"کشمیری" (Kashmiri)، پاکستان کے آزاد کشمیر میں پانچ فیصد افراد کی مادری زبان ہے۔

"ہندآریائی" (Indo-Aryan) زبانوں کے "داردک گروپ" میں سب سے زیادہ بولی جانے والی زبان، بھارت کے زیرِقبضہ وادیِ کشمیر میں "کشمیری" یا "کاشر زبان" کہلاتی ہے جو پاکستان کے زیرِانتظام آزاد کشمیر کی نیلم وادی میں قریباً بیس فیصد افراد بولتے ہیں۔ مظفرآباد میں صرف پندرہ فیصد افراد کی مادری زبان کشمیری ہے جبکہ آزاد کشمیر کی مجموعی طور پر 85 فیصد اکثریتی آبادی، پنجابی زبان کی بولیاں، "پوٹھواری، پہاڑی اور میرپوری" وغیرہ بولتی ہے۔

2023ء کی مردم شماری کے مطابق، پاکستان میں کشمیری زبان بولنے والوں کی کل تعداد 274.000 ہزار ہے جو مجموعی طور پر 68 لاکھ کشمیری بولنے والوں کا صرف 4 فیصد بنتا ہے۔

بھارت میں 2020ء سے کشمیری زبان کو ہندی، اردو، انگریزی اور ڈوگری کے ساتھ ریاست جموں و کشمیر کی سرکاری زبانیں بنایا گیا تھا اور یہ بھارت کی 22 شیڈول زبانوں میں سے ایک ہے۔ "پوگلی" اور" کشتواڑی"، دیگر بولیاں ہیں۔

کشمیری رسم الخط

"کشمیری زبان" کو پہلی بار 8ویں صدی میں "شاردا" نامی رسم الخط میں لکھا گیا جس کو آج بھی ہندو کشمیری پنڈت اپنے مذہبی استعمال میں لاتے ہیں جبکہ عام طور پر "کشمیری زبان" کو دیوناگری رسم الخط میں لکھا جاتا تھا۔ 14ویں صدی میں اسلام کے پھیلاؤ سے عربی/فارسی رسم الخط کی اجارہ داری قائم ہوئی جو آج بھی قائم ہے۔

کشمیری طرزِ تحریر کی ایک خصوصیت یہ بھی ہے کہ یہ مختلف لازمی اعراب (Wovels) کے ساتھ لکھی جاتی ہے جو عام طور پر دیگر "ابجد رسم الخطوط" یعنی عربی، فارسی اور اردو وغیرہ میں لکھنا ضروری نہیں ہوتا۔

"کھوار" یا "چترالی زبان" (Khowar)، "ہند آریائی" (Indo-Aryan) زبانوں کے "گندھارا یا داردک گروپ" سے تعلق رکھتی ہے جو پاکستان کے انتہائی شمال میں صوبہ خیبرپختونخواہ کے مالاکنڈ ڈویژن میں ضلع چترال کے علاوہ گلگت و بلتستان اور بالائی سوات میں بھی بولی جاتی ہے۔

کھوار کی تاریخ

چترال کی تاریخ

کھوار زبان کا حروفِ تہجی

"کھوار زبان" کی اپنی مخصوص حروفِ تہجی 1970 کی دھائی میں تشکیل پائی جس میں 42 حروف پر اتفاق کیا گیا لیکن حروفِ تہجی کی ویب سائٹ omniglot.com پر "کھوار" زبان کے حروف کی تعداد کہیں زیادہ درج ہے۔ 2009ء میں "کھوار زبان" کو ڈیجیٹل کیا گیا۔

کھوار حروفِ تہجی

"کلاشا یا کلاش ور" (Kalasha)، وادی کالاش میں آباد کالاش قبیلے کی زبان ہے جو معدومی کے خطرے سے دوچار ہے۔

"ہندآریائی" (Indo-Aryan) زبانوں میں "داردک زبانوں" کے گروپ سے تعلق رکھنے والی "کلاشہ زبان"، پاکستان کے شمالی ضلع چترال کے جنوب مغرب میں افغانستان کی سرحد کے قریب واقع وادی کالاش میں بولی جاتی ہے۔ اس پر مقامی "کھوار" اور افغانستان کی "نورستانی" زبانوں کے گہرے اثرات ملتے ہیں۔

"وادی کالاش" کو غلطی سے "وادی کیلاش" بھی لکھا جاتا ہے جبکہ اس علاقے کو "کافرستان" بھی کہتے تھے۔

2023ء کی مردم شماری کے مطابق، پاکستان میں کالاشہ زبان بولنے والوں کی کل تعداد 7.466 تھی۔

