پاکستانی فلمی موسیقی کا ایک بہت بڑا نام ، اے حمید کا تھا۔۔!

موسیقار اے حمید نے تیس سالہ فلمی کیرئر میں ستر سے زائد فلموں کی موسیقی ترتیب دی تھی۔ اندازاً ساڑھے چار سو کے قریب گیت کمپوز کیے جن میں سپرہٹ گیتوں کی ایک بہت بڑی تعداد ہے۔ کم ہی فلمیں ایسی تھیں کہ جن کا کوئی گیت مقبول نہ ہوا ہو۔ مادری زبان پنجابی ہونے کے باوجود اردو فلموں کے سکہ بند موسیقار تھے اور پورے فلمی کیرئر میں صرف 8 پنجابی فلموں کی موسیقی ترتیب دی تھی۔

اے حمید کا فلمی کیرئر

ہدایتکار جعفربخاری کی اردو فلم انجام (1957) سے آغاز کیا لیکن پہلا سپرہٹ گیت ہدایتکار اقبال یوسف کی اردو فلم رات کے راہی (1960) میں تھا

• کیا ہوا دل پہ ستم ، تم نہ سمجھو گے بلم۔۔

زبیدہ خانم کی مترنم آواز میں یہ ایک شاہکار گیت تھا۔

اسی سال ہدایتکار ایس ایم یوسف کی سپرہٹ فلم سہیلی (1960) سے بریک تھرو ملا جس کے بیشتر گیت مقبول ہوئے تھے۔ نسیم بیگم کا گایا ہوا گیت

• ہم بھول گئے ہر بات مگر تیرا پیار نہیں بھولے۔۔

ایک سٹریٹ سانگ ثابت ہوا تھا۔

ہدایتکار شریف نیر کی میگاہٹ اردو فلم دوستی (1971) ان کے فلمی کیرئر کی سب سے بڑی نغماتی فلم ثابت ہوئی تھی۔ میڈم نورجہاں کے گائے ہوئے لازوال گیت

• چٹھی جرا سیاں جی کے نام لکھ دے۔۔

سمیت اس فلم کے آٹھ میں سات گیت سپرہٹ ہوئے تھے۔ دیگر فلموں میں توبہ ، آشیانہ (1964) ، یہ امن (1971) ، بہشت (1974) ، ثریا بھوپالی (1976) اور آواز (1978) وغیرہ بہت بڑی نغماتی فلمیں تھیں۔

طوالت سے بچنے کے لیے ان کے تمام مقبول عام نغمات کی ایک فہرست مضمون کے آخر میں دی گئی ہے۔ یہاں خاص خاص فلموں ، گیتوں ، واقعات اور جناب مسعودرانا کے لیے کمپوز کیے گئے گیتوں پر بات ہوگی۔

اے حمید کی مشہور زمانہ قوالیاں

اے حمید کو یہ اعزاز حاصل ہے کہ انھوں نے پاکستانی فلموں کی سب سے مقبول فلمی قوالی

• نہ ملتا گر یہ توبہ کا سہارا ، ہم کہاں جاتے۔۔

کمپوز کی تھی۔ یہ مشہور زمانہ قوالی ہدایتکار ایس اے حافظ کی اردو فلم توبہ (1964) میں سلیم رضا ، منیر حسین ، آئرن پروین ، سائیں اختر اور ساتھیوں نے گائی تھی۔

اس سے قبل ہدایتکار ایس ایم یوسف کی اردو فلم اولاد (1962) میں بھی اسی ٹیم کی گائی ہوئی قوالی

• حق ، لا الہ لا اللہ ، فرما دیا کملی والے ﷺ نے۔۔

بڑی مقبول ہوئی تھی۔

اس کے علاوہ ہدایتکار اقبال یوسف کی اردو فلم عیدمبارک (1965) کی محفل میلادؐ کو بھلا کون بھلا سکتا ہے

