البیلا
اداکاری کے علاوہ گلوکاری بھی کرتے تھے

البیلا ، سٹیج اور فلم کے نامور مزاحیہ اداکار تھے جنھیں گانے کا شوق بھی تھا۔

دوسو کے لگ بھگ فلموں میں کام کرنے والے اس اداکار کی پہلی فلم رشتہ (1963) تھی جس میں انھوں نے اداکاری کے علاوہ مسعودرانا کے ساتھ ان کے پہلے پنجابی گیت

• چپ کر دڑ وٹ جا..

میں گائیکی کا مظاہرہ بھی کیا تھا۔ مجھے یہ جان کر خاصی حیرت ہوئی کہ یہ ان کا واحد فلمی گیت نہیں ہے بلکہ انھوں نے دیگر فلموں میں بھی گیت گائے تھے جن میں سے چار مزید گیت تو صرف مسعودرانا کے ساتھ تھے۔

ان دونوں فنکاروں کا دوسرا گیت فلم خوشیا (1973) میں تھا:

• گھڑی پل دی ہووے یا سو سال ، زندگی گذارو ہس کے..

منورظریف کی نمایاں آواز میں گایا گیا اور انھی پر فلمایا گیا یہ بامقصد گیت ان کی زندگی کا خلاصہ بھی بیان کرتا تھا۔ اس یادگار کورس گیت میں مسعودرانا کے علاوہ البیلا اور ساتھیوں نے سنگت کی تھی جبکہ اس گیت کو ننھا ، البیلا ، آصف جاہ ، امداد حسین اور ساتھیوں پر بھی فلمایا گیا تھا۔

اس جوڑی کا تیسرا گیت فلم خاموش (1977) میں تھا:

• روٹی کپڑا مکان ، اسیں نئیں منگدے ، اسیں نشیاں دے مارے

چار نشئی کرداروں رنگیلا ، البیلا ، عرفان کھوسٹ اور بانکا پر فلمائے ہوئے اس مزاحیہ گیت میں مسعودرانا کے ساتھ رنگیلا اور البیلا کی آوازیں بھی تھی۔ مجھے ذاتی طور پر فلموں میں گائے ہوئے ایسے مزاحیہ گیتوں سے بڑی گہری دلچسپی رہی ہے کیونکہ بات ہی بات میں بڑے بڑے کام کی باتیں کر دی جاتی ہیں جو غور و فکر کے قابل ہوتی ہیں۔

البیلا کا مسعودرانا کے ساتھ چوتھا گیت فلم اتھرا پتر (1981) میں تھا:

• کلا مر چلیاں ، میں کنوارا مر چیلیاں ، سر توں لے کے پیراں تک سارا مر چلیاں..

یہ مزاحیہ گیت ایک بڑے کمال کی فلمی صورتحال کے لیے گایا گیا تھا۔

ننھا ایک ناول نگار ہے جو اپنے ناول کی کہانی مکمل کرنے کے لیے کسی پھانسی کے قیدی کے آخری لمحات کو قریب سے محسوس کرنے کے لیے اجازت کے لیے اپنے جیلر دوست رنگیلا کو آئے دن تنگ کرتا رہتا ہے۔ ایک دن اس کو سزائے موت کے ایک قیدی سے ملایا جاتا ہے جو باتوں باتوں میں الجھا کر اسے اپنے کپڑے پہنا دیتا ہے اور اکیلا چھوڑ کر اپنی کال کوٹھڑی سے فرار ہو جاتا ہے۔

پھانسی کے وقت اصل قیدی کی جگہ ننھا کو پھانسی گھاٹ کی طرف لے جایا جاتا ہے۔ ایسی صورتحال پر یہ دلچسپ پیروڈی گیت گایا گیا تھا۔ ننھا پر مسعودرانا اور علی اعجاز پر البیلا کی آواز فلمائی گئی تھی اور کیا غضب کی اداکاری کی تھی اس جوڑی نے۔۔!

مسعودرانا کے ساتھ البیلا کا آخری گیت فلم اللہ دتہ (1988) میں تھا:

• کالی میری پگ تے گلابی شلوار جی ، ایخو جیا مجرا ہویا اے پہلی وار جی..

یہ گیت بھی ایک بڑی منفرد فلمی صورتحال کے لیے گایا گیا تھا۔

فلم کے ہیرو سلطان راہی ، ہیرا منڈی کے تمام غنڈوں ، بدمعاشوں اور کن ٹٹوں کی پٹائی کرنے کے بعد انھیں سزا کے طور پر گھنگھرو پہنا کر مجرا کرنے کا حکم دیتے ہیں۔ البیلا ، سلطان راہی کے چمچے ہوتے ہیں جو طاقتور کا حکم بجا لاتے ہوئے انھیں اپنے اشاروں پر نچاتے ہیں۔

مسعودرانا کی جاندار آواز فلم کے ولن اداکار جگی ملک اور ساتھیوں پر فلمائی جاتی ہے جو بڑے دلچسپ طریقے سے ناچتے اور گاتے ہوئے مجرا کرتے ہوئے ہارے ہوئے ناپسندیدہ عناصر کی دلی کیفیت بیان کرتے ہیں۔ البیلا پر انھی کی آواز فلمائی جاتی ہے جو طاقتور کے گن گاتے ہوئے شکست خوردہ عناصر کو مزید خوفزدہ کرتاہے۔