دیبو بھٹا چاریہ ، ساٹھ کی دھائی کی اردو فلموں کے ایک نامور موسیقار تھے جنھوں نے 1962ء کی فلم بنجارن سے لے کر 1969ء کی فلم پیار کی جیت تک مسلسل تیرہ فلموں میں مسعودرانا کے لیے تین درجن کے قریب گیت کمپوز کیے تھے۔

فلم بنجارن (1962)

فلم بنجارن سے قبل دیبو نے چار فلموں کی موسیقی دی تھی لیکن کامیابی نہیں ملی تھی۔ اس طرح یہ فلم ان کے لیے بھی بریک تھرو ثابت ہوئی تھی۔

اس فلم کا سب سے مقبول گیت تو میڈم نورجہاں کا گایا ہوا تھا

• نجانے کیسا سفر ہے میرا۔۔

اور یہی فلم ساٹھ کے عشرہ کی مقبول گلوکارہ آئرن پروین کی بھی پہلی بڑی فلم ثابت ہوئی۔

اس فلم میں دیبو نے مسعودرانا سے چار گیت گوائے تھے جن میں سے کوئی ایک بھی ہٹ گیت نہیں تھا لیکن مسعودرانا کی گائیکی نے موسیقی کے حلقوں کو چونکا دیا تھا۔ ایسی جاندار اور دلکش آواز اس سے قبل پاکستانی فلموں میں نہیں سنی گئی تھی۔ ان گیتوں میں ایک سولو گیت تھا

• کہیں دل پہ نہ جادو کر جائے ، یہ مہربانی ، ارے توبہ..

جوقابل ذکر نہیں تھا لیکن اس دوگانے

• او جنیا ، تورے حسن کے کارن ،اک دن ہو جائے رےتکرار..

میں ان کی آواز کی کوالٹی متاثر کن تھی۔ اس فلم کے دو کورس گیت بھی تھے جن میں مسعودرانا نے الاپ کے علاوہ مکھڑے بھی گائے تھے، ان میں جو مکھڑا بریک تھرو بنا اور جسے سن کر لوگ انھیں "پاکستانی رفیع" کہنے لگے تھے ، وہ

• لچکے کمریا موری ، میں نازک چھوری۔۔

میں تھا جو کچھ اس طرح سے تھاَ:

• اس نگری میں سو دھوکے ہیں ، دیکھ کے چلیو رانی ، قدم قدم پہ جال بچھے ہیں ، نہ کریو نادانی۔۔

اے دل تجھے اب ان سے ، یہ کیسی شکایت ہے

1963ء میں مسعودرانا اور دیبو کی دوسری مشترکہ فلم اقبال شہزاد کی شرارت تھی جس کے ہدایتکار رفیق رضوی تھے۔

اردو فلموں کے عظیم اداکار محمدعلی کی بطور ہیرو پہلی فلم تھی اور ان کی ہیروئنیں بہار اور لیلیٰ تھیں۔ اس سے قبل وہ فلموں میں منفی کردار کیا کرتے تھے۔ اس فلم میں گائے ہوئے مسعودرانا کے چاروں گیت جو نغمہ نگار مسرورانور کے لکھے ہوئے تھے ، وہ محمدعلی پر فلمائے گئے تھے ، ان میں سے سب سے مقبول گیت جو اصل میں ایک شوخ انداز کی غزل تھی اور جسےمعروف گلوکار مجیب عالم نے ایک ٹی وی پروگرام میں گا کر مسعودرانا کو خراج تحسین بھی پیش کیا تھا ، وہ تھا:

• اے دل ، تجھے اب ان سے ، یہ کیسی شکایت ہے ، وہ سامنے بیٹھےہیں ، کافی یہ عنایت ہے..

اس فلم کے یہ دو رومانٹک گیت بھی بڑے پسند کیے گئے تھےَ:

• برا مان کر کہاں چل دیے ، یہ تو عشق والوں کا فرض ہے ، آداب عرض ہے..
• تیرے شباب کا، اے جان جان، جواب کہاں..