• رحم کرو ، یا شاہ دو عالم ، صلی اللہ علیہ وسلم۔۔

مالا ، نذیربیگم اور ساتھیوں کی آوازوں نے ایک ایسا روحانی سماں پیدا کردیا تھا کہ نہ صرف ہواؤں اور فضاؤں نے رنگ و نور کی برسات کر دی تھی بلکہ فلمساز کو بھی ایک بلیک اینڈ وہائٹ فلم میں یہ نعتیہ کلام رنگین فلمانا پڑا تھا۔ اے حمید کی بیشتر فلموں میں ایسے روحانی گیت ، قوالیاں وغیرہ عام ہوتی تھیں۔

اردو فلم شریک حیات (1968) میں ہدایتکار ایس ایم یوسف نے شہنشاہ غزل مہدی حسن کو پہلی اور آخری بار سلورسکرین پر پیش کیا تھا۔ موسیقار اے حمید نے ان کے لیے آخری مغل تاجدار اور شاعر بہادرشاہ ظفر کی یہ مشہور غزل کمپوز کی تھی

• بات کرنی مجھے مشکل کبھی ایسی تو نہ تھی۔۔

اے حمید کا پسندیدہ گلوکار کون تھا؟

اے حمید کے پسندیدہ گلوکار تو منیر حسین تھے جنھیں وہ اکثر و بیشتر مواقع دیتے تھے اور خاص طور پر قوالیوں کے لیے وہ پہلا انتخاب ہوتے تھے۔ لیکن ان کے سب سے زیادہ مردانہ گیت مہدی حسن نے گائے تھے جو بنیادی طور پر ایک غزل گائیک تھے اور بلاشبہ اپنے فن کے بے مثل استاد تھے۔ ان کی گائیکی کا نیم کلاسیکل سٹائل ، اردو فلموں میں اتنا مقبول ہوا کہ بے شمار سپرہٹ گیت ان کے کریڈٹ پر ہیں۔ لیکن یہ بھی ایک حقیقت ہے کہ خانصاحب ، فلم کے آئیڈیل گلوکار کبھی نہیں رہے کیونکہ وہ ہر طرح کے فلمی گیت نہیں گا سکتے تھے۔ اس کی ایک زندہ مثال فلم ندیا کے پار (1973) میں دیکھنے میں آئی جب ایک کلاسیکل گیت

• آج میرے سنگیت کے مالک۔۔

کے آخر میں لمبی تان لگانا تھی جو مہدی حسن کے لیے ممکن نہ تھی۔ اے حمید نے اس مشکل کاحل ایسے نکالا تھا کہ اس کے لیے گلوکار شوکت علی کی خدمات حاصل کی گئیں جو لمبی تانیں لگانے میں ماہر تھے۔

ایسی ہی ایک صورتحال فلم ثریا بھوپالی (1976) میں دیکھنے میں آئی اور اے حمید کو مہدی حسن کی اس فنی کمزوری پر قابو پانے کے لیے منیر حسین کی خدمات حاصل کرنا پڑیں۔ فلم انگارے (1972) میں مہدی حسن کی گائی ہوئی مشہور زمانہ غزل

• اب کہ ہم بچھڑے تو شاید کبھی خوابوں میں ملیں۔۔

کی دھن بھی اے حمید نے بنائی تھی۔ اس کے علاوہ اور بھی بہت سے سپرہٹ گیت گوائے تھے جن کی فہرست نیچے دی گئی ہے۔

اے حمید کے مسعودرانا کے لیے گیت

مہدی حسن کے برعکس مسعودرانا ایک مکمل فلمی گلوکار تھے۔ آل راؤنڈ کارکردگی میں لاثانی تھے اور ہر طرح کے گیت بڑی آسانی سے گا لیتے تھے۔ ان کے ساتھ اے حمید کا پہلا ساتھ ہدایتکار حسن طارق کی اردو فلم بہن بھائی (1968) میں ہوا تھا۔ اس فلم میں مالا کے ساتھ گائے ہوئے اس رومانٹک گیت میں کلاسک رنگ نمایاں تھا:

• چھنن چھنن باجے رے ، مدھر مدھر گائے رے۔۔

اسی سال ہدایتکار ایس ایم یوسف کی فلم شریک حیات (1968) میں اے حمید نے مسعودرانا کے لیے پہلا سولو گیت کمپوز کیا تھا:

• میرے دل کے صنم خانے میں اک تصویر ایسی ہے ، جو بالکل آپ جیسی ہے۔۔

اس لاجواب شوخ اور رومانٹک گیت میں مسعودرانا نے جو ایکسپریشن دیے ، اس کی کوئی مثال نہیں ملتی۔ ایسا ہی ایک اور بے مثل شوخ گیت ہدایتکار فریداحمد کی اردو فلم خواب اور زندگی (1973) میں بھی تھا جس کا ایک ایک بول مسعودرانا کی عظمت کی گواہی دیتا ہے:

• اک سانولی سی لڑکی میرے دل کو بھا گئی ہے ، نس نس میں بس گئی ہے ، پاگل بنا گئی ہے۔۔

اسی فلم میں روایتی رومانٹک گیتوں میں رونالیلیٰ ٰ کے ساتھ گائے ہوئے اس امر سنگیت کو کون بھلا سکتا ہے:

• کل بھی تم سے پیار تھا مجھ کو ، تم سے محبت آج بھی ہے۔۔"

ہدایتکار ایس اے حافظ کی اردو فلم شکار (1974) میں بھی ایک تیز طرار شوخ گیت مسعودرانا کی آل راؤنڈ کارکردگی کا منہ بولتا ثبوت ہے:

• مر گیا ، لٹ گیا ، دل گیا ، میں تباہ ہوگیا ، اک شکاری ، اک نظر کا ، ہائے شکار ہوگیا۔۔

سنجیدہ اور بامقصد گیتوں کی طرف آئیں تو ہدایتکار حسن طارق کی اردو فلم وحشی (1971) کا تھیم سانگ سامعین پر بڑا گہرا اثر کرتا ہے:

• جو ٹھنڈک لوٹے چھاؤں کی ، جو گود اجاڑے ماؤں کی ، اس ظالم دنیا میں لوگو ، انسان اسے بھی کہتے ہیں۔۔

ہدایتکار نذرالاسلام کی اردو فلم حقیقت (1974) کا تھیم سانگ زندگی کی حقیقت بیان کرتا ہے:

• متوارے ، کتنا دکھی ہے انسان ، کوئی نہ جانے درد کسی کا ، سب ہیں یہاں انجان۔۔

درد دل رکھنے والوں کے لیے مسعودرانا کی دلسوز آواز دل میں اتر جاتی ہے۔ صرف یہی نہیں بلکہ جب بات ایک لوک گیت کی ہوتی ہے تو اس شعبے میں بھی مسعودرانا نے جو گایا ، امر کردیا:

• اٹھ جاگ نی سسیئے ، ستی ایں ، تینوں چھل گئی نیندر چور ، نی سسیسئے ، بے خبرے ، تیرا لٹیا ای شہر بھمبھور۔۔

ہدایتکار مسعود پرویز کی پنجابی فلم پنوں دی سسی (1972) میں اے حمید نے مسعودرانا سے یہ گیت اتنی اونچی سروں میں گوایا کہ برصغیر کا کوئی دوسرا گلوکار ان سے بہتر نہیں گا سکتا تھا۔ ہائی پچ میں گایا گیا ایک اور انتہائی مشکل اور بھاری بھر کم گیت ہدایتکار حسن طارق کی اردو فلم ضرورت (1976) میں بھی تھا:

• ہم بچھڑ جائیں گے سدا کے لیے ، اب تو کچھ یاد کر خدا کے لئے۔۔"

ہدایتکار قدیرملک کی پنجابی فلم آن (1973) میں اے حمید نے منیر حسین ، رونالیلیٰ اور مسعودرانا سے قومی جذبے سے سرشار ایک انقلابی کورس گیت گوایا تھا جو جناب ذوالفقارعلی بھٹوؒ کے 'عوامی دور' کی یاد دلاتا ہے جب سماج اور عوام دشمن عناصر پر بڑا کڑا وقت ہوا کرتا تھا ، ذرا بول ملاحظہ فرمائیں:

• سب ٹر گئے خان وڈیرے ، تیرا میرا دور آگیا ، واہ واہ بھئی شاناں تیریاں۔۔"

