کراچی سے تعلق رکھنے والے بھارتی فلموں کے ایک تقسیم کار نثارمراد کے اکلوتے اور لاڈلے بیٹے وحیدمراد نے دوران تعلیم ہی فلمی دنیا میں قدم رکھ دیا تھا۔۔!

وحیدمراد کے فلمی کیرئر کا آغاز

بطور فلمساز اور کہانی نویس پہلی فلم انسان بدلتا ہے (1961) تھی جس کے ہدایتکار منوررشید تھے۔ اس کامیاب فلم کے مرکزی کردار شمیم آرا اور درپن تھے۔

وحیدمراد بطور اداکار

اس دوران ہدایتکار ایس ایم یوسف کی سپر ہٹ فلم اولاد (1962) میں ایک معاون اداکار کے طور پر نیرسلطانہ اور حبیب کے بیٹے کا رول کیا۔ اس سے قبل فلم ساتھی (1959) میں ایک ایکسٹرا کے طور پر نظر آئے تھے۔

اگلے سال بطور فلمساز ایک اور فلم جب سے دیکھا ہے تمہیں (1963) ریلیز ہوئی۔ اس فلم کے ہدایتکار بھی منوررشید تھے اور مرکزی کردار زیبا اور درپن تھے۔ موسیقار سہیل رعنا کی یہ پہلی فلم تھی۔

اسی سال ، ہدایتکار قدیرغوری کی ایک سپرہٹ فلم دامن (1963) میں نیلو اور ہدایتکار ثقلین رضوی کی ناکام فلم مامتا (1964) میں نغمہ کے ساتھ سائید ہیرو تھے۔ اس آخری فلم میں وحیدمراد پر پہلا گیت "یہ مشکبار گیسو ، ارضی گلاب جیسے۔۔" فلمایا گیا تھا جو ایک دوگانا تھا اور منیر حسین اور ناہیدنیازی کی آوازوں میں تھا۔

وحیدمراد بطور ہیرو

وحیدمراد ، پہلی بار فلم ہیرا اور پتھر (1964) میں زیبا کے مقابل مکمل ہیرو کے روپ میں سامنے آئے تھے۔ اس فلم میں ان کا ساتھ ہدایتکار پرویز ملک کے ساتھ ہوا تھا جن کے بارے میں بتایا جاتا ہے کہ انھوں نے فلمسازی کی تعلیم امریکہ سے حاصل کی تھی۔ اس فلم کے فلمساز وحیدمراد خود تھے۔ سہیل رعنا موسیقار تھے جن کی موسیقی میں پہلی بار احمدرشدی کے گیت وحیدمراد پر فلمائے گئے تھے۔ "گوری سمٹی جائے شرم سے۔۔" اس جوڑی کے ریکارڈ ڈیڑھ سو کے لگ بھگ گیتوں میں سے یہ پہلا گیت تھا۔

وحیدمراد ، سپرسٹار بنے

وحیدمراد کو فلم ارمان (1966) نے سپر سٹار بنا دیا تھا۔ یہ کراچی میں بننے اور وہاں پلاٹینم جوبلی کرنے والی پہلی اردو فلم تھی جس کے فلمساز اور کہانی نویس بھی وحیدمراد خود تھے۔ اس فلم میں ان پر فلمائے گئے احمدرشدی کے گیت "کوکوکورینہ۔۔" نے انھیں نوجوان طبقے کا آئیڈیل فلمی ہیرو بنا دیا تھا۔ اگلے کئی سال تک وہ میڈیا کی ڈارلنگ تھے اور جتنی کوریج انھیں ملی ، اس کا عشر عشیر بھی کبھی کسی دوسرے اداکار کو نہیں ملا تھا۔

وحیدمراد کے فلمی اعدادوشمار

وحیدمراد نے کل 132 فلموں میں کام کیا تھا جن میں سے 119 اردو ، 12 پنجابی اور ایک پشتو فلم تھی۔ وہ 12 فلموں کے فلمساز ، 5 فلموں کے مصنف اور ایک فلم اشارہ (1969) کے ہدایتکار تھے۔ اس فلم کے علاوہ فلم سمندر (1968) میں بھی انھوں نے گائیکی کا مظاہرہ بھی کیا تھا۔

