اقبال کاشمیری

نامور ہدایتکار اقبال کاشمیری گزشتہ کئی برسوں سے علیل تھے لیکن پچھلے ایک ہفتہ سے گردوں کی بیماری کی شدت سے لاہور کے ایک ہسپتال میں 15 نومبر 2020ء کو 78 برس کی عمر میں انتقال کر گئے۔

اقبال کاشمیری کی وجہ شہرت تو ہدایتکار کے طور پر تھی لیکن اصل میں وہ بطور اداکار فلموں میں متعارف ہوئے تھے۔ مشہور زمانہ پنجابی فلم یکے والی (1957) ان کی پہلی فلم تھی جس میں وہ ہیروئن مسرت نذیر کے چھوٹے بھائی کے کردار میں تھے۔

اقبال کاشمیری ، چھوٹی قدوقامت کے مالک تھے ، اسی لیے ان کا فلمی نام " نکو " رکھا گیا تھا۔ اپنے ایک انٹرویو میں وہ اعتراف کرتے ہیں کہ انھیں اداکاری کا شوق تھا لیکن اپنی جسامت اور بیٹھی ہوئی آواز کی وجہ سے بطور اداکار کامیابی حاصل نہیں کر سکتے تھے۔

انھوں نے 16 فلموں میں بطور اداکار کام کیا تھا جن میں سے جٹی (1958) ، کرتار سنگھ (1959) ، ہزار داستان (1965) ، لالہ رخ اور پرستان (1968) وغیرہ اہم فلمیں تھیں۔

یکے والی (1957)

لالہ رخ (1968)

اقبال کاشمیری بطور ہدایتکار

اقبال کاشمیری کا دوسرا تعارف بطور معاون ہدایتکار کے ہے۔ فلم بہروپیا (1959) میں وہ پہلی بار ہدایتکار اسلم ایرانی کے معاون کے طور پر سامنے آئے تھے۔ ہدایتکار عزیز میرٹھی کی تین فلموں ہزار داستان (1965) ، عالیہ (1967) اور لالہ رخ (1968) کے علاوہ فلم کونج وچھڑ گئی (1969) میں کہانی نویس کے علاوہ ہدایتکار حیدرچوہدری کے معاون ہدایتکار بھی تھے اور مسعود بٹ اور نسیم حیدر بھی ان کے ساتھی تھے۔

اقبال کاشمیری بطور مصنف

اقبال کاشمیری کا تیسرا تعارف بطور کہانی ، مکالمہ اور منظرنامہ نویس کے طور پر تھا۔ عشق نہ پچھے ذات (1969) کہانی نویس کے طور پر ان کی پہلی بڑی فلم تھی۔ کل 14 فلموں کے مصنف کے طور پر فلموں کے ٹائٹلز پر ان کا نام آیا تھا جن میں یار دیس پنجاب دے (1971) ، پنڈی وال (1976) ، بلیک وارنٹ (1985) اور نوراں (2000) وغیرہ قابل ذکر ہیں۔

اقبال کاشمیری ، ایک کامیاب فلمی ہدایتکار

فلم بنارسی ٹھگ (1973)

بطور مکمل ہدایتکار ، اقبال کاشمیری نے کل 86 فلمیں بنائی تھیں جن میں تقریباً آدھی آدھی اردو اور پنجابی فلمیں ہیں۔ وہ شاید واحد ہدایتکار ہیں جنھوں نے اتنی بڑی تعداد میں دونوں زبانوں کی فلمیں بنائی تھیں۔

ان کی پہلی فلم ٹیکسی ڈرائیور (1970) ایک کامیاب فلم تھی جس سے بطور ولن الیاس کاشمیری کے عروج کا دور شروع ہوا تھا جبکہ ٹائٹل رول یوسف خان نے کیا تھا جو اس وقت تک دوسرے درجے کے اداکار تھے۔

ان کی دوسری فلم بابل (1971) بھی ایک سپر ہٹ فلم تھی جس کا ٹائٹل رول تو نعیم ہاشمی نے کیا تھا لیکن ہیرو یوسف خان ہی تھے جو ان کی پہلی پانچ فلموں کے ہیرو تھے۔ اس فلم سے میرا ایک یادگار واقعہ منسلک ہے جس کا ذکر طوالت کی وجہ سے پھر کبھی ہوگا۔