مسعودرانا اور احمدرشدی کا پہلا دوگانا

اسی سال دیبو نے ہدایتکار حسن طارق کی فلم قتل کے بعد میں پہلی بار پاکستانی فلمی تاریخ کے دو چوٹی کے گلوکاروں ، مسعودرانا اور احمدرشدی کو یکجا کیا تھا۔ اس فلم کا یہ گیت بڑا دلکش تھا

• او جان من ، ذرا رک جا ، یہ ادا نہ ہم کو دکھا۔۔

اس گیت کا رومانٹک حصہ مسعودرانا کی دلکش آواز میں تھا جو فلم کے ہیرو کمال پر فلمایا گیا تھا جبکہ کامیڈی حصہ احمدرشدی کی شوخ آواز میں تھا جو مزاحیہ اداکار لہری پر فلمایا گیا تھا۔ اس گیت میں تیسری آواز آئرن پروین کی تھی جو بیک وقت فلم کی ہیروئن نیلو اور کسی مزاحیہ اداکارہ پر فلمائی گئی تھی۔اس فلم کاسب سے مقبول گیت میڈم نورجہاں کی آواز میں تھا

• مجھے چاند سے ڈر سا لگتا ہے۔۔

1963ء ہی میں ریلیز ہونے والی ہدایتکار حسن طارق کی فلم شکوہ کے موسیقار حسن لطیف تھے لیکن چند گیت دیبو بھٹا چاریہ کے تھے جن میں مسعودرانا کی آواز میں بھی ایک گیت تھا

• مکھڑے کو چھپانے کی ادا لے گئی دل کو۔۔

مسعودرانا کا پہلا اردو تھیم سانگ

1964ء کی فلم بیٹی میں دیبو نے مسعودرانا سے پہلی بار کسی اردو فلم کےلیے تھیم سانگ ریکارڈ کروایا تھا:

• ایسے بھی معصوم ہیں اس دنیا میں جانے کتنے ، جن کا جرم نہیں ہے کوئی ، پھر بھی لوگ سزا دیتے ہیں..

یہ ایک انتہائی پر اثر گیت تھا جو فلم کے مرکزی کردار چائلڈ سٹار گٹو کے لیے گایا گیا تھا اور جس کی موسیقی کے ناقدین نے دل کھول کر تعریف کی تھی۔ اس سے قبل مسعودرانا ، اسی سال کی پنجابی فلم بھرجائی میں اپنا پہلا تھیم سانگ گا چکے تھے۔آواز میں قدرتی سوزوگداز اور غم و الم کے جذبات و احساسات کے فطری اظہار کے علاوہ اونچی سروں میں گانے کی خصوصیت نے انھیں تاحیات ٹائٹل اور تھیم سانگز کا سب سے بہترین گلوکار بنا دیا تھا۔

فلم بیٹی میں دیبو نے اداکارہ نیلو کے لیے گلوکارہ نسیم بیگم سے ایک کلاسیکل گیت بھی گوایا تھا

• چھن چھنا چھن بچھوا بولے ، کنگناں ڈولے..

جس میں مسعودرانا کا الاپ تھا جو اداکار امداد حسین پر فلمایا گیا تھا۔ اس کے علاوہ ایک مزاحیہ کورس گیت بھی تھا جس میں مسعودرانا کے علاوہ احمدرشدی اور روبینہ بدر بھی تھے:

• دنیا ریل گاڑی ، ہے سانپ کی سواری..

میں تو سمجھا تھا جدائی تیری ممکن ہی نہیں

1965ء میں دیبو کی فلم آرزو ریلیز ہوئی تھی۔ یہ بطور ہیرو اداکار حنیف کی واحد کامیاب فلم تھی۔ حنیف کی شکل دلیپ کمار سے ملتی تھی لیکن اداکاری میں بڑے کمزور تھے۔ ہیرو سے شروع ہوئے تھے ، معاون اداکار سے ایکسٹرا اداکار بن کر رہ گئے تھے۔ اس فلم میں دیبو نے مسعودرانا کے لیے تین گیت تھے جن میں یہ گیت سپر ہٹ گیت تھا:

• میں تو سمجھا تھا ، جدائی تیری ممکن ہی نہیں ، موت بھی آئے گی تو زانو پہ تیرے آئے گی..

