حیدرچوہدری
پنجابی فلموں کا بہت بڑا نام تھے
جنھوں نے سترہ برسوں میں
69 فلمیں بنائی تھیں

حیدرچوہدری

حیدرچوہدری ، اپنی زندگی میں سب سے زیادہ پنجابی فلمیں بنانے والے ہدایتکار تھے۔ ان کے کریڈٹ پر بہت بڑی بڑی اور یادگار فلمیں تھیں۔

پہلی فلم ہی سپرہٹ ہوئی

حیدرچوہدری کی پہلی ہی فلم تیس مار خان (1963) ایک لاجواب فلم تھی جس میں انھوں نے بڑی کامیابی کے ساتھ ایک ولن اداکار علاؤالدین کو پہلی بار سولو ہیرو کے طور پر پیش کیا تھا اور ایک نیا چہرہ شیریں کی صورت میں متعارف کروایا تھا جو دیکھتے ہی دیکھتے صف اول کی اداکارہ بن گئی تھی۔ گو اس فلم کے سپر وائزر شباب کیرانوی تھے لیکن حیدرچوہدری نے اپنی دیگر فلموں میں ثابت کر دیا تھا کہ وہ اپنی کامیابی کے لیے کسی کی نظر کرم کے محتاج نہیں تھے۔

حیدرچوہدری اور مسعودرانا کا ساتھ

حیدرچوہدری کی دوسری فلم بھرجائی (1964) میں پہلی بار ان کا ساتھ مسعودرانا کے ساتھ ہوا تھا جو سترہ برسوں میں 69 فلموں میں 79 گیتوں تک چلا گیا تھا۔ مسعودرانا کو پنجابی فلمی گائیکی پر مکمل اجارہ داری حاصل ہوتی تھی اور بیشتر موسیقاروں اور ہدایتکاروں کا پہلا انتخاب ہوتے تھے۔

پس پردہ گیتوں میں یکتائے عصر ہونے کی وجہ سے ان کی آواز فلموں کی ضرورت ہوتی تھی اور ہدایتکار فلمی صورتحال میں ان کی آواز کو بڑی خوبصورتی سے پیش کیا کرتے تھے۔ ایسی ہی ایک مثال فلم گونگا (1966) میں تھی جس میں ایک بچہ اپنی ماں کی قبر پر بے یارومددگار کھڑا آہیں بھر رہا ہے کہ پس منظر سے مسعودرانا کی انتہائی پر سوز اور جذباتی آواز ابھرتی ہے:

• کوئی اینی گل رب کولوں پچھ کے تے آئے ،ربا او کی کرے ، جدی ماں مر جائے..

فلم گونگا (1966)

میں نے جب پہلی بار یہ گیت سنا تھا تو تڑپ اٹھا تھا۔ اس گیت کو بار بار سن کر بھی جی نہیں بھرتا تھا۔

"ایوب بادشاہ"

مجھے اپنے پرائمری سکول کے زمانے کا ایک کلاس فیلو ایوب یاد آگیا تھا جس کی ماں ، دوسری جماعت میں ہی مر گئی تھی اور وہ اپنی چھوٹی بہن کے ساتھ اپنے لکڑہارے باپ کے خون پسینے کی کمائی سے سکول پڑھنے آتا تھا۔

اس کا لباس اور کھانا کبھی بھی دیگر بچوں کی طرح کا نہیں ہوتا تھا۔ باپ نے تو بڑے فخر سے اپنے بیٹے کا نام وقت کے بادشاہ ایوب خان کے نام پر رکھا تھا لیکن اس نادان کو شاید معلوم نہیں تھا کہ بادشاہوں پر بھی زوال آتا ہے۔

جب جنرل ایوب خان کو زوال آیا تھا تو اسے گلی گلی گالیاں پڑنے لگی تھیں۔ انھی نعروں کو استعمال کرتے ہوئے شرارتی لڑکے ، بیچارے ایوب کو بھی رگڑا لگا دیتے تھے اور وہ غریب ، اپنی غربت اور نام کی وجہ سے شدید قسم کے احساس کمتری میں مبتلا ہو گیا تھا۔

مجھے وہ کبھی یاد نہ رہتا اگر وہ حساب کے مضمون میں بلا کا ذہین نہ ہوتا۔ میں نے اپنی سکول کی پوری زندگی میں اگر کسی ساتھی طالب علم سے کبھی کوئی مدد لی تھی تو وہ صرف ایوب تھا حالانکہ میرا شمار سکول کے غیر معمولی طور پر ذہین ترین طالب علموں میں ہوتا تھا اور ہر کلاس میں مانیٹر اور ماسٹر صاحبان کا دایاں ہاتھ ہوتا تھا۔

روٹی یا تعلیم؟

1996ء میں اپنے پاکستان کے دورہ کے دوران ایک دن اتفاق سے ایک بس سٹینڈ پر ایوب سے ملاقات ہو گئی تھی۔ وہ بسوں میں بسکٹ وغیرہ بیچ رہا تھا۔ مجھے بڑی اذیت پہنچی تھی اور اس سے دریافت کیا تھا کہ

"ایوب ، تعلیم کا کیا بنا۔۔؟" جواب ملا

"غریب آدمی تعلیم حاصل کرے یا روٹی۔۔!"

