تسلیم فاضلی

رفتہ رفتہ وہ میری ہستی کا ساماں ہو گئے ۔۔
پہلے جاں ، پھر جانِ جاں ، پھر جانِ جاناں ہو گئے
دن بدن بڑھتی گئیں ، اس حسن کی رعنائیاں۔۔
پہلے گل ، پھر گلبدن ، پھر گل بداماں ہو گئے
آپ تو نزدیک سے نزدیک تر آتے گئے ۔۔
پہلے دل ، پھر دلربا ، پھر دل کے مہماں ہو گئے
پیار جب حد سے بڑھا ، سارے تکلف مٹ گئے ۔۔
آپ سے ، پھر تم ہوئے ، پھر تو کا عنواں ہو گئے

پاکستان کی فلمی تاریخ میں یو ں تو کئی ایک لاجواب گیت لکھے گئے ہیں لیکن مندرجہ بالا غزل ، اپنی مثال آپ ہے۔ ادبی حلقے بھی یقیناً اس کلام کو سن کر حیرت زدہ رہ گئے ہوں گے جو عام طور پر فلمی شاعری کو درخورداعتنا نہیں سمجھتے تھے۔

فلم زینت (1975) کے لیے یہ شاہکار غزل ، تسلیم فاضلی نے لکھی تھی اورموسیقار ناشاد نے شہنشاہ غزل خانصاحب مہدی حسن سے گوائی تھی۔ سلیم رضا کے بعد مہدی حسن کے گیتوں کی شاعری بڑے کمال کی ہوتی تھی۔ وہ بڑے خوش قسمت گویے تھے کہ انھیں تسلیم فاضلی جیسے اعلیٰ پائے کے گیت نگاروں کا ساتھ ملا تھا جن کے گیتوں میں ادبی چاشنی پائی جاتی تھی۔

تسلیم فاضلی کا فلمی کیرئر

تم ملے پیار ملا (1969)

تسلیم فاضلی کی پہلی فلم عاشق (1968) تھی جس کے سبھی گیت انھوں نے لکھے تھے لیکن کوئی ایک گیت بھی مقبول نہ ہوسکا تھا۔ موسیقار ناشاد کی دھن میں اس فلم میں مسعودرانا کا ایک دلسوز تھیم سانگ تھا جو پھانسی کے ایک ملزم کے لیے گایا گیا تھا

• اک بار اور اپنے گلے سے لگا لے ، ماں ، کیا جانے اس کے بعد تیرا لال ہو کہاں۔۔

فاضلی صاحب کو بریک تھرو فلم تم ملے پیار ملا (1969) سے ملا تھا جس کے متعدد گیت سپرہٹ ہوئے تھے جن میں مہدی حسن اور ملکہ ترنم نورجہاں کا یہ دوگانا "آپ کو بھول جائیں ہم ، اتنے تو بے وفا نہیں۔۔" فلم کی جان تھا۔

ان کی دیگر یادگار نغماتی فلموں میں جلے نہ کیوں پروانہ (1970) ، افشاں ، یادیں (1971) ، ایک رات (1972) ، زینت ، اناڑی ، امنگ ، نوکر (1975) ، شبانہ (1976) ، عاشی (1977) ، محبت مر نہیں سکتی ، بارات ، پلے بوائے (1978) اور دہلیز (1983) وغیرہ کے جملہ گیت انھوں نے لکھے تھے۔ ان کے لکھے ہوئے مشہور زمانہ گیتوں کی ایک فہرست آخر میں دی گئی ہے۔

تسلیم فاضلی کے چند یادگار گیت

تسلیم فاضلی کے دیگر یادگار گیتوں میں سے فلم پردے میں رہنے دو (1973) کی یہ مزاحیہ قوالی "شرمیلی آنکھوں والی اوازار کرگئی۔۔" ایک سپرہٹ قوالی تھی جو احمدرشدی اور مسعودرانا کے مشترکہ گیتوں میں سب سے مقبول مزاحیہ گیت تھا۔ اس قوالی کے دوران مسعودرانا کا ایک ہی سانس میں سال کے بارہ مہینوں کے نام لینا بڑا دلچسپ عمل تھا۔

اس فلم میں نیرہ نور کے ساتھ گایا ہوا یہ خوبصورت دوگانا بھی فاضلی صاحب کا لکھا ہوا تھا

