کلیم عثمانی

کلیم عثمانی ، ایک نامور شاعر اور فلمی گیت نگار تھے۔۔!

اپنی پہلی فلم انتخاب (1955) میں انھوں نے تین گیت لکھے تھے جن میں سے آنجہانی سلیم رضا کا گایا ہوا یہ گیت بڑا خوبصورت تھا "رُت ہے شباب کی ، دن ہیں بہار کے۔۔"

فلم راز (1959) میں زبیدہ خانم کاگایا ہوا گیت "میٹھی میٹھی بتیوں سے جیا نہ جلا ، جا رے بلم ، تجھے دیکھ لیا۔۔" پسند کیا گیا تھا۔

فلم ڈاکو کی لڑکی (1960) پہلی فلم تھی جس کے سبھی گیت انھوں نے لکھے تھے۔ اس فلم کی خاص بات یہ تھی کہ ساٹھ کی دھائی کی اردو فلموں کی مقبول اورمصروف ترین گلوکارہ مالا کی یہ پہلی فلم تھی جس میں پہلا گیت کلیم عثمانی کا لکھا ہوا تھا "اے میرے دل بتا ، کیسے کہہ دوں بھلا ، کون جانے ، میری نظروں میں جو پیار کی بات ہے۔۔" یہ گیت مسرت نذیر پر فلمایا گیا تھا۔

ان کی نظروں سے محبت کا جو پیغام ملا

پہلے دس برسوں میں انھوں نے صرف چھ فلموں کے گیت لکھے تھے۔ انھیں بریک تھرو ، فلم ہم دونوں (1966) سے ملا جس میں ان کی لکھی ہوئی غزل "ان کی نظروں سے محبت کا جو پیغام ملا۔۔" سپرہٹ ہوئی تھی۔ رونا لیلیٰ کی یہ پہلی فلم اور پہلا گیت تھا۔

اسی سال کی فلم جلوہ (1966) پہلی میوزیکل فلم تھی جس کے بیشتر گیت مقبول ہوئے تھے۔ مجیب عالم کا گایا ہوا یہ سپرہٹ گیت فلم کی جان تھا "کوئی جا کے ان سے کہہ دے ، ہمیں یوں نہ آزما ئیں۔۔"

فلم گھرانہ (1973) میں نیرہ نور کا پہلا سپرہٹ گیت "تیرا سایہ جہاں بھی ہو سجناں۔۔" کے علاوہ فلم ننھا فرشتہ (1974) میں ناہیداختر کا گایا ہوا پہلا گیت "نجانے کیوں دل دھڑکتا رہتا ہے۔۔" بھی کلیم عثمانی کا لکھا ہوا تھا۔

ان کے علاوہ نازنین (1969) ، نیند ہماری خواب تمہارے ، چراغ کہاں روشنی کہاں (1971) ، گھرانہ (1973) ، شرافت (1974) اور زندگی (1978) وغیرہ دیگر اہم نغماتی فلمیں تھیں۔ ان کے بیشتر مقبول عام گیتوں کی ایک فہرست نیچے دی گئی ہے لیکن یہاں خاص خاص فلموں ، گیتوں اور واقعات کے علاوہ مسعودرانا کے لیے لکھے ہوئے سپرہٹ گیتوں پر بات ہوگی۔

کلیم عثمانی اور مسعودرانا کا ساتھ

نازنین (1969)

نیند ہماری خواب تمہارے (1971)

چراغ کہاں روشنی کہاں (1969)

کلیم عثمانی نے فلم نازنین (1969) کے سبھی گیت لکھے تھے جن میں سے آدھے گیت مسعودرانا نے گائے تھے۔ تین گیت سپرہٹ ہوئے تھے جن میں

• یہ مانا کہ تم دلربا نازنین ہو ، مگر بندہ پرور ، خدا تو نہیں ہو۔۔
• نہ جھٹکو ہاتھ ، کرو کچھ بات ، کہ ہم کو نیند نہیں آتی۔۔

کے علاوہ فلم کا میگا ہٹ گیت مقبولیت کے سبھی ریکارڈ توڑ گیا تھا:

• میرا خیال ہو تم ، میری آرزو تم ہو ، میری نگاہ تمنا کی جستجو تم ہو۔۔

یہ شاید پہلا گیت تھا جو ایک اکیلے گلوکار نے قوالی کے انداز میں گایا تھا اور کیا کمال کا گایا تھا۔ لیکن اس گیت کی دھن طبع زاد نہیں تھی ۔ موسیقار ایم اشرف نے بھارتی فلم ہمراز (1967) میں روی شنکر کی موسیقی میں مہندرکپور کے گائے ہوئے گیت "نہ منہ چھپا کے جیو اور نہ سر جھکا کے جیو۔۔" کی دھن نقل کی تھی۔ لیکن اگر نقل اور اصل کا موازنہ کیا جائے تو پہلے الاپ ہی میں مسعودرانا یہ ثابت کر دیتے ہیں کہ ان کا مقابلہ تو صرف محمدرفیع ہی سےہوسکتا تھا۔

میرے ذہن پر بچپن ہی سے اس گیت کا ایسا سحر طاری ہے کہ آج بھی سنو تو دم بخود ہوکر سنتا ہوں۔ ویسےریڈیو یا آئیڈیو پر گیت سننے کا جو مزہ آتا ہے ، وہ فلم میں کبھی نہیں آسکتا۔

سپرہٹ گولڈن جوبلی فلم ، نیند ہماری خواب تمہارے (1971) کے گیت نگار بھی کلیم عثمانی تھے۔ اس فلم کے سات میں سے چار گیت مسعودرانا نے گائے تھے ، تین گیت سپرہٹ ہوئے تھے۔

مالا کے ساتھ گائے ہوئے دلکش رومانٹک دوگانے

• ہم نے تو پیار بہت تم سے چھپانا چاہا ، دل کے ہاتھوں ہوئے مجبور تو اقرار کیا۔۔

کے علاوہ

• ناراض نہ ہو تو عرض کروں ، دل تم سے محبت کرتا ہے ، لے لے کے تمہارا نام کوئی دیوانہ آہیں بھرتا ہے۔۔

بھی ایک لاجواب گیت تھا۔ اس فلم کا سب سے مقبول گیت تھا

• میرا محبوب آگیا ، من میرا لہرا گیا ، دل کی امنگیں ، ہوئی جواں۔۔

اس گیت میں مسعودرانا کا ناک میں الاپ گانا انھی کا خاصا تھا۔

اس فلم میں پہلی بار مسعودرانا کے چاروں گیت وقت کے مقبول ترین رومانٹک ہیرو ، وحیدمراد پر فلمائے گئے تھے جن پر عام طور احمدرشدی کے گیت پسند کیے جاتے تھے۔ لیکن رشدی صاحب ، ہلکے پھلکے ، ہلا گلا ٹائپ گیتوں کے گلوکار تھے جو مشکل گیت نہیں گا سکتے تھے جبکہ مسعودرانا ، بھاری بھر کم گیتوں کے گلوکار ہوتے تھے اور ایک ہر فن مولا گلوکار تھے۔

اسی سال ، کلیم عثمانی نے فلم چراغ کہاں روشنی کہاں (1971) کے آٹھوں گیت لکھے تھے جن میں سے چھ گیت ، مسعودرانا نے گائے تھے جن میں سے دو گیت سپرہٹ ہوئے تھے۔ پہلا گیت

• حال دل ، آج ہم سنائیں گے ، بندہ پرور ، کرم کچھ تو فرمایئے۔۔

ایک شاہکار رومانٹک گیت تھا جبکہ دوسرا گیت گائیکی کا ایک عجوبہ تھا

• میری دعا ہے کہ تو بن کے ماہتاب رہے ، خدا کرے کہ سلامت ، تیرا شباب رہے۔۔

فلم فرض اور مامتا (1975) میں مسعودرانا کا یہ مقبول عام گیت بھی کلیم عثمانی کا لکھا ہوا تھا

• آج غم دے دیا ، کل خوشی بخش دی ، حسن والوں کا کوئی بھروسہ نہیں۔۔

دلچسپ بات یہ کہ مندرجہ بالا چاروں فلموں کے موسیقار ایم اشرف اور ہدایتکار ، کے خورشید تھے۔

غیر حتمی اعدادوشمار کے مطابق کلیم عثمانی نے اندازاً پچاس کے قریب فلموں میں اڑھائی سو کے قریب گیت لکھے تھے۔

