اداکار حنیف
کو دلیپ کمار کا متبادل سمجھا گیا تھا

• میری دنیا میں اُجالے کا کہیں نام نہیں۔۔!
  میں تو سمجھا تھا۔۔ تیری زلف کے سائے کے تلے۔۔
  میں تو سمجھا تھا۔۔ جدائی تیری ممکن ہی نہیں۔۔
  موت بھی آئی تو زانو پہ تیرے آئے گی۔۔!

فلم آرزو (1965) کا یہ شاہکار گیت جب کبھی ریڈیو پر بجتا تھا تو سامعین دم بخود ہو کر سنتے تھے۔ مسعودرانا کی آواز کے زیروبم سننے والوں کو اپنی گرفت میں لے لیتے تھے اور کافی دیر تک اس گیت کا سحر قائم رہتا تھا۔

یہ یادگار گیت واجد چغتائی نامی فلمی شاعر کا لکھا ہوا تھا اور اس کے موسیقار دیبو تھے۔

یہ گیت اداکار حنیف پر فلمایا گیاتھا جن کی بطور ہیرو یہ واحد کامیاب فلم تھی۔

اداکار حنیف کا فلمی کیرئر

اداکار حنیف ، دلیب کمار سے مشابہت رکھتے تھے اور انھیں پہلی بار بطور ہیرو فلم ہمیں بھی جینے دو (1963) میں متعارف کروایا گیا تھا۔ اس فلم کی ہیروئن اداکارہ زمرد تھی جو دو درجن فلموں میں نظر آنے کے بعد پہلی بار نازی کے نام سے فرسٹ ہیروئن کے طور پر نظر آئی تھی لیکن ایک طویل فلمی کیریر کے باوجود زیادہ تر ایک معاون اداکارہ کے طور پر ہی فلموں میں دیکھی گئی تھی۔

یہی فلم ایک اور نامور اداکارہ روزینہ کی بھی پہلی فلم تھی۔ اداکارہ طلعت صدیقی نے بھی بطور گلوکار اسی فلم سے اپنے فلمی سفر کا آغاز کیا تھا۔ ہدایتکار بٹ کاشر تھے جو ایک اداکار تھے اور اس سے قبل متعدد فلموں میں اداکاری کر چکے تھے۔ یہ ان کی بطور ہدایتکار پہلی اور آخری فلم تھی جس میں انھوں نے نغمہ سرائی بھی کی تھی۔

اس فلم کے موسیقار سی فیض تھے جن کی یہ اکلوتی فلم تھی لیکن انھوں نے دو لاجواب دھنیں بنائی تھی جن میں ایک خانصاحب مہدی حسن کی ایک غزل تھی ، جس کے شاعر مسرور انور تھے

• الہیٰ ، آنسو بھری زندگی کسی کو نہ دے۔۔

جبکہ ایک دھن مسعودرانا کی یہ غزل تھی:

• آج کی رات ، بہاروں میں گزاریں گے صنم ، تم پکارو ہمیں ، ہم تم کو پکاریں گے صنم..

یہ دلکش غزل یوسف پردیسی نامی شاعر نے لکھی تھی جن کی یہ اکلوتی کاوش تھی۔

حنیف کی کارکردگی کے لحاظ سے فلم میخانہ (1964) بھی ایک اچھی فلم تھی۔ فلم آزادی یا موت (1966) میں وہ فرسٹ ہیرو تھے اور معروف لوک فنکار عالم لوہار کا یہ گیت ان پر فلمایا گیا تھا

• دنیا جانے ، میرے وطن کی شان۔۔

مسعودرانا کے ساتھ حنیف کی بطور ہیرو آخری فلم میرے لال (1967) تھی جس میں ان پر یہ دو دلکش گیت فلمائے گئے تھے:

• پیار بھی ہے سزا ، نہ تھا معلوم..
• یہ دل بھی تمہارا ہے ، یہ گھر بھی تمہارا ہے..

حنیف کا تعلق کراچی سے تھا۔ اداکاری محض شوقیہ کرتے تھے ، شاید یہی وجہ تھی کہ ڈیڑھ سو سے زائد فلموں میں کام کیا ، ہیرو سے سائیڈ ہیرو اور ولن سے معاون اداکار ہوتے ہوئے ایک ایکسٹرا اداکار رہ گئے تھے۔ 1990ء میں انتقال ہوا تھا۔