جب ریڈیو پر یہ گیت بجتا تھا تو میرے لیے وقت ساکت سا ہوجاتا تھا اور بڑی حیرت ہوتی تھی کہ کوئی اتنے اونچے سروں میں بھی گا سکتا ہے۔ مجھے اونچی سروں کی گائیکی میں مسعودرانا سے زیادہ کبھی کسی گلوکار نے متاثر نہیں کیا اور ایسے گیتوں کے دوران میں ان کی آواز کے سحر اور زیروبم میں کھو جایا کرتا تھا۔ اس فلم کا یہ گیت بھی بڑا زبردست تھا

• آرزو کا رنگ بھر کر ، دل کا افسانہ کہو..

ہم شہر وفا کے لوگوں کو تقدیر نے اکثر لوٹا ہے

1966ء میں دیبو کی دو فلمیں ریلیز ہوئی تھیں اور ان دونوں فلموں میں مسعودرانا کے آٹھ گیت تھے۔ ان میں پہلی فلم ہدایتکار حسن طارق کی تقدیر تھی جس میں یہ دو سنجیدہ گیت بڑے اعلیٰ پائے کے تھے:

• ہم شہر وفا کے لوگوں کو تقدیر نے اکثرلوٹا ہے ..
• یہ دنیا وہ محفل ہے جہاں ، ماتم بھی ہے ، نغمہ بھی ہے..

جبکہ نشہ کی کیفیت میں گایا ہوا یہ گیت

• یہ کیسا نشہ ہے ، میں کس عجب خمار میں ہوں۔۔

ایک بے مثل گیت تھا ، مسعودرانا کے گائے ہوئے ڈیڑھ درجن کے قریب نشے کے گیتوں میں سے یہ میرا پسندیدہ ترین گیت ہے جس کی گائیکی اور تاثرات لاجواب تھے۔

بڑے بے مروت ہیں یہ حسن والے

اسی سال ریلیز ہونے والی دیبو کے فلمی کیرئر کی سب سے بڑی نغماتی فلم بدنام تھی جس کے سبھی گیت مقبول ہوئے تھے۔ اس فلم میں ثریا ملتانیکر کی ایک غزل نے دھوم مچا دی تھی

• بڑے بے مروت ہیں یہ حسن والے ، کہیں دل لگانے کی کوشش نہ کرنا۔۔

یہ ایک ریڈیو کی غزل تھی جسے دیبو نے کمال مہارت سے فلمی انگ میں ڈھالا تھا۔ بتایا جاتا ہے کہ محض اس ایک گیت کی رائلٹی سے فلم بدنام کے جملہ اخراجات پورے ہو گئے تھے۔

فلم بدنام میں دیبو نے مسعودرانا جیسے ہر فن مولا گلوکار سے چار مختلف النوع گیت گوائے تھے۔ فلم کا تھیم سانگ شاید واحد گیت تھا کہ جس کی اتنی طویل استھائی تھی:

یہ دنیا
میت رے
راہ گذر ہے
اور
ہم بھی مسافر ، تم بھی مسافر
کون کسی کا ہووے
کاہے چپ چپ رووے
کوئی ساتھ دے کہ نہ ساتھ دے
یہ سفر اکیلے ہی کاٹ لے
کہ ہم بھی مسافر تم بھی مسافر
کون کسی کا ہووے
اس گیت کا جو ریڈیو ورژن تھا ، فلمی ورژن اس سے مختلف تھا اور اس میں فلم کی ڈرامائی صورتحال کے مطابق تبدیلی کی گئی تھی۔ مسعودرانا چونکہ واحد مکمل فلمی گلوکار تھے ، اس لیے ان کے بہت سے ایسے گیت ملتے ہیں جو صرف فلمی صورتحال کے مطابق گائے جاتے تھے۔ اس فلم کا دوسرا گیت ایک انتہائی دلکش دھیمی سروں میں گایا ہوا رومانٹک گیت تھا جو اداکار اعجاز پر فلمایا گیا تھا:

• ابھی تو دل میں ہلکی سی خلش محسوس ہوتی ہے ، بہت ممکن ہے کل اس کا ، محبت نام ہو جائے..

اس فلم میں تیسرا گیت ایک سنجیدہ رومانٹک گیت تھا جو مسعودرانا کے ساتھ آئرن پروین نے گایا تھا اور فلم میں اعجاز اور نیلو پر فلمایا گیا تھا

• اک اور بات مانی ، اک اور زخم کھایا ، خود ہم نے اپنے ہاتھوں دل کا دیا جلایا۔۔

فلم بدنام میں دیبونے ایک مزاحیہ کورس گیت بھی کمپوز کیا تھا

• بہت بے آبرو ہو کر تیرے کوچے سے ہم نکلے..