وہ ، 1928ء میں بھارتی شہر دیوبند میں پیدا ہوئے تھے۔ اصل نام احتشام الہیٰ تھا ۔ ان کے متعدد شعری مجموعے بھی شائع ہوئے تھے۔ ان کا شمار ان شاعروں میں ہوتا تھا کہ جو مشاعروں میں اپنا کلام بڑے ترنم سے سنایا کرتے تھے اور ایک سماں سا باندھ دیتے تھے۔ 2000ء میں انتقال ہوا تھا۔

حسن والوں کا کوئی بھروسہ نہیں

کلیم عثمانی کے لکھے ہوئے اور مسعودرانا کے گائے ہوئے گیت "آج غم دے دیا ، کل خوشی بخش دی ، حسن والوں کا کوئی بھروسہ نہیں۔۔" کو جب بھی سنتا ہوں ، اپنی ایک کلاس فیلو لڑکی ، کھونی Connie ، یاد آجاتی ہے جس سے چند سہانی یادیں وابستہ ہیں۔

نیلی آنکھوں اور سنہرے بالوں والی اس حسینہ سے تقریباً دو تین سال تک شناسائی رہی۔ کلاس میں ہم 6 لڑکے اور 12 لڑکیاں تھے۔ ڈنمارک میں سکول یا کم عمری ہی میں عشق و محبت کا کھیل اور جنسی بے راہروی شروع ہوجاتی ہے اور اسے معیوب نہیں سمجھا جاتا۔ میں ، مشرقی ماحول سے آیا تھا جہاں اظہار محبت کرنے کے لیے بھی ایک عمر درکار ہوتی تھی ، اس لیے مغربی ماحول کو قبول کرنا مشکل تھا۔

کھونی سے جب پہلی بار آنکھ ملی تو وہ مجھے بڑے غور سے دیکھ رہی تھی۔ میں گبھرا گیا تھا۔ جب بھی چور آنکھوں سے اسے دیکھتا تو وہ میری طرف ہی دیکھ رہی ہوتی تھی۔ میں ، پہلی صف میں اتفاق سے اس کے جڑواں بھائی کلاؤس Klaus کے ساتھ بیٹھتا تھا۔ وہ تیسری لائن میں میرے متوازی بیٹھی ہوئی ہوتی تھی۔ چند ایک بار آنکھیں ملیں تو وہ مسکرا دی۔ میں نے بھی مسکرانا شروع کردیا اور یہ سلسلہ کچھ عرصہ تک ایسے ہی چلتا رہا۔

اس دوران پہلی بار میں نے اپنی کلاس کے ایک بچے کی سالگرہ کی پارٹی میں شرکت کی جہاں کلاس کے دیگر بچے بھی تھے۔ وہاں ناچ گانا ہوا جو میرے مزاج کے مطابق تو نہیں تھا لیکن ماحول ہی ایسا تھا۔ میں بہت شرمیلا تھا اور میرے ذہن پر پاکستان میں اپنی پہلی محبت عاشی کا بھوت بھی سوار تھا۔

اس پارٹی میں مجھے کھونی نے بطور خاص اپنے ساتھ رقص کرنے کی دعوت دی جو نہ ٹھکرا سکا۔ یہ اور بات تھی کہ میری مثال ناچ نہ جانے آنگن ٹیڑھا والی تھی۔ میرا پیر اس کے پیر پر پڑا تو اس کی چیخ نکل گئی تھی۔ اس سے قبل مجھے پہلی بار اس کے ہاتھوں میں ہاتھ ڈالنے ، جسم کے ساتھ جسم ملانے اور بہت قریب سے دیکھنے کا موقع ملا تھا ، بلاشبہ وہ بہت حسین تھی۔

آنکھ مچولی کا یہ سلسلہ کچھ عرصہ تک چلتا رہا۔ عاشی کی یاد دھندلانے لگی تھی اور کھونی ، رفتہ رفتہ ، میری ہستی کا ساماں بنتی چلی گئی لیکن مشرقی ماحول کے خوف میں پلے ہوئے مجھ جیسے شخص میں اظہار محبت کی جرات نہیں تھی۔ وہ بھی خلاف معمول ایک شرمیلی لڑکی تھی اور سب کچھ آنکھوں کی زبانی ہی کہنا چاہتی تھی۔

