ایسا شاید ہی کبھی ہوا ہو گا کہ قیام پاکستان کے بعد کوئی ہندو ، ہندوستان سے پاکستان آیا ہو اور مستقل طور پر یہیں کا ہو کر رہ گیا ہو۔۔!

کرشن کمار سے کے خورشید تک

معروف فلمساز اور ہدایتکار سید عطااللہ شاہ ہاشمی کی دعوت پر 'کرشن کمار' ، پاکستان آئے اور 'کے کمار' کے نام سے ان کی متعدد سپرہٹ فلموں کے نگران ہدایتکار یا سپروائزر کے طور پر زبردست کارکردگی کا مظاہرہ کیا۔ کچھ عرصہ بعد اسلام قبول کیا اور اپنا اسلامی نام 'خالدخورشید' پسند کیا جو 'کے خورشید' کے نام سےفلمی ریکارڈز میں محفوظ ہے۔

کے خورشید کی پہلی فلم

کے خورشید کی بطور ہدایتکار پہلی فلم شعلہ اور شبنم (1967) تھی جو ایک ایکشن اور ڈرامائی فلم تھی۔ اس فلم کی کہانی بھی ان کی اپنی تھی لیکن مکالمے ریاض شاہد کے لکھے ہوئے تھے۔ پاکستانی فلموں کے پہلے سپرسٹار سدھیر ، ہیرو اور شمیم آرا ہیروئن تھی۔ اس فلم کی خاص بات یہ تھی کہ اپنے وقت کے مقبول ہیرو درپن نے اس فلم میں ایک ثانوی رول کیا تھا۔

سدھیر کی دیگر ہیروز پر برتری

پاکستانی فلموں کے پہلے سپرسٹار ، سدھیر کو یہ اعزاز حاصل تھا کہ وقت کے بڑے بڑے ہیروز نے ان کے مقابل ثانوی کردار کیے تھے۔ ان میں درپن کے علاوہ ، اسلم پرویز ، اعجاز ، حبیب ، اکمل ، محمدعلی ، وحیدمراد ، شاہد ، عنایت حسین بھٹی ، کیفی ، بدرمنیر ، آصف خان ، یوسف خان ، سلطان راہی اور اقبال حسن شامل تھے۔ صرف سنتوش ، کمال اور ندیم کو ان کے مقابل کاسٹ نہیں کیا گیا تھا ، اگر کیا بھی جاتا تو یقیناً وہ بھی ثانوی کرداروں میں ہوتے کیونکہ سدھیر پاکستان کے سب سے مقبول اور اکلوتے 'سپرہیرو' تھے جو تین عشروں تک چوٹی کے سپرسٹار فلمی ہیرو رہے اور اپنی آخری فلم میں بھی مرکزی کردار میں تھے۔

کے خورشید کے فیورٹ گلوکار مسعودرانا تھے

ہدایتکار کے خورشید کی فلموں میں سب سے زیادہ مردانہ گیت مسعودرانا کے گائے ہوئے تھے۔ انھوں نے 9 فلموں میں 29 گیت گائے تھے۔ گویا فی فلم تین گیت تھے۔ فلم شعلہ اور شبنم (1967) میں ان کا گایا ہوا یہ گیت سپرہٹ ہوا تھا:

• عجیب ہے یہ زندگی ، کبھی ہیں غم ، کبھی خوشی ، وہاں ہیں اب تباہیاں ، جہاں تھیں رونقیں کبھی۔۔

ایک لٹے پٹے قافلے کے پس منظر میں گائے ہوئے اس تھیم سانگ کی گائیکی اور شاعری بڑے کمال کی تھی۔ یہ گیت تنویرنقوی کا لکھا ہوا تھا جس کی دھن ایم اشرف نے بنائی تھی۔

ایک نغماتی فلم نازنین (1969)

ہدایتکار کے خورشید کے کریڈٹ پر نازنین (1969) جیسی نغماتی فلم بھی تھی جس میں شبنم اور ندیم کی کلاسک جوڑی تھی۔ اس فلم کی پہچان ، مسعودرانا کے گائے ہوئے چار گیتوں میں سے یہ سپرہٹ گیت تھا:

• میراخیال ہو تم ، میری آرزو تم ہو ، میری نگاہ تمنا کی جستجو تم ہو۔۔

موسیقار ایم اشرف نے بھارتی فلم ہمراز (1967) میں روی شنکر کی موسیقی میں مہندرکپور کے گائے ہوئے گیت "نہ منہ چھپا کے جیو اور نہ سر جھکا کے جیو۔۔" کی دھن نقل کی تھی۔ اگر نقل اور اصل کا موازنہ کیا جائے تو پہلے الاپ ہی میں مسعودرانا یہ ثابت کر دیتے ہیں کہ ان کا مقابلہ تو صرف محمدرفیع ہی سے کیا جاسکتا تھا۔