"دمیلی زبان" (Dameli) کا تعلق "ہند آریائی" (Indo-Aryan) زبانوں میں "داردک گروپ" سے ہے جو صوبہ خیبر پختونخواہ کے انتہائی شمال میں واقع وادی چترال کے جنوب میں دریائے چترال (یا کنڑ) کے پاس دروش اور ارند ندی کی وادی دومیل میں چھ ہزار کے قریب افراد بولتے ہیں۔

"دمیلی زبان" کو "دمیا باشا"، "گدوجی" اور "گدوجو" بھی کہا جاتا ہے۔ معدومی کے خطرے سے دوچار اس زبان کے بولنے والے اب زیادہ تر پشتو یا کھوار زبانیں بولنے لگے ہیں۔

"گواربتی" (Gawar-Bati)، "ہندآریائی" (Indo-Aryan) زبانوں میں "دادری گروپ" سے تعلق رکھتی ہے جس کو "نورستانی، کوہستانی، گواری، نریساتی، آرندوئ وار اور ساتر" بھی کہا جاتا ہے۔

"گواربتی زبان"، افغانستان کے صوبہ کنار اور پاکستان کے صوبہ خیبرپختونخواہ کے شمالی ضلع چترال کی وادی آرندو میں بولی جاتی ہے۔ اس زبان میں 35 ہزار الفاظ پر مشتمل لغت کے علاوہ قرآن مجید کا ترجمہ بھی ہوا ہے۔ علاوہ ازیں، لوک ادب اور شعری اصناف بھی موجود ہیں۔ اس زبان میں ابتدائی قاعدہ اور مجموعہ الفاظ کی ایک کتاب بھی شائع ہو چکی ہے۔ یہ زبان بھی معدومی کے خطرے سے دوچار ہے۔

"کوہستانی، انڈس کوہستانی یا آباسین کوہستانی" (Kohistani)، صوبہ خیبرپختونخواہ کے شمالی ضلع لوئر اور اپر کوہستان کے دریائے سندھ کے مغربی کنارے میں بولی جاتی ہے۔

"ہند آریائی" (Indo-Aryan) زبانوں کے "گندھارا یا داردک گروپ" سے تعلق رکھنے والی یہ زبان گلگت کی "شینا"، چترال کی "کھوار" اور صوبہ خیبرپختونخواہ کی دیگر دو زبانوں "گاوری" اور "توروالی" کی ہمسایہ زبان ہے جو وادی دبیر اور کانڈیا میں بولی جاتی ہے۔ پتن بڑا شہر ہے۔

2023ء کی مردم شماری کے مطابق، پاکستان میں کوہستانی زبان بولنے والوں کی کل تعداد دس لاکھ 30 ہزار ہے۔

"کوہستانی زبان" میں قرآن مجید کا ترجمہ ہو چکا ہے جبکہ ایک لغت کے علاوہ ایک قاعدہ بھی شائع ہوا ہے۔ روایتی لوک ادب اور شاعری کے علاوہ ریڈیو پروگرام بھی نشر ہوتے ہیں۔

کوہستانی زبان کا حروفِ تہجی

"توروالی زبان" (Torwali)، وادی سوات کے وسطی علاقہ میں بولی جانے والی ایک قدیم زبان ہے۔۔!

توروالی حروفِ تہجی

"ہند آریائی" (Indo-Aryan) زبانوں کے "دردستانی گروپ" سے تعلق رکھنے والی "توروالی" زبان، "بحرین کوہستانی" کے نام سے بھی جانی جاتی ہے۔ "کوہستانی" اور "کالامی" زبانوں کے ساتھ گہرا رشتہ ہے۔ شمالی پاکستان میں مدائن کے شمال میں دریائے سوات کے مقام بحرین اور چیل کے علاقوں میں مقامی طور پر بولی جاتی ہے۔

صوبہ خیبرپختونخواہ کے علاقہ کوہستان کی یہ علاقائی زبان "توروالی"، بارہ سو قبل مسیح کی گندھارا تہذیب کی نشانی ہے جس کو محفوظ رکھنے کی کوشش کی جارہی ہے لیکن معدومی کے خطرے سے دوچار ہے۔

توروالی کا حروفِ تہجی

"گاوری" (Gawri)، وادی سوات کی ایک زبان ہے جو "کالامی کوہستانی" بھی کہلاتی ہے۔

"ہند آریائی" (Indo-Aryan) زبانوں کے خاندان میں "داردک" زبانوں کے کوہستانی سلسلے کی ایک زبان ہے جو صوبہ خیبر پختونخواہ میں ضلع سوات اور دیر کے علاقوں میں دریائے پنجکوڑہ کی بالائی وادی میں بولی جاتی ہے۔ "کالامی، بشکریک، دیری، دیروالی، داردو اور کوہستانی" وغیرہ کے ناموں سے بھی پہچانی جاتی ہے۔ "دشوا، تھل، لاموتی، اوشو، کالام اور راجکوٹی"، مختلف لہجے یا بولیاں ہیں۔

پاکستان کے شمالی پہاڑی علاقوں کی تیس کے قریب زبانوں میں سے "توروالی"، "انڈس کوہستانی"، "باتری"، "چلیسو" اور "گاورو" زبانوں کے گروہ سے ملتی ہے۔

"گاوری زبان" بھی پشتو کی طرح کا حروفِ تہجی استعمال کرتی ہے۔ یہ زبان بھی معدومی کے خطرے سے دوچار ہے۔

"بٹیری زبان" (Bateri)، ضلع کوہستان کے جنوبی علاقے میں دریائے سندھ کے مشرقی کنارے تحصیل بٹیرا میں بولی جاتی ہے۔۔!

