی دھنوں میں میڈم نورجہاں کا فلم عدالت (1968) میں "دکھائے دل جو کسی کا ، وہ آدمی کیا ہے۔۔" ، فلم رب دی شان (1971) میں "میں الہڑ پنجاب دی ، ماہیا گھبرو پاکستان دا۔۔" ، مہدی حسن کا فلم آئینہ (1966) میں "دل ویران ہے ، تیری یاد ہے ، تنہائی ہے۔۔" اور فلم داستان (1968) میں "قصہ غم میں تیرا نام نہ آنے دیں گے۔۔" ، احمدرشدی کا فلم باغی سردار (1966) میں "آج خوشی سے جھوم رہا ہے اک پردیسی دیوانہ۔۔" ، فلم نیا سویرا (1970) میں "اے زندگی ، اے زندگی ، میں نے تیرے ہر موڑ پر ، دامن غموں کا چھوڑ کر پائی ہے اک تازہ خوشی۔۔" اور فلم روڈ ٹو سوات (1971) میں "یہ ادا ، یہ ناز ، یہ انداز آپ کا۔۔" ، استاد امانت علی خان کا ایک غیر ریلیز شدہ فلم سنگیت میں "پیار نہیں ہے سر سے جس کو ، وہ مورکھ انسان نہیں۔۔" وغیرہ مقبول عام گیت تھے۔

ماسٹر تصدق حسین نے مسعودرانا کے لیے چار درجن کے قریب گیت کمپوز کیے تھے جن میں فلم ہمراہی (1966) کے گیت سدا بہار ہیں۔ ان کا پہلا ساتھ فلم لنڈا بازار (1964) میں ہوا تھا جس میں صرف ایک شعر تھا "گئے دنوں کی یاد دلائے یہ لنڈا بازار۔۔" فلم یہ جہاں والے (1965) کا یہ المیہ گیت "کاتب تقدیر ہوتا سامنے ، پوچھتا میں اس کا دامن تھام کے۔۔" کیا زبردست گیت تھا۔ فلم بھائی جان (1966) میں اس گیت نے تو مجھے مسعودرانا کے گیتوں کا دیوانہ بنا دیا تھا "اے خدا ، کیسی زمانے کی رواداری ہے ، غم کا بازار ہے ، زخموں کی خریداری ہے۔۔" اسی گیت کو پھر فلم ہم لوگ (1970) کے تھیم سانگ کے طور پر بھی استعمال کیا گیا تھا۔ فلم آئینہ (1966) کا میگا ہٹ گیت "تمہی ہو محبوب میرے ، میں کیوں نہ تمہیں پیار کروں۔۔" کی دھن بھی ماسٹر تصدق حسین کی بنائی تھی۔ یہ انکشاف خود مسعودرانا نے اپنے ایک ٹی وی پروگرام میں کیا تھا۔ فلم شاہی فقیر (1970) میں مسعودرانا نے پہلی اور آخری بار بطور ہیرو کام کیا تو ان پر فلمائے ہوئے دونوں گیت بھی ماسٹر صاحب کے کمپوز کیے ہوئے تھے۔ فلم سجن بیلی (1970) میں انھوں نے ایک گیت کمپوز کیا تھا "سدا نہ باغیں بلبل بولے ، سدا نہ باغ بہاراں۔۔" اس گیت کو انھوں نے پنجابی فلمی گائیکی کے دو سب سے بڑے ناموں ، مسعودرانا اور عنایت حسین بھٹی سے الگ الگ گوایا تھا۔ آخری فلم حسینہ مان جائے گی (1980) میں بھی ماسٹر صاحب نے مسعودرانا سے ایک گیت گوایا تھا۔

Masood Rana & Tasadduq Hussain:

7 joint Online films

Masood Rana & Tasadduq Hussain:

Total 24 joint films