سنتوش کمار ، ایک انتہائی باوقار اور پرکشش شخصیت کے حامل اداکار تھے۔۔!

پاکستان کے ابتدائی دور میں وہ ، سدھیر کے بعد دوسرے مقبول اور کامیاب ترین فلمی ہیرو تھے جنھوں نے اس دور کی متعدد یادگار فلموں میں کردارنگاری کی تھی۔ ان کی پہلی فلم بیلی (1950) تھی جبکہ آخری فلم آنگن (1982) تھی۔

بطور ہیرو یادگار فلموں میں دو آنسو (1950) ، قاتل ، پتن (1955) ، انتظار ، سرفروش (1956) ، عشق لیلیٰ ، وعدہ ، سات لاکھ ، بیداری (1957) ، مکھڑا (1958) ، موسیقار ، گھونگھٹ (1962) ، دامن (1963) ، نائلہ ، کنیز (1965) ، ہمراہی ، سوال ، لوری (1966) وغیرہ قابل ذکر ہیں۔ سو کے قریب فلموں میں نظر آنے والے رومانٹک فلموں کے اس عظیم ہیرو پر پاکستان فلم میگزین کے سابقہ ورژن میں ایک تفصیلی مضمون لکھا جا چکا ہے جسے یہاں دھرانے کی ضرورت نہیں ہے۔

سنتوش پر فلمایا گیا پہلا گیت

پاکستان فلم میگزین کے سابقہ ورژن پر سنتوش کمار پر ایک تفصیلی مضمون

سنتوش کمار پر پہلا فلمی گیت ان کی دوسری فلم دو آنسو (1950) میں فلمایا گیا تھا:

• اس دل کو اپنا گھر سمجھو ، اپنے گھر میں آ جاؤ جی۔۔

دلچسپ بات یہ ہے کہ یہ گیت کسی پروفیشنل گلوکار کا گایا ہوا نہیں تھا بلکہ علاؤالدین کی آواز میں تھا جو ساٹھ کے عشرہ میں عوامی اداکار کے طور پر مشہور تھے۔ فلم گلنار (1953) میں سنتوش پر موسیقار خلیل احمد کی آواز بھی فلمائی گئی تھی۔

سنتوش اور عنایت حسین بھٹی

پاکستان کے ابتدائی دور کے سب سے مقبول فلمی گلوکار عنایت حسین بھٹی تھے جن کے بہت سے گیت سنتوش پر فلمائے گئے تھے۔ ان میں سے پہلا سپر ہٹ گیت فلم پتن (1955) میں تھا "ساڈا سجرا پیار ، کوے بار بار، کیتے ہوئے قرار بھل جائیں نہ۔۔" بھی شامل تھا۔ فلم عشق لیلیٰ (1957) میں بھٹی صاحب کا گایا ہوا سب سے سپر ہٹ اردو گیت "محبت کا جنازہ جا رہا ہے۔۔" بھی سنتوش پر فلمایا گیا تھا۔

سنتوش پر کس کے گیت زیادہ فلمائے گئے؟

سنتوش کے ہیروشپ کے عروج کے دور میں ان پر سب سے زیادہ سلیم رضا اور منیر حسین کے گائے ہوئے گیت فلمائے گئے تھے جو اس دور کے سب سے مقبول ترین گلوکار تھے۔ فلم سات لاکھ (1957) میں سلیم رضا کا گیت "یارو مجھے معاف رکھو ، میں نشے میں ہوں۔۔" اور منیر حسین کے گائے ہوئے گیت "قرار لوٹنے والے۔۔" اور فلم مکھڑا (1958) میں "دلا ٹھہر جا ، یار دا نظارا لین دے۔۔" بھی سنتوش پر فلمائے گئے تھے۔ گلوکار شرافت علی کا فلم وعدہ (1957) میں گایا ہوا شاہکار گیت "جب تیرے شہر سے گزرتا ہوں۔۔" بھی سنتوش پر فلمایا گیا تھا۔

سنتوش پر فلمائے ہوئے مسعودرانا کے گیت

سنتوش کمار پر مسعودرانا کا پہلا گیت رشید عطرے کی موسیقی میں فلم آزاد (1964) میں تھا "میں وہ دیوانہ ہوں ، جس پر کوئی ہنستا بھی نہیں۔۔" تھا۔ دلچسپ بات یہ ہے کہ اس کے بعد سنتوش پر زیادہ تر مسعودرانا ہی کے گیت فلمائے گئے تھے۔ جن میں ان دونوں کا سب سے یادگار گیت فلم نائلہ (1965) میں تھا:

• دور ویرانے میں اک شمع ہے روشن کب سے ، کوئی پروانہ ادھر آئے تو کچھ بات بنے..

