"بنگالی" (Bengali)، کبھی پاکستان کی سب سے زیادہ بولی جانے والی زبان ہوتی تھی۔۔!

"ہند یورپین" (Indo-European) زبانوں کے خاندان میں"ہندآریائی" (Indo-Aryan) گروپ سے تعلق رکھنے والی انتہائی مشرق میں آخری زبان "بنگالی" ہے جو دنیا کی دس سب سے زیادہ بولی جانے والی زبانوں میں سے ایک ہے۔

"بنگالی"، بنگلہ دیش اور بھارتی ریاست مغربی بنگالی کی سرکاری زبان ہے۔ بھارت میں 22 سرکاری زبانوں میں سے ایک ہے اور متعد ریاستوں کے علاوہ ہندی کے بعد سب سے زیادہ بولی جانے والی زبان ہے۔ کراچی میں بھی بنگالی بولنے والوں کی ایک بڑی تعداد آباد ہے۔

بنگالی زبان کی تاریخ

بنگالی زبان کی تاریخ ڈیڑھ ہزار سال پرانی ہے اور اس سنسکرت زدہ زبان پر علاقے کی معاشرت اور سیاست پر بڑے گہرے اثرات رہے ہیں۔ چالیس فیصد سے زائد سنسکرت الفاظ ہیں جبکہ عربی، فارسی اور دیگر زبانوں کے الفاظ بھی بڑی تعداد میں ملتے ہیں۔

بنگالی زبان کا میعاری لہجہ کلکتہ میں ملتا ہے لیکن باقی علاقوں میں تھوڑے بہت فرق سے بنگالی زبان بولی جاتی ہے البتہ چٹاگانگ کی بولی الگ ہے۔ مسلم بنگال اور ہندو بنگال کی بولیوں میں بھی مذہبی تفریق کی وجہ سے فرق ہے۔ بنگالی زبان کا آسامی، نیپالی اور اوڑیا زبانوں سے قریبی تعلق ہے۔

بنگلہ دیش کے آئین میں "بنگالی" کو واحد سرکاری زبان قرار دیا گیا ہے جو سرکاری یا نیم سرکاری دفاتراور خود مختار اداروں میں تمام ریکارڈز اور خط و کتابت، عدالتی اور دیگر قانونی کارروائیوں میں استعمال ہوتی ہے۔ بنگلہ دیش کا قومی ترانہ "امارسوناربنگلہ۔۔" نوبل انعام یافتہ شاعر رابندرناتھ ٹیگور (1941-1861ء) کا لکھا ہوا ہے جبکہ قاضی نذر الاسلام (1976-1899ء) کو قومی شاعر کا درجہ حاصل ہے۔

اردو بنگالی تنازعہ

پاکستان کے دو لخت ہونے کی پہلی اور بڑی وجہ بھی بنگالی زبان ہی تھی۔ حکومتِ پاکستان نے اردو کو واحد قومی زبان بنانے کی کوشش کی جس کی بنگالیوں نے بھرپور مزاحمت کی تھی۔ قائدِاعظمؒ نے جب 21 مارچ 1948ء کو ڈھاکہ میں خطاب کرتے ہوئے "صرف اور صرف اردو ہی پاکستان کی قومی زبان ہوگی" کا اعلان کیا تو ان پر ہوٹنگ کرنے والوں میں نوجوان رہنما شیخ مجیب الرحمان بھی تھے جو آگے چل کر بانی بنگلہ دیش بنے۔

یہ تنازعہ اس وقت شدت اختیار کر گیا جب وزیرِاعظم خواجہ ناظم الدین کے دور میں 1952ء میں ڈھاکہ میں بنگالی زبان کو سرکاری زبان بنانے کی تحریک میں متعدد طالب علم ہلاک ہوئے جو بنگالیوں کی تحریکِ آزادی کا آغاز ثابت ہوئے۔ انھی "شہدا" کی یاد میں 2000ء سے دنیا بھر میں 21 فروری کو "مادری زبان کا عالمی دن" منایا جاتا ہے۔