پاکستانی فلموں میں شاید یہ پہلا گیت تھا جو ایک ہی گلوکار نے قوالی کے انداز میں گایا تھا۔ مسعودرانا کا یہ شاہکار گیت ان گیتوں میں سے ایک ہے کہ جسے جب بھی سنا ، ایسے لگا کہ جیسے پہلی بار سن رہا ہوں ، ایک لاجواب گیت تھا۔

اس فلم میں کلیم عثمانی کے لکھے ہوئے گیت تھے جن میں مسعودرانا کے گائے ہوئے یہ گیت بھی بڑے زبردست تھے

• یہ مانا کہ تم دلربا نازنین ہو ، مگر بندہ پرور ، خدا تو نہیں ہو۔۔
• نہ جھٹکو ہاتھ ، کرو کچھ بات ، کہ ہم کو نیند نہیں آتی۔۔
• آجا ، آجا ، دلربا ، چھوڑ کے مجھ کو کہاں چلی اے ، بے وفا۔۔

کے خورشید کی پہلی پنجابی فلم ، یملا جٹ (1969)

ہدایتکار کے خورشید کی پہلی پنجابی فلم یملا جٹ (1969) تھی۔ علاؤالدین نے ٹائٹل رول کیا تھا۔ رونا لیلیٰ کی یہ پہلی پنجابی فلم تھی جس میں اسے پانچ گیت گانے کا موقع ملا تھا۔ ایم اشرف کی دھنوں میں حزیں قادری کے لکھے ہوئے بیشتر گیت مقبول ہوئے تھے۔ سب سے ہٹ گیت تھا:

• ذرا ٹھہر جا وے چوری چوری جان والیو۔۔

اس فلم کا تھیم سانگ مسعودرانا کی آواز میں تھا جو سن کر تڑپ اٹھا تھا اور عہد کر لیا تھا کہ جب کبھی موقع ملا ، اس عظیم گلوکار کے ایسے بامقصد فن پاروں کو ضرور یاد کروں گا:

• اے جگ وانگ سراواں بندیا ، پہلے پہر نیں دھپاں جس تھاں ، پچھلے پہر نیں چھاواں ۔۔

اس گیت کے ایک انترے میں حزیں قادری نے اس فانی زندگی اور رشتوں کا فلسفہ چند الفاظ میں بیان کردیا تھا:

• سانواں دا وساہ کی کرناں ، روویئے تاں جے آپ نئیں مرنا
  سانواں وانگر ساتھ نئیں چلنا ، ماں ، پیو ، بہن ، بھرانواں۔۔

اسی فلم میں آواز کے بے تاج بادشاہ ، مسعودرانا کا ایک بھنگڑہ گیت

• نی میلہ لٹ لے مٹیارے ، تیرا کہیڑا مل لگدا۔۔

بھی تھا جس میں ان کی دلکش آواز چار چوفیرے اور دکھن پربت ، کچھ اس طرح سے گونجی تھی کہ فلم بینوں کو کرسیوں پر سے اچھلنے پر مجبور کر دیا تھا۔

نسیم بیگم کے ساتھ یہ دلکش رومانٹگ دوگانا

• لنگی بن کے پشوری ، پا کے کرتا لاہوری ، ویکھو منڈا میرے ہان دا مجاجاں کردا۔۔

بھی کیا کمال کا گیت تھا۔ اس فلم میں حسنہ اور یوسف خان کی روایتی جوڑی تھی۔

شیرپتر (1971) مسلسل دوسری پنجابی فلم تھی جس کے ہدایتکار کے خورشید تھے۔ سدھیر کا ٹائٹل رول تھا ، ہیروئن نغمہ تھی۔ اس فلم میں اداکارہ مہ پارہ سیکنڈ پیئر میں اقبال حسن کے ساتھ تھی جس کے لیے مسعودرانا کا یہ شوخ گیت گایا گیا تھا:

• مست ہوا نے گھنڈ چک ویکھی شکل جدوں مٹیار دی۔۔

مسعودرانا کی شاہکار نغماتی فلم نیند ہماری خواب تمہارے (1971)

