اسلام آباد کی تعمیر

اسلام آباد کا سنگ بنیاد 27 اکتوبر 1960ء کو رکھا گیا تھا

27 اکتوبر 1960ء کو پاکستان کے نئے دارالحکومت اسلام آباد کا سنگ بنیاد رکھا گیا تھا۔۔!

یہ "یوم انقلاب" کا دن تھا جب دو سال قبل یعنی 27 اکتوبر 1958ء کو جنرل ایوب خان پاکستان کی تقدیر کے بلا شرکت غیرے مالک بن گئے تھے۔ اس دن کو ایک نیا شہر آباد کر کے ایک یادگار دن بنادیا گیا تھا جو بلاشبہ جنرل ایوب خان کے کارناموں میں سے ایک بڑا کارنامہ تھا لیکن اہل کراچی نے انھیں اس جرم پر کبھی معاف نہیں کیا تھا۔

دارالحکومت بدلنے کی ضرورت کیوں محسوس ہوئی؟

قیام پاکستان کے بعد کراچی کو ملک کا دارالحکومت منتخب کیا گیا تھا لیکن آبادی میں بے تحاشا اضافہ اور وسائل کی کمی نے مسائل میں اضافہ کردیا تھا۔ پچاس کی دھائی میں ہندوستانی مہاجروں کی سندھیوں اور بنگالیوں سے چپقلش نے صورتحال انتہائی کشیدہ کردی تھی۔ سیاسی افراتفری اور غنڈہ گردی میں بے پناہ اضافہ ہوگیا تھا۔ ہندوستان سے درآمدشدہ اردو بیوروکریسی اور پنجابی/پختون ملٹری کریسی میں اختیارات کی جنگ بھی تھی جس میں جیت اسی کی ہونا تھی جو زیادہ طاقت ور تھا۔ اور پھر طاقت کا مرکز بھی تو جی ایچ کیو راولپنڈی میں تھا جہاں سے دارالحکومت کی نگرانی بہتر طریقے سے ہوسکتی تھی۔

اسلام آباد کمیشن کا قیام

اس سے قبل 21 جنوری 1959ء کو ایوب حکومت نے ایک کمیشن قائم کیا جس کے سربراہ چیف آف سٹاف میجر جنرل یحییٰ خان تھے۔ اس کمیشن کو پاکستان کے نئے دارالحکومت کے لئے موزوں ترین مقام کی تلاش کی ذمہ داری تفویض کی گئی تھی۔ 12 جون 1959ء کو اس کمیشن کی رپورٹ کے مطابق موجودہ اسلام آباد کا مقام تجویز کیا گیا تھا جسے وفاقی کابینہ نے منظور کر لیا تھا۔

• 7 ستمبر 1959ء کو نئے شہر کی تعمیر کا ماسٹر پلان منظور ہوا اور اس کمیشن کا سربراہ بھی جنرل یحییٰ خان کو بنایا گیا تھا۔ اس دوران دارالحکومت کراچی سے راولپنڈی منتقل کر دیا گیا تھا جو پاکستان کا "عارضی دارالحکومت" بنا۔
• 24 فروری 1960ء کو وفاقی کابینہ نے نئے دارالحکومت کا نام "اسلام آباد" رکھنے کا فیصلہ کیا جس کا اعلان وزیر اطلاعات و نشریات ذوالفقار علی بھٹوؒ نے کیا تھا۔
• 28 مئی 1960ء کو شکر پڑیاں کی پہاڑی پر وفاقی کابینہ کا اجلاس ہوا جس کی صدارت ، صدر جنرل ایوب خان نے کی تھی اور شہر کے ماسٹر پلان کی منظوری دی گئی تھی۔ یہ پلان یونانی کمپنی Constantinos Apostolou Doxiadis نے تیار کیا تھا۔
• 27 اکتوبر 1960ء کو اسلام آباد کی تعمیر کا سنگ بنیاد رکھ دیا گیا تھا اور چھ سو مکانوں پر مشتمل پہلا علاقہ "آب پارہ" 3 جون 1962ء کو مکمل ہوا تھا۔

یاد رہے کہ پاکستان (1959) ، روس (1918) اور برازیل (1950) کے بعد دنیا کا تیسرا ملک تھا جس نے اپنا دارالحکومت تبدیل کیا تھا۔ ان کے علاوہ تنزانیہ (1980) ، آئیوری کوسٹ (1983) ، نائیجریا (1991) ، قزاخستان (1997) اور میانمار یا برما (2005) نے بھی اپنے دارالحکومت تبدیل کیے تھے جبکہ مصر اور انڈونیشیا مستقل قریب میں ارادہ رکھتے ہیں۔