"ہندکو" (Hindko)، "ہندآریائی" (Indo-Aryan) زبانوں کے "شمال مغربی پنجابی لہندا" گروپ سے تعلق رکھنے والی پنجابی زبان کی ایک بولی ہے جس کو 2017ء کی مردم شماری میں پہلی بار ایک الگ زبان کے طور پر شمار کیا گیا تھا۔

2023ء کی مردم شماری کے مطابق، پاکستان میں "ہندکو" بولنے والوں کی تعداد 56 لاکھ کے قریب ہے جو کل آبادی کا اڑھائی فیصد بنتا ہے۔

ہندکو زبان کہاں بولی جاتی ہے؟

"ہندکو" بولنے والوں کی اکثریت ہزارہ ڈویژن کے تین اضلاع، ایبٹ آباد، ہری پور اور مانسہرہ میں آباد ہے جو صوبہ خیبر پختونخواہ کا حصہ ہیں۔ پشاور اور کوہاٹ میں "ہندکو" کی مخصوص بولیاں بولی جاتی ہیں۔ پشتو کے بعد اس صوبہ کی یہ سب سے بڑی زبان ہے جو صوبے کے دس فیصد عوام کی مادری زبان ہے۔

آزاد کشمیر کی وادی نیلم اور دارالحکومت مظفرآباد کی اکثریتی آبادی بھی "ہندکو" بولتی ہے جہاں اس کو مقامی طور پر پارمی (یا پاریم ) کے نام سے جانا جاتا ہے۔ پنجاب میں بھی ضلع اٹک اور چکوال کے علاقوں میں "ہندکو" کی مختلف بولیاں بولی جاتی ہیں۔

ہندکو زبان کی تاریخ

"ہندکو" کا لفظی معنی "ہندوستان کے پہاڑ" ہیں۔ گویا ان پہاڑوں میں بولی جانے والی زبان کو "ہندکو" نام ملا۔ یہاں مغلوں کے زوال کے بعد ایک خودمختار ریاست "امب" وجود میں آئی جو سکھ راج (1849-1799ء) کے خلاف مزاحمت کے لیے مشہور ہوئی۔ اس ریاست کو 1969ء میں پاکستان میں ضم کر لیا گیا تھا۔

یہاں پشتون نسل کا ایک "تنولی" قبیلہ حکمران تھا جو آج بھی "ہندکو" بولنے والا سب سے بڑا قبیلہ ہے۔ اس زبان کو بولنے والوں کو "ہندکواں"، "ہزاریوال" اور "پنجابی پٹھان" بھی کہتے ہیں۔

ہندکو بولنے والے پنجابی کیوں نہیں کہلاتے؟

"ہندکو زبان" سے میرا پہلا تعارف ایک پشتو فلم دیکھنے سے ہوا تھا اور بڑی سخت حیرت ہوئی تھی کہ "ہندکو" تو مکمل طور پر پنجابی زبان ہے۔۔!

حقیقت تو یہ ہے کہ پنجابی زبان کی سٹینڈرڈ بولی "ماجھی" اور "ہندکو" کے لہجوں میں انیس بیس کا فرق ہے جبکہ ان دونوں کے درمیان بولی جانے والی "پوٹھواری" بولی قدرے مختلف انداز کی ہے۔

اس مضمون کی تیاری کے لیے مزید تحقیق کی اور شکوک و شہبات دور کرنے کے لیے سوشل میڈیا پر متعدد "ہندکو" ویڈیوز دیکھے اور ذہن میں یہ سوال پیدا ہوا کہ "ہندکو" بولنے والے خود کو پنجابی کیوں نہیں کہتے۔۔؟

تاریخ کا ایک طالبِ علم ہونے کے ناطے یہ جواب بڑی آسانی سے مل گیا۔ جیسا کہ اوپر ذکر ہوا ہے کہ پنجاب کے شمال میں واقع موجودہ صوبہ خیبرپختونخواہ کے ضلع ہزارہ میں ایک خودمختار ریاست "امب" ہوتی تھی جو سکھ راج (1849-1799ء) کے وحشیانہ دورکے خلاف بغاوت کی وجہ سے مشہور ہوئی تھی۔

یہیں سے ایک بڑے مسلمان عالم، سیداحمدشہید (1831-1786ء) نے علمِ بغاوت بلند کرتے ہوئے "تحریکِ مجاہدین" تشکیل دی اور جذبہ جہاد سے سرشار ہو کر سکھ فوج کو شکست دے کر پشاور پر قبضہ کرلیا تھا لیکن 1831ء میں بالاکوٹ کے معرکے میں مہاراجہ رنجیت سنگھ (1839-1780ء) کے ہاتھوں شہید ہو گئے تھے۔

