قومی ترانہ گانے والی گلوکارہ

نسیمہ شاہین ، ریڈیو پاکستان کراچی کی ایک معروف گلوکارہ تھیں جو ان گیارہ گلوکاروں میں شامل ہیں کہ جنھیں پاکستان کا قومی ترانہ "پاک سر زمین شادباد۔۔" گانے کا اعزاز حاصل ہے۔ ان آوازوں میں نسیمہ شاہین کے علاوہ احمدرشدی ، شمیم بانو ، کوکب جہاں ، رشیدہ بیگم ، نجم آراء ، زوار حسین ، اختر عباس ، انور ظہیر اور اختر وصی علی شامل ہیں۔

یہ ترانہ معروف شاعر حفیظ جالندھری صاحب نے لکھا تھا جس پر یہ تنقید بھی کی جاتی ہے کہ اس قومی ترانہ میں اردو کا خالص لفظ صرف "کا" ہے ورنہ باقی سب فارس والوں کے لیے لکھا گیا تھا۔

یہ ترانہ 723 ترانوں میں سے منتخب کیا گیا تھا اور اسے پہلے سے تیار شدہ دھن پر لکھا گیا تھا جو موسیقار احمد علی غلام علی چھاگلہ نے بنائی تھی۔ اس ترانے میں 21 آلات موسیقی 38 مختلف سروں میں استعمال کیے تھے اور اس کا دورانیہ 80 سیکنڈ تھا۔ قومی ترانے کی اس دھن کو 21 اگست 1949ء کو حکومتی منظوری حاصل ہوئی تھی اور پہلی بار یکم مارچ 1950ء کو سرکاری طور پر اس دھن کا استعمال کیا گیا تھا جبکہ مکمل قومی ترانہ 13 اگست 1954ء کو پہلی بار ریڈیو پاکستان سے نشر ہوا تھا۔

نسیمہ شاہین کی مسعودرانا کی طرح پہلی فلم انقلاب (1962) تھی اور پہلا گیت تھا "آج ہم بے سہارا ہو گئے۔۔"

بیس کے قریب بیشتر کراچی ساختہ فلموں میں تین درجن کے قریب فلمی گیت گائے لیکن کامیابی نہیں ملی۔ سب سے ہٹ گیت فلم ارمان (1966) میں تھا "اونٹ پہ بیٹھا میرا منا ، اونٹ کے پیچھے بچے۔۔"

نسیمہ شاہین کے مسعودرانا کے ساتھ پانچ دوگانوں کا ریکارڈ ملتا ہے جن میں سے پہلا گیت فلم دل نے تجھے مان لیا (1963) میں ایک کورس گیت تھا:

• یہ مکھڑے پہ آنچل ، چندا پہ بادل ، یہ قد ہے کہ بجلی سی لہرا رہی ہے..

اس کورس گیت کی دھن مصلح الدین نے بنائی تھی اور اسے حمایت علی شاعر نے لکھا تھا۔

1963ء کی اردو فلم مسٹر ایکس واحد فلم تھی جس میں نسیمہ شاہین نے چھ گیت گائے تھے لیکن کوئی ایک بھی ہٹ نہیں ہوا تھا۔ ان میں ایک کورس گیت تھا:

• گوری جاؤ نہ دامن جھٹک کر..

جس کی دھن لال محمد اقبال صاحبان نے بنائی تھی جبکہ اس میں نسیمہ شاہین ، مسعودرانا اور ساتھیوں کے ساتھ وسیم فاروقی نامی گلوکار بھی تھے جو ان بہت سے گلوکاروں میں سے ایک تھے جن کے کریڈٹ پر چند ایک ہی گیت تھے اور پھر وہ گمنام ہو گئے تھے۔

نسیمہ شاہین نے مشرقی پاکستان کی اردو فلم مالن (1964) میں بھی بیشتر گیت گائے تھے۔ اس فلم کے موسیقار نذیر شیلے تھے لیکن شاعر کا علم نہیں ہو سکا۔ ان میں سے دو گیت مسعودرانا کے ساتھ تھے اور کیا غضب کے رومانٹک گیت تھے۔ فلمی گیتوں پر تحقیق کے دوران جب یہ دو سریلے گیت سننے کو ملے تھے تو دل میں مسعودرانا کی عظمت میں مزید اضافہ ہوگیا تھا کیونکہ یہ گیت ان کی عام ڈگر سے ہٹ کر تھے۔ دھیمی سروں میں گائے ہوئے ان گیتوں کے بول تھے:

• آپ نہ جو پیار کیا ہے، آپ کا شکریہ..
• سیاں رے سیاں ، چھوڑ دے موری بہنیا..

ان دونوں گلوکاروں کا آخری سنگم فلم ہنی مون (1970) میں ہوا تھا جس میں جاوید سرور کی دھن پر تنویر نقوی کا یہ گیت خاصا مشہور ہوا تھا:

• ہوا کو کیوں نہ چوموں میں ، خوشی سے کیوں نہ جھوموں میں..

نسیمہ شاہین نے کراچی ریڈیو سے بہت سی غزلیں ، نعتیں اور دیگر گیت بھی گائے تھے۔

Masood Rana & Naseema Shaheen:

0 joint Online films

Masood Rana & Naseema Shaheen:

Total 10 joint films