ہدایتکار ایس ایم یوسف کی اردو فلم نیک پروین (1975) میں اے حمید نے ایک بڑا ہی سبق آموزگیت گوایا تھا جس میں ناہیداختر ، شراب کے قصیدے بیان کرتی ہے تو مسعودرانا ، شراب کی برائیوں کا ذکر کرتے ہیں۔ سنگیتا اور محمدعلی پر فلمایا ہوا یہ کلب گیت بڑے کمال کا تھا:

• جانے کیوں ڈرتی ہے دنیا جام سے ، پینے والے پیتے ہیں یہ آگ بڑے آرام سے۔۔"

ہدایتکارہ وحیدہ خان کی ڈبل ورژن اردو/پشتو فلم کرائے کے گوریلے (1984) میں اے حمید نے ایک کورس گیت گوایا تھا

• ہم چار یار گوریلے۔۔

اس گیت میں اے نیر اور اخلاق احمد مرکزی گلوکار تھے جبکہ مسعودرانا اور شوکت علی ثانوی گلوکار تھے۔

اے حمید کا مسعودرانا کے ساتھ آخری گیت ایک مزاحیہ کورس گیت تھا جو ہدایتکار ایس سلیمان کی کوپروڈکشن فلم لوان لندن (1987) میں گایا گیا تھا

• اللہ مہربان تو زمانہ مہربان ہے۔۔

ساتھی گلوکاران ، اے نیر اور شوکت علی تھے۔

اے حمید کے اہم سنگ میل

دلچسپ اتفاق ہے کہ پہلی فلم کی طرح موسیقار اے حمید کی آخری فلم ڈسکو دیوانے (1988) کے ہدایتکار بھی جعفربخاری ہی تھے۔

اے حمید نے ہدایتکار ایس ایم یوسف کی بیشتر فلموں کی موسیقی ترتیب دی تھی۔ سو سے زائد گیت نغمہ نگار فیاض ہاشمی سے لکھوائے تھے۔

زیادہ تر گیت میڈم نورجہاں ، مالا ، مہدی حسن اور منیر حسین سے گوائے تھے۔

انھوں نے گلوکار اے نیر کو دریافت کیا تھا اور ہدایتکار حسن طارق کی اردو فلم بہشت (1974) میں روبینہ بدر کے ساتھ یہ پہلا دوگانا گوایا تھا

• یونہی دن کٹ جائیں ، یونہی شام ڈھل جائے ، تجھے دیکھتا رہوں میں ، یونہی سامنے بٹھائے۔۔

معروف پاپ سنگر نازیہ حسن کو بھی پہلی بار ہدایتکار حسن طارق کی اردو فلم سنگدل (1982) میں گوایا تھا جس میں یہ گیت تھا

• ڈسکو دیوانے۔۔

بین الاقوامی شہرت کی حامل اس پاکستانی گلوکارہ کی پہچان اس کا پہلا سپرہٹ ڈسکو گیت تھا "آپ جیسا کوئی میری زندگی میں آئے تو بات بن جائے۔۔" یہ گیت کسی بھارتی فلم کے لیے گایا گیا تھا۔

1924ء میں امرتسر کے ایک فنکار گھرانے میں پیدا ہونے والے شیخ عبدالحمید عرف 'اے حمید' نے بھارت کے پونا فلم انسٹیٹیوٹ سے موسیقی کی تربیت حاصل کی تھی۔ وہ پیانو بجانے کے ماہر تھے۔ انتقال 1991ء میں ہوا اور راولپنڈی میں سپردخاک ہوئے۔