یہ ایک تلخ حقیقت ہے کہ ہمارے ملک میں روٹی کا حصول ایک عام آدمی کی سب سے بڑی دوڑ ہوتی ہے۔ حیدرچوہدری کی ایسی ہی ایک قابل تعریف فلم روٹی (1968) میں اکمل پر فلمائے ہوئے بابا چشتی اور حزیں قادری کے اشتراک سے مسعودرانا کے اس تھیم سانگ کے یہ بول ایک بھوکے غریب شخص کی کیفیت بیان کر رہے ہیں:

• روٹی دا سوال اے ، جواب ایدا روٹی اے ، وڈے سارے لوکاں لئی اے گل بڑی چھوٹی اے۔۔!
  لبھناں واں گھر ایس روگ دے طبیب دا ، ناں میرا پچھدے او ، دکھ آں غریب دا ، کرماں دا ماریا تے ہاریا نصیب دا۔۔!

فلم بینوں کے ہاتھ پر نبض

فلم اج دا مہینوال (1973)

حیدرچوہدری بڑے گھاگھ قسم کے فلم میکر تھے۔ ان کا ہاتھ فلم بینوں کی نبض پر ہوتا تھا اور کامیاب فلمیں بنانے کا گر جانتے تھے۔

انھوں نے فلم گونگا (1966) میں پہلی بار اداکار ساون کو ٹائٹل رول میں پیش کیا تھا جو آگے چل کر پنجابی فلموں کے بھاری بھر کم اداکار ثابت ہوئے تھے۔

منورظریف کی بطور ہیرو پہلی فلم اج دا مہینوال (1973) بھی حیدرچوہدری ہی کی فلم تھی جنھوں نے منورظریف کے انتقال پر فلم ریشماں تے شیرا (1976) کے ٹائٹل میں مسعودرانا سے ایک "نوحہ" یا تعزیتی شعر گوایا تھا:

ایخو جیے وی لوک ساڈے کولوں ٹر جان گے
لبھدے پھراں گے ، ساڈے ہتھ نئیں آن گے۔۔

ایسا ہی ایک نوحہ ان کی فلم مقدر (1985) کے ٹائٹل میں اقبال حسن کی یاد میں بھی مسعودرانا نے گایا تھا:

چپ چپیتے ٹر گیا ایں ، پا کے ہاڑ پکار۔۔

ایک ایسے دور میں کہ جب ایکشن فلموں کا جادو سر چڑھ کر بول رہا تھا ، حیدرچوہدری نے ننھا اور علی اعجاز کو لے کر پی ٹی وی کے ایک ڈرامے پر فلم دبئی چلو (1979) بنا کر جہاں متبادل تفریح کا بندوبست کیا تھا وہاں دو مزاحیہ اداکاروں کو صف اول کے ہیرو بنا دیا تھا۔

1986ء میں انھوں نے ایک بڑی جرات مندانہ فلم جورا بنائی تھی جو اس وقت کے پاکستان کے سب سے بڑے مسئلہ منشیات کے بارے میں تھی جو نام نہاد افغان جہاد کا شاخسانہ تھا۔

1987ء میں انھوں نے سابقہ اداکارہ مسرت نذیر کو بطور گلوکارہ فلم دلاری میں مشہور زمانہ لوک گیت "میرا لونگ گواچہ۔۔" کے ساتھ متعارف کروایا تھا۔

حیدرچوہدری کی فلموں کی یاد میں

حیدرچوہدری ، میری زندگی کی دیکھی ہوئی پہلی تینوں فلموں ، لچھی ، قول قرار اور عشق نہ پچھے ذات (1969) کے ہدایتکار بھی تھے۔ دلچسپ اتفاق ہے کہ جب مئی 1982ء میں پاکستان کو خیرآباد کہا تھا تو میری آخری فلم بھی حیدرچوہدری کی یادگار فلم دوستانہ تھی جس میں انھوں نے مسعودرانا ، شوکت علی اور اے نیر کو پردہ سکرین پر پیش کیا تھا۔

نقل کی نقل

حیدرچوہدری نے اپنے آخری دنوں میں ایک فلم ننگی تلوار (1989) بنائی تھی جو ایک انڈین پنجابی فلم "ووہٹی ہتھ سوٹی" کی فریم ٹو فریم نقل تھی۔

دلچسپ بات یہ تھی کہ وہ بھارتی پنجابی فلم ، ایک پاکستانی اردو فلم آج اور کل (1976) کی نقل تھی اور اس میں مسعودرانا کے دو گیت کاپی کیے گئے تھے۔ ان میں سے ایک مہندر کپور نے گایا تھا

• سوہنیاں نے بوہے اگے چک تن لئی۔۔

اور دوسرا گیت محمد صدیق نامی گلوکار نے گایا تھا

• دھیاں دتیاں تے کیوں نہ دتا مالا مالکا۔۔

حیدرچوہدری نے اپنی فلم ننگی تلوار میں مسعودرانا سے تو دونوں گیت نئی دھنوں میں گوائے تھے لیکن میڈم نورجہاں سے آشا بھونسلے کا گایا ہوا گیت "سب نوں نچاواں ، میں سب نوں نچاواں ، ہاسیاں دے وچ وچ سچ بولی جاواں۔۔" ہوبہو اسی دھن اور بولوں کے ساتھ گوایا تھا اور یہ گیت انجمن پر فلمایا گیا تھا۔