بنگالی حروفِ تہجی

بنگالی زبان کو 11ویں صدی سے پہلے نہیں لکھا جاتا تھا۔ اس کا رسم الخط، قدیم براہمی زبانوں سے ماخوذ ہے جو دیوناگری (ہندی) کی طرز پر ہے۔ 19ویں صدی تک بنگلہ زبان کو فارسی رسم الخط میں بھی لکھا جاتا تھا لیکن قیامِ پاکستان کے بعد ایسی کوشش کی سخت مزاحمت ہوئی تھی۔ 13ویں صدی میں بنگال میں مسلم اثرورسوخ بڑھا اور بنگالی زبان میں عربی اور فارسی کے الفاظ شامل ہوئے لیکن رسم الخط براہمی ہی رہا۔

1734-42ء کے عرصہ میں پہلی بار ایک پرتگیزی عیسائی پادری مشنری نے بنگالی زبان کی لغت اور گرامر تیار کی جس پر بعد میں انگریزوں نے بھی کام کیا۔ 1778ء میں ایک انگریز ہی نے پہلی بنگالی تحریر پرنٹ کی تھی۔

ایغور یا کاشغری (Uyghur) زبان کا تعلق ترکش (Turkic) زبانوں کے خاندان سے ہے جو چینی صوبہ سنکیانگ میں بولی جاتی ہے۔

"اکادمی ادبیات پاکستان" کی کتاب "پاکستانی زبانیں اور بولیاں" کے مطابق یہ ترکش زبان، پاکستان کے شمالی علاقہ جات میں ایک ہزار کے قریب افراد بولتے ہیں۔

"پامیری کرغز" (Pamir Kyrgyz)، پاکستان کی ایک "ترکش" بولی ہے۔

"ترکش" (Turkic) زبانوں کے خاندان میں وسطی ایشیا کی ایک مسلم ریاست، کرغستان کی زبان "کرغز" (Kyrgyz) کی ایک الگ تھلگ بولی "پامیری کرغز" ہے جو پاکستان کے ضلع چترال اور گلگت و بلتستان کی وادی گوجال اور افغانستان کے واخان کوریڈور میں بولی جاتی ہے ۔ اس بولی کو بولنے والے سیاہ کرغیز ( کاره قیرغیز ) کے نام سے جانے جاتے ہیں۔

"وادی گوجال"، گلکت و بلتستان کی سب سے بڑی تحصیل ہے جو سابقہ ریاست بالائی ہنزہ کا علاقہ ہے اور اب ایک سب ڈویژن ہے۔ شاہراہ قراقرم، اس وادی کو شمال مغرب میں چین کے صوبہ سنکیانگ سے درہ خنجراب اور افغانستان سے تین کلومیٹر چوڑی واخان وادی سے ملاتی ہے جس کے پار تاجکستان ہے۔ اسی علاقے میں 2010ء میں عطا آباد گاؤں میں ایک بڑا لینڈ سلائیڈ ہوا جس نے ایک بڑی جھیل بنا دی تھی۔

"وادی گوجال" میں 9ویں صدی میں بدھ مت کے ماننے والوں نے اسلام قبول کیا اور 19ویں صدی کے شروع میں یہ علاقہ اسماعیلی بنا جہاں پرنس آغا خان نے کئی ایک ترقیاتی منصوبے شروع کیے ہوئے ہیں۔ یہاں زیادہ تر "وخی"، "بروشسکی" اور "ڈوماکی" زبانیں بولی جاتی ہیں۔

"وخی" (Wakhi)، ایک ایسی زبان ہے جو پاکستان کے علاوہ چین، افغانستان اور تاجکستان میں بھی بولی جاتی ہے۔

"ہندایرانی" (Indo-Iranian) زبانوں کی جنوبی پامیر کی مشرقی شاخ سے تعلق رکھنے والی یہ زبان، افغانستان کے واخان کوریڈور، پاکستان کے گلگت بلتستان کی وادی ہنزہ، تاجکستان کے علاقے گورنو بدخشاں اور چین میں مغربی صوبے سنکیانگ کے باشندے بولتے ہیں۔

یہ زبان پشتو حروفِ تہجی کے علاوہ لاطینی اور روسی رسم الخط میں بھی لکھی جاتی ہے۔ ریڈیو پاکستان گلگت سے "وخی زبان" میں پروگرام نشر ہوتے ہیں جبکہ اس زبان کی ترویج و ترقی کے لیے کام ہو رہا ہے۔ ساٹھ ہزار سے کم افراد بولتے ہیں اور اس کی معدومی کا خطرہ بھی ہے۔

"ساریکولی" (Sarikoli)، چین اور پاکستان کی مشترکہ زبان ہے جو شمالی سرحدی علاقے وادی پامیر میں بولی جاتی ہے۔