اے حمید کے چند مقبول عام گیت

• کیا ہوا دل پہ ستم ، تم نہ سمجھو گے بلم۔۔ (زبیدہ خانم ، فلم رات کے راہی 1960)
• ہم بھول گئے ہر بات مگر تیرا پیار نہیں بھولے۔۔ (نسیم بیگم ، فلم سہیلی 1960)
• مکھڑے پہ سہرا ڈالے ، آجا او آنے والے۔۔ (نسیم بیگم مع ساتھی ، فلم سہیلی 1960)
• کہیں دو دل جو مل جاتے ، بگڑتا کیا زمانے کا۔۔ (سلیم رضا ،نسیم بیگم ، فلم سہیلی 1960)
• لاالہ الا اللہ ، فرما دیا کملی والے ﷺ نے۔۔ (سلیم رضا ، منیر حسین ، سائیں اختر مع ساتھی فلم اولاد 1962)
• تم ملے پیار ملا ، اب کوئی ارمان نہیں۔۔ (منیر حسین ، نسیم بیگم ، فلم اولاد 1962)
• نام لے لے کے تیرا ہم تو جئیں جائیں گے۔۔ (نسیم بیگم ، فلم اولاد 1962)
• نہ ملتا گر یہ توبہ کا سہارا ، ہم کہاں جاتے۔۔ (منیر حسین ، سلیم رضا ، آئرن پروین مع ساتھی فلم توبہ 1964)
• المدد ، المدد ، پرودگار دو جہاں ﷺ۔۔ (نسیم بیگم ، آئرن پروین مع ساتھی فلم توبہ 1964)
• او رے صنم ، دل یہ کیسے بتائے ، پیار میں بیری ہوگئے۔۔ (نورجہاں ، فلم توبہ 1964)
• تیری خاطر جل رہے ہیں ، کب سے پروانے۔۔ (نورجہاں ، فلم پیغام 1964)
• وفاؤں کی ہم کو سزا تو نہ دو گے۔۔ (مالا ، نسیم بیگم مع ساتھی فلم پیغام 1964)
• جارے بے دردی تو نے ، کہیں کا ہمیں نہ چھوڑا۔۔ (مالا مع ساتھی ، فلم آشیانہ 1964)
• بڑے سنگدل ہو ، بڑے ناسمجھ ہو۔۔ (احمدرشدی ، فلم آشیانہ 1964)
• جو دل کو توڑتے ہیں ، ان کا بھی جواب نہیں۔۔ (منیر حسین ، فلم آشیانہ 1964)
• چن لیا میں نے تمہیں ، سارا جہاں رہنے دیا۔۔ (نورجہاں ، فلم شبنم 1965)
• جو کسی کے قریب ہوتے ہیں ، وہ بڑے خوش نصیب۔۔ (سلیم رضا ، فلم شبنم 1965)
• رحم کرو یا شاہ دو عالم ﷺ ، صلی اللہ علیہ وسلم۔۔ (مالا ، نذیربیگم مع ساتھی ، فلم عیدمبارک 1965)
• نوازش ، کرم ، شکریہ ، مہربانی ، مجھے بخش دی آپ نے زندگانی۔۔ (مہدی حسن ، فلم میں وہ نہیں 1967)
• اے دنیا ، کیا تم سے کہیں ، جا چھیڑ نہ ہم دیوانوں کو۔۔ (مہدی حسن ، فلم سہاگن 1967)
• کاش کوئی مجھ کو سمجھاتا ، میری سمجھ میں کچھ نہیں آتا۔۔ (احمدرشدی ، فلم بہن بھائی 1968)
• ہیلو ہیلو ، مسٹر عبدالغنی۔۔ (آئرن پروین ، احمدرشدی ، فلم بہن بھائی 1968)
• اے بے کسوں کے والی ، دے دے ہمیں سہارا۔۔ (مالا ، مہدی حسن ، فلم بہن بھائی 1968)
• بات کرنی مجھے مشکل کبھی ایسی تو نہ تھی۔۔ (مہدی حسن ، فلم شریک حیات 1968)
• کسے آواز دوں تیرے سوا ، ڈھونڈ رہا ہے پیار میرا۔۔ (مالا ، فلم شریک حیات 1968)
• میرے دل کے صنم خانے میں اک تصویر ایسی ہے۔۔ (مسعودرانا ، فلم شریک حیات 1968)
• تیرے لیے او جان جان ، لاکھوں ستم اٹھائیں گے۔۔ (نورجہاں ، فلم شریک حیات 1968)
• چٹھی جرا سیاں جی کے نام لکھ دے۔۔ (نورجہاں ، فلم دوستی 1971)
• روٹھے سیاں کو میں تو اپنے ، خود ہی منانے چلی آئی۔۔ (نورجہاں ، فلم دوستی 1971)
• یہ وادیاں ، یہ پربتوں کی شاہ زادیاں۔۔ (نورجہاں ، فلم دوستی 1971)
• گوری رین ملن کی آئی کہ نین تیرے کجلے بھرے۔۔ (نورجہاں ، فلم دوستی 1971)
• بس گیا تو سوتنیا کے دوار سجناں ، کہاں ہے تیرا پیار سجناں۔۔ (نورجہاں ، فلم دوستی 1971)
• آرے آرے ، دل کے سہارے۔۔ (مجیب عالم ، نورجہاں ، فلم دوستی 1971)
• سجناں ، بھول نہ جانا میرا پیار۔۔ (نورجہاں ، فلم دوستی 1971)
• کس نام سے پکاروں ، کیا نام ہے تمہارا۔۔ (نورجہاں ، فلم غرناطہ 1971)
• جو ٹھنڈک لوٹے چھاؤں کی ، جو گود اجاڑے ماؤں کی۔۔ (مسعودرانا ، فلم وحشی 1971)