"ہندآریائی" (Indo-Aryan) زبانوں کے گروپ سے تعلق رکھنے والی "بٹیری زبان"، 2017ء کی مردم شماری کے مطابق اندازاً 15 ہزار افراد کی مادری زبان ہے جو لکھی پڑھی نہیں جاتی تا ہم روایتی لوک ادب اور بعض لوک شعری اصناف پائی جاتی ہیں۔ بشام کے تجارتی مرکز کی وجہ سے پشتو کے ساتھ رابطہ زیادہ ہے۔ "بٹیری زبان"، "شینا کوہستانی" کی ہمسایہ زبان ہے۔

"بٹیری زبان" کے بولنے والوں کی ایک محدود تعداد جموں کشمیر میں بھی پائی جاتی ہے۔

"گوورو زبان" (Gowro) کو "گابرخیل" بھی کہا جاتا ہے اور یہ ایک کوہستانی زبان ہے جو معدومی کے خطرے سے دوچار ہے۔۔!

"ہند آریائی" (Indo-Aryan) زبانوں کے داردک گروپ سے تعلق رکھنے والی "گوورو زبان"، صوبہ خیبرپختونخواہ میں کوہستان کے علاقے میں دریائے سندھ کے مشرقی کنارے پہ واقع گاؤں مہرین میں بولی جاتی ہے۔

Ethnologue کے مطابق "گوورو زبان" بولنے والوں کی تعداد ایک ہزار سے بھی کم ہے۔

چلیسو (Chilisso)، دادرک زبانوں میں کوہستان کے علاقے میں بولی جانے ایک زبان ہے جو معدومی کے خطرے سے دوچار ہے۔

شمالی خیبرپختونخواہ میں کوہستان میں وادی کولئی اور جلکوٹ کے علاقوں میں بولی جانے والی "چلیسو" زبان، چند ہزار افراد کی زبان ہے جس پر "شینا کوہستانی" کا گہرا اثر ہے۔

تھل لمینتی (Thall Lamenti)، صوبہ خیبرپختونخواہ کے علاقے کوہستان میں بولی جاتی ہے اور معدومی کے خطرے سے دوچار ہے۔

یہ سابقہ ریاست دیر میں بولی جاتی تھی اور اس کو "دیروالی" بھی کہتے تھے۔

"کام ویری" (Komviri)، ضلع دیر کے مغرب میں افغانستان سے ملحق وادی بازگل میں بولی جاتی ہے۔

"ہند ایرانی"(Indo-Iranian) زبانوں کے گروپ سے تعلق رکھنے والی صوبہ خیبرپختونخواہ میں دو ہزار کے قریب افراد کی یہ زبان ایک وادی تک محدود ہے جو پاکستان کے شمالی علاقے میں افغانستان کے صوبہ نورستان میں واقع ہے۔ یہ زبان "کام دیشی کامک، لمرت ویری ور شیخانی" کے ناموں سے بھی جانی جاتی ہے۔

"کاٹی یا شیخانی زبان" (Kati)، "ہند ایرانی" (Indo-Iranian) زبانوں کے نورستانی گروپ سے تعلق رکھتی ہے جو کوہِ ہندوکش میں افغانستان کے صوبہ نورستان سے ملحق پاکستان کے ضلع چترال کے علاقوں میں "کاتا ، کوم ، مومو، کشتو" اور کچھ چھوٹے سیاہ پوش قبائل بولتے ہیں۔

"سیاہ پوش کافری اور بشگالی" اس کے دیگر نام ہیں جبکہ "کاتاواری" اور "کامویری" اس کی دیگر بولیاں ہیں۔ یہ زبان بھی معدومی کے خطرے سے دوچار ہے۔

ارسونی وار (Arsoniwar) زبان، چترال کی وادی دروش میں بولی جاتی ہے جو بمشکل دو سو کے قریب لوگ بولتے ہیں اور معدومی کے خطرے سے دوچار ہے۔

بشگالی وار (Bashgaliwar)، صوبہ خیبرپختونخواہ کے ضلع چترال کی بشگال وادی میں بولی جاتی ہے جو معدومی کے خطرے سے دوچار ہے۔