بطور اداکار ان کی خاص خاص فلموں میں عید مبارک ، کنیز (1965) ، جوش ، جاگ اٹھا انسان ، بھیا (1966) ، انسانیت ، دیوربھابھی ، احسان ، دوراہا ، پھر صبح ہوگی ، رشتہ ہے پیار کا (1967) ، سمندر ، دل میرا دھڑکن تیری ، جہاں تم وہاں ہم (1968) ، سالگرہ ، عندلیب (1969) ، نصیب اپنا اپنا ، انجمن ، چاند سورج (1970) ، نیند ہماری خواب تمہارے ، مستانہ ماہی (1971) ، ناگ منی ، دولت اور دنیا اور بہارو پھول برساؤ (1972) ، عشق میرا ناں ، تم سلامت رہو ، پھول میرے گلشن کا ، دشمن ، شمع (1974) ، جوگی ، محبت زندگی ہے ، صورت اور سیرت ، جب جب پھول کھلے (1975) ، شبانہ (1976) ، سہیلی ، پرکھ ، آواز (1978) ، بہن بھائی (1979) ، پیاری ، کرن اور کلی (1981) شامل ہیں۔

وحیدمراد کا عروج و زوال

وحیدمراد کے انتہائی عروج کا دور 1966ء سے 1973ء تک رہا۔ 1974ء تک وہ اپنی مارکیٹ ویلیو کھو چکے تھے اور دیگر فلمی ہیروز کے مقابلے میں ثانوی کرداروں پر مجبور ہونا پڑا تھا۔ اپنے انتقال سے چند سال قبل تک وہ ایک بھولی ہوئی داستان اور گزرا ہوا خیال بن چکے تھے جنھیں اپنے پرائے سبھی نظرانداز کر چکے تھے۔ جب 23 نومبر 1983ء کو اچانک ان کے انتقال کی خبر جنگل میں آگ کی طرح سے پھیلی تھی تو یہ جان کر ہر کسی کو بڑا دکھ ہوا تھا کہ وقت کا ایک عظیم اداکار کتنی بے بسی اور بے اعتناعی کے عالم میں اس دارفانی سے کوچ کر چکا ہے۔

وحیدمراد کے فلمی گیت

وحیدمراد پر ڈھائی سو کے قریب گیت فلمائے گئے تھے۔ ان میں سے ڈیڑھ سو کے لگ بھگ گیت صرف احمدرشدی نے گائے تھے جبکہ سات درجن کے قریب گیت مہدی حسن کے گائے ہوئے تھے۔ مسعودرانا نے تیسرے نمبر پر سب سے زیادہ دو درجن کے قریب گیت وحیدمراد کے لیے گائے تھے۔ ان کی پہلی مشترکہ فلم جب سے دیکھا ہے تمہیں (1963) تھی جس کے وحیدمراد ، فلمساز تھے لیکن پہلا گیت "دل میں بسایا پیار سے ہم نے ، تم کو اپنا جان کے۔۔" فلم جاگ اٹھا انسان (1966) میں فلمایا گیا تھا۔ دکھی پریم نگری کے لکھے ہوئے اس شاہکار گیت کی دھن لال محمداقبال نے بنائی تھی اور ساتھی فنکارہ زیبا تھی۔

وحیدمراد پر مسعودرانا کا پہلا سولو گیت

اسی سال کی فلم بھیا (1966) میں مسعودرانا کا پہلا سولو گیت وحیدمراد پر فلمایا گیا تھا "جواب دو نہ دو ، لیکن میرا سلام تو لو۔۔" روبن گھوش کی موسیقی میں عشرت کلکتوی کا لکھا ہوا دھیمی سروں میں گایا ہوا یہ ایک شاہکار گیت ہے لیکن فلمبندی بڑی مایوس کن تھی۔ وحیدمراد کی مشرقی پاکستان میں بننے والی یہ واحد فلم تھی جس میں ان کی ہیروئن چترا سنہا تھی۔

