اکمل ، پنجابی فلموں کے ایک انتہائی مقبول و مصروف اداکار تھے جو اپنے انتہائی عروج کے دور میں صرف 38 سال کی عمر میں انتقال کرگئے تھے۔۔!

اکمل ، عظیم اداکار اجمل کے چھوٹے بھائی تھے اور فلموں میں ایک میک اپ آرٹسٹ تھے۔ اداکاری کے شوق میں ابتداء میں ایکسٹرا کرداروں سے فلمی کیرئر کا آغاز کیا اور فلم جبرو (1956) میں پہلی بار ہیرو کے رول میں نظر آئے تھے۔ فلمی ہیرو کے طور پر اپنا آپ منوانے کے لیے انھیں خاصی جدوجہد کرنا پڑی تھی۔ ابتدائی آٹھ برسوں میں ڈیڑھ درجن فلموں میں بطور ہیرو کام کرنے کے باوجود کوئی خاص مقام پیدا نہ کر سکے تھے۔ یہاں تک کہ 1963ء میں سدھیر کے مقابل فلم بغاوت میں مکمل ولن اور فلم چاچا خوامخواہ میں ایک ثانوی اور غیر اہم رول میں نظر آئے تھے۔ لیکن اسی سال ہدایتکار امین ملک کی شاہکار فلم چوڑیاں سے انھیں بریک تھرو مل گیا تھا۔ اس فلم میں ان کی کردار نگاری سابقہ فلموں سے یکسر مختلف اور انتہائی شاندار تھی۔ ہدایتکار اسلم ایرانی کی سپر ہٹ فلم ہتھ جوڑی (1964) کے دیہاتی کردار نے انھیں سپر سٹار بنا دیا تھا اور پھر انھوں نے ایک ایسا عروج دیکھا تھا کہ اپنی زندگی کے آخری تین برسوں میں اپنے فلمی کیرئر کی آدھی سے زائد فلموں میں کام کیا تھا۔ وہ پنجابی فلموں کے پہلے فلمی ہیرو تھے کہ جنہوں نے ایک کیلنڈر ائیر میں دس سے زائد فلموں میں کام کیا تھا اور یہ کارنامہ انھوں نے اپنے مختصر فلمی کیرئر میں تین بار سر انجام دیا تھا جس سے ان کی مقبولیت اور مصروفیت کا اندازہ لگایا جا سکتا ہے۔ ان کی فلمی جوڑی سب سے زیادہ اداکارہ فردوس کے ساتھ پسند کی گئی تھی جس کے ساتھ شادی بھی کی تھی۔

اکمل ، شکل و صورت اور قد بت سے ہالی وڈ کے کسی ہیرو کی طرح لگتے تھے ، خاص طور پر جب وہ مونچھوں کے بغیر نظر آتے تھے ورنہ ان کی پہچان ایک خالص دیہاتی یا پینڈو نوجوان کی سی تھی۔ یہ بھی ایک حقیقت ہے کہ اکمل کی کامیابی صرف پنجابی فلموں تک محدود تھی ، اردو فلموں کے وہ ناکام اداکار تھے۔ ان کی ڈیڑھ درجن اردو فلموں میں سے صرف ایک اردو فلم خاندان (1964) کامیاب تھی جس میں انھوں نے ینگ ٹو اولڈ رول کیا تھا اور دیگر دو قد آور فلمی ہیروز حبیب اور محمد علی کے باپ کے کردار میں نظر آئے تھے۔ بعض لوگ اکمل کو پنجابی فلموں کا پہلا سپر سٹار بھی کہتے ہیں جو سراسر غلط ہے۔ ایسا دعویٰ کرنے والے اصل میں سدھیر سے بغض رکھتے ہیں جو نہ صرف پنجابی بلکہ پاکستانی فلموں کے پہلے سپر سٹار بھی تھے۔ اکمل نے بھی دیگر بڑے فلمی ہیروز کی طرح سدھیر کے مقابل ہمیشہ ثانوی کردار ادا کیے تھے۔ وہ فلموں کی کامیابی اور عوامی مقبولیت کے لحاظ سے سدھیر سے بہتر نہیں تھے۔ اکمل کو جوانی کی موت کی وجہ سے بہت زیادہ شہرت مل گئی تھی ورنہ پاکستان کے سب سے بڑے صوبہ پنجاب میں فلم بینوں میں سدھیر کی مقبولیت کا ریکارڈ صرف سلطان راہی ہی توڑ سکے تھے۔

مسعودرانا نے اکمل کے لیے پہلی بار فلم بھرجائی (1964) میں نغمہ سرائی کی تھی اور ایک دھمال گائی تھی "دم علیؑ دم ، علیؑ دم مست قلندر۔۔" صرف چار برسوں میں اکتیس میں سے بیس فلموں میں مسعودرانا کے اکمل پرتیس سے زائد گیت فلمائے گئے گائے تھے۔ ان گیتوں میں سب سے سپرہٹ گیت "سجناں نے بوہے اگے چک تن لئی۔۔" تھا۔ اور بھی کئی مقبول عام گیت تھے جن کی مکمل فہرست نیچے دی گئی ہے۔ دلچسپ بات یہ ہے کہ مسعودرانا کے گائے ہوئے گیت اکمل کے بیٹے شہباز اکمل پر بھی فلمائے گئے تھے جو ایک منفرد ریکارڈ ہے۔

فلم بھرجائی (1974) میں اکمل کی جوڑی اداکارہ شیریں کے ساتھ تھی جو ایک سال قبل فلم تیس مار خان میں متعارف ہوئی تھی اور دیکھتے ہی دیکھتے صف اول کی اداکارہ بن گئی تھی۔ دلکش خدوخال کی مالک شیریں فلم بینوں کی نیندیں حرام کرنے کا فن خوب جانتی تھی۔ صرف آٹھ برسوں کے مختصر فلمی کیرئر میں اس نے 33 فلموں میں کام کیا تھا جن میں سے 18 فلمیں صرف اکمل کے ساتھ تھیں۔ اکمل کی سب سے بڑی فلم ملنگی (1965) بھی شیریں ہی کے ساتھ تھی۔ شیریں نے صرف دو اردو فلموں میں کام کیا تھا جن میں ایک فلم جانباز (1966) تھی جس میں اس کی جوڑی محمد علی کے ساتھ تھی اور وہ پوری فلم پر چھائی ہوئی تھی لیکن پھر بھی اردو فلموں میں کلک نہ ہو سکی تھی۔ اس کی آخری ریلیز شدہ فلم خزانچی (1971) تھی ، پھر وہ غائب ہو گئی تھی۔ فلم بھرجائی (1964) میں اکمل کے ولن ساون تھے جنہوں نے مظہر شاہ کے بعد سب سے زیادہ فلموں میں ان کے ساتھ کام کیا تھا۔