"سرائیکی" (Saraiki) کو 1981ء کی مردم شماری میں پہلی بار ایک الگ زبان کے طور پر شمار کیا گیا جو اصل میں پنجابی زبان کی چار بولیوں، "ملتانی، ریاستی، ڈیری اور تھلوچی" کا مشترکہ نام ہے۔

"ہندآریائی" (Indo-Aryan)  زبانوں میں "شمال مغربی پنجابی لہندا" گروپ کی یہ "زبان"، جنوبی پنجاب کے علاوہ خیبرپختونخواہ، سندھ اور بلوچستان کے علاقوں میں بھی بولی جاتی ہے۔

2023ء کی مردم شماری کے مطابق، پاکستان میں سرائیکی بولنے والوں کی تعداد دو کروڑ 88 لاکھ ہے۔ یہ "پنجابی، پشتو اور سندھی" کے بعد چوتھی بڑی مادری زبان ہے جو پاکستان کی کل آبادی کا 12 فیصد بنتا ہے۔

صوبہ پنجاب کا ہر پانچواں شخص، سرائیکی بولتا ہے۔ جنوبی پنجاب میں بالترتیب مظفرگڑھ، ڈیرہ غازیخان، بھکر، میانوالی، راجن پور، لودھراں، بہاولپور، لیہ، رحیم یار خان اور ملتان، وہ دس اضلاع ہیں جہاں سرائیکی بولنے والوں کی اکثریت ہے۔ صوبہ خیبرپختونخواہ میں ڈیرہ اسماعیل خان بھی سرائیکی اکثریت کا ضلع ہے۔

کیا سرائیکی اور پنجابی دو مختلف زبانیں ہیں؟

سرائیکی بھی ہندی/اردو، پنجابی، سندھی اور گجراتی کی طرح وادی سندھ کی پانچ ہزار سالہ پرانی تہذیب کی حدود میں آتی ہے، اسی لیے ان سبھی زبانوں میں بڑا گہرا تاریخی اور لسانی تعلق پایا جاتا ہے۔

پانچ دریاؤں کی سرزمین "پنجاب" کے علاقوں میں بولی جانے والی سبھی زبانیں/بولیاں/لہجے، "پنجابی زبان" ہی ہیں اور یہ تقسیم صرف اور صرف سیاسی بنیادوں پر قائم کی گئی ہے۔ "سرائیکی" بولنے والوں کو پنجابی زبان (جو اصل میں "ماجھی بولی" کو کہا جاتا ہے) سے الگ کیا گیا ہے حالانکہ دونوں "زبانیں/بولیاں/لہجے" جاننے والے بغیر کسی ترجمان کے ایک دوسرے کو بخوبی سمجھ لیتے ہیں، صرف لہجے کا فرق ہے یا متعدد الفاظ مختلف ہیں جو دنیا کی ہر زبان اور ہر علاقے میں پائے جاتے ہیں۔

"سرائیکی" کے علاوہ "ہندکو" اور "ڈوگری" کو الگ زبانیں قرار دینے کا یہ فائدہ ضرور ہوا ہے کہ ہر پنجابی، بغیر کسی محنت کے چار زبانیں جانتا ہے یعنی پنجابی، سرائیکی، ہندکو اور ڈوگری۔ "اردو" اور "انگلش" اضافی خوبیاں ہیں۔

سرائیکی زبان کے اہم سنگِ میل

سرائیکی میں قرآنِ مجید کا پہلا ترجمہ 1930ء میں شائع ہوا تھا۔ لغت، گرامر، حروفِ تہجی، شعر و ادب، کتب، اخبارات و جرائد، ریڈیو اور ٹی وی کے علاوہ سرائیکی میں فلمیں بھی بنی ہیں۔ ایسوسی ایٹڈ پریس آف پاکستان کی ویب سائٹ کا ایک سرائیکی ورژن بھی موجود ہے۔

سرائیکی خطے کے سب سے بڑے شاعر خواجہ غلام فریدؒ (1901-1845ء) تھے جو کوٹ مٹھن، بہاولپور میں پیدا ہوئے تھے۔

اسلامیہ یونیورسٹی بہاولپور میں 1989ء اور بہاؤالدین زکریا یونیورسٹی ملتان 2006ء میں سرائیکی شعبہ قائم ہوا۔ گومل یونیورسٹی ڈیرہ اسماعیل خان اور اسلام آباد کی علامہ اقبال اوپن یونیورسٹی میں بھی ڈگری کی سطح پر سرائیکی پڑھائی جاتی ہے۔