اس کورس گیت میں نمایاں آوازیں مسعودرانا ، شوکت علی اور امداد حسین کی تھیں لیکن ایک نام سلامت علی کا بھی تھا۔ اب یہ معلوم نہیں کہ یہ صاحب کون تھے۔۔؟

استاد سلامت علی خان تو ہو نہیں سکتے تھے جو کلاسیکی موسیقی کا ایک بہت بڑا نام تھے اور جن سے مسعودرانا بھی بے حد متاثر تھے اور انھیں وقت کا تان سین کہتے تھے۔ ایک غزل گو گلوکار سلامت علی بھی تھے لیکن یہ کنفرم نہیں ہے کہ اس گیت کے سلامت علی کون تھے۔۔؟

اے جان غزل ، لہر کے نہ چل

1967ء میں دیبو نے دو فلموں کی موسیقی ترتیب دی تھی اور ان میں مسعودرانا سے چار گیت گوائے تھے۔ فلم بہادر میں

• اے جان غزل ، لہرا کے نہ چل ، دلبر ، میرا دل تڑپا کے نہ چل۔۔

بڑا دلکش گیت تھا جس میں آئرن پروین بھی تھی اور یہ گیت درپن پر فلمایا گیا تھا اور ساتھ میں مسرت نذیر بھی تھی جس کی یہ آخری فلم تھی۔ اسی سال کی فلم میرے بچے میری آنکھیں کے دونوں گیت بھی بڑے کمال کے تھے

• یاد کرو ہمدم ، وہ پیار بھرا موسم۔۔
• میرا یار ہے ایسا یاروں میں۔۔

اے وطن کی سرزمین

1968ء میں دیبو نے دو فلموں کی موسیقی دی تھی، ان میں ایک فلم ایک ہی راستہ تھی جس میں مسعودرانا کے دو گیت تھے۔ ان میں ایک ملی ترانہ تھاَ جو بڑا متاثر کن تھا

• اے وطن کی سر زمین ، تیرا ہر ذرہ حسین۔۔

جبکہ دوسرا ایک کلاسیکل گیت تھا

• گر گئی مورے ماتھے کی بندیا۔۔

جس میں مسعودرانا نے میڈم نورجہاں کی سنگت کی تھی اور یہ آوازیں رانی اور امداد حسین پر فلمائی گئی تھیں۔

شبنم کی مغربی پاکستان کی پہلی فلم سمندر (1968)

1968ء کی دوسری فلم سمندر تھی جو اردو فلموں کے سپر سٹار وحیدمراد کی بطور ہیرو اور فلمساز کراچی میں بننے والی ایک اوسط درجے کی فلم تھی۔

اس فلم کی خاص بات یہ تھی کہ اس میں مشرقی پاکستان کی مشہور اداکارہ شبنم نے پہلی بار مغربی پاکستان کی کسی فلم میں کام کیا تھا۔

ان دنوں وحیدمراد کی جوڑی احمدرشدی کے ساتھ بڑی مقبول تھی ، اس لیے دیبو سے ڈیمانڈ کی گئی تھی فلم کے تمام گیت رشدی صاحب ہی گائیں گے۔ دیبو نے ڈیمانڈ کے مطابق مال سپلائی کیا تھا لیکن فلم کے کورس گیت

• تیرا میرا ساتھی ہے لہراتا سمندر۔۔

میں اپنے فیورٹ گلوکار مسعودرانا کو شامل کرنے سے باز نہ رہ سکے تھے۔

ویسے بھی احمدرشدی ہلکے پھلکے گیتوں کے گلوکار تھے ، اونچی سروں میں گانا ان کے لیے ممکن نہیں تھا۔ یہ کورس گیت سن کر اندازہ ہوتاتھا کہ جہاں احمدرشدی کی سُرختم ہوتی تھی وہاں سے مسعودرانا کی سُر شروع ہوتی تھی۔

مجھے یہ فلم یاد نہیں لیکن بتایا جاتا ہے کہ اس کا ایک سلوموشن ورژن بھی تھا جس میں مسعودرانا کے ساتھ وحیدمراد کی آواز شامل تھی۔

