پاک میگزین پر "پاکستانی زبانوں کے ڈیٹابیس" کا بنیادی مقصد، معلوماتِ عامہ کے علاوہ پاکستانی زبانوں کی تاریخ کو محفوظ کرنا ہے۔

اس ویب سائٹ پر تاریخی اور جغرافیائی معلومات کے علاوہ پاکستانی زبانوں کے حروفِ تہجی پر بات کی گئی ہے لیکن علمِ لسانیات (Linguistics) کے دیگر اہم علوم مثلاً Phonetics (صوتیات)، Morphology (الفاظ) اور Syntax (جملہ سازی) وغیرہ پر بات نہیں کی گئی، البتہ لنکس دیے گئے ہیں، جنھیں دلچسپی ہے، مزید تحقیق کر سکتا ہے۔

اس ویب سائٹ کی تیاری میں جہاں وسیع مطالعہ کام آیا وہاں چھ دھائیوں کے ذاتی تجربات اور مشاہدات کے علاوہ سوشل میڈیا پر مختلف زبانوں/بولیوں کے بڑی تعداد میں ویڈیوز بھی دیکھے۔

عالمی زبانوں پر ایک نظر

عالمی زبانوں کی معتبر ویب سائٹ Ethnologue کے 2024ء کے اعدادوشمار کے مطابق، اس وقت دنیا بھر کے 242 ممالک کی آٹھ ارب سے زائد آبادی سات ہزار سے زائد زبانیں بولتی ہے جن میں سے ساڑھے تین ارب کی آبادی صرف 20 زبانیں بولتی ہے۔

دنیا بھر میں صرف 7فیصد یا 486 زبانیں سرکاری امور کی انجام دہی، ذرائع ابلاغ اور تعلیم و تربیت کے طور پر استعمال ہوتی ہیں۔ 44 فیصد یا تین ہزار سے زائد زبانیں معدومی کے خطروں سے دوچار ہیں۔ 449 زبانیں ختم ہو چکی ہیں جبکہ 49فیصد یا ساڑھے تین ہزار زبانیں محفوظ ہیں۔ دنیا بھر میں خواندگی کی اوسط شرح 86فیصد ہے جو پاکستان میں صرف 59فیصد ہے۔

پاکستان کی زبانیں

پاکستان میں 70 کے قریب
زبانیں بولی جاتی ہیں

Ethnologue ویب سائٹ کے مطابق، پاکستان میں کل 68 زبانیں بولی جاتی ہیں جن میں سے اردو، انگلش اور سندھی، سرکاری زبانیں ہیں۔ 9 زبانیں غیرمقامی ہیں جن میں سے ایک انگریزی ہے جبکہ 47 زبانیں محفوظ ہیں اور 18 معدومی کے خطرے سے دوچار ہیں۔

پاک میگزین پر "پاکستانی زبانوں کے ڈیٹابیس" کو تاریخی تناظر میں ترتیب دیا گیا ہے جس میں پاکستان میں بولی جانے والی یا متعلقہ زبانوں/بولیوں اور لہجوں کی تاریخ و جغرافیہ پر معلومات محفوظ کی گئی ہیں۔ ان میں کچھ مخصوص اصطلاحات استعمال کی گئی ہیں جنھیں سمجھنا ضروری ہے:

"زبان" کی تعریف

کسی بھی "زبان" (language) کی تعریف یہ ہے کہ جب دو افراد بغیر کسی ترجمان کے ایک دوسرے کے ساتھ متفقہ طور پر "مخصوص الفاظ" (vocabulary) کو "مخصوص تلفظ" (phonology) کے ساتھ "مخصوص ترتیب" (grammar) یعنی جملوں کی ادائیگی سے بولتے اور سمجھتے ہیں تو وہ ایک ہی زبان بول رہے ہوتے ہیں۔