"ہندایرانی" (Indo-Iranian) زبانوں کے مشرقی گروپ سے تعلق رکھنے والی "ساریکولی زبان"، چین میں "تاجک زبان" کہلاتی ہے حالانکہ اصل تاجک زبان سے مختلف ہے۔ یہ زبان، تاجکستان اور افغانستان کے بدخشاں علاقوں میں بولی جانے والی دوسری پامیر زبانوں سے قریبی تعلق رکھتی ہے لیکن اکثریت ایغور زبان کو ذریعہ تعلیم کے طور پر استعمال کرتی ہے۔

"یدغا زبان" (Yidgha)، "ہندایرانی" (Indo-Iranian) زبانوں کے پامیر گروپ سے تعلق رکھتی ہے جو صوبہ خیبرپختونخواہ کے شمالی ضلع چترال کی بالائی وادی میں افغانستان کی سرحد کے قریب تحصیل لوٹ کوہ کے گرم چشمہ کے تین دیہاتوں میں چھ ہزار کے قریب لوگ بولتے ہیں۔

"یدغا زبان"، افغانستان میں بولی جانے والی "مونجی زبان" سے کافی ملتی ہے جس کے بولنے والے 1980 کی دھائی میں روسیوں کے خلاف "افغان جہاد" میں چترال میں ہجرت کر آئے تھے اور یہ علاقہ اسلحہ کی ترسیل کا بڑا مرکز ہوتا تھا۔

"یدغا زبان" بولنے والے زیادہ تر لوگ چترال کی بڑی زبان "کھوار" کو اپنا رہے ہیں جبکہ پشتو اور اردو بھی پھیل رہی ہیں۔ اسی لیے اس زبان کو بھی معدومی کے شدید خطرے کا سامنا ہے۔

"گجراتی" (Gujarati)، کراچی کی ایک اقلیتی میمن برادری کے علاوہ قائدِاعظمؒ اور مہاتما گاندھی کی مادری زبان بھی تھی۔۔!

"ہند یورپین" (Indo-European) زبانوں کے خاندان میں"ہندآریائی" (Indo-Aryan) گروپ  سے تعلق رکھنے والی "گجراتی زبان"، وادی سندھ کی قدیم تہذیب کا ایک حصہ ہونے کی وجہ سے ہندی/اردو، پنجابی اور سندھی کے بہت قریب ہے۔ صوبہ سندھی میں میمن، بوہرا، خواجہ، کھتری، پارسی اور سورتی نسلوں کے علاوہ "کولی بھیل" اور "میگھواڑ" بھی لوگ بولتے ہیں۔

گجراتی زبان، بھارت کی چھٹی بڑی زبان ہے جو 22 شیڈول زبانوں میں سے ایک ہے۔یہ بھارت کے شمال مغربی صوبہ گجرات کی زبان ہے جو گجراتی رسم الخط میں لکھی جاتی ہے جو ہندی رسم الخط سے ملتا ہے اور "براہمی" طرزِ تحریر سے ماخوذ ہے۔

"میمونی" (Memoni) زبان کو کراچی کی میمن برادری بولتی ہے۔

"ہندآریائی" (Indo-Aryan) زبانوں کے خاندان سے تعلق رکھنے والی "میمونی" زبان، بھارتی صوبہ گجرات کے علاقہ کاٹھیاواڑ میں آباد مسلمان میمن برداری بولتی تھی جو تقسیمِ ہند کے بعد سندھ یا کراچی میں آباد ہوئی۔ "میمونی زبان"، سندھی ، کچھی اور گجراتی زبانوں کا مرکب ہے اور عربی، گجراتی اور رومن میں لکھی جاتی ہے۔

"جنڈاوڑہ" یا "جندوریا" (Jandavra)، سندھ میں بولی جانے والی ایک چھوٹی سی زبان ہے۔

"ہندآریائی" (Indo-Aryan)  زبانوں کے خاندان سے تعلق رکھنے والی اس زبان کا تعلق بھی گجراتی گروپ سے ہے۔ صوبہ سندھ میں میرپورخاص، نواب شاہ، حیدرآباد اور بدین وغیرہ کے علاقوں میں بولی جاتی ہے۔ معدومی کے خطرے سے دوچار ہے۔

"کچھی کولی" (Kachi Koli)، گجراتی زبان کی ایک شاخ ہے جو صوبہ سندھ میں "کچھی کولی قبیلے" کے لوگ بولتے ہیں۔

