فیاض ہاشمی ، پاکستانی اردو فلموں کے نامور گیت نگار تھے جنہوں نے ایک سو سے زائدفلموں کے نغمات لکھنے کے علاوہ ایک فلم ہم ایک ہیں (1961) کی ڈائریکشن بھی دی تھی اور ڈیڑھ درجن کے قریب فلموں کی کہانیاں ، مکالمے اور منظر نامے بھی لکھے تھے۔

فیاض ہاشمی کی پہلی فلم دوپٹہ (1952) تھی جس میں لکھا ہوا ان کا ایک ہی گیت تھا "مصیبت ہے ، بلا ہے اور میں ہوں۔۔"

مکمل نغمہ نگار کے طور پر ان کی پہلی فلم انوکھی (1956) تھی جو عظیم گلوکار احمد رشدی کی پہلی فلم تھی اور جس میں گایا ہوا ان کا پہلا گیت "ماری لیلیٰ نے ایسی کٹار۔۔" ہاشمی صاحب ہی کا لکھا ہوا تھا۔

فیاض ہاشمی کا لکھا ہوا پہلا سپر ہٹ گیت فلم سویرا (1959) میں ایس بی جان کا گایا ہوا تھا "تو جو نہیں ہے تو کچھ بھی نہیں ہے۔۔" انہوں نے بہت سی فلموں میں سپر ہٹ گیت لکھے تھے جن کی مکمل تفصیل کے لئے ملاحظہ فرمائیں:

• فیاض ہاشمی کا فلمی کیرئر

فیاض ہاشمی نے مسعودرانا کے فلم بنجارن میں گائے ہوئے چار میں سے دو گیت لکھے تھے جن کا ذکر گزشتہ مضامین میں ہو چکا ہے۔ یہاں جو فہرست مرتب کی گئی ہے وہ حتمی نہیں ہے کیونکہ گیت نگاروں کے بارے میں زیادہ معلومات دستیاب نہیں ہیں ، اسی لئے پاکستان فلم میگزین میں ایسے مقامات پر سوالیہ نشانات لگا دیئے جاتے ہیں اور جب معلومات دستیاب ہوتی ہیں تو انہیں اپ ڈیٹ کر دیا جاتا ہے۔