سرائیکی حروفِ تہجی

سرائیکی حروفِ تہجی کی تشکیل 1970 کی دھائی میں ہوئی۔ اس میں کل 44 حروف ہیں جن میں پنجابی/سرائیکی کی مخصوص آوازوں یعنی "بھ، جھ، ڈھ اور گھ" کو بالترتیب "ب، ج، ڈ اور گ" کے نیچے دو دو نقطے ڈال کر بنایا گیا ہے۔

پنجابی زبان میں "دھ" کی بھی مخصوص آواز ہے جو سرائیکی کے حروفِ ہجا میں نہیں ملتی البتہ "ن" میں ایک "ط" ڈال کر "ن اور ڑ" کی مشترکہ آواز بنائی گئی ہے جو پنجاب کے دیہاتی علاقوں میں مثلاً "کنک" میں بولی جاتی ہے جس کا مطلب "گندم" ہے۔ ایسی آواز "ل" میں بھی ملتی ہے لیکن اس پٹی میں نہیں ہے۔ عام طور پر سرائیکی لہجے میں بھاری "ڈ" کا استعمال بہت ہوتا ہے۔

عربی/فارسی/اردو/پنجابی/سندھی/پشتو/بلوچی/سرائیکی حروفِ تہجی پر تفصیلی ویب سائٹ میں "الف سے یے تک"، ہر حرف کی تاریخ، تشکیل، تلفظ اور دیگر دلچسپ معلومات محفوظ کی گئی ہیں۔

سرائیکی بولیاں/لہجے

سرائیکی زبان کو جنوبی پنجاب کی چار بولیوں، "ملتانی، ریاستی، ڈیری اور تھلوچی" کو ملا کر ایک زبان بنایا گیا ہے جبکہ ان بولیوں کے متعدد مقامی لہجے بھی ہیں۔ ان میں چولستانی کے علاوہ "کیتھرانی" لہجہ، بلوچستان میں بولا جاتا ہے جس کو ایک الگ زبان بھی سمجھا جاتا ہے۔

ان کے علاوہ "صوبہ سرائیکستان" کا مطالبہ کرنے والے سیاسی اور معاشی طور پر احساسِ محرومی کے شکار منفی ذہن کے لوگ، پنجاب کے "شاہ پوری" اور "جانگلی" بولنے والے علاقوں یعنی سرگودھا، خوشاب، چنیوٹ، جھنگ، ٹوبہ ٹیک سنگھ، خانیوال، وہاڑی، پاکپتن، ساہیوال اور اوکاڑہ کے اضلاع پر بھی اپنا حق جتاتے ہیں۔

ملتانی (Multani)، پنجابی زبان کی ایک بولی (dialect) تھی جو اب ایک الگ زبان "سرائیکی" کہلاتی ہے۔ "ہندکی" اور "چناوڑی" اس بولی کے دو لہجے ہیں۔

صوبہ پنجاب میں ملتان اور مظفرگڑھ کے علاقوں میں بولی جانے والی "ملتانی" کو دیگر تین بڑی بولیوں، "ریاستی"، "ڈیری" اور "تھلوچی" کے ساتھ ملا کر ایک نئی زبان "سرائیکی" کا نام دیا گیا جس کو 1981ء کی مردم شماری میں پہلی بار ایک الگ زبان کے طور پر شمار کیا گیا لیکن ماہرینِ لسانیات اس پر متفق نہیں ہیں۔

ریاستی یا بہاولپوری (Riasti)، پنجابی زبان کی ایک بولی (dialect) ہے جو اب ایک الگ زبان "سرائیکی" کے طور پر جانی جاتی ہے۔

صوبہ پنجاب کے جنوب میں واقع دریائے ہاکڑا کے نام پر "ہاکڑا" کہلانی والی ایک سابق ریاست، بہاولپور اور ضلع رحیم یار خان کے علاقوں میں بولی جانے والی "ریاستی/بہاولپوری" بولی، "جھنگوچی اور راجستھانی" بولیوں کے ملاپ سے بنی جس کو دیگر تین بڑی بولیوں، "ملتانی"، "ڈیری" اور "تھلوچی" کے ساتھ ملا کر ایک نئی زبان "سرائیکی" کا نام دیا گیا جس کو 1981ء کی مردم شماری میں پہلی بار ایک الگ زبان کے طور پر شمار کیا گیا جو ماہرینِ لسانیات کے لیے ایک متنازعہ فیصلہ ہے۔