چاند بھی سامنے آتے ہوئے شرماتا ہے

1969ء میں دیبو کی صرف ایک ہی فلم پیار کی جیت ریلیز ہوئی تھی جو بری طرح سے ناکام رہی تھی۔ اس فلم کے ہیرو عابد قریشی تھے جو اداکارہ افشاں قریشی کے شوہر اور ٹی وی اداکار فیصل قریشی کے والد تھے۔ اس فلم میں انھوں نے اپنی بھابھی روزینہ کے ساتھ ہیرو کا رول کیا تھا اور ان پر مسعودرانا اور آئرن پروین کا یہ دلکش رومانٹک گیت فلمایاگیا تھا

• چاند بھی سامنے آتے ہوئے شرماتا ہے۔۔

1970ء میں دیبو نے فلم ہنی مون میں معاون موسیقار کی حیثیت سے کام کیا تھا ، اس لیے معلوم نہیں کہ کون سا گیت ان کا تھا البتہ اس فلم میں بھی مسعودرانا کے دو گیت تھے۔ اسی سال کی ایک فلم چاند سورج کی پس پردہ موسیقی دیبو نے دی تھی۔ اس سے قبل انھوں نے فلم میں زندہ ہوں (1968) کی بیک گراؤنڈ موسیقی بھی دی تھی۔

دیبو کا پہلا پنجابی گیت

1971ء کی پنجابی فلم بازیگر میں بطور موسیقار دیبو کا نام ملتا ہے۔ اگر یہ درست ہے تو اس فلم میں رونا لیلیٰ کا ایک سپر ہٹ گیت تھا:

• نی سیو ، کونج وچھڑ گئی ڈھاروں تے لبھدی سجناں نوں۔۔

تنہار تھی اور ہمیشہ سے تنہا ہے زندگی

ان کے علاوہ دیبو کے کریڈٹ پر تین فلمیں اور بھی تھیں ، جھک گیا آسمان (1970) ، ٹائیگر گینگ اور دل والے (1974) جبکہ ایک غیرریلیز شدہ فلم جلتے ارمان بجھتے دیپ کا حوالہ بھی ملتا ہے جس میں دیبو نے مہدی حسن سے ایک سپر ہٹ گیت گوایا تھاَ

• تنہا تھی اور ہمیشہ سے تنہا ہے زندگی۔۔

اس فلم میں مسعودراناکاآئرن پروین کے ساتھ یہ دوگانا بھی تھا

• نگاہیں بچا کر کہاں جائیے گا۔۔

موسیقار دیبو کا پس منظر

دیبو ، بنگالی النسل اور ہندو مذہب سے تعلق رکھتے تھے۔ 1956ء کی فلم انوکھی کی موسیقی ترتیب دینے کے لیے موسیقار تمر برن کے ساتھ کراچی آئے تھے اور پھر یہیں کے ہو کر رہ گئے تھے۔ فلم بنجارن سے قبل انھوں نے چار فلموں مسکہ پالش (1957) ، یہ دنیا (1960) ، ہم ایک ہیں اور لاکھوں فسانے (1961) کی موسیقی دی تھی۔ سقوط ڈھاکہ کے بعد واپس بنگلہ دیش چلے گئے تھے۔

36 اردو گیت ... 0 پنجابی گیت

Masood Rana & Deebo:

0 joint Online films

(0 Urdu and 0 Punjabi films)

Masood Rana & Deebo:

Total 15 joint films

(15 Urdu, 0 Punjabi films)

1.	1962: Banjaran (Urdu)

2.	1963: Shikva (Urdu)

3.	1963: Shararat (Urdu)

4.	1963: Qatal Kay Baad (Urdu)

5.	1964: Beti (Urdu)

6.	1965: Aarzoo (Urdu)

7.	1966: Taqdeer (Urdu)

8.	1966: Badnam (Urdu)

9.	1967: Bahadur (Urdu)

10.	1967: Meray Bachay Meri Ankhen (Urdu)

11.	1968: Samundar (Urdu)

12.	1968: Ek Hi Rasta (Urdu)

13.	1969: Pyar Ki Jeet (Urdu)

14.	1970: Honeymoon (Urdu)

15.	Unreleased: Jaltay Arman Bujhtay Deep (Urdu)