کے خورشید کی فلمساز اور ہدایتکار کے طور پر پہلی سپرہٹ گولڈن جوبلی رومانٹک اور نغمہ بار فلم نیند ہماری خواب تمہارے (1971) تھی۔ دیبا اور وحیدمراد روایتی کرداروں میں تھے۔ کلیم عثمانی کی شاعری اور موسیقار ایم اشرف تھے۔ اس فلم میں بھی مسعودرانا کے چار گیت تھے جن میں سے تین سپرہٹ تھے۔ فلم کا سب سے مقبول ترین گیت تھا:

• میرا محبوب آگیا ، من میرا لہرا گیا ، دل کی امنگیں ہوئیں جواں۔۔

مسعودرانا کی پہچان ، لمبی تان اور اونچی سروں میں اڑان ہوتی تھی۔ سننے والا بھی ان کے گیت سنتے ہوئے خود کو انتہائی اونچی ہواؤں میں اڑتے ہوئے محسوس کرتا تھا۔ اس فلم کا یہ انتہائی دلکش رومانٹک گیت بھی وحیدمراد پر فلمایا گیا:

• ناراض نہ ہو تو عرض کروں ، دل تم سے محبت کرتا ہے
  لے لے کے تمہار نام کوئی دیوانہ آہیں بھرتا ہے۔۔

یہ گیت مسعودرانا کی گائیکی کا ایک ماسٹرپیس تھا۔ فلم کی ہیروئن دیبا ، اس گیت میں بڑی پرکشش نظر آئی۔ اسی فلمی جوڑی پر مالا اور مسعودرانا کا یہ دوگانا بھی دل کے تار چھیڑ دیتا ہے:

• ہم نے تو پیار بہت تم سے چھپانا چاہا ، دل کے ہاتھوں ہوئے مجبور تو اقرار کیا۔۔

کے خورشید کی بطور ہدایتکار تیسری اور آخری پنجابی فلم رب راکھا (1971) تھی جس میں بابا چشتی کی دھن میں مسعودرانا کا اپنی زمین کی محبت سے سرشار ایک ملی ترانہ تھا:

• ساڈے پاک دیس دی سارے جگ وچ کیتے نہ ملے مثال ، آؤ ، سجایئے دھرتی اپنی خون پسینے نال۔۔

مسعودرانا کی ایک اور نغماتی فلم چراغ کہاں روشنی کہاں (1971)

مسعودرانا کو ہدایتکار کے خورشید کی فلم چراغ کہاں روشنی کہاں (1971) میں چھ گیت گانے کا موقع ملا تھا۔ ان میں سے دو گیت سپرہٹ ہوئے تھے:

• حال دل آج ہم سنائیں گے ، بندہ پرور ، کرم کچھ تو فرمایئے۔۔
• میری دعا ہے کہ تو بن کے ماہتاب رہے ، خدا کرے کہ سلامت ، تیرا شباب رہے۔۔

یہ دونوں شاہکار گیت ندیم پر فلمائے گئے تھے جو وہ اپنی روایتی ہیروئن شبنم کے لیے گا رہے تھے۔ اس فلم کا تھیم سانگ

• دنیا والے ، کیسا نرالا تیرا یہ سنسار ہے۔۔

فلم میں دو بار الگ الگ گایا گیا تھا۔ ہماری فلموں میں ایسے کئی گیت ملتے ہیں کہ جن کی دھن ایک ہوتی تھی لیکن انھیں دو دو ، تین تین بلکہ چار چار بار بھی گایا گیا تھا۔

مسعودرانا کا کے خورشید کی فلموں میں آخری مقبول گیت فلم فرض اور مامتا (1975) میں تھا:

• آج غم دے دیا ، کل خوشی بخش دی ، حسن والوں کا کوئی بھروسہ نہیں۔۔

دلچسپ بات یہ ہے کہ مسعودرانا اور ہدایتکار کے خورشید کی نو میں سے آٹھ فلموں کے موسیقار ایم اشرف تھے اور بیشتر گیت کلیم عثمانی نے لکھے تھے۔

کے خورشید کی دیگر فلمیں

ہدایتکار کے خورشید کی دیگر فلموں میں دل دیا درد لیا (1968) واحد فلم تھی جس میں زیبا نے کام کیا تھا ، محمدعلی ہیرو تھے۔ اس فلم کے ٹائٹل پر ہدایتکار کے طور پر ریاض بخاری کا نام درج ہے جبکہ دیگر معلومات میں بھی خاصا تضاد ہے۔ فلم کنجوس (1968) کے بعد یہ دوسری فلم ہے کہ جس کے فلم ٹائٹل اور پوسٹر وغیرہ پر متضاد معلومات درج ہیں۔

