رفیق رضوی

ہدایتکار رفیق رضوی ، مشہور فلم بیداری (1957) کے حوالے سے جانے جاتے ہیں۔۔!

جذبہ حب الوطنی پر بنی ہوئی
فلم بیداری (1957)
ایک بھارتی فلم کا چربہ تھی

پاکستان آنے سے قبل بھارت میں ان کی فلموں میں آواز ، کوشش ، وعدہ ، الہ دین کا بیٹا اور کاروان جیسی فلمیں قابل ذکر تھیں۔

پاکستان میں بطور ہدایتکار ان کی پہلی فلم بیداری (1957) تھی جو قومی جذبے اور حب الوطنی کے موضوع پر بنائی ہوئی ایک یادگار نغماتی فلم تھی۔ یہ فلم اپنے پہلے رن میں تو ناکام ہو گئی تھی لیکن پھر قومی تہواروں پر سپر ہٹ قومی نغمات کی وجہ سے بڑی پسند کی جاتی رہی ہے۔

فلم اور گیت بھی چربہ

اس فلم کا افسوسناک پہلو یہ تھا کہ یہ ایک بھارتی فلم جاگرتی (1954) کا ہو بہو چربہ تھی۔ یہاں تک کہ اس کے مشہور زمانہ تینوں "قومی گیت" بھی نقل شدہ تھے۔ اس فلم کا مشہور ترین ترانہ منور سلطانہ کی آواز میں تھا

• اے قائد اعظمؒ ، تیرا احسان ہے احسان۔۔

یہ بھارتی گلوکارہ آشا پوسلے کے گیت "سابرمتی کے سنت ، تو نے کر دیا کمال۔۔" کا پاکستانی ورژن تھا۔ سلیم رضا کا گایا ہوا مشہور ترانہ

• آؤ بچو سیر کرائیں تم کو پاکستان کی۔۔

کوی پردیپ نامی گلوکار کے گیت "آؤ بچو تمہیں دکھائیں ، جھانسی ہندوستان کی۔۔" کی نقل تھا جبکہ محمدرفیع کے گائے ہوئے گیت

• ہم لائے ہیں طوفان سے کشتی نکال کے۔۔

کو سلیم رضا نے انھی الفاظ میں گایا تھا۔ دلچسپ بات یہ تھی کہ رفیع صاحب ، لفظ 'کشتی' کو کاف کے نیچے زیر سے جبکہ سلیم رضا زبر سے گا رہے تھے جو شاید زیادہ صحیح تلفظ ہے۔

گو موسیقار ہیمنت کمار کی دھنوں کو موسیقار فتح علی خان نے نقل کیا تھا لیکن پاکستانی گلوکاروں کی کارکردگی ، بھارتی گلوکاروں سے بہتر تھی۔

فلم بیداری (1957) کے ان تینوں کاپی شدہ گیتوں کو "مشرف بہ پاکستان" کرنے کا "اعزاز" ایک خاور زمان نامی شاعر کو حاصل ہے جن کے چند فلموں میں متعدد گیت ملتے ہیں جن میں سے ایک پنجابی گیت "اک کڑی بڑی ہوشیار۔۔" فلم دکی تکی (1976) میں مسعودرانا نے گایا تھا۔

رتن کمار کی پاکستانی اور بھارتی فلموں میں اداکاری

اس فلم کی ایک اور خاص بات یہ تھی کہ یہ اداکار رتن کمار کی پاکستان میں پہلی فلم تھی۔ بھارتی فلم جاگرتی میں بھی انھوں نے کام کیا تھا۔ پاکستان کی فلمی تاریخ کے وہ واحد اداکار تھے کہ جنھوں نے بچپن میں ایک فلم میں کام کر کے نام پیدا کیا اور پھر جوانی میں بھی متعدد فلموں میں ہیرو آئے تھے لیکن ڈیڑھ درجن فلموں میں کام کرنے کے باوجود ان کی صرف ایک فلم ناگن (1959) ہی کامیاب ہو سکی تھی۔ ہدایتکار رفیق رضوی نے رتن کمار کو فلم واہ رے زمانے (1958) ، دو استاد اور نیلوفر (1960) میں بھی موقع دیا تھا لیکن ناکامی مقدر رہی تھی۔

