ہدایتکار حسن طارق
کے کریڈٹ پر بہت بڑی بڑی فلمیں ہیں

حسن طارق کے بارے میں ایک تفصیلی مضمون

حسن طارق ، پاکستان کے ایک نامور فلمساز اور ہدایتکار تھے جن کے کریڈٹ پر بہت بڑی بڑی فلمیں تھیں۔ وہ ، مسعودرانا کی دوسری فلم بنجارن (1962) کے ہدایتکار تھے جو اتفاق سےان کی بھی دوسری فلم تھی۔

حسن طارق کے بارے میں پاکستان فلم میگزین کے سابقہ ورژن میں ایک تفصیلی مضمون لکھا جا چکا ہے جسے یہاں دھرانے کی ضرورت نہیں ہے۔

مسعودرانا نے حسن طارق کی ڈیڑھ درجن فلموں میں دو درجن سے زائد گیت گائے تھے جو سبھی اردو زبان میں تھے اور جن کا یہاں ریکارڈ محفوظ کیا گیا ہے جبکہ چند یادگار فلموں اور ان کے گیتوں کا تفصیلی ذکر کیا جا رہا ہے۔

فلم تقدیر (1966) میں مسعودرانا کے شاہکار گیت

حسن طارق کی ایک اردو فلم تقدیر (1966) تھی جس میں مسعودرانا نے اداکاری کے علاوہ یہ تین بھاری بھر کم گیت بھی گائے تھے:

• ہم شہر وفا کے لوگوں کو تقدیر نے اکثرلوٹا ہے..
• یہ دنیا وہ محفل ہے جہاں ، ماتم بھی ہے ، نغمہ بھی ہے..
• یہ کیسا نشہ ہے ، میں کس عجب خمار میں ہوں ، تو آکے جا بھی چکا ہے..

موسیقار دیبو بھٹا چاریہ اور گیت نگاروں فیاض ہاشمی اور منیر نیازی کے یہ تینوں شاہکار گیت فلم کے ہیرو سنتوش پر فلمائے گئے تھے لیکن ان گیتوں کی فلمبندی ، ہدایتکار حسن طارق کی کارکردگی پر ایک سوالیہ نشان تھی کیونکہ فلم کے گیتوں کے بول فلم کے ہیرو کے چہرے کے تاثرات سے ہم آہنگ نہیں تھے۔

سنتوش ، پاکستانی فلموں میں سدھیر کے بعد دوسرے سپر سٹار ہیرو تھے اور پچاس کا عشرہ ان کے عروج کا دور تھا لیکن ساٹھ کے عشرہ میں وہ ایک جیسے کرداروں اور کسی قسم کے تاثرات سے عاری چہروں سے فلم سکرین پر نظر آتے تھے۔ اس فلم میں ہیرو سے زیادہ ان اداکاروں کے چہروں کے تاثرات بہتر نظر آرہے تھے جو ریڈیو سے چپک کر مسعودرانا کی سحر انگیز آواز سے متاثر ہورہے تھے۔

وہ دور ریڈیو کا ہوتا تھا اورلوگ بڑے انہماک سے فلمی گیت سنتے تھے۔ مجھ پر بھی اپنے بچپن کے اس دور کا ایسا اثر قائم ہے کہ فلم میں گیتوں کا وہ مزہ کبھی نہیں آیا جو ریڈیو یا آئیڈیو میں آتا ہے۔ ویسے بھی آج کے دور میں یو ٹیوب پر بہت کم گیت ایسے ہیں کہ جن میں مسعودرانا کی اصل آواز سننے کو ملتی ہے۔

فلم یتیم (1967) میں مسعودرانا کے دلگیر گیت

حسن طارق کی فلم یتیم (1967) ، یتیم اور لاوارث بچوں کے موضوع پر بنائی گئی تھی ایک انتہائی بامقصد اور پر اثر فلم تھی جس میں مسعودرانا کے یہ دو لاجواب گیت تھے جن میں پہلا گیت ایک لوری تھا:

• جہاں پھول بھی ہیں اور کانٹے بھی ،تمہیں اس گلشن میں جینا ہے..
• لو ٹ آؤ ، ہاتھ جوڑ کر کہتا ہوں ، میرے پیارو ، لوٹ آؤ..