ماسٹر عنایت حسین کی دھن میں حمایت علی شاعر کا لکھا ہوا یہ گیت مسعودرانا کے ساتھ مالا نے گایا تھا جس کی بطور گلوکارہ یہ سب سے یادگار فلم تھی۔ اس فلم اور اس گیت کا میرے ذہن پر بڑا گہرا اثر ہے جس کا تذکرہ کئی مضامین میں کر چکا ہوں۔ یہ فلم میں نے اپنے لڑکپن کے دور میں کوپن ہیگن کے ساگا سینما میں دیکھی تھی اور اسی عرصہ میں وہ ناول بھی پڑھا تھا جس پر یہ فلم بنائی گئی تھی۔ یہی گیت تھا جسے سن کر مجھے بڑی حیرت ہوئی تھی کہ اس میں مردانہ آواز مسعودرانا کی تھی۔ وہ عام طور پر لاؤڈ گائیکی کے لیے مشہور تھے لیکن دھیمی سروں کی اس گائیکی نے ان کی آل راؤنڈ کارکردگی پر مہر ثبت کر دی تھی۔

سنتوش کا تاثرات کے بغیر چہرہ

ہدایتکار حسن طارق کی فلم تقدیر (1966) میں مسعودرانا کے چار گیت سنتوش کے لیے گائے گئے تھے جن میں "ہم شہر وفا کے لوگوں کو تقدیر نے اکثر لوٹا ہے۔۔" سب سے یادگار گیت تھا جو ریڈیو پر جب بجتا تھا تو لوگ اسی طرح بڑے انہماک سے سنتے تھے جیسے اس گیت کے ویڈیو میں نظر آتے ہیں۔ لیکن افسوس کہ سنتوش کمار کا چہرہ کسی قسم کے تاثرات سے عاری تھا۔ ان سے زیادہ تاثرات شوخ و چنچل لہری کے چہرے پر تھے جو خلاف معمول بڑے مغموم انداز میں یہ گیت سنتے ہیں۔ یہی حال دوسرے گیت "یہ دنیا وہ محفل ہے جہاں ماتم بھی ہے نغمہ بھی ہے۔۔" بھی دیکھنے کو ملتا ہے۔ نشے کی حالت میں گایا ہوا گیت "یہ کیسا نشہ ہے ، میں کس عجب خمار میں ہوں۔۔" بھی بڑے کمال کا گیت تھا۔

سنتوش اور شوخ گیت

اسی سال کی فلم ماں بہو اور بیٹا (1966) میں بھی مسعودرانا کے دو دلکش رومانٹک گیت "چہرے پہ گرا آنچل ہو گا۔۔" اور "او نازک نرم حسینہ ، تیری نیلی نیلی آنکھوں میں دل میرا ڈوبا۔۔" بھی سنتوش پر فلمائے گئے تھے۔ اس فلم کے دو مشہور گیت اور بھی تھے "لوگ دیکھیں نہ تماشہ ، میری رسوائی دا۔۔ (میڈم نورجہاں) اور "اب اور پریشاں ، دل ناشاد نہ کرنا۔۔" (مہدی حسن)۔ ان گیتوں کے موسیقار حسن لطیف اور نغمہ نگار حبیب جالب تھے۔ یہ فلم میڈم نورجہاں کے بڑے بیٹے اکبر حسین رضوی کی بطور ہدایتکار واحد فلم تھی جس میں ان کی سوتیلی ماں یاسمین نے اداکاری کی تھی جبکہ سگی ماں میڈم نورجہاں نے گائیکی کا مظاہرہ کیا تھا۔

سنتوش پر فلمایا ہوا آخری گیت

دستیاب ریکارڈز کے مطابق سنتوش پر فلمایا گیا آخری گیت بھی مسعودرانا کا گایا ہوا تھا "پیار سے اک نظر دیکھ لو تم۔۔" فلم بے رحم (1967) میں مالا کے ساتھ گایا ہوا یہ ایک دوگانا تھا جس کی دھن رحمان ورما نے بنائی تھی جبکہ شاعر مظفر وارثی تھے۔ ساتھی اداکارہ رانی تھی۔