ایک ایکسٹرا اداکار سے چوٹی کا مزاحیہ اداکار بننے والے اس عظیم فنکار نے وہ مقام حاصل کر لیا تھا کہ اسے کچھ کہنے ، کرنے کی ضرورت نہیں پڑتی تھی کیونکہ فلم بین اسے دیکھتے ہیں ہنس پڑتے تھے۔ جب اس نے فلم بنانے کا اعلان کیا تو لوگ اسے بھی مذاق ہی سمجھے تھے لیکن جب اس نے بطور فلمساز ، ہدایتکار اور مصنف کے فلم دیا اور طوفان (1969) بنائی تو ناقدین حیران رہ گئے تھے۔ اوپر سے بطور گلوکار بھی اس کی آواز کا جادو سر چڑھ کر بولنے لگا تھا اور "گا میرے منوا گاتا جارے۔۔" ہر طرف گایا جانے لگا تھا۔ لطف کی بات یہ تھی کہ یہ مشہورزمانہ گیت لکھا ہوا بھی اسی کا اپنا تھا۔۔!

اس کے بعد جب اس نے پاکستان کی تاریخ میں پہلی بار اپنے فلمی نام پر فلم رنگیلا بنائی تھی تو اس میں وہ ہیرو بھی تھا۔ وہ شکل سے ہیرو لگتا ہی نہیں تھا لیکن کمال دیکھئے کہ پورا ملک اس کے حسن کے ترانے گنگنانے پر مجبور ہو گیا تھا کہ "وے سب توں سوہنیا ، ہائے وے من موہنیا۔۔!" اس نے بطور موسیقار اور نغمہ نگار بھی تاریخ میں اپنا نام لکھوایا تھا۔

پاکستان کا یہ قابل فخر ہفت پہلو فنکار ، رنگیلا ، بیک وقت اداکار ، ہدایتکار ، فلمساز ، مصنف ، نغمہ نگار ، موسیقار اور گلوکار بھی تھا۔ اس کے 2005ء میں انتقال پر ایک تفصیلی مضمون لکھا گیا تھا جو مندرجہ بالا امیج پر کلک کرنے سے پڑھا جا سکتا ہے۔

پاکستان فلم ڈیٹابیس کے مطابق رنگیلا کی ساڑھے پانچ سو سے زائد فلمیں ہیں جو ایک غیر حتمی فہرست ہے۔ رنگیلا کی بطور ہدایتکار 21 فلمیں ہیں اور گیارہ گیارہ فلمیں بطور فلمساز اور مصنف تھیں۔ دیا اور طوفان (1969) ، رنگیلا (1970) ، دل اور دنیا (1971) اور کبڑا عاشق (1973) وہ چار مشہور زمانہ فلمیں تھیں جن کے وہ ہدایتکار ، فلمساز اور مصنف بھی تھے۔ بطور موسیقار اور نغمہ نگار دو دو فلمیں تھیں جن میں دورنگیلے (1972) سب سے زیادہ مشہور فلم تھی جبکہ بطور گلوکار 21 فلموں میں 32 گیت ملتے ہیں اور متعدد سپرہٹ گیت گائے تھے۔ اعدادوشمار کے مطابق رنگیلا کی ریلیز کے لحاظ سے پہلی فلم چن ماہی (1956) تھی جس میں وہ ایکسٹرا اداکار تھے۔ رنگیلا کے صفحہ پر ان تمام ریکارڈز کا ذکر ہونا چاہئے تھا لیکن اس کے لئے جو پروگرامنگ درکار ہے ، اس کے لئے فی الحال وقت نہیں ہے۔ ان شاء اللہ ، اس سلسلے سے فراغت کے بعد ان صفحات کو تمام جزیات کے ساتھ مکمل کرنے کی کوشش کروں گا۔

رنگیلا پر مسعودرانا کے چار درجن کے قریب گیت فلمائے گئے تھے جن میں زیادہ تر مزاحیہ گیت تھے۔ سب سے زیادہ مقبول ترین گیت فلم دورنگیلے (1972) میں فلمایا گیا تھا:

• سجناں اے محفل ، اساں تیرے لئے سجائی اے ، پیار بلاوے آ جا ، کاہنوں ضد لائی اے..

مسعودرانا کے اس گیت کے ریکارڈنگ اور فلم ورژن میں نمایاں فرق تھا۔ یہ رنگیلا کی سب سے کامیاب ترین فلم تھی جس میں وہ ہیرو اور ولن کے ڈبل رول میں تھے۔ اس فلم کے بارے میں مجھے یہ بھی یاد ہے کہ ریلیز کے بعد جب یہ کامیاب ہو گئی تھی تو اس میں مزید کشش پیدا کرنے کے لئے ایک اور گانے کا اضافہ کیا گیا تھا جو غالباَ رونالیلیٰ کا گایا ہوا تھا "تینوں لبھیا گوا کے جگ سارا۔۔" اس فلم میں رنگیلا کو پہلی بار فلم جٹی (1958) میں چانس دینے والے ہدایتکار ایم جے رانا نے پہلی اور آخری بار اداکاری کی تھی۔ رنگیلا ، انہیں اپنا محسن سمجھتے تھے۔

رنگیلا پر مسعودرانا کے دو کلاسیکل ٹائپ گیت بھی فلمائے گئے تھے جو اپنی مثال آپ تھے۔ ان میں سے پہلا گیت فلم زرق خان (1973) میں کمال احمد کی موسیقی میں تھا:

• یاد میں تیرے صدیاں بیتیں ، ایک جھلک دکھلا جا..

جبکہ دوسرا گیت فلم رنگیلا عاشق (1973) میں تھا جس کی دھن وجاہت عطرے نے بنائی تھی:

• چھیڑ تو دل دے تار دیوانے ، گا ایخو جیا سر وچ گانا ، کھو لے چین قرار..

رنگیلا نے دو کورس گیتوں میں مسعودرانا کے ساتھ شراکت بھی کی تھی۔ فلم رنگیلا (1970) میں منورظریف کا تکیہ کلام ہوتا ہے "میرا نام ہے انجانا ، میرا کام ہے گانا بجانا ، میرا دوست ہے مسعودرانا.." یہی تکیہ کلام رنگیلا نے فلم کاکا جی (1984) میں دھرایا تھا۔ دونوں فلموں کے ہدایتکار رنگیلا تھے۔ رنگیلا کی بطور اداکار آخری فلم ایک اور لو سٹوری (1999) بتائی جاتی ہے جبکہ بطور ہدایتکار انہوں نے اپنی آخری فلم خوبصورت شیطان (1994) میں اپنے ایک بیٹے سلمان کو بطور ہیرو پیش کیا تھا لیکن وہ کامیاب نہیں ہوئے تھے۔ اس فلم میں رنگیلا نے اپنا آخری گیت "میرا چین چرا کے لے گئیں۔۔" بھی گایا تھا۔

(21 اردو گیت ... 26 پنجابی گیت )