موسیقار سلیم اقبال صاحبان اور نغمہ نگار فیاض ہاشمی کے ان دونوں اعلیٰ پائے کے گیتوں کو مسعودرانا نے ڈوب کے گایا تھا اور ان کی پر سوز آواز میں جس دکھ درد کا اظہار ہوتا ہےوہ کبھی کسی اور آواز میں سننے میں نہیں آیا۔

یہ دونوں تھیم سانگ علاؤالدین پر فلمائے گئے تھے جو ساٹھ کے عشرہ کے سب سے مقبول ترین اداکار تھے۔ فلم یتیم میں وہ ایک معذور لیکن خداترس شخص کے روپ میں تھے جو یتیم بچوں کو پناہ دیتا ہے اور انھیں چوری چکاری اور دیگر جرائم سے بچا کر تعلیم و تربیت اور محنت و مزدوری کی طرف راغب کرتا ہے۔

فلم بینی یا تماش بینی

ایسی بامقصد فلمیں عام فلم بینوں کے مزاج کے مطابق نہیں ہوتی تھیں جنھیں فلموں میں زیادہ تر ناچتی گاتی عورتوں اور لڑتے جھگڑتے مردوں کے کردار زیادہ پسند آتے ہیں۔

بدقستمی سے ہمارے فلمسازوں نے ہمیں فلم بینی سے زیادہ تماش بینی کا عادی بنایا ہے حالانکہ ایک فلم ، فنون لطیفہ کے جملہ فنون کا ایک ایسا فن پارہ ہوتا ہے کہ جو تخلیقی اور تیکنیکی فنکاروں کی صلاحیتوں کا نچوڑ اور ایک ٹیم ورک کا نتیجہ ہوتا ہے اور جس کا کپتان ، ہدایتکار ہوتا ہے۔

حسن طارق کی شاہکار فلم بہارو پھول برساؤ (1972)

فلم بہارو پھول برساؤ (1972)

حسن طارق کا نام ایک کلاسیک اردو فلم بہارو پھول برساؤ (1972) کے ہدایتکار کے طور پر بھی آتا ہے جو اصل میں ایک بھارتی ہدایتکار ایم صادق کی کاوش تھی لیکن عین فلم کی تکمیل کے دوران ان کا انتقال ہو گیا تھا جس کے بعد باقی کام حسن طارق نے مکمل کیا تھا۔ لکھنو تہذیب پر بنائی گئی اس رومانٹک فلم کے مرکزی کردار رانی اور وحیدمراد تھے۔

اس فلم کا سب سے سپر ہٹ گیت مسعودرانا کے گائے ہوئے ٹاپ ٹین میگا ہٹ گیتوں میں شمار ہوتا ہے جسے شیون رضوی نے لکھا تھا اور اس کی دھن موسیقار ناشاد نے بنائی تھی:

• میرے دل کی ہے آواز کہ بچھڑا یار ملے گا..

یہ گیت اردو فلموں کے سپر سٹار وحیدمراد پر فلمایا گیا تھا جن کی یہ ایک بہت بڑی فلم تھی اور جس نے 1983ء میں ان کے انتقال کے بعد بھی لاہور میں گولڈن جوبلی منائی تھی۔

اس سدا بہار فلمی گیت سے میری بڑی گہری ذاتی یادیں وابستہ ہیں جنھیں وقت آنے پر بڑی تفصیل سے ضابطہ تحریر میں لایا جائے گا ، ان شاءاللہ۔۔!

جو ٹوٹ گئی پائل تو کیا ہوگا؟

حسن طارق کی ایک فلم دلربا (1974) تھی جس میں ایک کلاسیکل دوگانا تھا جو روبینہ بدر اور مسعودرانا کی آوازوں میں تھا اور جو فلم میں رانی اور وحیدمراد پر فلمایا گیا تھا:

• جو ٹوٹ گئی چوڑی تو کیا ہو گا ، کھنک گئی پائل تو کیا ہو گا..

موسیقار ایم اشرف اور نغمہ نگار تسلیم فاضلی کے لکھے ہوئے اس منفرد گیت میں مسعودرانا نے ایک ایسا کلاسیکل ٹچ دیا تھا کہ جو انھی کا خاصا تھا۔ میں نے آج تک کسی اور پاکستانی گلوکار کو ایسا لاجواب گیت گاتے نہیں سنا۔

دلچسپ بات یہ تھی کہ اسی فلم میں احمدرشدی صاحب کا گایا ہوا ایک مزاحیہ گیت بھی تھا

• ہے جو بھی سنگر اعظم ، ہمارے سامنے آئے ۔۔

اس گیت کے مطابق پاکستان کے اردو فلم بینوں میں جو گلوکار زیادہ مقبول تھے ، وہ مہدی حسن ، احمدرشدی ، رونا لیلیٰ اور مالا تھے اور ان میں میڈم نورجہاں اور مسعودرانا کی کوئی اہمیت نہیں تھی جو پاکستان کی سب سے بڑی زبان پنجابی میں بننے والی فلموں کی سٹینڈرڈ آوازیں تھیں۔

اردو فلموں کے موسیقاروں کے لیے ان سے گوانا ایک مجبوری ہوتی تھی کیونکہ جو گیت یہ دونوں گا سکتے تھے ، وہ کسی اور کے بس کی بات نہیں ہوتی تھی ، میڈم تو خیر سے ملکہ ترنم بھی تھیں جبکہ مردانہ فلمی گائیکی میں مسعودرانا جیسا "سنگر اعظم" بھی کوئی نہیں تھا۔۔!