تو جو نہیں ہے تو کچھ بھی نہیں ہے

ہدایتکار رفیق رضوی کی ایک فلم سویرا (1959) گلوکار ایس بی جان کے مشہور زمانہ گیت

• تو جو نہیں ہے تو کچھ بھی نہیں ہے۔۔

کی وجہ سے بڑی مشہور ہوئی تھی۔ کمال کے ساتھ ان کی ایک فلم اپنا پرایا (1959) بھی بہت اچھی فلم تھی۔

محمدعلی کی بطور ہیرو پہلی فلم

محمدعلی کی بطور ہیرو پہلی فلم شرارت (1963)

رفیق رضوی کی گیارہ میں سے آخری پانچوں فلموں میں مسعودرانا کے گیت ملتے ہیں۔ ان میں سے پہلی فلم شرارت (1963) تھی جس میں محمدعلی کو پہلی بار ہیرو کے طور پر کاسٹ کیا گیا تھا۔ ان پر جو پہلی مردانہ آواز فلمائی گئی تھی ، وہ مسعودرانا کی تھی۔ اس فلم کا یہ گیت بڑا مقبول ہوا تھا

• اے دل تجھے اب ان سے یہ کیسی شکایت ہے۔۔

اگلی فلم آرزو (1965) اداکار حنیف کی بطور ہیرو واحد کامیاب فلم تھی جس میں مسعودرانا کا یہ گیت سپر ہٹ ہوا تھا

• میں تو سمجھا تھا جدائی تیری ممکن ہی نہیں۔۔

اس سے اگلی فلم پھر صبح ہو گی (1967) تھی جس میں رفیق رضوی نے پہلی بار وحیدمراد کو ہیرو لیا تھا۔ اس فلم کا تھیم سانگ بھی مسعودرانا کی آواز میں تھا

• پھر صبح ہو گی ، اندھیرے نہیں رکنے والے۔۔

یہ گیت پوری فلم میں چھوٹے چھوٹے ٹکڑوں کی صورت میں آتا ہے۔

اس فلم کی خاص بات یہ تھی کہ اس کے فلمساز رفیق چوہدری نے رونا لیلیٰ کے ساتھ ایک بڑا مشہور دوگانا گایا تھا "دیا رے دیا ، کانٹا چبھا مورے پاؤں میں۔۔"

شبنم کی مغربی پاکستان کی پہلی فلم

رضوی صاحب کی اگلی فلم سمندر (1968) تھی جس میں مشرقی پاکستان کی اداکارہ شبنم نے پہلی بار مغربی پاکستان کی کسی فلم میں کام کیا تھا۔ یہ فلم کراچی میں بنائی گئی تھی اور رفیق رضوی کی بطور ہدایتکار کامیاب ترین فلم تھی۔ اس فلم کا کورس گیت

• ساتھی ، تیرا میرا ساتھی ہے لہراتا سمندر۔۔

بڑا مشہور ہوا تھا۔ اس گیت میں احمدرشدی ، سائیں اختر اور ساتھیوں کے ساتھ مسعودرانا کی آواز بھی شامل تھی۔

رفیق رضوی کی آخری فلم پھر چاند نکلے گا (1970) تھی جس میں مسعودرانا کا ایک ترانہ تھا

• سر کٹا کے چلو ، خون بہا کے چلو۔۔

یہ پہلی فلم تھی جس میں موسیقار سہیل رعنا نے میڈم نورجہاں سے کوئی گیت گوایا تھا۔

رفیق رضوی کے ایک بیٹے مسعودرضوی نے فلم گھر داماد (1969) جبکہ دوسرے بیٹے سعید رضوی نے متعدد فلمیں بنائی تھیں جن میں فلم شانی (1989) سب سے مشہور تھی۔ یہ پاکستان کی پہلی سائنس فکشن فلم تھی۔ رفیق رضوی کا انتقال 1986ء میں ہوا تھا۔