اداکارہ رضیہ

ہماری فلموں میں جہاں ایک طرف مرکزی کردار ، ہیرو ، ہیروئن ، ولن اور کیریکٹرایکٹرز کے ہوتے تھے وہاں عام طور پر ایک متوازی کہانی مزاحیہ کرداروں کی بھی ہوتی تھی جو فلموں کا ایک لازمی حصہ ہوتے تھے۔

اس شعبہ میں جہاں بڑی تعداد میں مرد مزاحیہ فنکاروں نے نام پیدا کیا وہاں محدودے چند خواتین فنکارائیں بھی سامنے آئیں جن میں رضیہ سب سے مقبول اور مصروف ترین نام تھا۔

رضیہ
پاکستانی فلموں کی پہلی کامیاب ترین مزاحیہ اداکارہ تھی لیکن جب اس کے ساتھی مزاحیہ فنکار ہیرو بنے تو اس کا فلمی کیرئر ختم ہو گیا تھا

فلم ہسدے آؤ ہسدے جاؤ (1974)

پاکستان کے ابتدائی دور میں فلموں میں کوئی مخصوص مزاحیہ اداکارہ نہیں تھی۔ اداکارہ زینت ایسا پہلا نام تھا جو کامیڈی رول کیا کرتی تھی لیکن اس نے مزاحیہ کرداروں کے مقابلے میں سنجیدہ کرداروں میں زیادہ شہرت حاصل کی تھی۔

پاکستان کی پہلی فلم تیری یاد (1948) کی ہیروئن آشا پوسلے بطور ہیروئن تو ناکام تھی لیکن معاون اور منفی کرداروں کے علاوہ مزاحیہ کرداروں میں بھی بہت سی فلموں میں نظر آئی تھی۔

ایک موٹی تازی کالی کلوٹی اداکارہ چن چن بھی تھی جو اپنی مخصوص وضع و قطع کی وجہ سے چند کرداروں تک محدود رہی تھی۔ رضیہ ، وہ پہلا نام تھا جو صحیح معنوں میں ایک کامیاب مزاحیہ اداکارہ ثابت ہوئی تھی اور خصوصاً ساٹھ کا عشرہ اس کے انتہائی عروج کا دور تھا۔

رضیہ کی پہلی فلم کون سی تھی؟

رضیہ ، اپنے ایک انٹرویو میں اپنی پہلی فلم مفت بر (1961) بتاتی ہے لیکن ریلیز کے اعتبار سے اس کی پہلی فلم گڈی گڈا (1956) تھی۔ دو سو کے قریب فلموں میں کام کیا اور ہنڈرڈرائفلز (1981) آخری فلم تھی۔

بقول رضیہ کے ، جب اس کے ساتھی مزاحیہ اداکار رنگیلا اور منورظریف ہیرو بن گئے تو اس کا فلمی کیرئر ختم ہو گیا تھا کیونکہ اس نے اولڈ رول کرنے سے انکار کر دیا تھا۔

اپنے جسمانی خدوخال کی وجہ سے ہیروئن کے رول کے لیے وہ ویسے بھی موزوں نہیں تھی۔ اس کی جونئیر ساتھی مزاحیہ اداکارائیں ، صاعقہ اور زرقا ہیروئن بن گئی تھیں اور عام طور پر رنگیلا اور منورظریف کے ساتھ آتی تھیں۔

رضیہ کے علاوہ اس دور میں شاہدہ اور فرحی نے بھی بہت سی فلموں میں کام کیا تھا۔ ان کے بعد رومانہ اور زیبا شہناز نے بھی کامیڈی کرداروں میں بڑی شہرت حاصل کی تھی۔

رضیہ پر فلمائے گئے گیت

پچاس اور ساٹھ کے عشروں کی زیادہ تر پاکستانی فلموں میں جہاں فلم کی ہیروئن اور ہیرو پر گیت فلمائے جاتے تھے وہاں مزاحیہ اداکاروں کے لیے بھی گیت ہوتے تھے۔

رضیہ پر بھی بڑی تعداد میں گیت فلمائے گئے تھے جو عام طور پر آئرن پروین کی آواز میں ہوتے تھے۔

گلوکاروں میں احمدرشدی کو مزاحیہ گیت گانے میں سب پر سبقت حاصل تھی۔ وہ ایسے گیتوں میں مختلف النوع آوازیں نکالتے تھے جو مسعودرانا سمیت کسی اور گلوکار کے بس کی بات نہیں ہوتی تھی۔ لیکن مسعودرانا کو یہ خوبی حاصل تھی کہ ان کی آواز میں ہر قسم کے گیتوں کے لیے جو ایکسپریشنز ہوتے تھے وہ کسی اور گلوکار کی آواز میں نہیں تھے۔

رضیہ پر جو سب سے یادگار مزاحیہ گیت فلمایا گیا تھا وہ احمدرشدی اور آئرن پروین کا گایا ہوا فلم آئینہ (1966) میں تھا "مولا ، جھٹ پٹ سے ہیرو بنا دے مجھے۔۔" اس گیت میں ساتھی اداکار منورظریف تھے۔ اس گیت میں اس وقت کے مشہور ترین فنکاروں کا ذکر ہے جو رانی ، نیلو ، فردوس ، درپن ، سنتوش ، طالش ، علاؤالدین اور مظہرشاہ تھے۔ تاریخ کا ایک طالب علم ہونے کے ناطے ایسے گیتوں سے مجھے بڑی گہری دلچسپی رہی ہے۔

رضیہ پر مسعودرانا کے درجن بھر دوگانے فلمائے گئے تھے جن میں سے پہلا دوگانا فلم میرا ماہی (1964) میں تھا

• جے تو پچھیں میں کون تے میں انگریزی ناچا نی۔۔

اس گیت میں نذر ایک ڈانس ماسٹر کے طور پر رضیہ کو رقص سکھاتا ہے۔ نسوانی آواز آئرن پروین کی تھی جس نے رضیہ پر فلمائے ہوئے بیشتر گیت گائے تھے۔ ایسے ہی گیتوں میں فلم لنگوٹیا (1969) کا گیت

• لوکو ، میں شادی کی کیتی ، گل وچ پا لئی پھائی۔۔

میرے پسندیدہ ترین مزاحیہ گیتوں میں سے ایک ہے جسے میں اکثر گنگناتا رہتا ہوں۔ فلم ات خدا دا ویر (1970) کا یہ گیت تو بڑے کمال کا تھا

• نی موتے دیر نہ لاویں۔۔

گو یہ ایک سنجیدہ گیت تھا لیکن فلم میں رضیہ اور منورظریف پر فلمایا گیا تھا اور مزے کی بات یہ ہے کہ منورظریف نے اپنی حرکتوں سے اس سنجیدہ گیت میں بھی مزاح پیدا کر دیا تھا۔

رضیہ کی موت کی جھوٹی خبر

پاکستانی اخبارات میں ایک انتہائی متنازعہ خبر شائع ہوئی تھی کہ اداکارہ رضیہ کا 21 جولائی 1987ء کو لندن کی ایک جیل میں انتقال ہوگیا ہے۔ اس پر منشیات کی سمگلنگ کا الزام تھا لیکن یہ خبر جھوٹی ثابت ہوئی تھی۔ کراچی سے تعلق رکھنے والے ایک فلمی صحافی گڈو نے رضیہ کو زندہ و جاوید تلاش کر کے یو ٹیوب پر اس کا انٹرویو پیش کر دیا تھا جس میں وہ بڑی ہشاش بشاش نظر آئی۔