• جانے سے پہلے اتنا بتا دو کہ پھر کب ملو گے ، کہاں پر ملو گے۔۔؟

فلم دامن اور چنگاری (1973) میں تسلیم فاضلی کا لکھا ہوا دوگانا

• یہ وعدہ کرو کہ محبت کریں گے۔۔

مسعودرانا اور میڈم نورجہاں کی آوازوں میں تھا لیکن اس کا المیہ ورژن "یہ وعدہ کیا تھا کہ محبت کریں گے۔۔" شباب کیرانوی صاحب نے لکھا تھا۔

​فلم زینت (1975) میں تسلیم فاضلی نے بھارتی فلم مغل اعظم (1960) میں لتا منگیشکر کے گائے ہوئے ایک گیت کی پیروڈی لکھی تھی "موہے پن گھٹ پہ نند لال چھیڑ گیو رے۔۔" موسیقار ناشاد نے یہ شوخ گیت مہدی حسن سے گوایا گیا تھا جو ان کی عام روش سے ہٹ کرتھا۔

فلم دیکھا جائے گا (1976) میں تسلیم فاضلی نے ایک انگلش گیت لکھا تھا "This is the song of wonder" جو "دما دم مست قلندر۔۔" کی دھن پر احمدرشدی نے گایا تھا ، ایم اشرف ، موسیقار تھے۔

فلم راجہ جانی (1976) میں تسلیم فاضلی نے ایک گیت لکھا تھا

• اندھیر نگری ، چوپٹ راجہ ، گائے جا پیارے ، بجائے جا باجا۔۔

مسعودرانا کی آواز اور امجد بوبی کی دھن میں اس گیت کو اس وقت کی بھٹو حکومت کے خلاف سمجھا گیا تھا ۔

​فلم طلاق (1976) میں تسلیم فاضلی نے یہ گیت لکھا تھا "قدموں میں تیرے جینا مرنا ، اب دور یہاں سے جانا کیا۔۔" جو ابن انشاء کی مشہور غزل "انشا جی اٹھو ، اب کوچ کرو۔۔" کی طرز پر تھا ، اس کا انھوں نے بہت برا منایا تھا لیکن موسیقار خلیل احمد تھے جنھوں نے اپنی ہی دھن کو فلمی رنگ دیا تھا۔

تسلیم فاضلی کا ایک قابل اعتراض گیت

شبانہ (1976)

​تسلیم فاضلی نے جہاں انتہائی قابل تعریف فلمی گیت لکھے تھے وہاں ایک قابل اعتراض بلکہ قابل مذمت گیت بھی لکھا تھا۔ فلم شبانہ (1976) میں ایم اشرف کی دھن میں یہ گیت "پیار میرا ، اوفرزانہ ، بھول نہ جانا۔۔" نے بہت سے شریف گھرانوں کی زندگیاں اجیرن کر دیں تھیں ۔

'فرزانہ' نام کی لڑکیوں کو تنگ کرنے کے لیے آوارہ اور اوباش نوجوانوں کے لیے یہ ایک آئیڈیل گیت تھا۔ ریڈیو پر جب یہ گیت بجتا تھا تو کئی مظلوم والدین ، بے چارے مہدی حسن کو بددعائیں دیا کرتے تھے۔ انھیں شاید علم نہیں تھا کہ اسی بے ہودہ گیت کے گانے پر خانصاحب کو نگار ایوارڈ تھما دیا گیا تھا۔۔!

تسلیم فاضلی ، صرف اردو فلموں کے شاعر تھے

تسلیم فاضلی ، صرف اردو فلموں کے گیت نگار تھے ، انھوں نے کبھی کوئی پنجابی گیت نہیں لکھا تھا البتہ چند گیتوں میں پنجابی ٹچ ملتا ہے۔ پاکستان فلم میگزین پر غیرحتمی فلموں کی تعداد ڈیڑھ سو سے زائد ہے جبکہ چارسو سے زائد گیتوں کار یکارڈ بھی ہے جو مسلسل اپ ڈیٹ ہورہاہے۔

ان کے سب سے زیادہ گیت موسیقار ناشاد اور ایم اشرف نے کمپوز کیے تھے جبکہ گلوکاروں میں مہدی حسن اور احمدرشدی نے سب سے زیادہ گیت گائے تھے۔ مسعودرانا کے ساتھ ان کے دودرجن کے قریب گیت تھے۔

تسلیم فاضلی کا اصل نام اظہار انور تھا اور وہ دہلی میں پیدا ہوئے تھے۔ گھر میں شاعرانہ ماحول ملا تھا۔ انھوں نے اداکارہ نشو کے ساتھ شادی کی تھی اور 1982ء میں دل کا دورہ پڑنے سے انتقال کرگئے تھے۔