مسعودرانا کی اہمیت

فلم دوراہا (1967) میں ہارمونیم کے تار چھیڑتے ہوئے ایک شکستہ دل عاشق جب اداس دل کی آہوں کو الفاظ کی زبان دیتا ہے "یہ تو کہو ، توڑ کے دل میرا ، چھپ گئے ہو کہاں ، ساجنا۔۔" تو انھیں سُر کا روپ دینے کے لیے موسیقار سہیل رعنا کو مسعودرانا سے بہتر کوئی آواز نہیں ملتی۔ وحیدمراد ، اردو فلموں کے اداکار تھے اور ان پر عام طور پر احمدرشدی اور مہدی حسن کے گیت فلمائے جاتے تھے لیکن وہ دونوں مخصوص ٹائپ گلوکار تھے۔ اسی لیے موسیقاروں کو مسعودرانا کی ضرورت پڑتی تھی جن سے بہتر ورسٹائل گلوکار پاکستانی فلموں کو کبھی نصیب نہیں ہوا۔ اس حقیقت کا ایک اور مظاہرہ فلم سمندر (1968) کے اس تھیم سانگ "ساتھی ، تیرا میرا ساتھی ہے لہراتا سمندر۔۔" میں ہوا تھا جب اونچی سروں میں جانے کے لیے موسیقار کو مسعودرانا کی ضرورت پڑتی ہے۔ گویا جہاں احمدرشدی کے سُر ختم ہوتے تھے وہاں سے مسعودرانا کے سُر شروع ہوتے تھے۔

وحیدمراد پر مسعودرانا کے چند سپرہٹ گیت

فلم دل میرا دھڑکن تیری (1968) میں ماسٹر عنایت حسین کی دھن میں قتیل شفائی کا لکھا ہوا گیت "جھوم اے دل وہ میرا جان بہار آئے گا۔۔" بھی وحیدمراد پر فلمایا گیا تھا۔ یہ ایک سپرڈپر ہٹ گیت تھا۔ ایسا ہی ایک گیت فلم تمہی ہو محبوب میرے (1969) میں تھا "فسانہ دل ہے مختصر سا کہ آگ دل میں بھڑک اٹھی ہے۔۔" ایم اشرف کی دھن میں خواجہ پرویز کا لکھا ہوا یہ مقبول عام گیت تھا۔

1971ء میں ریلیز ہونے والی فلم نیند ہماری خواب تمہارے پہلی فلم تھی جس میں مسعودرانا کے گائے ہوئے چاروں گیت وحیدمراد پر فلمائے گئے تھے۔ ایم اشرف کی موسیقی میں کلیم عثمانی کے سبھی گیت بڑے مقبول ہوئے تھے۔ "میرا محبوب آگیا ، من میرا لہرا گیا۔۔" سب سے سپر ہٹ گیت تھا جبکہ "ناراض نہ ہو تو عرض کروں ، دل تم سے محبت کرتا ہے۔۔" بھی ایک لاجواب گیت تھا۔ "یہ دنیا ہے دولت والوں کی۔۔" ایک بہترین تھیم سانگ تھا تو "ہم نے تو پیار بہت تم سے چھپانا چاہا۔۔" ایک دلکش رومانٹک گیت تھا جس میں ساتھی اداکارہ دیبا تھی۔

وحیدمراد کی فلم بہارو پھول برساؤ (1972) ایک شاہکار سماجی اور نغماتی فلم تھی۔ اس فلم کے سبھی گیتوں پر بھاری مسعودرانا کا یہ لازوال گیت تھا "میرے دل کی آواز کہ بچھڑا یار ملے گا۔۔" میں نے اپنی زندگی میں پہلی سینما سلائیڈ جو لکھی تھی ، اس پر فلم 'بہارو پھول برساؤ' لکھا تھا۔ ذرا تصور کریں کہ ایک دس سالہ بچے نے جب اپنی لکھائی سلور سکرین پر دیکھی تھی تو اس وقت وہ کتنی اونچی ہواؤں میں اڑ رہا ہوگا۔۔؟ اس فلم سے جڑی یادوں اور اپنے غیرمعمولی بچپن کے دیگر واقعات پر فی الحال تفصیل میں جانے کی گنجائش نہیں ہے۔

