نذیر بیگم

"نمبوآں دا جوڑا۔۔" اور "تھوڑا تھوڑا چن ویکھیا۔۔" جیسے سپرہٹ فلمی گیت گانے والی نذیر بیگم ، بنیادی طور پر ایک ریڈیو گلوکارہ تھی۔۔!

فیصل آباد میں پیدا ہونے والی اس خوش گلو اور خوش شکل گلوکارہ نے پشاور ریڈیو سے گانے کا آغاز کیا۔ پھر وہ کراچی ریڈیو سے وابستہ ہوئی جہاں فلم سازی کا آغاز ہوا تو پہلی فلم ہماری زبان (1955) کے بیشتر گیت گائے۔ پہلی سندھی فلم عمر ماروی (1956) بنی تو اس کے گیت بھی گائے۔

نذیر بیگم اور خورشید بیگم کی جوڑی

نذیر بیگم
کو زیادہ شہرت پنجابی لوک گیتوں کے حوالے سے ملی تھی

ساٹھ کے عشرہ کے شروع میں زبیدہ خانم کے جانے کے بعد لاہور کی مرکزی فلمی دنیا کو نذیر بیگم کی ضرورت پڑ گئی تھی جہاں فلموں کے علاوہ ریڈیو پر کلاسیک پنجابی لوک گیتوں کے لیے "نذیر بیگم اور خورشید بیگم" کی جوڑی بڑی مشہور ہوئی تھی۔ ان کے گائے ہوئے

• کالا ڈوریا ، کنڈے نال اڑیا ای اوئے۔۔

جیسے بے شمار سپرہٹ عوامی گیت بڑے ذوق و شوق سے سنے جاتے تھے۔

نذیر بیگم نے ڈیڑھ سو کے قریب فلموں میں تین سو کے قریب گیت گائے تھے جو ایک معقول تعداد تھی لیکن کامیابی کا تناسب انتہائی کم تھا۔

نذیر بیگم کا گیت فریدہ خانم پر فلمایا گیا

پہلا گیت فلم سیلاب (1953) میں خاورزمان نامی شاعر کا لکھا ہوا اور موسیقار جوڑی اصغرعلی ، محمدحسین کی دھن میں ایک کورس گیت تھا

• آئی آئی جوانی ، گیا دل رے ، ہوئی بسمل رے ، میں ہار گئی۔۔

دلچسپ بات یہ تھی کہ یہ گیت فلم کی ہیروئن صبیحہ خانم کے علاوہ اس واحد فلم میں اداکاری کرنے والی اداکارہ فریدہ خانم پر بھی فلمایا گیا تھا جو بعد میں "ملکہ غزل" کے نام سے مشہور ہوئی تھی۔

نذیر بیگم نے فلم ہماری زبان (1955) کا تھیم سانگ

• پیاری زبان اردو ، قومی زبان اردو۔۔

گانے کے علاوہ ایک اور دلکش گیت گایا تھا

• پیا نہ ہی آئے سکھی ری ، راہ تکت موری تھک گئیں اکھیاں۔۔

یقیناً اس دور میں کئی اور گیت بھی مقبول ہوئے ہوں گے لیکن ان پر وقت کی گرد پڑ چکی ہے۔

فلم مس 56 (1956) میں مہدی حسن کے ساتھ یہ دلکش گیت تھا

• یہ چاندنی یہ سائے ، پہلو میں تم ہو میرے۔۔

احمدرشدی کا پہلا پنجابی گیت

فلم چوہدری (1962) میں نذیر بیگم نے احمدرشدی کے پہلے پنجابی گیت

• پیار تیرا میں جھولی پایا تے طعنے سنے شریکاں۔

میں ساتھ دیا تھا جب ان کے ساتھ فلم مہتاب (1962) میں

• نہیں خبر ، کب ملی نظر اور دل دیوانہ ہو گیا۔۔

، فلم ماں کے آنسو (1963) میں

• سماں جب پیارا پیار ہو ، پیار کا دل کو سہارا ہو۔۔

اور فلم تیس مارخان (1963) میں

• نی میں نوکر تو سرکار تے قدماں چہ رکھ سوہنئے۔۔

جیسے خوبصورت گیت گائے تھے۔

مسعودرانا کے ساتھ نذیر بیگم کا ساتھ پہلی بار فلم چغل خور (1966) میں ہوا تھا اور چند خوبصورت رومانٹک گیت گائے تھے لیکن وہ زیادہ مقبول نہیں ہوئے تھے۔

نذیر بیگم کے عروج کا دور

1963/64ء کے سال نذیر بیگم کے انتہائی عروج کے سال تھے جب اس کے چند گیتوں نے دھوم مچا دی تھی۔ فلم تیس مارخان (1963) کا گیت

• نمبوآں دا جوڑا اساں باگے وچوں توڑیا۔۔

گلی گلی گونجنے والا گیت ہوتا تھا۔

اسی سال کی فلم چوڑیاں (1963) میں یہ شوخ گیت بھی بڑا پسند کیا گیا تھا

• میرے فیشن نوں ، پوزیشن نوں ، سب کہندے نیں ویلکم ، ٹیڈی بالم ، ہائے ظالم۔۔

فلم ماں کے آنسو (1963) میں

• جھمکا گر گیو رے مورا ، کراچی کے بازار میں۔۔

، فلم ہتھ جوڑی (1964) کا یہ گیت بھی سپرہٹ تھا

• تھوڑا تھوڑا چن ویکھیا ، بہتا رہ گیا گھٹاں دے اولے۔۔

نذیر بیگم کے چند مشہور گیت

نذیر بیگم کے فلمی گیتوں کے اعدادوشمار دیکھ کر بڑی حیرت ہوتی ہے کہ اس نے ساٹھ سے زائد گیت صرف آئرن پروین کے ساتھ گائے تھے جو عام طور پر کورس ، مجرا اور کلب گیتوں کے علاوہ عام دوگانے ہوتے تھے۔

شیریں ، فردوس ، نغمہ اور نیلو پر نذیر بیگم کے سب سے زیادہ گیت فلمائے گئے تھے۔ چند مشہور گیت کچھ اس طرح سے تھے:

• رت ساون کی رے من بھاون کی۔۔ (فلم زمین ، 1965)
• بلے بلے بھئی ، لوکاں بھانے پھل کھڑیا۔۔ (فلم ملنگی ، 1965)
• اوہ گیاں کبوتریاں۔۔ (فلم جی دار ، 1965)
• نکے ہندیاں دا پیار ، ویکھیں دیویں نہ وسار۔۔ (فلم مرزاجٹ ، 1967)
• پنڈ دی کڑی راہواں بھل گئی اے۔۔ (فلم پنڈ دی کڑی ، 1968)
• سوہنیوں عید مبارک۔۔ (فلم پگڑی سنبھال جٹا ، 1968)
• بچ جاناں ، میرے کولوں تسیں۔۔ (فلم ات خدا دا ویر ، 1970)