ایک دن فزکس کے پیریڈ میں ہم کلاس روم کے باہر کھڑے استاد کی آمد کے منتظر تھے کہ کھونی کے ساتھ بیٹھی ہوئی لڑکی ٹینا Tina میرے پاس آئی اور مجھ سے پوچھا:

"کیا تم کھونی کی دعوت محبت قبول کرتے ہو۔۔؟"

مجھے بے ساختہ کہنا تو چاہیے تھا کہ "ہاں ، میں کھونی سے بڑی محبت کرتا ہوں ، اس کی یادوں میں ہر وقت رہتا ہوں اور وہ ، میرے احواس پر بری طرح سے مسلط ہو چکی ہے۔۔" لیکن شرم و حیا سے جیسے زمین میں گڑھ گیا تھا۔ سر جھکا لیا تھا اور کوئی جواب نہیں دیا تھا۔ وہ کچھ دیر تک انتظار کرتی رہی اور مایوس ہو کر چلی گئی تھی۔ میں نے دیکھا کہ وہ ، کھونی کو میرے جواب کا بتا رہی تھی جو بڑی اداس ہو گئی تھی۔

چند دنوں بعد میں نے دیکھا کہ وہ مجھے نظرانداز کر کے دوسری صف میں بیٹھے ہوئے لڑکے Keld کے ساتھ آنکھیں ملا رہی تھی۔ میرا اپنا قصور تھا ، کی شرم اور پھوٹے کرم والی بات تھی۔ اپنی ناکامیوں پر ماتم کرتے ہوئے اور دل کو تسلی دیتے ہوئے یہ گیت میری دلی کیفیت بیان رہا تھا:

• آج غم دے دیا ، کل خوشی بخش دی ، حسن والوں کا کوئی بھروسہ نہیں۔۔!