• ظلم رہے اور امن بھی ہو ، کیا ممکن ہے۔۔ (نورجہاں/مہدی حسن ، فلم یہ امن 1971)
• اک لڑکی کی شادی آئی ، گونج اٹھی گھر میں شہنائی۔۔ (مالا مع ساتھی ، فلم یہ امن 1971)
• اڑتا ہوا وقت تھام لو ، ساتھی نہ ہوجائے شام۔۔ (مجیب عالم ، رونا لیلیٰ ، فلم یہ امن 1971)
• اٹھ جاگ نی سسئے ، ستی ایں ، تیرا لٹیا ای شہر بھمبھور۔۔ (مسعودرانا ، فلم پنوی دی سسی 1972)
• تیرے ملنے دی آس لے میں ٹر پئی۔۔ (مسعودرانا ، رونا لیلیٰ ، فلم پنوں دی سسی 1972)
• ہر آدمی ، الگ سہی مگر امنگ ایک ہے۔۔ (مہدی حسن ، فلم زندگی ایک سفر ہے 1972)
• اب کہ ہم بچھڑے تو شاید کبھی خوابوں میں ملیں۔۔ (مہدی حسن ، فلم انگارے 1972)
• جوگیا وے تک میرے ہتھ کی لکیر نوں،، (نورجہاں ، خورشید بیگم ، فلم آن 1973)
• سب ٹرگئے خان وڈیرے ، تیرا میرا دور آگیا۔۔ (رونا لیلیٰ ، منیر حسین ، مسعودرانا ، فلم آن 1973)
• کل بھی تم سے پیار تھا مجھ کو۔۔ (رونا لیلیٰ ، مسعودرانا ، فلم خواب اور زندگی 1973)
• اک سانولی سی لڑکی میرے دل کو بھا گئی ہے۔۔ (مسعودرانا ، فلم خواب اور زندگی 1973)
• چلو کہیں دور یہ سماج چھوڑ دیں۔۔ (مالا ، مہدی حسن ، فلم سماج 1974)
• پیار خود جینے کے انداز سکھا دیتا ہے۔۔ (منیر حسین ، فلم سماج 1974)
• دل لے کے مکر گیا ہائے ، سجن بے ایمان نکلا۔۔ (مالا ، فلم شکار 1974)
• مر گیا ، لٹ گیا ، دل گیا ، میں تباہ ہوگیا۔۔ (مسعودرانا ، فلم شکار 1974)
• زندگی جا ، چھوڑ دے پیچھا میرا۔۔ (نورجہاں / مہدی حسن ، فلم جواب دو 1974)
• متوارے ، کتنا دکھی ہے انسان ، کوئی نہ جانے۔۔ (مسعودرانا ، فلم حقیقت 1974)
• کل تک جو کہتے تھے اپنا ، آج وہی بیگانے ہیں۔۔ (نورجہاں ، فلم بہشت 1974)
• میں جو شاعر کبھی ہوتا ، تیرا سہرا کہتا۔۔ (مہدی حسن ، فلم بہشت 1974)
• ہزار بار منع کیا ، میری گلی نہ سیاں آنا۔۔ (ثمراقبال ، فلم عزت 1975)
• خدا ، وہ دن نہ دکھائے کہ یہ گناہ کروں۔۔ (مہناز ، فلم معاشرہ 1975)
• لکھ دی ہم نے آج کی شام ، آپکی خاطر۔۔ (ناہیداختر ، فلم نیک پروین 1975)
• آگئی باگاں وچ بہار۔۔ (نورجہاں ، فلم سوہنی مہینوال 1976)
• تھا یقین کہ آئیں گی یہ راتاں کبھی۔۔ (ناہیداختر ، فلم ثریا بھوپالی 1976)
• نام آئے نہ تیرا پیار کی رسوائی میں۔۔ (مہدی حسن ، فلم ثریا بھوپالی 1976)
• ہم بچھڑ جائیں گے سدا کے لئے۔۔ (مسعودرانا ، فلم ضرورت 1976)
• اے دوست ، تیری آنکھ اگر نم ہے تو مجھے کیا۔۔ (غلام عباس ، فلم بیگم جان 1977)
• تمام عمر تمہیں زندگی کا پیار ملے۔۔ (ناہیداختر ، فلم بھروسہ 1977)
• کس طرح جان وفا ، شوق کا اظہار کروں۔۔ (مہدی حسن ، فلم بھروسہ 1977)
• میرے دل سے زندگی بھر تیرا پیار کم نہ ہوگا۔۔ (مہدی حسن ، فلم دل کے داغ 1978)
• اک نئے موڑ پر زندگی آگئی۔۔ (نورجہاں ، مہدی حسن ، فلم دل کے داغ 1978)
• زندگی ، تو نے ہر قدم پہ مجھے۔۔ (غلام عباس ، مہناز ، فلم ماضی حال مستقبل 1978)
• تو میرے پیار کا گیت ہے۔۔ (ناہیداختر / مہدی حسن / اسد امانت علی خان ، فلم آواز 1978)
• سنو ، سنو ، شہر کے باسیو ، گاؤں سے آیا ہوں۔۔ (اے نیر ، فلم آواز 1978)
• ہری بھری آبادیاں ، گیت گاتی وادیاں ، نیلے گگن کے تلے۔۔ (غلام عباس ، فلم آواز 1978)
• دے رہی ہے مزہ ، بے رخی آپ کی۔۔ (نورجہاں ، فلم نیا انداز 1979)
• ضد نہ کر اس قدر ، جان جان ، حرج کیا مسکرانے میں ہے۔۔ (اے نیر ، فلم نیا انداز 1979)

