A brief interview of Prime Minister of Pakistan Mr. Nurul Amin who was in office for only 13 days..
نورالامین ، صرف 13 دن تک پاکستان کے وزیراعظم رہے۔۔!
7 دسمبر 1971ء کو پاک بھارت جنگ کے دوران ایک شدید بحرانی کیفیت میں پاکستان کے صدر اور چیف مارشل لاء ایڈمنسٹریٹر جنرل یحییٰ خان نے ایک "قومی حکومت" قائم کی تھی جس کے وزیراعظم کے طور پر مشرقی پاکستان سے 1970ء کے انتخابات میں واحد سیٹ جیتنے والے نورالامین کو وزیراعظم بنایا گیا تھا۔ یہ عہدہ علامتی تھی کیونکہ اصل اختیارات تو جنرل یحییٰ ہی کے پاس تھے۔
نورالامین کو ایک نام نہاد قومی حکومت کا وزیراعظم بنانے کا یہ ڈرامہ محض اس لیے رچایا گیا تھا کہ اس وقت پاکستان ، نہ صرف میدان جنگ میں پٹ رہا تھا بلکہ دنیا بھر میں سیاسی تنہائی کا شکار تھا۔ سلامتی کونسل میں جنگ بندی کی قراردادوں کو روس مسلسل ویٹو کررہا تھا اور ساکھ بچانے کا کوئی حل نظر نہیں آرہا تھا۔ ایسے میں پورے پاکستان میں کوئی ایک بھی شخص ایسا نہیں تھا جو عالمی طور پر پاکستان کی ترجمانی کر سکے۔ ایسے میں صرف ایک ہی شخص تھا جو ذوالفقار علی بھٹوؒ کی صورت میں موجودہ پاکستان کا منتخب لیڈر تھا جسے نائب وزیراعظم کے علاوہ وزیرخارجہ بنا کر سلامتی کونسل میں بھیجا گیا تھا۔
نورالامین ، 1948ء میں بنگال (مشرقی پاکستان) کے دوسرے وزیراعلیٰ نامزد ہوئے جب پہلے وزیراعلیٰ خواجہ ناظم الدین کو قائداعظمؒ کے انتقال کے بعد پاکستان کا دوسرا گورنرجنرل بنایا گیا تھا۔ ان کی چھ سالہ حکومت کی کارکردگی ایسی تھی کہ جب 1954ء میں مشرقی پاکستان میں پہلے صوبائی انتخابات منعقد ہوئے تو نہ صرف اپنی سیٹ ہارے بلکہ پاکستان کی خالق جماعت مسلم لیگ کا مشرقی پاکستان سے صفایا ہوگیا تھا۔ اس سے قبل 1952ء میں ڈھاکہ میں ہونے والے لسانی فسادات میں ہلاکتوں نے صورتحال انتہائی کشیدہ کردی تھی۔ 1970ء کے انتخابات میں وہ ان دو کامیاب امیدواروں میں سے ایک تھے جن کا تعلق عوامی لیگ سے نہیں تھا۔
نورالامین ، 15 جولائی 1893ء کو ضلع برہمن باریا ، بنگلہ دیش میں پیدا ہوئے تھے۔ ابتدائی تعلیم ، میمن سنگھ میں حاصل کی۔ 1919ء میں انگریزی ادب میں گریجویشن کیا۔ پھر تدریس کے شعبے سے منسلک رہے۔ 1924ء میں کلکتہ یونیورسٹی سے قانون کی ڈگری حاصل کی اور وکالت شروع کردی۔ 1929 میں میمن سنگھ لوکل بورڈ کے ممبر کے طور پر سیاسی کیرئر کا آغاز کیا اور کمشنر کے عہدے تک پہنچے۔ 1945ء میں مسلم لیگ میں شامل ہوئے اور انھیں ، ضلع میمن سنگھ میں مسلم لیگ کا صدر مقرر کیا گیا۔ 1946ء کے صوبائی انتخابات میں بنگال لیجسلیٹو اسمبلی کے سپیکر جنرل کے طور پر منتخب ہوئے۔
نورالامین کو ایک بنگالی ہونے کے باوجود سقوط ڈھاکہ کے بعد پاکستان کو ترجیح دینے کی وجہ سے بڑی عزت و تکریم کے ساتھ یاد رکھا جاتا ہے۔ یہی وجہ تھی کہ جب بھٹو صاحب کو حکومت ملی تو انھوں نے نورالامین کی حب الوطنی کو خراج تحسین پیش کرتے ہوئے انھیں نائب صدر کا عہدہ تفویض کیا تھا جو اب تک پاکستان کی تاریخ میں ایک منفرد داقعہ ہے۔ اس عہدے پر وہ 14 اگست 1973ء تک فائز رہے تھے۔ 2 اکتوبر 1974 کو جب 81 سال کی عمر میں انتقال ہوا تو مزار قائد میں تدفین ہوئی تھی۔
Nurul Amin as Prime Minister (video)
Credit: AP Archive
پاک میگزین ، پاکستانی تاریخ پر اردو میں ایک منفرد ویب سائٹ ہے جس پر اہم تاریخی واقعات کو بتاریخ سالانہ ، ماہانہ ، ہفتہ وارانہ ، روزانہ اور حروفانہ ترتیب سے چند کلکس کے نیچے پیش کیا گیا ہے۔ علاوہ ازیں اہم ترین واقعات اور شخصیات پر تاریخی اور مستند معلومات پر مخصوص صفحات ترتیب دیے گئے ہیں جہاں تصویر و تحریر ، ویڈیو اور دیگر متعلقہ مواد کی صورت میں محفوظ کیا گیا ہے۔ یہ سلسلہ ایک انفرادی کاوش اور فارغ اوقات کا بہترین مشغلہ ہے جو اپنی تکمیل تک جاری و ساری رہے گا ، ان شاء اللہ۔۔!
پاکستانی فلموں ، فنکاروں اور فلمی گیتوں پر ایک منفرد اور معلوماتی سلسلہ