کلیم عثمانی کے مقبول عام فلمی گیت

• میٹھی میٹھی بتیوں سے جیا نہ جلا ، جارے بلم ، تجھے دیکھ لیا۔۔ (زبیدہ خانم ، فلم راز 1959)
• کوئی جاکے ان سے کہہ دے ، ہمیں یوں نہ آزمائیں۔۔ (مجیب عالم ، فلم جلوہ 1966)
• لاگی رے ، لاگی لگن یہی دل میں ، گیت ڈھلے۔۔ (مہدی حسن ، فلم جلوہ 1966)
• دیکھو دیکھو رے جُلم ، نہیں آئے سانوریا۔۔ (نورجہاں ، فلم جلوہ 1966)
• ان کی نظروں سے محبت کا جو پیغام ملا۔۔ (رونا لیلیٰ ، فلم ہم دونوں 1966)
• کھلتی کلیوں ، رنگ بکھیرو۔۔ (احمدرشدی ، رونا لیلیٰ ، فلم ایک مسافر ایک حسینہ 1968)
• اب تیری مرضی ، تو آئے یا نہ آئے۔۔ (نسیم بیگم ، فلم عصمت 1968)
• میرا خیال ہو تم ، میری آرزو تم ہو۔۔ (مسعودرانا ، فلم نازنین 1969)
• یہ مانا کہ تم دلربا نازنین ہو مگر بندہ پرور ، خدا تو نہیں ہو۔۔ (مسعودرانا ، فلم نازنین 1969)
• نہ جھٹکو ہاتھ ، کرو کچھ بات کہ ہم کو نیند نہیں آتی۔۔ (مسعودرانا ، فلم نازنین 1969)
• مستی میں جھومے فضا ، گیت گائے ہوا۔۔ (احمدرشدی ، فلم نازنین 1969)
• میرے دل کی محفل سجا دینے والے۔۔ (احمدرشدی ، نورجہاں ، فلم عندلیب 1969)
• ننھی منی گڑیا رانی ، ایک پہیلی بوجھو نا۔۔ (رونا لیلیٰ ، فلم عندلیب 1969)
• ابھی ڈھونڈ ہی رہی تھی ، تمھیں یہ نظر ہماری۔۔ (نورجہاں ، فلم بے وفا 1970)
• میرا محبوب آگیا ، من میرا لہرا گیا۔۔ (مسعودرانا ، فلم نیند ہماری خواب تمہارے 1971)
• ناراض نہ ہو تو عرض کروں۔۔ (مسعودرانا ، فلم نیند ہماری خواب تمہارے 1971)
• ہم نے تو پیار بہت تم سے چھپانا چاہا۔۔ (مالا ،مسعودرانا ، فلم نیند ہماری خواب تمہارے 1971)
• جو بظاہر اجنبی ہیں اور غم سے بیگانے ہیں ۔۔ (مہدی حسن ، فلم نیند ہماری خواب تمہارے 1971)
• ہائے میرا جھمکا ، کھو گیا سجنا ں کے بازار میں۔۔ (رونالیلیٰ، فلم نیند ہماری خواب تمہارے 1971)
• حال دل آج ہم سنائیں گے۔۔ (مسعودرانا / مالا ، فلم چراغ کہاں روشنی کہاں 1971)
• میری دعا ہے کہ تو بن کے ماہتاب رہے۔۔ (مسعودرانا ، فلم چراغ کہاں روشنی کہاں 1971)
• بتا اے دنیا والے ، یہ کیسی تیری بستی ہے۔۔ (رنگیلا ، فلم دل اور دنیا 1971)
• آجا رے ، کب سے پکارے۔۔ (مسعودرانا ، فلم میری محبت تیرے حوالے 1972)
• میرا پیار بھرا سنسار لٹا۔۔ (رنگیلا ، نسیم بیگم ، فلم میری محبت تیرے حوالے 1972)
• خوبصورت ہو تم ، ہم بھی کچھ کم نہیں۔۔ (احمدرشدی ، مالا ، فلم آؤ پیار کریں 1972)
• خاموش ہیں نظارے ، اک بار مسکرا دو۔۔ (مہدی حسن ، فلم بندگی 1972)
• تیرا سایہ ، جہاں بھی ہو سجناں ، پلکیں بچھا دوں۔۔ (نیرہ نور ، فلم گھرانہ 1973)
• ایک آنے کی چڑیا اور دوآنے کا مور ہے۔۔ (احمدرشدی ، رونالیلیٰ ، فلم گھرانہ 1973)
• پیار پیار پیار ، کرنے کو تو سب کرتے ہیں۔۔ (احمدرشدی ، فلم گھرانہ 1973)
• گورے گورے گال پہ ، کالا کالا تل رے۔۔ (احمدرشدی ، فلم گھرانہ 1973)
• لکھ دیجیے اک پیار کی عرضی ، میرے نام۔۔ (احمدرشدی ، فلم ملاقات 1973)
• اللہ کے نام پہ جھولی بھر دے۔۔ (مسعودرانا ، احمدرشدی ، روشن ، فلم بے ایمان 1973)
• جب شام ہوتی ہے ، مجھے تم یاد آتے ہو۔۔ (مہدی حسن ، فلم بانو رانی 1974)
• تیرے بھیگے بدن کی خوشبو سے لہریں بھی ہوئیں مستانی۔۔ (مہدی حسن ، فلم شرافت 1974)
• او میرے سنگ چلا ہے اک خوبصورت ساتھی۔۔ (اخلاق احمد ، نیرہ نور ، فلم شرافت 1974)
• دل دیوانہ ہے ، نجانے کیوں دھڑکتا رہتا ہے۔۔ (ناہیداختر ، فلم ننھا فرشتہ 1974)
• آج غم دے دیا ، کل خوشی بخش دی۔۔ (مسعودرانا ، فلم فرض اور مامتا 1975)
• اس پرچم کے سائے تلے ہم ایک ہیں۔۔ (نیرہ نور ، فلم فرض اور مامتا 1975)
• رات بھی لے رہی ہے انگڑائی ، میرے محبوب ، آؤ سو جائیں۔۔ (مہدی حسن ، فلم داغ 1976)
• پیار تو اک دن ہونا تھا ، ہونا تھا ہوگیا۔۔ (اے نیر ، ناہیداختر ، فلم خریدار 1976)
• سنو سنو ، جو تم کہو ، تمہاری ہر خوشی پہ اپنی جان۔۔ (ناہیداختر ، فلم انوکھی 1976)
• جنگل میں منگل ، تیرے ہی دم سے۔۔ (اے نیر ، مہناز ، فلم زندگی 1978)
• تیرے سنگ دوستی ، ہم نہ توڑیں کبھی۔۔ (مہدی حسن / اے نیر ، مہناز ، فلم زندگی 1978)
• تجھے دل میں چھپا لوں ، دھڑکن میں چھپا لوں۔۔ (مہناز ، فلم زندگی 1978)