"ہند آریائی" (Indo-Aryan)  زبانوں کے مغربی گجراتی گروپ کی یہ زبان "پرکاری کولی" اور "واڈیارا کولی" سے بہت ملتی ہے۔ دیگر متبادل ناموں میں "بجھانیہ، کوری، واگھری اور واگریہ" سے پہچانی جاتی ہے۔ تھرپارکر، عمرکوٹ، میرپور خاص اور سانگھڑ کے اضلاع میں بولی جاتی ہے۔

"پرکاری کولی" (Parkari Koli)، صوبہ سندھ کے صحرائے تھر کے ضلع تھرپارکر، نگرپارکر اور بدین کے علاقوں میں بولی جاتی ہے۔

"ہند آریائی" (Indo-Aryan)  زبانوں کے گجراتی گروپ سے تعلق رکھنے والی یہ زبان "مارواڑی" اور "وڈیارا کولی" کے ساتھ بہت ملتی ہے۔

پارکری کولی کا حروفِ تہجی

"پرکاری کولی"، کا حروفِ تہجی 57 حروف پر مشتمل ہے جو سندھی زبان سے ماخوذ ہے۔ ان میں سے کچھ مخصوص تلفظ کے حروف پر Caret یا circumflex (ˆ) لگائی جاتی ہے جبکہ سندھی زبان کی طرح چار نقطے بھی استعمال کیے گئے ہیں۔

"ایر زبان" (Aer) بولنے والے افراد کی تعداد صرف ڈیڑھ سو کے لگ بھگ ہے۔۔!

"ہند آریائی" (Indo-Aryan) زبانوں کے گجراتی گروپ سے تعلق رکھنے اور معدومی کے خطرے سے دوچار ایک چھوٹی سی زبان ہے جو پاکستان کے صوبہ سندھ کے دیہی علاقوں، حیدرآباد ، کوٹ غلام محمد، نواب شاہ (شہید بے نظیرآباد) اور کنری کے علاوہ بھارت کے صوبہ گجرات میں بھی بولی جاتی ہے۔

عالمی زبانوں کے بارے میں معتبر ویب سائٹ Ethnologue کے مطابق، "ایر زبان" کی قریب ترین زبان "کچی کولی" اور اس کی دو بولیاں "کٹائی میگھوار" اور "کاچی بھیل" ہیں۔ یہ زبان بولنے والے صوبہ سندھ میں دو لسانی ہیں اور اس کی دو اقسام "جکریو گوٹھ ایر" اور "جیمس آباد ایر" ہیں۔

"ایر زبان" کو عربی طرزِ تحریر میں لکھا جاتا ہے۔

"ودھیاری کولی" (Wadiyara Koli)، گجراتی زبان کی ایک شاخ ہے جو جنوبی سندھ میں بھی بولی جاتی ہے۔

"ہند آریائی" (Indo-Aryan) زبانوں کے گروپ سے تعلق رکھنے والی یہ زبان بھارتی صوبہ گجرات کے ودھیار کے لوگ بولتے ہیں جو ہجرت کر کے سندھ میں آباد ہوئے۔ ان کا تعلق زیادہ تر "کولی" قبیلے سے ہے جس کی وجہ سے ان کی زبان کو بھی "ودھیاری کولی" کہلاتی ہے۔

"وگھڑی" (Vaghri)، گجراتی زبان کی ایک بولی ہے جو سندھ میں بولی جاتی ہے۔

"ہندآریائی" (Indo-Aryan) زبانوں کے خاندان سے تعلق رکھنے والی اس بولی کو "باوری" بھی کہا جاتا ہے۔ پانچ ہزار کے قریب بولنے والے ہیں۔

"اوڈکی زبان" (Oadki)، پاکستان اور بھارت میں "اوڈ قبیلے" کے لوگ بولتے ہیں جن کی تعداد پچاس ہزار سے زائد ہے۔

"ہندآریائی" (Indo-Aryan) زبانوں کے خاندان سے تعلق رکھنے والی یہ زبان، مراٹھی اور گجراتی کے قریب ہے اور بھارتی صوبہ گجرات، راجستھان، ہریانہ، دہلی اور پنجاب میں بولی جاتی ہے۔ "اوڈکی" یا "اوڈ" زبان پر مارواڑی اور پنجابی زبانوں کے اثرات بھی ملتے ہیں۔