علاؤالدین

پاکستان میں جن فنکاروں کے فلمی کیرئر انتہائی قابل رشک رہے ہیں ، ان میں ایک بہت بڑا نام اداکار علاؤالدین کا تھا۔۔!

ایک ایکسٹرا اور معاون اداکار سے چوٹی کے ولن شمار ہوئے۔ پھر مرکزی کرداروں سے ہوتے ہوئے ہیرو بننے کا اعزاز بھی حاصل کیا۔ تاریخی ، سماجی اور اصلاحی فلموں میں بھاری بھر کم سے ہلکے پھلکے کامیڈی رول تک کئے۔ بیک وقت ہیرو ، ولن ، کیریکٹرایکٹر اور کامیڈین کے روپ میں نظر آنے والے پہلے فنکار تھے۔ ساٹھ کا عشرہ تو علاؤالدین کے نام تھا جو جس فلم میں ہوتے ، اس فلم میں باقی اداکاروں کی حیثیت ثانوی ہوتی تھی۔

ایک کشمیری خاندان میں پیدا ہونے والے پہاپا علاؤالدین بٹ کے بارے میں بتایا جاتا ہے کہ انھیں گانے کا شوق تھا اور اسی دھن میں وہ اپنی جنم بومی راولپنڈی سے بمبئی چلے گئے تھے۔ وہاں فلموں میں گلوکاری بھی کی اور اداکاری بھی لیکن کامیابی سے محروم رہے۔ سنجوگ (1943) نامی فلم ان کی پہلی فلم بتائی جاتی ہے لیکن دلیب کمار کی فلم میلہ (1948) میں معاون اداکار کے طور پر کردارنگاری زیادہ نمایاں رہی۔

پاکستان کی پہلی جوبلی فلم ، پھیرے (1949)

قیام پاکستان کے بعد علاؤالدین کی پہلی فلم پھیرے (1949) تھی جس میں وہ ایک روایتی ولن تھے۔ یہ پاکستان کی پہلی سپرہٹ نغماتی فلم تھی جو مسلسل چھ ماہ تک لاہور میں چلتی رہی تھی۔ اس فلم نے پاکستان کی پہلی سلور جوبلی فلم ہونے کا اعزاز حاصل کیا تھا۔ چالیس کے عشرہ کی سلورجوبلی فلم ، ستر کے عشرہ کی ڈائمنڈ جوبلی فلم کے برابر ہوتی تھی۔ نیٹ پر جو سب سے پرانی پاکستانی فلم موجود ہے ، وہ ایک نغمہ بار پنجابی فلم لارے (1950) ہے جس میں وہ ایک روایتی ولن کے طور پر نظر آتے ہیں۔

جب علاؤالدین نے سنتوش کے لیے نغمہ سرائی کی

اسی سال اردو فلم دو آنسو (1950) نے پہلی سلورجوبلی اردو فلم ہونے کا اعزاز حاصل کیا تھا۔ اس فلم کے ہیرو سنتوش کمار پر جو پہلا پہلا فلمی گیت "اس دل کو اپنا گھر سمجھو ، اپنے گھر میں آجاؤ جی۔۔" فلمایا گیا تھا ، وہ علاؤالدین کے گائے ہوئے آدھ درجن فلمی گیتوں میں سے ایک تھا۔

فلم کرتار سنگھ (1959)
تقسیم ہند کے موضوع پر بننے والی
پاکستان کی سب سے بہترین فلم تھی

علاؤالدین کے عروج کا دور

پچاس کے عشرہ میں علاؤالدین زیادہ تر فلموں میں ایک روایتی ولن کے طور پر نظر آئے لیکن اسی دور کی ایک فلم آس پاس (1956) میں ان کی کردارنگاری نے فلمی حلقوں کو چونکا دیا تھا اور انھیں مرکزی کرداروں میں کاسٹ کیا جانے لگا تھا۔

