آئرن پروین ، ساٹھ کے عشرہ کی ایک مقبول اور مصروف ترین گلوکارہ تھی جس نے پاکستان کی فلمی تاریخ کے دوسرے عشرہ ، یعنی 1958ء سے 1967ء تک کے دس برسوں میں سب سے زیادہ فلمی گیت گانے کا اعزاز حاصل کیا تھا۔۔!

آئرن پروین نے چار سو سے زائد فلموں کے لئے نغمہ سرائی کی تھی اور اس کے گائے ہوئے فلمی گیتوں کی تعداد آٹھ سو کے لگ بھگ ہے لیکن سپر ہٹ گیتوں کا تناسب انتہائی کم ہے۔ یقیناََ اس دور میں ان گیتوں میں سے کئی ایک مقبول بھی ہوئے ہونگے ورنہ اتنے زیادہ فلمی گیت گانا ممکن نہیں ہو سکتا تھا۔

آئرن پروین کی پہلی فلم ممتاز (1958) تھی لیکن اسے بریک تھرو فلم بنجارن (1962) سے ملا تھا اور 1963ء اور 1964ء میں وہ سب سے زیادہ گیت گانے والی گلوکارہ تھی۔ ساٹھ کے عشرہ میں مجموعی طور پر سب سے زیادہ فلمی گیت گانے والی گلوکارائیں بالترتیب مالا ، آئرن پروین ، نسیم بیگم اور نور جہاں تھیں۔ آئرن پروین نے زیادہ تر دوگانے گائے تھے اور واحد گلوکارہ تھی جو مزاحیہ گیت گانے میں احمد رشدی اور مسعودرانا جیسے دیو قامت گلوکاروں کو قابو میں رکھتی تھی۔ خاص طور احمد رشدی کے ساتھ آئرن پروین کے سو سے زائد گیت تھے جن میں زیادہ تر مزاحیہ گیت تھے جو اس دور کی فلموں کا ایک لازمی حصہ ہوتے تھے ، ایسے گیتوں میں "ہیلو ہیلو مسٹر عبدالغنی۔۔کچی کڑھی میں مکھی پڑی۔۔ اللہ جھٹ پٹ سے ہیرو بنادے مجھے۔۔ کچھ کچھ مجھ سے ملتا جلتا بچوں ایک تھا راجہ۔۔ ویکھو سائیکل تے ٹر چلے۔۔دمڑی دا سک مل کے منڈا موہ لیا گبھرو جوان۔۔" وغیرہ شامل ہیں۔

آئرن پروین نے مسعودرانا کے ساتھ اسی کے قریب گیت گائے تھے اور وہ پہلی گلوکارہ تھی جس کے ساتھ مسعودرانا نے دوگانے گائے تھے۔ آئرن پروین کے دونوں سپر ہٹ گیتوں کا تعلق بھی مسعودرانا ہی کے ساتھ تھا:

• تمہی ہو محبوب میرے ، میں کیوں نہ تمہیں پیار کروں۔۔ (فلم آئینہ ، 1966)

یہ گیت مسعودرانا نے بھی گایا تھا جو زیادہ مقبول ہوا تھا۔ فلم آئینہ (1966) کے ٹائٹل پر مسعودرانا کا نام آئرن پروین ،احمد رشدی اور مہدی حسن سے پہلے لکھا گیاتھا حالانکہ وہ ان تینوں سے جونئیر تھے لیکن اس وقت مقبولیت میں سب سے آگے تھے۔ اس گیت سے زیادہ شہرت شاید ہی کبھی کسی اور گیت کو ملی ہو۔ مجھے یاد ہے کہ یہ گیت میری ہوش سے قبل کا تھا لیکن میرے بچپن میں بھی یہ گیت ریڈیو کے علاوہ مختلف ہوٹلوں کے گراموفون ریکارڈز پر بھی دن بھر بجتا رہتا تھا اور بچے بچے کی زبان پر تھا۔ فلم اشارہ (1969) میں بھی ایک مکالمہ اسی گیت کے بارے میں تھا جب فلم کے ہیرو وحید مراد اس گیت کو اپنا پسندیدہ گیت بتا رہے ہوتے ہیں۔ میرے لئے یہ گیت اس لئے بھی ناقابل فراموش تھا کہ اسے گنگناتے ہوئے مجھے اپنے بزرگوں سے ڈانٹ پڑی تھی کہ یہ کیا بے ہودگی ہے ، ہمارے ہاں عشق و محبت والے گیتوں کو گانا گنگنانا انتہائی معیوب سمجھا جاتا تھا۔

آئرن پروین کا سب سے سپر ہٹ پنجابی گیت بھی مسعودرانا کے ساتھ تھاجوفلم مرزا جٹ (1967) میں گایا گیا تھا:

• نکے ہندیاں دا پیار ، ویکھی دیوں نہ وسار..

