گلوکار آصف جاوید

20 اپریل 2021ء کو گلوکار آصف جاوید کا کرونا سے انتقال ہو گیا۔۔!

آصف جاوید ، ایک بہت اچھی آواز کے مالک ایک بہترین گلوکار تھے۔ وہ ، شہنشاہ غزل خانصاحب مہدی حسن کے شاگرد تھے اور بالکل انھی کے انداز میں گاتے تھے۔ ان کے فن میں ان کی محنت بھی نظر آتی تھی۔

پرویز مہدی ، امجد پرویز اور غلام عباس کے بعد آصف جاوید ، چوتھے گلوکار تھے جنھوں نے مہدی حسن کے شاگردوں کے طور پر نام پیدا کیا تھا۔ وہ ریڈیو ، ٹی وی اور موسیقی کی محافل میں گایا کرتے تھے اور زیادہ تر اپنے استاد کے گیت ہی گاتے تھے۔

میرے اپنے مشاہدے کے مطابق مہدی حسن کو ان کے صاحبزادے آصف مہدی کے بعد سب سے اچھا آصف جاوید گایا کرتے تھے۔ یوٹیوب پر ان کے بہت سے ایسے گیت ہیں جو اصل میں مہدی حسن کے گائے ہوئے تھے لیکن انھیں آصف جاوید نے بڑی خوبی سے گایا تھا۔ سننے والے حیران رہ جاتے تھے کہ کوئی خانصاحب کو اتنی خوبی سے بھی گا سکتا ہے۔۔؟

آصف جاوید کے فلمی گیت

آصف جاوید نے فلم کے لیے بھی گایا تھا لیکن اس شعبے میں کامیاب نہیں ہوئے تھے۔ گو ان کا مکمل فلمی ریکارڈ دستیاب نہیں ہے لیکن بہت سے لوگوں کے لیے یہ بات حیران کن ہوگی کہ حسن طارق کی فلم دیدار (1974) میں ناشاد کی موسیقی میں ملکہ ترنم نورجہاں کے اس مشہور کورس گیت میں آصف جاوید کی خوبصورت آواز بھی شامل تھی:

• ہم سے جو نیناں چرائے مہندی باغ میں ، سکھی تورا سیاں بلائے مہندی باغ میں۔۔

یہ گیت سن کر مجھے بھی حیرت ہوئی تھی کہ آصف جاوید نے کتنا خوبصورت گایا تھا لیکن کتنی عجیب بات ہے کہ انھیں فلمی گلوکار کے طور پر کامیابی نہ مل سکی تھی۔ یقیناً کسی بھی انسان کی کامیابیوں میں قابلیت سے زیادہ قسمت کا عمل دخل ہوتا ہے اور یہی کچھ آصف جاوید کے ساتھ بھی ہوا۔ یہ بھی ایک حقیقت ہے کہ جس کی نقل کی جائے ، اس کی موجودگی میں کوئی مقام پیدا کرنا مشکل ہوتا ہے کیونکہ اصل کی موجودگی میں نقل کی اہمیت کم ہوجاتی ہے۔ جس طرح مسعودرانا نے محمدرفیع سے ہٹ کر گائیکی کا اپنا سٹائل بنایا تھا ، اگر اسی طرح آصف جاوید بھی کرتے تو شاید کہیں زیادہ کامیاب ہوتے۔

آصف جاوید اور مسعودرانا کا ساتھ

آصف جاوید نے فلم بارود کا تحفہ (1990) میں مسعودرانا کے ساتھ ایک ترانہ گایا تھا:

• مسلم کی ہے للکار ، اللہ اکبر ، اے باطل خونخوار ، خبردار ، خبردار۔۔

افغانستان کی خانہ جنگی پر بنائی جانے والی یہ واحد پاکستانی فلم تھی۔ اس ترانے کی دھن موسیقار مشتاق علی نے بنائی تھی جنھوں نے آصف جاوید سے دو فلموں لہو دی اگ (1974) اور گنگوا (1991) کے علاوہ دو نامکمل فلموں کماؤ پتر اور کنگلا صاحب کے گیت بھی گوائے تھے۔ ممکن ہے کہ کسی اور فلم میں بھی گوایا ہوگا۔ آصف جاوید کا انفرادی ریکارڈز کا صفحہ بنا دیا گیا ہے جہاں ان کی فلموں اور گیتوں کا ریکارڈ اپ ڈیٹ ہوتا رہے گا۔

آصف جاوید کا مسعودرانا کو خراج تحسین

آصف جاوید کو میں نے آخری بار ایک ویڈیو میں دیکھا اور سنا تھا جس میں انھوں نے مسعودرانا کا فلم دومٹیاراں (1968) کا یہ دلکش گیت اتنی خوبصورتی سے گایا تھا کہ ان کے ساتھی گلوکار انور رفیع بھی حیران رہ گئے تھے:

• ہن گل کر دلا ، پہلاں نئیں سیں من دا ، ویکھ لیا ای مزہ ، پیار کرن دا۔۔

آصف جاوید کا انتقال کرونا کی بیماری سے ہوا جو علاج ومعالجہ کی عدم سہولیات کی وجہ سے خاص طور پر برصغیر پاک و ہند میں شدت اختیار کرتی جارہی ہے۔ اللہ تعالیٰ ، مرحوم کی مغفرت کرے اور سبھی بیماروں کو صحت کاملہ عطا فرمائے (آمین)