فلم کرتار سنگھ (1959) کے لافانی ٹائٹل رول نے علاؤالدین کو فلموں کی ضرورت بنا دیا تھا۔ فلم سلمیٰ (1960) میں پہلی بار سیکنڈہیرو کے طور پر نظر آئے اور پھر مرکزی کرداروں کی لائن لگ گئی تھی۔ فلم مہتاب (1962) نے انھیں ' عوامی اداکار ' بنا دیا تھا۔ فلم تیس مار خان (1963) میں پہلی بار ایک سولو ہیرو کے طور پر کامیڈی کردار میں نظر آئے۔ پھر اس سلسلے کی کئی فلموں میں کام کیا جن میں پھنے خان (1965) ایک بہت بڑی فلم تھی جس میں ان کا سٹائل بہت سے نوجوانوں کو کاپی کرتے ہوئے دیکھا گیا تھا۔ دل دا جانی (1967) اسی سلسلے کی ایک بہت بڑی نغماتی فلم تھی۔ علاؤالدین کی ہیروشپ کا دور فلم بھولے شاہ (1970) پہ ختم ہوا تھا۔

علاؤالدین پر ایک ویب سائٹ

تاریخی فلموں کے اہم ترین اداکار

علاؤالدین نے تاریخی کرداروں میں بھی بڑا متاثر کیا۔ فلم شہید (1962) میں ایک عرب شیخ ، فلم فرنگی (1964) میں ایک باغی درویش ، فلم نظام لوہار (1966) میں ایک ڈاکو ، فلم زرقا (1969) میں ایک فلسطینی مجاہد لیڈر اور فلم یہ امن (1971) میں ایک کشمیری حریت پسند کے روپ میں زبردست کردارنگاری کی۔ چالیس سالہ فلمی کیرئر میں انھوں نے تین سو سے زائد فلموں میں کام کیا تھا۔ علاؤالدین کے فلمی کیرئر پر ایک تفصیلی مضمون پاکستان فلم میگزین کے سابقہ ورژن پر لکھا جا چکا ہے جسے کبھی موقع ملا تو یونی کوڈ میں پیش کروں گا۔

علاؤالدین اور مسعودرانا کا ساتھ

علاؤالدین پر سب سے زیادہ مسعودرانا اور احمدرشدی کے گائے ہوئے گیت فلمائے گئے تھے۔ احمدرشدی کا سب سے یادگار گیت فلم مہتاب (1963) میں "گول گپے والا آیا۔۔" تھا جس کے بول حزیں قادری نے لکھے تھے اور موسیقی منظور اشرف کی تھی۔

مسعودرانا کے ساتھ ان کا پہلا ساتھ فلم اک سی چور (1965) میں ہوا تھا۔ حزیں قادری ہی کے لکھے ہوئے بول اور ماسٹر عبداللہ کی دھن میں یہ دلکش گیت تھا "ڈگمگ ڈولیاں میں ، تاں سمجھ آئی اے ، پلیوں نئیں پیتی سانوں ، سجناں پلائے اے۔۔" یہ گیت جب آئیڈیو کیسٹوں میں سنتا تھا تو بڑا گہرا اثر کرتا تھا لیکن فلم میں دیکھ کر بڑی مایوسی ہوئی تھی کیونکہ علاؤالدین گیت فلمانے کا حق ادا نہیں کر سکے تھے۔

علاؤالدین کی کلاسیک فلم بدنام (1966)

علاؤالدین پر مسعودرانا کا جو سب سے یادگار ترین گیت فلمایا گیا تھا وہ ہدایتکار اقبال شہزاد کی شاہکار فلم بدنام (1966) میں تھا:

• کوئی ساتھ دے کہ نہ ساتھ دے ، یہ سفر اکیلے ہی کاٹ لے ، کہ ہم بھی مسافر ، تم بھی مسافر ، کون کسی کا ہووے۔۔