یہ گیت اتنا مقبول ہوا تھا کہ اس فلم کی ٹیم نے جب اپنی اگلی فلم بنائی تھی تو وہ اسی گیت کے پہلے بول پر تھی۔ آئرن پروین کے مسعودرانا کے ساتھ گیتوں میں بڑی ورائٹی تھی۔ ان گیتوں میں سے یہ گیت مقبول عام تھے:

• اک اور بات مانی ، اک اور زخم کھایا ، خود ہم نے اپنے ہاتھوں دل کا دیا جلایا.. (فلم بدنام ، 1966)
• آئی رات باراتاں والی ، خوشیاں دا چن چڑھیا.. (فلم پیداگیر ، 1966)
• حسن والوں کو جلانے کی بری عادت ہے.. (فلم آئینہ ، 1966)
• نور خدا ملے کہ حبیب خدا ملے ، مولا تیرا کرم ہے ہمیں مصطفیٰ ﷺ ملے.. (فلم جانباز ، 1966)
• موتے دیر نہ لاویں ، اج وی نہ آئیوں فیر کہیڑے ویلے آویں گی.. (فلم ات خدا دا ویر ۔ 1970)

ان کے علاوہ متعدد یادگار اور گمنام گیت ایسے بھی تھے جو مقبول نہیں ہوئے تھے لیکن کیا کمال کے رومانٹک گیت تھے اور جنہیں سن کر پچاس کے عشرہ کے رفیع لتا کے رومانٹک گیتوں کا گمان ہوتا تھا:

• تاروں کی چھیاں چھیاں ، من پریسنوں سیاں ، تم نے یہ کیا کیا.. (فلم ساگر ، 1965)
• ٹری ٹری جانی ایں نی غصے غصے ہوکے ، ذرا جنی گل میری سن لے کھلو کے .. (فلم کھیڈن دے دن چار ، 1965)
• نکی جنی گل اتوں مکھ موڑ کے ، میرا دل توڑکے ، دلدار چلیا.. (فلم پنڈ دی کڑی ، 1968)
• تم مجھے اپنی محبت دے دو ، دل میں رہنے کی اجازت دے دو.. (فلم الف لیلیٰ ، 1968)
• محبت کا وعدہ ہمیشہ نبھانا ، نہ آنکھیں چرانا ، نہ دامن چھڑانا.. (فلم شاہی محل ، 1968)
• سن چناں ستویں دیا ، میرے ویر نوں نظر نہ لاویں.. (فلم غیرت مند ، 1969)
• آ جاؤ ، ذرا مل بیٹھیں ہم ، کچھ کہہ لیں گے کچھ سن لیں گے.. (فلم داغ ، 1969)
• چاند بھی سامنے آتے ہوئے شرماتا ہے.. (فلم پیار کی جیت ، 1969)
• میرا حبیب ہے تو ، میرا نصیب ہے تو ، آجا رے آجا.. (فلم دو باغی ، 1971)
• اس بےوفا کا اے دل ہم نہ گلہ کریں گے.. (فلم ارادہ ، غیر ریلیز شدہ)
• پھلے پھلے دنیا میں تو ، دنیا تیری آباد ہو.. (فلم نئی زندگی ، غیر ریلیز شدہ)
• سن کے مرلی کی دھن ، ناچے مورا من.. (فلم نئی زندگی ، غیر ریلیز شدہ)

آئرن پروین کے چند دیگر مقبول گیتوں کی ایک فہرست ملاحظہ فرمائیں:

• قدم بڑھاؤ ساتھیو ، بڑھے چلو۔۔ (فلم سلطنت ، 1960)
• محلاں ہیٹھ کھلوتیا ، توں چور ایں یا کوئی ہور۔۔ (فلم مٹی دیاں مورتاں ، 1960)
• جتھے آپ وسنا ایں ماہیا ، سد لے کول وے۔۔ (فلم ہتھ جوڑی ، 1964)
• چنی کیسری تے تلے دیاں دھاریاں۔۔ (فلم لائی لگ ، 1964)
• نہ ملتا در یہ توبہ کا سہارا تو ہم کہاں جاتے۔۔ (فلم توبہ ، 1964)
• رت ساون کی رے من بھاون کی۔۔ (فلم زمین ، 1965)
• مان بھی جاؤ گڑیا رانی ، نہیں روٹھنا اچھا۔۔ (فلم ہمراہی ، 1966)
• اسیں پچھلی رات دے تارے۔۔ (فلم چغل خور ، 1966)
• دل نہ لگانا جا کے دیس پرائے۔۔ (فلم انسانیت ، 1967)
• سجناں نہ جا ، اجے لتھا نئیوں چاہ میرے پیار دا۔۔ (فلم اکبرا ، 1967)
• پنڈ دی کڑی راہواں بھل گئی اے۔۔ (فلم پنڈ دی کڑی ، 1968)
• چوڑا میری بانہہ دا چھنک دا اے چھن چھن۔۔ (فلم میدان ، 1968)

آئرن پروین کے بارے میں بتایا جاتا ہے کہ وہ انگلستان میں رہ رہی ہے اوراس کاتعلق مسیحی برادری سے تھا۔

عام طور پر فلمی اشتہارات میں گیتوں یا گلوکاروں کا ذکر نہیں ہوتا تھا لیکن 4 دسمبر 1966ء کے ایک فلمی اشتہار کے مطابق فلم آئینہ کی پہچان ہی مسعودرانا اور آئرن پروین کا گایا ہوا سپر ہٹ گیت "تمہی ہومحبوب میرے۔۔" تھا جو خیبر سے کراچی تک زبان زدعام تھا۔ یہ ایک دلچسپ اتفاق ہے کہ آئرن پروین کے دونوں مقبول ترین گیتوں کے بولوں پر فلمیں بنائی گئی تھیں۔دونوں گیتوں میں اس کے ساتھ مسعودرانا تھے اور دونوں فلمیں 1969ء میں ریلیز ہوئی تھیں: نکے ہندیاں دا پیار اور تمہی ہو محبوب میرے۔۔!

Masood Rana & Irene Parveen:

31 joint Online films

Masood Rana & Irene Parveen:

Total 158 joint films