17 اردو گیت ... 8 پنجابی گیت

Masood Rana & A. Hameed:

5 joint Online films

(3 Urdu and 2 Punjabi films)

1.	1968: Behan Bhai (Urdu)

2.	1973: Khawab Aur Zindagi (Urdu)

3.	1974: Shikar (Urdu)

4.	1974: Teray Jehay Putt Jamman Manwa (Punjabi)

5.	1976: Sohni Mehinwal (Punjabi)

Masood Rana & A. Hameed:

Total 17 joint films

(13 Urdu, 4 Punjabi films)

1.	1968: Behan Bhai (Urdu)

2.	1968: Sharik-e-Hayyat (Urdu)

3.	1969: Bahu Rani (Urdu)

4.	1971: Wehshi (Urdu)

5.	1972: Punnu Di Sassi (Punjabi)

6.	1973: Aan (Punjabi)

7.	1973: Khawab Aur Zindagi (Urdu)

8.	1974: Shikar (Urdu)

9.	1974: Teray Jehay Putt Jamman Manwa (Punjabi)

10.	1974: Haqeeqat (Urdu)

11.	1975: Professor (Urdu)

12.	1975: Neik Parveen (Urdu)

13.	1976: Sohni Mehinwal (Punjabi)

14.	1976: Zaroorat (Urdu)

15.	1979: Mout Meri Zindagi (Urdu)

16.	1984: Karaye Kay Goreelay (Urdu)

17.	1987: Love in London (Urdu)