تسلیم فاضلی کے چند مشہور گیت

• آپ کو بھول جائیں ہم ، اتنے تو بے وفا نہیں۔۔ (مہدی حسن ، نورجہاں ، فلم تم ملے پیار ملا 1969)
• گوری کے سر پہ سج کے ، سہرے کے پھول کہیں گے۔۔ (احمدرشدی ، فلم تم ملے پیار ملا 1969)
• محبتوں کے قدردان ، نہ شہر میں ، نہ گاؤں میں۔۔ (ندیم ، فلم جلے نہ کیوں پروانہ 1970)
• سو برس کی زندگی میں ایک پل۔۔ (مہدی حسن ، فلم انصاف اور قانون 1971)
• مجھ سا تجھ کو چاہنے والے ، اس دنیا میں کوئی اور ہو۔۔ (رجب علی ، نورجہاں ، فلم یادیں 1971)
• خدا کرے کہ محبت میں وہ مقام آئے۔۔ (نورجہاں / مہدی حسن ، فلم افشاں 1971)
• سن میری بٹیا ، سن میری رانی ، غم کا فسانہ ۔۔ (نورجہاں ، فلم افسانہ زندگی کا 1972)
• میرا دل نجانے کب سے تیرا پیار ڈھونڈتا ہے۔۔ (بشیراحمد ، فلم ہل سٹیشن 1972)
• دنوا دنوا میں گنوں ، کب آئیں گے سانوریا۔۔ (رونا لیلیٰ ، فلم من کی جیت 1972)
• اک بار چلے آؤ ، پھر آکے چلے جانا۔۔ (مہدی حسن ، فلم ایک رات 1972)
• کس نے بجائی ہے یہ بانسریا رے۔۔ (نورجہاں ، فلم ایک رات 1972)
• شرمیلی آنکھوں والی اوازار کر گئی۔۔ (احمدرشدی ، مسعودرانا ، فلم پردے میں رہنے دو 1973)
• یارو ، میں بڑا پریشان ، اک لڑکی جوان۔۔ (احمدرشدی ، فلم پردے میں رہنے دو 1973)
• جانے سے پہلے اتنا بتا دو۔۔ (مسعودرانا ، نیرہ نور ، فلم پردے میں رہنے دو 1973)
• جب پیار کسی سے ہوتا ہے تو ہوتا ہے یہ انجام۔۔ (مہدی حسن /رونا لیلیٰ ، فلم بے ایمان 1973)
• ہمارے دل سے مت کھیلو ، کھلونا ٹوٹ جائے گا۔۔ (مہدی حسن ، فلم دامن اور چنگاری 1973)
• یہ وعدہ کرو کہ محبت کریں گے۔۔ (مسعودرانا ، نورجہاں ، فلم دامن اور چنگاری 1973)
• وقت کا پہیہ چلتا جائے ، روکے سے رکنے نہ پائے۔۔ (مسعودرانا ، فلم نیلام 1974)
• دل لے کے مکر گیا ہائے ، سجن بے ایمان نکلا ۔۔ (مالا ، فلم شکار 1974)
• مرگیا ، لٹ گیا ، دل گیا ، میں تباہ ہوگیا۔۔ (مسعودرانا ، فلم شکار 1974)
• اگر تم مل جاؤ ، زمانہ چھوڑ دیں گے ہم۔۔ (تصورخانم ، فلم ایماندار 1974)
• کسی مہربان نے آکے میری زندگی سجا دی۔۔ (ناہیداختر ، فلم شمع 1974)
• ایسے موسم میں چپ کیوں ہو ، کانوں میں رس گھولو۔۔ (ناہیداختر ، فلم شمع 1974)
• رات بھر جیا مورا ، مجھے کیوں ستائے۔۔ (اخلاق احمد ، نیرہ نور ، فلم امنگ 1975)
• کیوں نہ راہوں میں کلیاں بچھائیں ہم۔۔ (اخلاق احمد ، نیرہ نور ، فلم امنگ 1975)
• رفتہ رفتہ وہ میری ہستی کا ساماں ہوگئے۔۔ (مہدی حسن ، فلم زینت 1975)
• ہزار بار منع کیا ، میری گلی نہ سیاں آنا۔۔ (ثمراقبال ، فلم عزت 1975)
• اپنا جیون شیشے کا کھلونا ہی تو ہے۔۔ (مہدی حسن ، فلم نوکر1975)
• تجھے پیار کرتے کرتے میری عمر بیت جائے۔۔ (مہدی حسن /ناہیداختر ، فلم میرا نام ہے محبت 1975)
