وحیدمراد
کی بطور فلمساز پہلی دو فلموں کے
ہدایتکار منور رشید تھے

منور رشید

منوررشید ایک کامیاب فلمی ہدایتکار تھے۔۔!

انھیں ، لیجنڈری اداکار وحیدمراد کی بطور فلم ساز بنائی ہوئی پہلی دو فلموں کے ہدایتکار ہونے کا اعزاز حاصل ہے۔

ان میں سے پہلی فلم انسان بدلتا ہے (1961) تھی۔ اس کامیاب فلم میں وقت کی کامیاب فلمی جوڑی شمیم آرا اور درپن مرکزی کرداروں میں تھے۔ ان کی دوسری فلم جب سے دیکھا ہے تمہیں (1963) میں درپن کے ساتھ زیبا کو پیش کیا گیا تھا۔ موسیقار سہیل رعنا کی یہ پہلی فلم تھی جس میں مسعودرانا کا یہ کورس گیت تھا

• حسن والوں کا سدا برا انجام ہوتا ہے۔۔

منوررشید کی بطور ہدایتکار کل بارہ فلموں میں سے مسعودرانا کے سات فلموں میں پندرہ گیت تھے۔

منوررشید کی تیسری فلم الہلال (1966) تھی جو آٹھویں عباسی خلیفہ معتصم باللہ کے دور کا ایک فرضی قصہ تھا۔ درپن نے مرکزی کردار کیا تھا ، حسنہ ، ہیروئن اور یوسف خان کو ولن کے رول میں پیش کیا گیا تھا۔ یہ ان کی کامیاب فلموں کی ہٹ ٹرک تھی۔ رشید عطرے کی موسیقی میں اس فلم کا کوئی گیت قابل ذکر نہیں تھا۔

دے گا نہ کوئی سہارا

ہدایتکار منوررشید کی چوتھی فلم کون کسی کا (1966) سابقہ سبھی فلموں سے زیادہ کامیاب فلم ثابت ہوئی تھی۔ یہ ایک بہترین سوشل فلم تھی۔ حسنہ ، کمال اور طلعت صدیقی مرکزی کردار تھے۔ اس فلم کی موسیقی منظور اشرف کی تھی اور حبیب جالب کا لکھا ہوا اور مسعودرانا اور نسیم بیگم کا گایا ہوا یہ گیت فلم کا سب سے مقبول ترین گیت تھا

• دے گا نہ کوئی سہارا ، ان بے درد فضاؤں میں ، سو جا غم کی چھاؤں میں۔۔

میری سماعت میں محفوظ ہونے والا یہ پہلا پہلا گیت ہے جو کبھی نہیں بھلا سکا۔

مسرت نذیر کی آخری فلم بہادر (1967)

مسرت نذیر کی آخری فلم بہادر (1967)

منوررشید کی پانچویں فلم بہادر (1967) تھی۔ یہ فلم کئی سال تک زیر تکمیل رہی تھی۔ اس فلم کا پہلا نام ' بازیگر ' تھا ، پھر ' بہادرحسینہ ' بنا اور آخر میں ' بہادر ' کے نام سے ریلیز ہوئی تھی اور ایوریج رہی تھی۔

اس فلم میں عظیم ادکار محمدعلی کو ولن کے کردار میں پیش کیا گیا تھا ، درپن ہیرو تھے اور ہیروئن کے طور پر مسرت نذیر تھی جس کی یہ آخری فلم تھی اور ٹائٹل رول میں پوری فلم پر چھائی ہوئی تھی۔

مسرت نذیر ، ایک بڑی اعلیٰ پائے کی اداکارہ تھی جس نے فلم قاتل (1955) سے فلمی کیرئر کا آغاز کیا اور دیکھتے ہی دیکھتے صف اول کی اداکارہ بن گئی تھی۔

پتن (1955) ، ماہی منڈا ، باغی ، قسمت (1956) ، یکے والی (1957) ، کرتار سنگھ (1959) ، گلفام (1961) اور شہید (1962) جیسی بڑی بڑی فلمیں اس کے کریڈٹ پر تھیں۔

عین عروج کے دور میں فلمی دنیا کو خیرآباد کہا اور شادی کے بعد بیرون ملک چلی گئی تھی۔ مسرت نذیر پر مسعودرانا کا واحد گیت

