پاکستان میں پہلا مارشل لاء

پاکستان کے پہلے فوجی حکمران ، جنرل محمد ایوب خان

7 اکتوبر 1958ء کے دن پاکستان میں پہلا مارشل لاء لگایا گیا تھا۔۔!

پاکستان کے صدرمیجر جنرل (ر) سکندر مرزا نے ملک گیر مارشل لاء لگاتے ہوئے 1956ء کے آئین کو معطل کیا۔ وزیراعظم ملک فیروز خان نون اور دو وزرائے اعلیٰ ، وزیراعلیٰ مغربی پاکستان نواب مظفرعلی قزلباش اور وزیراعلیٰ مشرقی پاکستان عطاالرحمان اور ان کی کابیناؤں کو برطرف کیا البتہ دونوں گورنرز ، ذاکر حسین اور سلطان الدین احمد اپنے اپنے عہدوں پر برقرار رہے۔ ایک قومی اسمبلی اور دو صوبائی اسمبلیاں توڑیں۔ سیاسی پارٹیاں توڑیں اور سیاسی سرگرمیوں پر پابندی لگا کر آرمی چیف جنرل محمد ایوب خان کو مارشل لاء ایڈمنسٹریٹر مقرر کر دیا تھا۔

اختیارات ، آرمی چیف کے سپرد کرنے کے باوجود سکندرمرزا ، صدارت سے چمٹے رہے لیکن 27 اکتوبر 1958ء کو انھیں اس زحمت سے بچا کر ملک بدرکردیا گیا تھا۔

مارشل لاء کیوں لگایا گیا؟

• جنوری 1951ء میں آرمی چیف بنتے ہی جنرل محمدایوب خان اقتدار پر قبضہ کرنے کے جتن کررہے تھے۔ 1953ء میں امریکہ کی آشیرباد کے بعد وہ شیر ہوگئے تھے۔ اس دوران پاکستان کی پہلی اسمبلی کا توڑنا ، دوسری اسمبلی سے ون یونٹ بنوانا جس سے نہ صرف بنگالیوں کی اکثریت کو بے اثر کیا گیا بلکہ ملک کو عدم سیاسی استحکام کا شکار کرکے حالات ایسے پیدا کیے گئے کہ واحد حل مارشل لاء ہی نظر آئے۔
• امریکہ کو جو فوجی اڈے دیے گئے تھے ، وہ بھی 1959ء سے اپنا کام شروع کررہے تھے اور جنرل ایوب نہیں چاہتے تھے کہ ایسی خبریں عوام تک پہنچ پائیں۔
• فروری 1959ء میں انتخابات ہونے والے تھے اور سکندرمرزا سمجھتے تھے کہ مروجہ سیاسی نظام میں ان کی صدارت خطرے میں ہے۔ جس دن مارشل لاء لگایا گیا تھا ، اسی دن قائداعظمؒ کے ایک ساتھی خان قیوم خان نے جہلم سے گجرات تک 32 میل لمبا جلوس نکالا تھا جس میں عوام کا ٹھاٹھیں مارتا ہوا سمندر تھا۔ اس جلوس میں خان صاحب نے فوج اور بیوروکریسی کو چیلنج کیا تھا کہ وہ عوامی طاقت کا مقابلہ کرکے دکھائیں۔
• 6 اکتوبر 1958ء کو ریاست قلات کے نواب نے بغاوت کردی تھی جسے طاقت کے بل بوتے پر دبا دیا گیا تھا۔
• حکومتی سطح پر اس انتہائی قدم کا جو جواز پیش کیا گیا تھا اس میں عدم سیاسی استحکام اور افراتفری ، "سیاستدانوں کی کرپشن" ، مشرقی پاکستان کی اسمبلی میں ڈپٹی سپیکر شاہد علی خان کا 25 ستمبر 1958ء کو قتل اور 9 مئی 1958ء کو صوبہ مغربی پاکستان کے وزیراعلیٰ ڈاکٹر خان صاحب کے قتل وغیرہ تھے۔