یوسف خان کا عروج

فلم ضدی (1973) کا ٹائٹل رول بھی یوسف خان نے کیا تھا جس نے انھیں طویل جدوجہد کے بعد سپر سٹار بنا دیا تھا۔ اس فلم کے سبھی گیت مقبول ہوئے تھے جن میں میڈم نورجہاں کا یہ گیت اس فلم کی پہچان بن گیا تھا "وے چھڈ میری وینی نہ مروڑ۔۔" اس فلم سے بھی میرا ایک بڑا ہی یادگار واقعہ منسلک ہے جس کا ذکر پھر کبھی ہوگا۔

فردوس اور اعجاز کی آخری کامیاب فلم

اقبال کاشمیری کی ایک اور سپر ہٹ فلم بنارسی ٹھگ (1973) نے منورظریف کو ایک عام کامیڈین سے مرکزی کرداروں تک پہنچا دیا تھا۔ یہ فردوس اور اعجاز کی جوڑی کی آخری بڑی فلم تھی اور اداکارہ ممتاز کے لیے بریک تھرو ثابت ہوئی تھی جس پر میڈم نورجہاں کا یہ سٹریٹ سانگ فلمایا گیا تھا "اکھ لڑی بدو بدی۔۔"

ندیم کی پہلی پنجابی فلم

نامور گلوکارہ اور اداکارہ سلمیٰ آغا کی پہلی پنجابی فلم بھابھی دیاں چوڑیاں (1986) اور اردو فلموں کے سپر سٹار ندیم کی پہلی پنجابی فلم مکھڑا (1988) کے ہدایتکار بھی اقبال کاشمیری ہی تھے۔ بطور ہدایتکار دیگر مشہور فلموں میں جادو (1974) ، شریف بدمعاش (1975) ، قسمت (1985) ، ہم ایک ہیں (1986) ، چوروں کی بارات (1987) ، اللہ دتہ (1988) ، بختاور (1991) ، حسینوں کی بارات (1992) ، انٹرنیشنل لٹیرے (1994) ، جوڈرگیا وہ مرگیا (1995) اور گھر کب آؤ گے (2000) وغیرہ قابل ذکر ہیں۔ اقبال کاشمیری کی بطور ہدایتکار آخری فلم دیوداس (2015) تھی جو ایک سپر فلاپ فلم تھی۔ اس فلم میں انھوں نے فلم کے فلمساز ندیم شاہ کو ٹائٹل رول میں پیش کیا تھا۔

اقبال کاشمیری بطور فلمساز

بطور فلمساز ، اقبال کاشمیری نے صرف چار فلمیں بنائی تھیں جن میں شاہین (1977) پہلی فلم تھی جس میں ان کے ساتھی فلمساز موسیقار کمال احمد تھے۔ بتایا جاتا ہے کی اس فلم کی ہیروئن شہناز ان کی منکوحہ تھی۔ نیپالی اداکارہ سشما شاہی سے بھی انھوں نے شادی کی تھی۔ بطور فلمساز باقی تین فلمیں الہ دین (1981) ، جن چاچا (1983) اور ہتھاں وچ ہتھ (1984) تھیں۔

اقبال کاشمیری اور مسعودرانا کا ساتھ

ہدایتکار اقبال کاشمیری کی سپرہٹ فلم بنارسی ٹھگ (1973)

اقبال کاشمیری کی ڈیڑھ درجن فلموں میں مسعودرانا کے دو درجن گیت ملتے ہیں جن میں گیتوں کی بہت زیادہ ورائٹی ملتی ہے۔

ایسے گیتوں میں سے پہلا گیت فلم بابل (1971) میں تھا "لے لو میرے کھڈونے۔۔" یوسف خان پر فلمائے گئے اس گیت کی دھن ماسٹر عبداللہ نے بنائی تھی اور بول تنویر نقوی کے لکھے ہوئے تھے جو کسی تک بندی سے زیادہ نہیں تھے۔ بھلا اس بات کا کیا جواز بنتا ہے کہ "قیمت سب دی وکھری وکھری ، نئیں جے ڈھائی ڈھائی آنے۔۔" شاعری سے واجبی دلچسپی رکھنے والا مجھ جیسا عام شخص بھی یہ تک بندی ہضم نہیں کر سکا۔