1973ء کی فلم خواب اور زندگی دوسری اور آخری فلم تھی جس کے چاروں گیت ایکبار پھر وحیدمراد پر فلمائے گئے تھے۔ ان میں سے "کل بھی تم سے پیار تھا مجھ کو۔۔" اپنے وقت کا ایک سپر ہٹ گیت تھا جس میں مسعودرانا کا ساتھ رونالیلیٰ نے دیا تھا۔ یہ گیت دوبار الگ الگ گایا اور فلمایا گیا تھا۔ اس فلم کا متاثرکن گیت "اک سانولی سی لڑکی میرے دل کو بھا گئی ہے۔۔" تھا جس میں مسعودرانا کے ایکسپریشن بے مثال تھے۔ اس گیت میں شمیم آرا بڑی پرکشش نظر آتی تھی جس کے عروج کا دور اس وقت تک گزر چکا تھا۔

وحیدمراد کے لیے مسعودرانا کے پنجابی گیت

فلم سیونی میرا ماہی (1974) پہلی پنجابی فلم تھی جس میں مسعودرانا کی آواز وحیدمراد پر فلمائی گئی تھی۔ حزیں قادری کا لکھا ہوا نذیرعلی کی دھن میں یہ ایک روایتی گیت تھا "ویری میرے پیار دا ، خدا تے خدائی اے۔۔" ان چاروں فنکاروں کا ایک اور پنجابی فلم سجن کملا (1975) میں بھی ایک منفرد گیت تھا "اج تسی بڑے دناں بعد ملے او۔۔" یہ گیت ، گائیکی اور تحت لفظی کا مرقع تھا۔

فلم لیلیٰ مجنوں (1974) اور انسان اور شیطان (1978) میں دوقوالیوں میں زیادہ تر حصہ منیر حسین اور ساتھیوں نے گایا تھا لیکن جب وحیدمراد کی باری آتی تھی تو دونوں موسیقاروں ، نثاربزمی اور کمال احمد نے مسعودرانا کا انتخاب کیا تھا۔

فلم ننھا فرشتہ (1974) میں "پیار بنا تنبہ وجدا ای نا۔۔" بھی ایک دلکش کورس گیت تھا جبکہ فلم دیدار (1974) میں میڈم نورجہاں کے ساتھ بھی مسعودرانا کا یہ گیت بڑے اعلیٰ پائے کا تھا "کردیا پیار کا حق ادا ہم نے۔۔" فلم دشمن (1974) کا یہ تھیم سانگ "اپنا لہو پھر اپنا لہو ہے۔۔" بھی کیا کمال کا گیت تھا جو وحیدمراد اور محمدعلی کے پس منظر پر فلمایا گیا ایک منفرد گیت تھا۔ فلم محبوب میرا مستانہ اور گونج اٹھی شہنائی (1976) میں مسعودرانا نے دو شوخ گیت "اک الہڑ مٹیار۔۔" اور "چاہے بدھ ہو چاہے ہو جمعرات۔۔" بھی وحیدمراد کے لیے گائے تھے۔

وحیدمراد کے لیے مسعودرانا کا ایک لاجواب گیت

آخر میں ایک ایسے گیت کا ذکر کیے بغیر بات مکمل نہیں ہوگی کہ جس نے مجھے بے حد متاثر کیا تھا۔ فلم دلربا (1975) میں وحیدمراد اور رانی کے لیے مسعودرانا نے روبینہ بدر کے ساتھ ایک ایسا باکمال گیت گایا تھا کہ جس بہتر گیت میں نے آج تک نہیں سنا۔ موسیقار ایم اشرف کی دھن میں "جو ٹوٹ گئی پائل تو کیا ہوگا۔۔" جیسے منفرد گیت میں مسعودرانا نے ثابت کر دیا تھا کہ ان سے بہتر ہر فن مولا گلوکار پاکستان میں دور دور تک کوئی اور نہیں ہے۔ اس عظیم گلوکار نے اس گیت میں کیا غضب کا کلاسیکل ٹچ دیا تھا۔۔! ایسے لاجواب گیتوں نے مجھے مجبور کر دیا تھا کہ اس مایہ ناز گلوکار کو اس کے شایان شان ایسا منفرد خراج تحسین پیش کروں ، ورنہ مسعودرانا کی ذات یا خاندان سے میرا دور دور تک کبھی کوئی تعلق نہیں رہا۔

(26 اردو گیت ... 3 پنجابی گیت )