• اے جان غزل لہرا کے نہ چل ، دلبر میرا دل تڑپا کے نہ چل۔۔

فلمایا گیا تھا جس میں ہیرو درپن تھے اور ساتھی گلوکارہ آئرن پروین تھی۔ دیبو بھٹا چاریہ کی موسیقی میں فیاض ہاشمی کا لکھا ہوا یہ گیت تھا۔

منوررشید کی پہلی ناکام فلم ناخدا (1968) تھی۔ اس فلم میں کراچی ٹی وی کے ممتاز اداکار شکیل نے ہیرو کا رول کیا تھا لیکن بڑی سکرین پر انھیں وہ کامیابی نہ مل سکی تھی جو چھوٹی سکرین پر ملی تھی۔ فلم کی ہیروئن رخسانہ بھی کبھی فرسٹ پئر میں کامیاب نہیں ہوئی تھی۔

منور رشید کی سپرہٹ فلم نئی لیلیٰ نیا مجنوں (1969)

اس ناکامی کی کسر اگلی فلم نئی لیلیٰ نیا مجنوں (1969) میں نکل گئی تھی جو منوررشید کے فلمی کیرئر کی سب سے کامیاب ترین فلم ثابت ہوئی تھی۔ کراچی میں پلاٹینم جوبلی کرنے والی اس کامیڈی فلم کے مرکزی کردار نسیمہ خان ، کمال ، عالیہ اور لہری تھے۔

یہ ایک نغماتی فلم بھی تھی جس کا سب سے ہٹ گیت مسعودرانا اور مالا کا گایا ہوا تھا

• میرے ہم سفر ، تم بڑے سنگدل ہو۔۔

جبکہ

• ندیا کے بیج گوری ہلچل مچائے رے۔۔

بھی بڑا مقبول ہوا تھا۔ ماسٹر تصدق حسین کی دھنیں بڑی پر کشش تھیں۔

اگلی فلم روڈٹوسوات (1970) بھی اس پیٹرن پر بنائی گئی تھی لیکن چند اچھے گیتوں اور رنگین فلم ہونے کے باوجود پہلے جیسی کامیابی سے محروم رہی تھی۔ اس فلم میں مسعودرانا کا مالا ، تانی اور ساتھیوں کے گایا ہوا فلم کا تھیم سانگ

• چلے ہیں دل والے روڈ ٹو سوات۔۔

بڑا پسند کیا گیا تھا جبکہ احمدرشدی اور مالا کا گایا ہوا یہ گیت بھی بڑا مقبول ہوا تھا

• یہ ادا ، یہ ناز ، یہ انداز آپ کا۔۔

منوررشید کی اگلی دو فلمیں انجان (1970) اور روٹھا نہ کرو (1971) ناکام فلمیں تھیں۔ فلم انجان (1970) میں خانصاحب مہدی حسن کا گیت

• اپنوں نے دکھ دیے تو مجھے یاد آگیا۔۔

بڑا پسند کیا گیا تھا۔

منور رشید اور منورظریف کی فلم پیار کا موسم (1975)

اگلی فلم پیار کا موسم (1975) میں منورظریف کی مقبولیت کو کیش کروایا گیا تھا ورنہ فلم اور فلم کی کہانی بڑی کمزور تھی۔ ماسٹر تصدق حسین نے ایکبار پھر کورس دھنوں کی لائن لگا دی تھی۔

مجھے کبھی نہیں بھولتا کہ کوپن ہیگن کے ساگا سینما میں یہ فلم دیکھتے ہوئے فلم آپریٹر نے دانستہ فلم کو اس جگہ بند کروا دیا تھا جہاں منورظریف ، مسعودرانا کا یہ گیت گاتے ہوئے پہنچتے ہیں "تھا آنکھوں کا قصور چھری دل پہ چل گئی۔۔"

منورظریف کے انتقال کے بعد یہ پہلی فلم تھی جو میں نے دیکھی تھی اور جس میں اس عظیم کامیڈین کو دیکھ کر لوگ ہنسے نہیں بلکہ دھاڑیں مار مار کر روئے تھے۔

منوررشید کی آخری فلم ہنستے آنسو (1981) ایک ناکام فلم تھی۔

منوررشید ، معروف کرکٹ کھلاڑی ہارون رشید کے والد تھے۔ ان کا انتقال غالباً 1999ء میں ہوا تھا۔