ابو شاہ ، پاکستانی فلموں میں ایکسٹرا کرداروں میں نظر آنے والے ایک باریش فنکار تھے۔ چالیس برسوں کے طویل فلمی کیرئر میں بس اتنا فرق پڑا تھا کہ ان کی داڑھی سیاہ سے سفید ہو گئی تھی۔۔!

طویل فلمی کیرئر میں بھی گمنام رہے

ابو شاہ کی پہلی فلم شعلہ تھی جو 1952ء میں ریلیز ہوئی تھی اور ان کی آخری فلم حنا کا ذکر ملتا ہے جو 1993ء میں ریلیز ہوئی تھی۔ اسی سال ان کا انتقال بھی ہو گیا تھا۔ اب تک کی معلومات کے مطابق ابو شاہ کی 79 فلموں کا ریکارڈ دستیاب ہے جن میں 28 اردو ، 45 پنجابی اور باقی ڈبل ورژن فلمیں ہیں۔ ان میں شاید ہی کسی فلم میں ان کا کوئی مرکزی یا اہم کردار ہو گا۔

عام طور پر وہ کسی مزار پر کوئی مجاور ، ملنگ ، فقیر ، امام مسجد یا دیگر چھوٹے موٹے کرداروں میں نظر آتے تھے۔ ان پر جو گیت فلمائے جاتے تھے وہ عام طور پر مرکزی کرداروں کے پس منظر کے لیے ہوتے تھے۔ پاکستانی فلموں میں پس منظر میں گائے ہوئے ٹائٹل اور تھیم سانگز میں مسعودرانا کو بلا شرکت غیرے مکمل اجارہ داری حاصل ہوتی تھی ، اس لیے یہ کوئی حیرت کی بات نہیں ہو سکتی کہ ابو شاہ پر زیادہ تر مسعودرانا ہی کے گیت فلمائے گئے تھے۔

مسعودرانا کے ابو شاہ پر فلمائے ہوئے گیت

ابو شاہ کا مسعودرانا کے ساتھ پہلا ساتھ فلم ملنگی (1965) میں ہوا تھا جب اس فلم کے دو گیت ان پر فلمائے گئے تھے۔ ماسٹرعبداللہ کی موسیقی میں حزیں قادری کے لکھے ہوئے ان گیتوں میں سے پہلا گیت "خاناں دے خان پروہنے ، کوئی غریب دا یار نئیں۔۔" تھا۔ یہ گیت اس فلم کا بنیادی خیال بھی بیان کرتا ہے۔ دوسرا گیت "اٹھ ماجھے دیا شیر جواناں ، کیوں گیا ایں ہمت ہار۔۔" تھا جو فلم کے مرکزی کرداروں ملنگی (اکمل) اور ہرنام سنگھ (مظہرشاہ) کو بغاوت پر اکساتا ہے۔

ایکسٹرا اداکار ابو شاہ

مسعودرانا نے ابو شاہ کے لیے فلم ٹکہ متھے دا (1970) میں معاشرتی ناہمواریوں کے بارے میں بابا چشتی کی دھن میں ایک گیت گایا تھا "ہسدے لٹیرے ایتھے ، روندے حقدار۔۔"

فلم ہاشو خان (1972) میں ایم اشرف کی موسیقی میں جو گیت گایا تھا "رہے نام اللہ دا ، اللہ ہی اللہ۔۔" وہ لاجواب تھا۔ فلم کے مرکزی کردار ساون کے لیے یہ گیت گایا گیا تھا جو اپنے انجام سے بے خبر ایک ظالم اور جابر حکمران ہوتا ہے۔

اسی طرح فلم ہار گیا انسان (1975) میں موسیقار نثار بزمی کا کمپوز کیا ہوا ٹائٹل اور تھیم سانگ "ہار گیا انسان خدا سے۔۔" بھی ابو شاہ پر فلمایا گیا جو وہ طارق عزیز کے لیے گا رہے تھے جو اپنے فلمی کردار میں یہ بھول جاتے ہیں کہ اوپر ایک خدا بھی ہے۔

مسعودرانا نے اسدبخاری کی لکھی ہوئی ایک منقبت "اک تارا بولے علیؑ علیؑ ، جگ سارا بولے علیؑ علیؑ۔۔" بھی گائی تھی جو ماسٹر تصدق حسین کی موسیقی میں ابو شاہ پر فلم اج دی گل (1975) میں فلمائی گئی تھی اور ایک بھارتی مذہبی گیت کی نقل تھی۔ موسیقار وجاہت عطرے کی فلم جیلر تے قیدی (1975) میں ایک قوالی تھی "اے دنیا جے ، دنیا والو ، ایتھے کرنی بھرنی پیندی اے۔۔" جو ابو شاہ ، سلطان راہی اور ساتھیوں پر فلمائی گئی تھی۔ اس قوالی میں مسعودرانا کے ساتھ منیر حسین بھی تھے اور یہی قوالی اب تک کی معلومات کے مطابق مسعودرانا اور ابو شاہ کا آخری ساتھ تھا۔

ان کے علاوہ میری معلومات میں صرف ایک گیت اور ملتا ہے جو ابو شاہ پر فلمایا گیا تھا "بجے یوں اللہ والی تال ، دما دم اللہ ہو۔۔" اسے مہدی حسن نے فلم محبت اور مجبوری (1981) میں گایا تھا جس کی دھن کمال احمد نے بنائی تھی۔ یقیناً ، کچھ گیت اور بھی ہوں گے جن تک میری معلومات نہیں ہیں۔

فلم ہاشو خان (1974) کا فلم پوسٹر