فلم بدنام (1966) میں
علاؤالدین نے اداکاری کا نیا معیار قائم کیا تھا

اس فلم میں علاؤالدین کی کردارنگاری ضرب المثل بن گئی تھی جس نے انھیں ایک لیجنڈ کا مقام دے دیا تھا۔ اردو فلموں میں اگر کسی فلم کے مکالمے عوامی سطح پر مقبول ہوئے تھے تو وہ اس فلم کے تھے جنھیں ریاض شاہد نے لکھا تھا "کہاں سے آئے ہیں یہ جھمکے ، کیا کہہ رہے ہیں یہ جھمکے۔۔"

اس فلم میں گلوکارہ ثریا ملتانیکر کی غزل "بڑے بے مروت ہیں یہ حسن والے۔۔" بھی شامل کی گئی تھی جو اداکارہ نبیلہ پر فلمائی گئی تھی۔ بتایا جاتا ہے کہ محض اس غزل کی رائیلٹی سے پوری فلم کے اخراجات نکل آئے تھے۔

یاد رہے کہ فلم بدنام (1966) کو روس کی سترہ مختلف زبانوں میں ڈب کر کے نمائش کے لیے پیش کیا گیا تھا اور وہاں یہ فلم بے حد پسند کی گئی تھی۔

ریاض شاہد ہی کی فلم مسٹر اللہ دتہ (1966) کا ٹائٹل رول بھی علاؤالدین نے کیا تھا اور ان پر مسعودرانا کے دو گیت فلمائے گئے تھے۔ ان میں سے پہلا گیت "کوئی حال مست ، کوئی چال مست ، سانوں کر دے ربا مال مست۔۔" ایک بڑا دلچسپ گیت تھا جبکہ دوسرا گیت "اور بھائیا اللہ دتیا ، دسی کون جتیا۔۔" ایک ذومعنی گیت تھا جس میں ایک عام شخص یہ سوال کر رہا ہے کہ 1965ء کی جنگ کس نے جیتی تھی۔۔؟

ہدایتکار افتخار خان کی بھاری بھر کم فلم جگری یار (1967) کا ٹائٹل اور تھیم سانگ "سوچ کے یار بناویں بندیا۔۔" بھی مسعودرانا نے علاؤالدین اور دیگر تین بڑے اداکاروں اکمل ، ساون اور مظہرشاہ کے لیے گایا تھا جس کے بول بھی حزیں قادری نے لکھے تھے اور موسیقی بابا چشتی کی تھی۔ اس ایک گیت میں پوری فلم کی کہانی بیان کر دی جاتی ہے۔ مسعودرانا کے متعدد گیت اسی نوعیت کے تھے جنھیں سن کر پوری فلم کی کہانی سمجھ میں آجاتی تھی۔

مسعودرانا کے دو بڑے اعلیٰ پائے کے گیت "جہاں پھول بھی ہیں اور کانٹے بھی۔۔" اور "لوٹ آؤ ، ہاتھ جوڑ کر کہتا ہوں۔۔" بھی علاؤالدین پر فلمائے گئے تھے۔ ہدایتکار حسن طارق کی فلم یتیم (1967) میں یتیم بچوں کے لیے گائے گئے ان گیتوں کی موسیقی سلیم اقبال صاحبان نے بنائی تھی اور بول فیاض ہاشمی کے لکھے ہوئے تھے۔

ایسا ہی ایک انتہائی بامقصد گیت "ہار دینا نہ ہمت کہیں ، ایک سا وقت رہتا نہیں۔۔" مالا کے ساتھ مسعودرانا کا گایا ہوا یہ گیت علاؤالدین کے علاوہ اداکارہ رخسانہ پر فلم پاکدامن (1969) میں فلمایا گیا تھا جس کے موسیقار ماسٹر عنایت حسین اور نغمہ نگار قتیل شفائی تھے۔ مسعودرانا کا علاؤالدین پر آخری گیت "سچ نوں نہ چھڈیں پاویں ساہ مک جان۔۔" فلم یہ آدم (1986) میں فلمایا گیا تھا جو ان کے انتقال کے تین سال بعد ریلیز ہوئی تھی۔