دنیا کی کوئی بھی زبان راتوں رات نہیں بنی اور نہ ہی جلد ختم ہوتی ہے بلکہ اس کے لیے صدیوں کا سفر درکار ہوتا ہے۔ مذہبی اصطلاح میں تو خدا نے حضرت آدمؑ اور حضرت حواؑ کو زمین پر بھیجتے ہی یکمشت سارا دنیاوی علم دے دیا تھا لیکن سائنسی اصطلاح میں ہر کام کا ایک ارتقائی عمل ہوتا ہے اور یہ ثابت کرنا انتہائی مشکل ہے کہ دنیا میں پہلی بار کن دو افراد کے مابین بات چیت ہوئی، کون سی زبان استعمال کی گئی اور کون سے پہلے الفاظ ادا کیے گئے تھے۔

"بولی" کی تعریف

ایک "بولی" (dialect)، کسی زبان کا ذیلی گروپ ہوتی ہے جو الفاظ، تلفظ اور انداز کے تھوڑے بہت فرق کے ساتھ مخصوص علاقوں میں بولی جاتی ہے، مثلاً "سرائیکی"، "ہندکو" اور "ڈوگری" کو سیاسی بنیادوں پر خودمختار زبانیں قرار دیا گیا ہے جو مکمل طور پر پنجابی زبان کی علاقائی "بولیاں" ہیں اور بغیر کسی ترجمان کے باہمی طور پر قابلِ فہم ہیں۔ سوشل میڈیا پر ان زبانوں کے ویڈیوز دیکھے جا سکتے ہیں۔

اصل میں دنیا کی ہر زبان مختلف "بولیوں" میں تقسیم ہے۔ عام طور پر ہر پندرہ بیس کلومیٹر پر ہر زبان میں تبدیلیاں شروع ہوجاتی ہیں۔ جتنی بڑی زبان ہوگی، اتنی ہی اس کی بولیوں کی تعداد بھی زیادہ ہوگی۔

"لہجے" کی تعریف

پاک میگزین کے "پاکستانی زبانوں کے ڈیٹابیس" میں "زبان" (language) اور "بولی" (dialect) کے بعد "لہجہ" (accent) کی اصطلاح بھی استعمال کی گئی ہے جو کسی بھی زبان یا بولی کے الفاظ کو آواز اور انداز کے مخصوص اتارچڑھاؤ سے بولنے کو کہتے ہیں۔ پنجابی زبان کی ماجھی بولی کے مشہور "سیالکوٹی" اور "لھوری" لہجے اس کی بڑی مثالیں ہیں۔

زبانوں کے خاندان کیا ہیں؟

دنیا بھر کی سات ہزار سے زائد زبانوں کو ماہرینِ لسانیات نے مختلف خاندانوں میں تقسیم کیا ہے جس کا مطلب یہ ہے کہ ان زبانوں کا آپس میں کبھی نہ کبھی اور کوئی نہ کوئی رشتہ ضرور رہا ہے جس کی وجہ سے ان میں کئی ایک باتیں یا الفاظ اور جملے وغیرہ مشترک ہیں۔

کوئی بھی زبان قدرتی ارتقائی عمل سے نہیں بچ پائی، وقت کے ساتھ ان میں تبدیلیاں رونما ہوتی رہتی ہیں۔ کئی ایک زبانیں معدوم ہوجاتی ہیں اور ان کی جگہ نئی زبانیں جنم لے لیتی ہیں۔ ہر زبان میں نئے الفاظ اور محاورے آتے ہیں، کئی ایک الفاظ متروک ہوجاتے ہیں۔ مختلف افراد، قبائل اور اقوام کا زمین پر پھیلنا، ذریعہ معاش کے لیے ہجرت اور نقل مکانی کرنا، فاتحین کا دنیا کو فتح کرنا اور مختلف اقوام کا آپس میں سماجی اور کاروباری ملاپ، کئی ایک نئی زبانوں کی تشکیل کا باعث بنتا ہے اور یہ سلسلہ ازل سے جاری ہے اور ابد تک رہے گا۔

دنیا بھر کی سبھی زبانوں کو 135 مختلف خاندانوں میں تقسیم کیا گیا ہے جن میں پانچ "خاندان"، پاکستان میں موجود ہیں جن کی تفصیل درجِ ذیل ہے:

ہندیورپی خاندان

ہندیورپین (Indo-European)، ساڑھے تین ارب آبادی کی 454 زبانوں کا دنیا کا سب سے بڑا لسانی خاندان ہے جس کی آٹھ بڑی شاخیں ہیں جو برصغیر پاک و ہند کے علاوہ ایران، افغانستان، یورپ، روس، شمالی اور جنوبی امریکہ، آسٹریلیا اور نیوزی لینڈ تک پھیلی ہوئی ہیں۔ پاکستان کی قریباً سبھی زبانیں اسی خاندان کے ذیلی گروپ Indo-Iranian سے تعلق رکھتی ہیں۔

• "ہندایرانی خاندان" کی مزید کئی شاخیں ہیں جن میں "ایرانی گروپ" میں پاکستان کی پشتو اور بلوچی آتی ہیں جبکہ "ہندآریائی" یا "ہندوستانی گروپ" میں اردو، پنجابی اور سندھی وغیرہ آتی ہیں۔
• "ہندآریائی گروپ" کو مزید شاخوں میں تقسیم کیا گیا ہے جن میں "مشرقی زبانوں" میں مثلاً بنگالی آتی ہے جبکہ "مغربی زبانوں" میں گجراتی اور راجستھانی ہیں۔ "وسطی زبانوں" میں اردو/ہندی جبکہ "شمال مغربی زبانوں" میں پنجابی اور سندھی ہیں۔ جنوب میں "مراٹھی زبانیں" ہیں۔
• ان زبانوں کی مزید تقسیم ہوتی ہے اور Punjabic زبانوں میں پنجابی، سرائیکی اور ہندکو وغیرہ آتی ہیں جبکہ Western Pahari کی اصطلاح ہندوکش سے آزاد کشمیر، مقبوضہ کشمیر اور ہماچل پردیش کے پہاڑی علاقوں میں بولی جانے والی زبانوں/بولیوں کو کہتے ہیں جو حقیقت میں پنجابی زبان کی بولیاں ہیں جن میں ڈوگری کو ایک الگ زبان کا درجہ دیا گیا ہے۔
• کشمیری اور پاکستان کے دوردراز اور دشوارگزار شمالی علاقہ جات کی بے شمار چھوٹی چھوٹی زبانوں کو "داردک زبانیں" کہا جاتا ہے۔

افروایشیائی خاندان

افروایشیائی (Afro-Asiatic) میں 382 زبانوں کو تقسیم کیا گیا ہے۔یہ زبانیں مشرقِ وسطیٰ اور شمالی افریقہ میں بولی جاتی ہیں جنھیں سات مختلف شاخوں میں تقسیم کیا گیا ہے۔ انھی میں ایک گروپ "سامی" (Semitic) زبانوں کا ہے جس میں "عربی زبان" بھی آتی ہے جو دنیا بھر کے مسلمانوں کی روحانی زبان ہے۔ پاکستان میں بھی ہر مسلمان یہ زبان پڑھ سکتا ہے۔

دراوڑی خاندان

دراوڑی (Dravidian)، 85 زبانوں کا خاندان ہے جس کے Northern گروپ کی "براہوئی زبان" ، پاکستان کے صوبہ بلوچستان میں بولی جاتی ہے۔ اس خاندان کے باقی چاروں گروپس کی زبانیں خصوصاً جنوبی بھارت میں بولی جاتی ہیں اور ان کے بولنے والوں کو ہندوستان کے قدیم باشندے کہا جاتا ہے جنھیں ساڑھے تین ہزار سال قبل حملہ آور آریاؤں نے نقل مکانی پر مجبور کیا تھا۔

چینی تبت خاندان

چینی تبت (Sino-Tibetan) کے خاندان میں 458 زبانوں کا حوالہ ملتا ہے جس کو صرف دو گروپوں میں تقسیم کیا گیا ہے۔ اس خاندان کے Tibeto-Burman گروپ میں پاکستان کے شمالی علاقوں میں بولی جانے والی زبان "بلتی" (Balti) کا ذکر بھی ملتا ہے۔ یہ گروپ برما یا مینمار سے افغانستان تک کے کوہِ ہمالیہ کے طویل پہاڑی سلسلے میں 441 چھوٹی چھوٹی زبانوں پر مشتمل ہے۔ دنیا کی مادری زبان کے طور پر سب سے زیادہ بولی جانے چینی زبان Mandarin بھی اسی خاندان میں شامل ہے۔