• یہ دنیا رہے نہ رہے میرے ہمدم۔۔ (مہدی حسن / ناہیداختر ، فلم میرا نام ہے محبت 1975)
• کیسے وہ شرمائیں ، جیسے میگھا چھائے۔۔ (غلام عباس ، فلم دو ساتھی 1975)
• انداز وہی اپنایا ہے ، تیرے دل کو پسند جو آجائے۔۔ (ناہیداختر ، فلم سوسائٹی گرل 1976)
• جو درد ملا ، اپنوں سے ملا ، غیروں سے شکایت کون کرے۔۔ (مہدی حسن ، فلم شبانہ 1976)
• بے وفا کون ہے ، کون ہرجائی ہے۔۔ (مہدی حسن ، فلم شبانہ 1976)
• قدموں میں تیرے جینا مرنا ، اب دور یہاں سے جانا کیا۔۔ (نورجہاں ، فلم طلاق 1976)
• میری سالگرہ ہے بولو ، ہیپی برتھ ڈے ٹو می۔۔ (بے مسرت ، فلم طلاق 1976)
• کہنے کو یہ اک گیت ہے ، دراصل ہے چرچا تیرا۔۔ (مہدی حسن ، فلم آپکا خادم 1976)
• یہ لوگ بڑے ہم لوگوں پر ہنستے ہی رہے ہیں۔۔ (مہدی حسن ، فلم وقت 1976)
• جب شام ہوتی ہے ، مجھے تم یاد آتے ہو۔۔ (مہدی حسن ، فلم دامن کی آگ 1976)
• پیار کا وعدہ ایسے نبھائیں ، کوئی جدا کرنے نہ پائے۔۔ (مہناز ، مہدی حسن ، فلم آج اور کل 1976)
• تو میری زندگی ہے ، تو میری ہر خوشی ہے۔۔ ( نورجہاں / مہدی حسن ، فلم محبت مرنہیں سکتی 1977)
• کبھی میں سوچتا ہوں ، کچھ نہ کچھ کہوں۔۔ (مہدی حسن ، فلم آئینہ 1977)
• مجھے دل سے نہ بھلانا ۔۔ (مہدی حسن ، مہناز/نیرہ نور/عالمگیر ، فلم آئینہ 1977)
• آپ کو ہم پسند کرتے ہیں ، آپ پر جان و دل سے مرتے ہیں۔۔ (ناہیداختر ، فلم عاشی 1977)
• پیار کبھی کرنا نہ کم ، مر جائے گی تیری عاشی۔۔ (ناہیداختر ، فلم عاشی 1977)
• جان تمنا ، کب تک تم نہ ، پیار میرا پہچانو گے۔۔ (غلام عباس ، فلم عاشی 1977)
• دیکھ کے دل کا کورا کاغذ ، لکھ دیا میں نے سلام۔۔ (مہدی حسن ، فلم کورا کاغذ 1978)
• کسی سے دل نہ لگانا کبھی خدا کے لئے۔۔ (نورجہاں ، فلم کورا کاغذ 1978)
• جس دن سے دیکھا ہے تم کو صنم ، بے چین رہتے ہیں۔۔ (مہدی حسن ، فلم امبر 1978)
• ٹھہرا ہے سماں ، ہم تم ہیں جہاں ۔۔ (مہدی حسن ، فلم امبر 1978)
• ملے تو ساتھی ، کھلی دو کلیاں۔۔ (اے نیر ، فلم امبر 1978)
• مجھے لے چل ، یہاں سے دور ان وادیوں میں ۔۔ (مہناز، فلم پرستش 1978)
• روٹھا یار منانا مشکل ہے ۔۔ (مہدی حسن ، فلم ابھی تو میں جوان ہوں 1978)
• یاد رکھنے کو کچھ نہ رہا ، بھول جانے کو کچھ بھی نہیں۔۔ (اے نیر ، فلم بارات 1978)
• میں ہوتی اک مورنی اور تو ہوتا اک مور۔۔ (مہناز ، فلم بارات 1978)
• روز کہتا ہوں بھول جاؤں تجھے ۔۔ (مہدی حسن ، فلم راجہ کی آئے کی بارات 1979)
• تم کون ہو۔۔ (ناہیداختر ، شوکت علی ، رجب علی ، اے نیر ، غلام عباس ، اخلاق احمد ، فلم کھوٹے سکے 1981)
• آج تو غیر سہی ، پیار سے بیر سہی۔۔ (مہدی حسن ، فلم دہلیز 1983)
• بن کے مصرعہ غزل کا چلی آؤ نا۔۔ (احمدرشدی ، فلم ہیرو 1985)