تھلی یا تھلوچی (Thalli/Thalochi)، پنجابی زبان کی دیگر دو بولیوں، "جھنگوی" اور "شاہ پوری" کے ملاپ سے بنی۔ اس کو "جٹکی" بھی کہتے ہیں جبکہ "ملکی" اور "کاچھی"، اس کے دیگر لہجے ہیں۔

"تھلی یا تھلوچی"، دریائے سندھ کے مشرقی جانب، صحرائے تھل، بھکر، لیہ اور مظفر گڑھ کے علاوہ مغربی جانب صوبہ خیبر پختونخوا کے ڈیرہ اسماعیل خان، بنوں اور ٹانک کے اضلاع میں بولی جاتی ہے۔

1981ء کی مردم شماری میں "تھلی/تھلوچی" کو "ملتانی"، "ریاستی" اور "ڈیری" سے ملا کر ایک نئی زبان سرائیکی" کا حصہ بنا دیا گیا تھا۔

ڈیری یا ڈیرہ والی (Derawali)، پنجابی زبان کی دیگر بولیوں، "جھنگوی"، "شاہ پوری" اور "تھلوچی" کے ملاپ سے بنی۔ "پچھادی" اور "جغدالی"، اس بولی کے دو لہجے ہیں۔

"ڈیری"، دریائے سندھ کے مغربی جانب، ضلع ڈیرہ غازی خان اور راجن پور کے علاوہ صوبہ خیبر پختونخوا کے ڈیرہ اسماعیل خان میں بھی بولی جاتی ہے۔

1981ء کی مردم شماری میں "ڈیری" بولی اور "ملتانی"، "ریاستی" اور "تھلوچی" بولیوں کے مرکب سے "سرائیکی" زبان وجود میں آئی تھی۔

چولستانی (Cholistani)، پنجابی/سرائیکی کی ایک بولی ہے جو بہالپور کے صحرائے چولستان میں لاکھوں کی تعداد میں بولی جاتی ہے۔

"کیتھرانی" (Khetrani)، سرائیکی/پنجابی اور سندھی کے قریب ہے لیکن اس کو ایک الگ زبان بھی سمجھا جاتا ہے۔

صوبہ پنجاب کے ضلع ڈیرہ غازیخان اور راجن پور سے متصل بلوچستان کے مشرق میں کوہِ سلیمان کے علاقے میں واقع ضلع بارخان، موسیٰ خیل اور کوہلو کے علاقوں میں آباد کیتھرانی قبیلے کی بولی کو "بارزئی" اور "جعفراکی" بھی کہا جاتا ہے۔ گرامر، پنجابی/سرائیکی اور سندھی سے ملتی ہے لیکن اس کو ایک الگ زبان شمار کیا جاتا ہے۔

راٹھی/چولستانی (Rathi)، سرائیکی/پنجابی زبان کی ایک بولی ہے جو صحرائے چولستان کے علاقے میں بولی جاتی ہے۔ "جھنگوی" اور" مارواڑی" زبانوں کے انضمام سے وجود میں آئی۔

چنھاوڑی (Chenhawri)، پنجابی/سرائیکی زبان کی "ملتانی بولی" کا ایک لہجہ ہے جو ضلع مظفرگڑھ میں بولا جاتا ہے۔

ہندکی (Hindki)، پنجابی/سرائیکی زبان کی "ملتانی بولی" کا ایک لہجہ ہے جو ضلع مظفرگڑھ میں بولا جاتا ہے۔

پچھادی (Pachhadi)، پنجابی/سرائیکی زبان کی "ڈیری بولی" کا ایک لہجہ ہے جو ضلع ڈیرہ غازی خان میں بولا جاتا ہے۔

جغدالی (Jaghdali)، پنجابی/سرائیکی زبان کی "ڈیری بولی" کا ایک لہجہ ہے جو ضلع ڈیرہ غازی خان میں بولا جاتا ہے۔

ملکی (Mulki)، پنجابی/سرائیکی زبان کی "تھلوچی بولی" کا ایک لہجہ ہے جو ضلع میانوالی میں بولا جاتا ہے۔

کاچھی (Kachhi)، پنجابی/سرائیکی زبان کی "تھلوچی بولی" کا ایک لہجہ ہے جو ضلع میانوالی میں بولا جاتا ہے۔