ترکش خاندان

ترکش (Turkic)،41 زبانوں کا خاندان ہے جس کے Eastern گروپ کی ایک زبان "ایغور/کاشغری" (Uyghur) اور ایک بولی "پامیری کرغز" (Pamir Kyrgyz)، پاکستان کے شمالی علاقہ جات میں بولی جاتی ہے۔ اس خاندان کے دیگر چار گروپس کی زبانیں، ترکیہ کے علاوہ وسطی ایشیاء کے ممالک، قزاقستان، ازبکستان، ترکمانستان، کرغستان اور آذربائیجان میں بھی بولی جاتی ہیں۔

تنہا زبانیں

تنہا (isolate) کے ضمن میں 104 زبانوں کا ذکر ملتا ہے جن کا کسی لسانی خاندان سے کوئی تعلق ثابت نہیں کیا جاسکا۔ ان میں پاکستان کی "بروشسکی" (Burushaski) زبان بھی ہے جو پاکستان کے شمالی علاقہ جات میں بولی جاتی ہے۔

پاکستانی زبانوں کا ڈیٹابیس، کیوں؟

پاک میگزین، ایک انفرادی کاوش ہے جو 1999ء سے مسلسل آن لائن ہے۔ یہ ویب سائٹ میری ذاتی دلچسپی کے مواد پر مبنی ہے جس کو میں اپنی ذہنی تسکین کے لیے اپنے فارغ اوقات میں بناتا ہوں۔

پاکستانی زبانوں کا یہ منفرد ڈیٹابیس بھی میرے دیرینہ شوق کی تکمیل ہے، الحمد للہ۔۔!

علمِ لسانایات سے ہمیشہ سے بڑی گہری دلچسپی رہی ہے۔ اس کا آغاز بچپن ہی سے ہوگیا تھا جب پہلی جماعت، ایک سرائیکی علاقے (کندیاں، ضلع میانوالی) میں پڑھی تھی۔ جب پانچ چھ ماہ بعد اپنے آبائی شہر، کھاریاں واپس آیا تو میرا لہجہ مکمل طور پر سرائیکی ہو چکا تھا اور بڑے فخر کے ساتھ دوسروں کو سنایا کرتا تھا کہ پنجابی زبان کو کس طرح دو مختلف انداز (ماجھی اور سرائیکی) میں بولا جا سکتا ہے۔

میرا یہ شوق مزید پروان چڑھا جب سرگودھا سے "شاہ پوری"، سوہاوہ سے "پوٹھواری" اور مانسہرہ سے "ہندکو" بولنے والے مہمان آتے اور میں انھیں بڑی دلچسپی اور حیرت سے سنا کرتا تھا کہ پنجابی زبان کے تو کئی رنگ ہیں۔

بچپن میں ریڈیو بہت سنا ہے جس نے میری آتش شوق کو مزید بھڑکایا۔ اردو اور انگریزی سے میرا پہلا رابطہ بھی ریڈیو ہی کے ذریعے ہوا تھا۔ ریڈیو پاکستان لاہور اور آل انڈیا ریڈیو سے نشر ہونے والے سبھی پنجابی پروگرام، "جمہور دی آواز" (یا نظام دین دا پروگرام)، لوک اور فلمی گیت خالص "ماجھی" لہجے میں ہوتے تھے جو میرا بھی مادری لہجہ ہے لیکن ایک رضیہ نامی خاتون کی انتہائی دلکش آواز میں "پوٹھواری" سننے کے لیے ریڈیو پاکستان راولپنڈی کے علاوہ ملتان اور بہاولپور کے ریڈیو سٹیشنوں سے "ملتانی" اور "ریاستی" بولیوں کے پروگرام بھی سنا کرتا تھا۔

اسی دور میں ریڈیو جموں سے "ڈوگری" اور "گوجری" پروگرام سن کر بڑا مزہ آتا تھا۔ مشہور دانشور اشفاق احمد کا پروگرام "تلقین شاہ" بھی بڑے ذوق و شوق سے سنتے تھے جس میں وہ اردو/پنجابی مکس زبان بولتے تھے جو بھارتی پنجاب کے جنوب کی متعدد زبانوں میں سے ایک تھی۔