سکھوں کی حکومت کو پنجابیوں کی حکومت بھی سمجھا جاتا تھا کیونکہ سکھوں کا مذہب، کلچر اور زبان وغیرہ سبھی پنجاب تک محدود رہے ہیں۔ گو سکھ، پنجاب میں کبھی بھی اکثریت میں نہیں رہے لیکن مسلح اور جنگجو ہونے کی وجہ سے پنجاب اور کشمیر پر قابض ہوئے تھے۔ اپنے نصف صدی کے اس دور کو سکھ، "خالصہ راج" بھی کہتے ہیں اور ان کی تحریک "خالصتان" اسی دور کے احیاء کا دوسرا نام ہے۔

1849ء میں جب "سکھا شاہی" کا پچاس سالہ تاریک دور ختم ہوا تو بالخصوص پنجاب کے مسلمانوں نے انگریزوں کو اپنا نجات دہندہ سمجھا تھا۔

سکھوں کی جنونی پنجابی قوم پرستی، نہ صرف مسلمانوں بلکہ ہندوؤں کو بھی کھٹکتی تھی اور جس طرح تقسیم کے بعد بھارت میں پنجابی ہندوؤں نے سکھوں کی پنجابی شناخت سے بغاوت کی اور "ہندی" کو اپنانے کے علاوہ "ڈوگری" کو الگ زبان بنوایا، اسی طرح پاکستان میں پنجابی مسلمانوں کی بڑی تعداد بھی "پنجابی شناخت" سے بیزار ہوئی اور "اردو" کو پاکستانی مسلم امہ کے اتحاد کی علامت کے طو پر اپنایا تھا۔

"ہندکو" بولنے والے چونکہ سکھوں (یا پنجابیوں) سے براہِ راست حالتِ جنگ میں رہے ہیں، اس لیے ان کا"پنجابی شناخت" یا زبان سے اجتناب کرنا سمجھ میں آتا ہے۔۔!

ہندکو زبان کے اہم سنگِ میل

2003ء میں گندھارا ہندکو بورڈ نے پہلی بار "ہندکو لغت" شائع کی۔ پشاور میں قائم ادارہ فروغِ ہند نے "ہندکو" میں قرآنِ کریم کا پہلا منظوم ترجمہ 2010ء میں شائع کیا۔ اس زبان میں کتابیں اور اخبارات و جرائد شائع ہوتے ہیں۔ ریڈیو اور ٹی وی پروگراموں کے علاوہ ایک فلم قصہ خوانی (1980) بھی بنائی گئی تھی۔ ہندکو حروفِ تہجی میں 57 حروف ہیں۔

ہندکو بولنے والی چند اہم شخصیات

پاکستان کے پہلے مسلمان آرمی چیف اور پہلے فوجی حکمران فیلڈ مارشل محمدایوب خان، ان کے بیٹے گوہرایوب خان (وزیرِخارجہ) اور پوتے عمرایوب خان (پی ٹی آئی)، پہلے مسلمان ائرمارشل اصغرخان، ممتاز شاعر احمدفراز اور ان کے بیٹے شبلی فراز (پی ٹی آئی)، ممتاز فلمی شاعر قتیل شفائی، ممتاز ٹی وی اداکار فردوس جمال اور عظیم بھارتی اداکار دلیپ کمار کا تعلق بھی "ہندکو" بولنے والے افراد میں ہوتا ہے۔

ہندکو زبان کے مختلف لہجے

"ہندکو" زبان کو مختلف لہجوں میں بولا جاتا ہے جن میں "شمالی ہندکو" میں " ایبٹ آباد، گلیات، ہری پور، مانسہرہ اور تنولی" جبکہ "جنوبی ہندکو" میں کوہاٹی، پشوری (جہاں اس زبان کو بولنے والوں کو "پشاوری یا خارے" کے نام سے پکارا جاتا ہے۔)، چھاچھی ( اٹک اور ہری پور)، گھیبی (پنڈی گھیب)، دھنی (چکوال) اور اعوانکاری (تلہ گنگ)" شامل ہیں۔ "ہندکو" کی یہ سبھی بولیاں، پنجابی زبان کی سبھی بولیاں بولنے والے بغیر کسی ترجمان کے سمجھ لیتے ہیں۔