موج لکھنوی

موج لکھنوی ، کراچی سے تعلق رکھنے والے ایک فلمی شاعر تھے جنھوں نے درجن بھر فلموں میں نغمہ نگاری کی تھی۔

ان کی پہلی فلم تم نہ مانو (1961) بطور مکالمہ نگار تھی اور ان کا لکھا ہوا پہلا گیت فلم مسٹر ایکس (1963) میں تھا۔ اسی فلم میں انھوں نے مسعودرانا کے لیے درجن بھر گیتوں میں سے پہلا گیت لکھا تھا:

• کس کے قدموں کی آہٹ ہے ، بھلا یہ کون آیا ہے..

نئی لیلیٰ نیا مجنوں

نئی لیلیٰ نیا مجنوں (1969)

اپنی ابتدائی سات فلموں میں فی فلم ایک دو گیت لکھنے کے بعد نئی لیلیٰ نیا مجنوں (1969) پہلی فلم تھی جس کے سبھی گیت ان کے لکھے ہوئے تھے۔ یہ ایک سپر ہٹ نغماتی فلم تھی جس کے گیتوں کی دھنیں ماسٹر تصدق حسین نے بنائی تھیں اور کیا خوب بنائی تھیں۔ اس فلم کا سب سے ہٹ گیت مسعودرانا اور مالا کا گایا ہوا تھا:

• میرے ہمسفر ، تم بڑے سنگدل ہو۔۔

جبکہ یہ کورس گیت بھی کیا زبردست تھا:

• ندیا کے بیچ گوری ہل چل مچائے رے۔۔

اس فلم میں احمدرشدی اور مالا کے گیت "او میری محبوبہ۔۔" کے علاوہ اس گیت کی دھن بھی کیا خوب تھی "جانے مجھے کیا ہو گیا ہے۔۔" اس کورس گیت میں مالا اور ساتھیوں کے ساتھ دو بول مسعودرانا کے بھی تھے جبکہ فلم کا ٹائٹل گیت بھی مسعودرانا کا گایا ہوا تھا جس میں صرف فلم کا نام گایا گیا تھا "نئی لیلیٰ نیا مجنوں۔۔"

ایک فلمی گیت کا دورانیہ کتنا؟

یاد رہے کہ ہماری فلموں میں بہت سے ایسے "گیت" بھی ملتے ہیں جو عام گیتوں کی طرح کم از کم دو انتروں پر مشتمل نہیں ہوتے تھے بلکہ فلم کی ضرورت کے مطابق ایک مصرعہ سے متعدد اشعار تک مشتمل ہوتے تھے۔

پاکستان فلم میگزین کے فلمی گیتوں کے ڈیٹا بیس میں ایسے تمام مصرعوں ، شعروں ، دوہوں ، قطعات وغیرہ کی گائیکی کو ایک مکمل گیت شمار کیا گیا ہے۔

مسعودرانا کے ایسے "گیتوں" کی تعداد دیگر گلوکاروں کی نسبت زیادہ ہے کیونکہ وہ سب سے خالص فلمی گلوکار تھے۔ ان کے ایسے "گیتوں" کی تعداد دو درجن کے قریب ہے جن کی ایک فہرست بھی مرتب کی گئی ہے۔

آئے ہیں دل والے روڈ ٹو سوات

موج لکھنوی کی دوسری فلم جس میں انھوں نے سارے گیت لکھے تھے ، وہ روڈ ٹو سوات (1970) تھی جس کا سب سے مقبول گیت احمدرشدی ، مالا اور ساتھیوں کا گایا ہوا تھا "یہ ادا ، یہ ناز ، یہ انداز آپ کا۔۔" جبکہ فلم کا ٹائٹل سانگ "چلے ہیں دل والے روڈ ٹو سوات۔۔" مالا ، تانی ، مسعودرانا اور ساتھیوں کا گایا ہوا تھا۔

یہ فلم رنگین تھی اور نئی لیلیٰ نیا مجنوں کے سٹائل پر بنائی گئی تھی لیکن ویسی کامیابی سے محروم رہی تھی۔

پیار کا موسم ، دل کو جلائے

موج لکھنوی چونکہ صرف کراچی کی فلموں تک محدود رہے تھے ، اس لیے لاہور کے فلمسازوں نے انھیں بہت کم چانس دیا تھا۔

ان کی لاہور کی ایک اور فلم پیار کا موسم (1975) تھی جس کے جملہ گیت ان کے لکھے ہوئے تھے۔ اس فلم کے دس میں سے آدھے یعنی پانچ گیت مسعودرانا کے گائے ہوئے تھے جو سبھی اس وقت کے مقبول ترین اداکار منورظریف پر فلمائے گئے تھے۔

مجھے کبھی نہیں بھول سکتا جب اس فلم کے پہلے گیت

• دیکھا جو حسن یار طبیعت مچل گئی۔۔

کا دوسرا مصرعہ فلم میں آتا ہے "۔۔ تھا آنکھوں کا قصور ، چھری دل پہ چل گئی۔۔" تو اچانک فلم آپریٹر نے فلم روک دی تھی اور چند لمحات کے سکوت کے بعدسپیکر پر اس کی بھرائی ہوئی آواز سنائی دی تھی کہ "یہ چھری منورظریف کے دل پر نہیں ، ہم سب کے دلوں پر چلی ہے۔۔"

یہ واقعہ منورظریف کی جمعرات 29 اپریل 1976ء کے دن موت کے صرف تین دن بعد یعنی اتوار 2 مئی 1976ء کا ہے جب میں نے یہ فلم کوپن ہیگن کے ساگا سینما میں دیکھی تھی اور منورظریف جیسے گوہر نایاب کی اچانک موت پر ہر کسی کو دکھی دیکھا تھا اور یہ پوری فلم ہم نے اسی الم کے عالم میں دیکھی تھی۔

موج لکھنوی کی آخری فلم

موج لکھنوی نے طویل عمر پائی تھی لیکن فلموں میں زیادہ مصروف نہیں رہے۔ ان کی آخری فلم مانگ میری بھر دو ، 1983ء میں بنی تھی جو محمدعلی اور وحیدمراد کی جوڑی کی آخری فلم بھی تھی۔ بڑی کمزور فلم تھی لیکن اتنی کامیاب ہوئی تھی کہ کراچی کے پچیس سینماؤں میں ایک ساتھ ریلیز ہو کر ایک ہی ہفتے میں سلورجوبلی منا کر ہمیشہ کے لیے ڈبوں میں بند ہوگئی تھی۔۔!