گیارہ سال کی عمر میں پہلی بار ڈنمارک آیا تو یہاں دنیا بھر کے لوگوں اور زبانوں سے پالا پڑھا۔ جس سکول میں یہاں کی مقامی زبان سیکھی، وہاں پہلی بار سکھوں اور ہندوؤں سے پالا پڑا۔ یہاں کی مقامی زبان "ڈینش" سیکھنے کا اتنا فائدہ ضرور ہوا کہ سکنڈے نیویا کی دیگر دونوں زبانوں یعنی "سویڈش اور نارویجن" سے بھی واقفیت پیدا ہوئی۔

شمالی یورپ کی یہ تینوں جرمینک زبانیں، تحریری صورت میں ہوں تو سمجھ آ جاتی ہے لیکن تلفظ بڑا مختلف ہے۔ دلچسپ بات یہ ہے کہ "نارویجن زبان" کا "سویڈش زبان" سے تلفظ ملتا ہے لیکن تحریری طور پر وہ "ڈینش زبان" کے زیادہ قریب ہے۔ خود ڈینش زبان کا تلفظ ان میں ایسے ہی منفرد ہے جیسے رومن زبانوں میں "فرانسیسی زبان" کا ہے حالانکہ اسی فیصد تک اس زبان کی "اطالوی" اور "ہسپانوی" زبانوں سے مماثلت ہے۔

سکول میں انگلش کے علاوہ ابتدائی "جرمن زبان" سیکھنے کا موقع بھی ملا جبکہ اپنی اردو دانی کی وجہ سے "فارسی" اور "عربی" کی تحریروں کی بڑی حد تک سمجھ آجاتی ہے۔ اصل میں بچپن میں مسجد میں "عربی قاعدہ" پہلا مواد تھا جو پڑھا۔ قرآن مجید، پہلی کتاب تھی جو پڑھی جبکہ پنجابی زبان کے عظیم صوفی شاعر میاں محمدبخشؒ کا لافانی کلام "سیف الملوک"، دوسری کتاب تھی جو پڑھنے کا موقع ملا تھا۔

1980 کی دھائی میں علم لسانیات سے میرا شوق اس حد تک بڑھ گیا تھا کہ پاکستان سے ہر زبان کی لغات منگوائیں۔ اس دوران بھارتی فلموں کی مدد سے دیوناگری اور گورمکھی سے واقفیت پیدا ہوئی۔ اپنے کاروبار کے سلسلے میں اکثر انڈین دوستوں سے رابطہ رہتا ہے، وہ اپنی طرف سے "ہندی" بولتے ہیں جبکہ میں ان سے "اردو" میں بات کرتا ہوں لیکن اصل میں ہم "ہندوستانی زبان" میں بات کررہے ہوتے ہیں۔

آج صورتحال یہ ہے کہ میرا روزانہ چار زبانوں سے پالا پڑتا ہے۔ "پنجابی"، روزمرہ بول چال کی زبان ہے لیکن اپنے بچوں اور مقامی لوگوں سے "ڈینش" میں بات کرنا پڑتی ہے۔ "اردو"، لکھنے پڑھنے اور "اجنبی پاکستانیوں" سے رابطہ کی زبان ہے جبکہ غیرملکیوں سے بات چیت کے لیے "انگریزی" کا استعمال ہوتا ہے۔

"پاکستان کا یہ لسانی ڈیٹابیس"، اپنی نانی اماں مرحومہ کے نام کرتا ہوں جو بڑی عجیب و غریب پنجابی بولتی تھیں کیونکہ ان کا تعلق بھارت کی جنوبی ریاست کیرالہ سے تھا اور غالباً ملیالم، ان کی مادری زبان تھی۔ وہ بڑے فخر سے بتایا کرتی تھیں کہ ان کا تعلق برصغیر میں آنے والے پہلے پہلے مسلمانوں کی عرب نسل سے تھا۔ دوسری جنگِ عظیم کے دوران میرے نانا مرحوم سے شادی کرکے ہمیشہ کے لیے پنجاب کی ہوکر رہ گئی تھیں۔