فلم بنارسی ٹھگ (1973) میں مسعودرانا کا گیت "نشیاں نیں ساڑیا ، حلیہ وگاڑیا۔۔" ایک سپر ہٹ گیت تھا جو منورظریف پر فلمایا گیا تھا۔ یہ اپنے وقت کی بہت بڑی فلم تھی جو عید الفطر ، 28 اکتوبر 1973ء کو ریلیز ہوئی تھی اور پنجاب سرکٹ میں اپنے مقابلے کی دیگر چاروں فلموں دامن اور چنگاری ، سوسائٹی ، کبڑا عاشق اور پہلا وار پر بھاری ثابت ہوئی تھی جس کا ایک ثبوت ایک اخباری اشتہار ہے جس میں ایک ہی دن ریلیز ہونے کے باوجود فلم بنارسی ٹھگ 55 ہفتے جبکہ دامن اور چنگاری 39 اور سوسائٹی 37 ہفتے میں تھیں جبکہ باقی دونوں فلمیں ناکام ہو گئی تھیں ۔

جہلم کے سینما گھر

یہ میرے بچپن کے پہلے فلمی دور کی پاکستان میں آخری عید تھی اور یہ فلم میں نے جہلم کے ریجنٹ سینما میں دیکھی تھی جو دریائے جہلم کے کنارے واقع تھا۔

میرے ذہن پر آج بھی وہ ماحول تازہ ہے جو اس فلم کے دوران اور بعد میں دیکھا تھا۔ ایک بڑی فلم کو ایک بڑے شہر میں دیکھنے کا ایک بڑا خوشگوار اور یادگار تجربہ تھا۔ گو اس سے قبل اسی سال جہلم کے پیراڈائز سینما میں فلم خون بولدا اے (1973) اور ناز سینما میں چار خون دے پیاسے (1973) دیکھ چکا تھا لیکن وہ ناکام فلمیں تھیں۔ فلموں کی کامیابیوں اور جوبلیوں کے بارے میں ایک تفصیلی مضمون ان شاء اللہ ، پھر کبھی ہو گا۔

ہدایتکار اقبال کاشمیری اپنی اداکارہ نیپالی بیوی شسما شاہی کے ساتھ

فلم نیلام (1974) میں یہ شاہکار تھیم سانگ مسعودرانا کے ناقابل فراموش گیتوں میں سے ایک ہے "وقت کا پہیہ چلتا جائے۔۔" فلم ریشماں جوان ہو گئی (1975) میں یہ شوخ گیت بڑا منفرد تھا "کی ناں تیرا شہزادی۔۔" فلم چترا تے شیرا (1976) میں یہ انقلابی گیت "اساں مان وطن دا رکھنا اے۔۔" ، فلم یاردا سہرا (1976) کا "مندا ہوندا یتیماں دا حال شالا مرن نہ ماواں۔۔" ، فلم چوروں کی بارت (1987) میں "پیسے کی دنیا ہے پیارے۔۔" ، فلم لاوا (1987) کا یہ گیت "ماں ، اولاد کا سایہ بن کر ساری عمر گزارے۔۔" اور فلم رنگیلے جاسوس (1989) میں "دین پیسہ ، ایمان پیسہ۔۔" وغیرہ بڑے بامقصد گیت تھے۔

فلم اللہ دتہ (1988) میں مسعودرانا کا گیت "کالی میری پگ تے گلابی شلوار اے۔۔" فلم ولن جگی ملک پر فلمایا گیا تھا۔ فلم شیدا ٹلی (1993) میں یہ گیت بھی کیا کمال کا تھا "سب دا سجن ، سب دا بیلی ، شیدا ٹلی ، آیا شیدا ٹلی۔۔" فلم یادگار (1994) میں مسعودرانا کے آخری دنوں کا یہ گیت بھی کیا کمال کا تھا "سب کجھ تے میرا لٹ گیا ، کی کول رہ گیا۔۔" اور آخری گیت فلم انٹرنیشنل لٹیرے (1994) میں یہ کورس گیت تھا "جب بھی علیؑ کا نام لیا ، ہر بلا ٹلی۔۔"