فلم آؤ پیار کریں (1972) میں رونالیلیٰ اور احمدرشدی کا یہ گیت بڑا خوبصورت تھا "خوبصورت ہو تم ، ہم بھی کچھ کم نہیں۔۔" اس فلم میں رنگیلا چھائے ہوئے تھے اور ان پر احمدرشدی کا یہ مزاحیہ گیت بھی فلمایا گیا تھا "روزی روزی پکاروں میں بن میں ، پیاری روزی بسی میرے من میں۔۔"

فلم گھرانہ (1973) بھی ایک بہت بڑی نغماتی فلم تھی جس میں نیرہ نور کا یہ گیت سپرہٹ ہوا تھا "تیرا سایہ جہاں بھی ہو سجناں ، پلکیں بچھا دوں۔۔"

اس فلم میں محمدعلی کی جذباتی اداکاری فلم کی جان تھی جبکہ احمدرشدی کے کئی گیت مقبول ہوئے تھے جن میں "پیار پیار پیار ، کرنے کو تو سب کرتے ہیں۔۔" ، "گورے گورے گال پہ کالا کالا تل رے ، اک لڑکی مغرور سی جو لے گئی میرا دل رے۔۔" اور "ایک آنے کی گڑیا اور دو آنے کا مور ہے۔۔"

فلم بانو رانی (1974) میں مہدی حسن کا یہ دلکش رومانٹک گیت میرے پسندیدہ ترین گیتوں میں سے ایک تھا "رات بھی لے رہی ہے انگڑائی ، میرے محبوب ، آؤ سو جائیں۔۔"

ناہیداختر کی پہلی فلم ننھا فرشتہ (1974)

فلم ننھا فرشتہ (1974) میں پہلی بار گلوکارہ ناہیداختر کو متعارف کرایا گیا تھا اور پہلا گیت تھا:

• دل دیوانہ دل ، نجانے کیوں دھڑکتا رہتا ہے۔۔

اپنی پہلی ہی فلم میں ناہیداختر نے مسعودرانا اور احمدرشدی کے ساتھ یہ کورس گیت بھی گایا تھا

• تار بنا تنبہ وجدا ای نا۔۔

فلم امنگ (1975) میں پہلی بار اخلاق احمد کو چار گیت گانے کا موقع ملا تھا جو بڑے مقبول ہوئے تھے۔ خاص طور پر نیرہ نور کے ساتھ دونوں دوگانے "کیوں نہ راہوں میں کلیاں بچھائیں ہم ، آج دلدار سج دھج کے آیا ہے۔۔" اور "رات بھر جیا مورا مجھے کیوں ستائے۔۔"

فلم داغ (1976) میں مہناز کا گیت "اپنے لیے تو سب ہی جیتیں ہیں اس جہاں میں۔۔" بھی پسند کیا گیا تھا۔

فلم انوکھی (1976) میں ناہیداختر کا گیت "سنوسنو ، جو تم کہو ، میں اپنی ہر خوشی تمہارے نام۔۔" بڑا مقبول ہوا تھا۔

فلم سنگم (1977) میں غلام عباس کا گیت "سانولی سلونی ، او تیکھے نینوں والی۔۔" بھی بڑا پسند کیا گیا تھا۔

فلم نیاانداز (1979) میں میڈم نورجہاں کا گیت "دے رہی ہے مزہ بے رخی آپکی۔۔" اور اے نیر کا گیت "ضد نہ کر اس قدر ، جان جان۔۔" بھی بڑے مقبول گیت تھے۔

کے خورشید کی آخری دو فلمیں بے نظیر قربانی (1985) اور بدلہ (1987) تھیں۔

کے خورشید کا فلمی ریکارڈ

کے خورشید نے اپنے بیس سالہ فلمی کیرئر میں کل 20 فلمیں بنائیں جن میں 17 اردو اور 3 پنجابی فلمیں تھیں۔ ان میں سے 10 فلموں کے فلمساز بھی تھے۔ 3 فلموں کی کہانیاں یا منظرنامے بھی ان کے کریڈٹ پر ہیں۔ 4 فلموں ، نوکر (1955) ، چھوٹی بیگم (1956) ، داتا (1958) اور غالب (1961) میں نگران ہدایتکار یا سپروائزر کے طور پر اپنی صلاحیتوں کا مظاہرہ کیا۔ 1990ء میں انتقال ہوگیا تھا۔

(22 اردو گیت ... 7 پنجابی گیت )