کیا پاکستان کے حصول کے لئے لاکھوں جانیں قربان کی گئی تھیں یا ……؟

2007ء میں پاکستان کی ساٹھویں سالگرہ کے موقع پر پاکستان کی جغرافیائی تاریخ پر یہ مضمون لکھا تھا جسے بڑی تعداد میں پڑھا گیا تھا اور پسند بھی کیا گیا تھا لیکن جیسا کہ ہوتا ہے …… بعض افراد نے بڑی سخت تنقید کی اور اپنی اپنی سوچ اور فہم کے مطابق نکتہ چینی بھی کی۔ کسی کے خیال میں یہ پاک فوج کو بدنام کرنے کی سازش تھی اور کوئی اسے اس لئے ہضم نہیں کر سکا تھا کہ میں نے تعارف میں لکھا تھا کہ …… ایک گولی چلائے بغیر اور ایک قطرہ خون بہائے بغیر نہ صرف ایک نئی قوم کی تشکیل ہوئی تھی بلکہ دنیا کی سب سے بڑی اسلامی مملکت بھی قائم ہو گئی تھی……! ہمارے ہاں عام طور پر یہ کہا جاتا ہے کہ …… پاکستان، لاکھوں جانیں قربان کر کے حاصل کیا گیا تھا …… بدقسمتی سے کچھ لوگوں کو داستان میں مزہ ہی نہیں آتا جب تک اسے خون سے رنگین نہ کر لیں۔ ویسے بھی کچھ لوگوں کو یہ بات ہضم ہی نہیں ہوپاتی کہ …… پاکستان کا قیام ، جمہوری نظام کا ایک بہت بڑا معجزہ تھا جو کشت و خون کے بغیر قائد اعظم ؒ جیسی بے مثل قیادت اور ان کے ٹائپ رائٹر ، ہندوؤں کے متعصب رویے اور انگریز جیسے انصاف پسند حکمرانوں کی وجہ سے معرض وجود میں آیا تھا۔ بد قسمتی سے کچھ لوگ قیام پاکستان کے نتیجے میں ہونے والے بد ترین فرقہ وارانہ فسادات میں ہلاک ہونے والوں کو پاکستان کے حصول میں جان دینے والا سمجھتے ہیں جو انتہائی غلط فہمی اور تاریخی غلطی ہے۔ ذرا سوچیں ……اگر وہ فسادات نہ ہوتے تو کیا پاکستان نہ بنتا……!

میں اس وقت زیادہ تفصیل میں نہیں جا سکتا …… یہی جواب کافی ہے۔ میں نے جو کچھ لکھا ہے وہ انتہائی تحقیق اور ذمہ داری کے ساتھ لکھا ہے اور اس مضمون میں کوئی ایک بھی ایسی بات نہیں ہے جو مبنی بر حقیقت نہ ہو یا جس پر مجھے کوئی پچھتاوہ ہو …… (مظہر اقبال ……11فروری 2011ء)